RSS
240. zk., 2012ko abenduaren 13a, osteguna
- Bestelako formatuak:
- PDF (167 KB - 2 orri.)
- EPUB (97 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
JUSTIZIA ADMINISTRAZIOA
BILBOKO LEHEN AUZIALDIKO 5 ZENBAKIKO EPAITEGIA
5568
EDIKTUA, ezkontzaz kanpoko seme-alabentzako neurrietarako 93/11 prozeduraren ondoriozkoa.
JAKINARAZPEN-ZEDULA
Bilboko Lehen Auzialdiko 5 zenbakiko Epaitegian (Bizkaia), seme-alabenganako neurrietarako ezkontzaz kanpoko L2 93/11 prozedura bideratu da, Alimato Baldek eskatuta, TIT.IV-VII L1 CC delakoaren gainean eta Ricardo Correia Junior-en aurka. Prozedura horren gainean epaia eman da. Hona hemen idazpurua eta epaitza, hitzez hitz:
293/12 EPAIA
Epailea: Francisco Javier Osa Fernandez.
Lekua: Bilbao (Bizkaia).
Eguna: bi mila eta hamabiko ekainaren zazpia.
Alderdi demandatzailea: Alimato Balde.
Abokatua: Maria Fernandez Prieto.
Prokuradorea: Jacobo Belmonte Garcia.
Alderdi demandatua: Ricardo Correia Junior.
Abokatua.
Prokuradorea.
Judizioaren gaia: seme-alaba adingabeenganako neurriak.
EPAITZA
Zati batean baietsi dut Jacobo Belmonte García prokuradoreak Alimato Balderen izenean eta ordez aurkeztu duen demanda, Ricardo Correia Junior-en kontrakoa –demandatua auzi-ihesean da–. Horiek horrela, neurri hauek erabaki ditut:
1.– Alaba adingabeen zaintza eta jagoletza amari esleitzen zaizkio, eta adingabeon gaineko guraso-ahalaz baliatzea ere amari emango zaio, esklusiboki.
2.– Aitak alabak bisitatzeko erregimen gutxienekorik ez da ezartzen, hargatik eragotzi gabe parteek libreki adostu dezaketena.
3.– Aitak unean-unean –lana, subsidioa, langabezi-saria edo laguntza sozialak direla medio– dauzkan diru-sarreren % 35 ordaindu behar dio amari, alaba adingabeen mantenu modura. Nolanahi ere, hilero ordaindu beharko duen gutxieneko zenbatekoa 300 euro izango da. Aurreratuta eta hil bakoitzaren lehenengo bost egunen barruan ordainduko du, auzi-jartzaileak izendatzen duen kontuan dirua sartuz; zenbateko hori urtero urtarrilean eguneratu beharko da, Estatistikako Institutu Nazionalak edo hori ordezkatzen duen erakundeak argitaratutako KPIaren arabera, oinarritzat justu aurreko hamabi hilabeteak hartuz. Ordainketa egin ezean, legezko neurriak hartuko dira.
4.– Gurasoek erdibana ordainduko dituzte alaba adingabekoen ohiz kanpoko gastuak. Halakotzat joko dira mediku-, farmazia-, optika-, odontologia-zerbitzuek sortutako gastuak, eta Gizarte Segurantzak edo mediku-aseguru pribatu batek bere gain hartzen ez dituen gainerako medikuntza-gastuak. Halakotzat joko dira, orobat, irakasle edo tutoreek gomendatuta, ikasketa-prozesuaren indargarri eta lagungarri alabek jaso behar dituzten eskola-orduak. Gainerako gastuak –aisialdiak edo eskolak eragindakoak baina premiazkoak ez direnak, eta guraso biek erabakitakoak ez badira–, egitea erabaki duenak ordaindu beharko ditu, gasturik egin bada behintzat. Nolanahi ere, bi gurasoek aho batez hartutako erabakia izan bada, erdibana ordainduko dituzte.
5.– Prozesuko izapide honetan ez da bestelako neurririk hartuko.
Prozedura hau izapidetzerakoan sortutako prozesu-kostuak ez zaizkio inori ezartzen.
Aurkaratzeko modua: Bizkaiko Probintzia Auzitegian apelazio-errekurtsoa jarrita (PZLb 455. artikulua). Errekurtsoa prestatzeko, idazkia aurkeztu behar da epaitegi honetan, ebazpena jakinarazi eta biharamunetik aurrera hogei egun balioduneko epean. Idazki horretan, bestalde, honako hauek adieraziko dira: inpugnazioa zein alegaziotan oinarritzen den, eta apelatutako ebazpena eta aurkaratutako erabakia zein diren (PZLb, 458.2 artikulua).
Errekurtsoa aurkeztu ahal izateko, 50 euroko gordailua jarri beharko da, eta baldintza hori bete ezean ez da hura izapidetzea onartuko. Gordailua egiteko, zenbateko hori zainpean jarri beharko da, epaitegi honek Banesto taldean (Banco Español de Crédito) duen Gordailuan eta Zainpean jartzeko Kontuan. Kontuaren zenbakia hau da: 4709. Dirua sartu izanaren agirian, kontzeptua idazteko hutsunean, «Errekurtsoa» dela adierazi beharko da (kodea: 02-Apelazioa). Diru-kopuru hori zainpean utzi izana egiaztatu egin beharko da errekurtsoa aurkeztean (BJLO, 15. xedapen gehigarria).
Errekurtsoa jartzeko gordailua eratzetik salbuetsita daude aipatutako xedapenaren 5. paragrafoan aipatzen direnak eta doako laguntza juridikorako eskubidea aitortua dutenak.
Eta epai honen bidez erabaki, agindu eta sinatzen dut.
Ricardo Correia Junior demandatuari behar bezalako jakinarazpena egiteko balio dezan, ematen eta sinatzen dut idazki hau, Bilbon (Bizkaia), bi mila eta hamabiko ekainaren zortzian.
IDAZKARIA.
