Euskal Herriko Agintaritzaren Aldizkaria

100. zk., 2014ko maiatzaren 29a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

BILBOKO LEHEN AUZIALDIKO 5 ZENBAKIKO EPAITEGIA

2375

EDIKTUA, seme-alaba adingabeentzako neurrietarako 817/13 prozeduraren ondoriozkoa.

JAKINARAZPEN-ZEDULA

Bilboko Lehen Auzialdiko 5 zenbakiko Epaitegian (Bizkaia) jarraitutako 817/13 prozeduran epaia eman da (ezkontzaz kanpoko seme-alabenganako neurriak). Eva Maria Mena Sierra andreak sustatu du prozedura, Dubairo Sow jaunaren aurka. Hona hemen epai horren idazpurua eta epaitza:

120/14 EPAIA

Epailea: Francisco Javier Osa Fernandez jauna.

Lekua: Bilbao (Bizkaia).

Eguna: bi mila eta hamalauko martxoaren hogeia.

Alderdi demandatzailea: Eva Maria Mena Sierra.

Abokatua: Maria Angeles Minguito Ferreiro.

Prokuradorea: Ana Bregel Orella.

Alderdi demandatua: Dubairo Sow.

Abokatua.

Prokuradorea.

Judizioaren gaia: seme-alaba adingabeentzako neurriak.

EPAITZA

Partez baiesten dut Eva María Mena Sierra andreak Dubairo Sow jaunaren aurka aurkeztu duen demanda. Horiek horrela, seme-alaba adingabeak direla-eta, neurri hauek hartzea erabaki dut:

1.– Seme-alaba adingabeen zaintza eta jagoletza amari esleitzen zaizkio, eta adingabeen gaineko guraso-ahalari dagozkion ahalmenak, halaber, amak bakarrik izango ditu.

2.– Aitak eta seme-alaba adingabeekin komunikatu ahal izango du, eta beraiekin egon, bi gurasoek askatasunez erabakitzen duten moduan.

3.– Bi seme-alaba adingabeen mantenu gisa, aitak 200 euro ordainduko dizkio hilero amari (100 euro seme-alaba bakoitzeko). Aurreratuta eta hil bakoitzaren lehenengo bost egunen barruan ordainduko ditu, amak izendatzen duen kontuan dirua sartuz; zenbateko hori urtero eguneratuko da, urtarrilaren 1etik aurrerako ondorioekin, Estatistikako Institutu Nazionalak edo hori ordezkatzen duen erakundeak estatu osorako argitaratutako kontsumoko prezioen indizearen arabera, oinarritzat justu aurreko urtea hartuz. Ordainketa egin ezean, legezko neurriak hartuko dira.

4.– Prozesuko izapide honetan ez da beste neurririk hartuko.

Prozedura hau izapidetzerakoan sortutako prozesu-kostuak ez zaizkio inori ezartzen.

Aurkaratzeko modua: Bizkaiko Probintzia Auzitegian aurkeztutako apelazio-errekurtsoaren bidez (PZLb, 455. artikulua). Errekurtsoa egiteko, idazkia aurkeztu behar da epaitegi honetan, hogei egun balioduneko epean, jakinarazpena egin eta biharamunetik aurrera. Idazki horretan, bestalde, honako hauek adieraziko dira: aurkaratzea zein alegaziotan oinarritzen den, apelatutako ebazpena eta zein erabaki aurkaratzen diren (PZLb, 458.2 artikulua).

Errekurtsoa jarri ahal izateko, 50 euroko gordailua eratu beharko da, eta, baldintza hori bete ezean, ez da hura izapidetzea onartuko. Gordailua egiteko, zenbateko hori zainpean jarri beharko da epaitegi honek Banco Santanderren duen Gordailuan eta Zainpean jartzeko Kontuan. Kontuaren zenbakia hauxe da: 4709. Ordainagiriaren kontzeptua idazteko hutsunean, «errekurtsoa» dela adierazi beharko da (kodea: 02-Apelazioa). Diru-kopuru hori zainpean utzi izana egiaztatu egin beharko da errekurtsoa aurkeztean (BJLOko 15. xedapen gehigarria).

Errekurtsoa jartzeko gordailua eratzetik salbuetsita daude aipatutako xedapenaren 5. paragrafoan aipatzen direnak eta doako laguntza juridikorako eskubidea aitortua dutenak.

Dubairo Sow demandatuari behar bezala jakinarazteko eman eta sinatzen dut ediktu hau, Bilbon (Bizkaia), bi mila eta hamalauko maiatzaren hamahiruan.

IDAZKARIA.

Azterketa dokumentala