Euskal Herriko Agintaritzaren Aldizkaria

105. zk., 2014ko ekainaren 5a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

GARAPENERAKO LANKIDETZAREN EUSKAL AGENTZIA

2476

EBAZPENA, 2014ko ekainaren 4koa, Garapenerako Lankidetzaren Euskal Agentziako zuzendariarena, zeinen bidez ebazten baita garapenerako lankidetzaren kargurako ekintza humanitarioetarako estrategia markoen finantziazio-lerroko laguntzak ematea.

Otsailaren 19ko 31/2008 Dekretuak arautzen ditu garapenerako lankidetzaren kargurako ekintza humanitarioetarako laguntzak, eta bi ekintza-mota bereizten ditu. Batetik, larrialdietarako laguntza-proiektuak, bizirautea bermatzeko eta hondamendien eraginpeko pertsonen sufrimendua arintzeko oinarrizko ondasun eta zerbitzuak urgentziaz ematera bideratuak, eta, bestetik, ekintza humanitarioko proiektuak, zentzu zabalagoan, zeinen ekintzek beharrizan-maila txikiagoa baitute eta zeinen helburua garapenerako, giza eskubideetarako eta bakea eraikitzeko oinarriak sustatzea baita.

Kanpo Harremanetarako idazkari nagusiaren 2014ko urtarrilaren 21eko Ebazpenaren bidez (2014ko urtarrilaren 31ko EHAA, 121. zk.), garapenerako lankidetzaren kontura ekintza humanitarioetarako 2014. urterako laguntzak iragarri ziren: 1.600.000 euro, finantziazio-lerro iraunkorrerako, eta 2.000.000 euro, ekintza humanitarioko estrategia markoen finantziazio-lerrorako (% 50, 2014. urtean ordaintzeko, eta beste % 50a, 2015. urtean).

Otsailaren 19ko 31/2008 Dekretuak arautzen ditu garapenerako lankidetzaren kontura ekintza humanitarioetarako laguntzak; bada, dekretu horren 28. eta 29. artikuluetan xedatutakoaren arabera, jasotako eskabideak baloratuko dira, eta puntuaziorik handiena lortu dutenak suertatuko dira onuradun, finantziazio-lerro honen zuzkidura agortu arte, betiere.

Aipatu dekretuaren 4. artikuluan xedatzen denez, laguntzen deialdia urtero iragarriko da Etxebizitza eta Gizarte Gaietako sailburuaren agindu baten bidez. Kasu honetan, Kanpo Harremanetarako Idazkaritza Nagusia da eskumen hori duen agintaritza, bi dekretu hauek aplikatuta: lehendakariaren 20/2012 Dekretua, abenduaren 15ekoa, Euskal Autonomia Erkidegoaren Administrazioko sailak sortu, ezabatu eta aldatu eta horien egitekoak eta jardun-arloak finkatzen dituena, eta 187/2013 Dekretua, apirilaren 9koa, Lehendakaritzaren egitura organikoa eta funtzionala ezartzen dituena. Laguntza horiek kudeatzea eta eman beharreko ebazpenak ematea, aldiz, Garapenerako Lankidetzaren Euskal Agentziaren zuzendariaren eskumena da.

Balorazio- eta instrukzio-prozesua amaitu eta gero, eta 2014ko maiatzaren 8an bildu zen Garapenerako Lankidetzaren Euskal Agentziaren artezkaritza-kontseiluaren proposamenez, hau

EBAZTEN DUT:

Lehenengoa.– Otsailaren 19ko 31/2008 Dekretuan araututako eta Kanpo Harremanetarako Idazkaritza Nagusiaren 2014ko urtarrilaren 21eko Ebazpenaren bidez iragarritako estrategia markoen finantziazio-lerroko laguntzak ematea ebazpen honen I. eranskinean jasotako erakundeei; bertan adierazten dira zenbatekoak eta baldintzak.

Bigarrena.– II. eranskinean ageri diren eskabideak ezestea, aurrekontu-kreditu eskasiagatik.

Hirugarrena.– III. eranskinean jasotako eskabideak deialditik kanpo uztea, bertan zehazten diren arrazoiak tarteko.

Ebazpen honek ez dio amaiera ematen administrazio-bideari, eta, beraren aurka, gora jotzeko errekurtsoa aurkeztu ahal izango zaio Garapenerako Lankidetzaren Euskal Agentziako lehendakariari, hilabeteko epean, ebazpena Euskal Herriko Agintaritzaren Aldizkarian argitaratu eta hurrengo egunetik aurrera. Gora jotzeko errekurtsoa jarri eta hiru hilabete igaro ondoren ebazpenik eman ez bada, ezetsi egin dela ulertuko da, eta administrazioarekiko auzietako bidea zabalik geratuko da.

Vitoria-Gasteiz, 2014ko ekainaren 4a.

Garapenerako Lankidetzaren Euskal Agentziako zuzendaria,

PAUL ORTEGA ETCHEVERRY.

(Ikus .PDF)

(Ikus .PDF)

(Ikus .PDF)

Azterketa dokumentala