Euskal Herriko Agintaritzaren Aldizkaria

247. zk., 2011ko abenduaren 30a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

Industria, Berrikuntza, Merkataritza eta Turismo Saila

6355

EBAZPENA, 2011ko azaroaren 30ekoa, Berrikuntza eta Teknologiako sailburuordearena; honen bitartez, oinarri zientifikoa eta teknologikoa duten enpresak merkaturatzeko proiektuak egiteko NETs laguntza-programa arautzen duen 2008ko azaroaren 27ko Aginduan ezarritako esparruan 2012ko ekitaldirako laguntzak emateko deialdiaren berri ematen da.

Industria, Merkataritza eta Turismoko sailburuaren 2008ko azaroaren 29ko Aginduak (EHAA, 2008ko abenduaren 23koa), Industria, Berrikuntza, Merkataritza eta Turismoko sailburuaren 2009ko abenduaren 23ko Aginduak aldatuta, oinarri zientifiko eta teknologikoko enpresak garatzeko proiektuak egiteko laguntza-programa arautzen du (NETs programa).

Agindu horren 13. artikuluan ezarritakoarekin bat etorriz, bidezko da 2012ko ekitaldirako bertan finkaturiko laguntzetarako deialdia egitea, bai eta horretarako beharrezkoak diren arauak ematea ere.

Horrenbestez, agindu horren 13. artikuluan ezarritako eskumena erabilita, honako hau

XEDATZEN DUT:

1. artikulua.- Helburua.

1.- Oinarri zientifikoa eta teknologikoa duten enpresak merkaturatzeko proiektuak egiteko NETs laguntza-programa arautu zuen Industria, Merkataritza eta Turismoko sailburuaren 2008ko azaroaren 27ko Aginduan aurreikusitako laguntza-deialdia 2012. ekitaldirako egitea da ebazpen honen xedea. Agindu hori Industria, Berrikuntza, Merkataritza eta Turismoko sailburuaren 2009ko abenduaren 23ko Aginduaz aldatu zen.

2.- Programa hori finantzatzeko 4.000.000 euro daude, 2012ko ekitaldirako Euskal Autonomia Erkidegoko Aurrekontu Orokorretan horretarako ezarritako aurrekontu-kredituaren kargura.

Deialdi honen kontura emango diren diru-laguntzen guztizko bolumenak ez du gaindituko artikulu honetan ezarritako zenbatekoa edo, kasuan kasu, zenbateko hori handitzetik, betiere prozedura ebatzi baino lehen, ateratzen dena, indarreko legedian aurreikusitako kredituak lotzeko edo aurrekontuak aldatzeko erregimenari jarraiki. Horrelako egoerarik gertatuz gero, horren berri jakinarazi behar da Berrikuntza eta Teknologiako sailburuordearen ebazpen bidez. Bestetik ere, Eskualde Garapeneko Europako Funtsak (Feder) Nets programa hau finantzatzen lagundu du.

2. artikulua.- Eskakizunak.

Deialdiko laguntzak baliatzeko, Nets programa arautzen duen aginduaren 7. eta 8. artikuluetan ezarritako eskakizunak betetzen direla egiaztatu beharko da, proiektu eta onuradunei dagokienez.

3. artikulua.- Eskaerak eta epea.

1.- Eskaerak eta gainerako agiri osagarriak Industriaren Sustapen eta Eraldaketarako Sozietatea SAren (SPRI) bulegoetan -Urkixo zumarkalea, 36-4. solairua, Bilbao (Bizkaia Plaza Eraikina)- aurkeztu beharko dira, zuzenean edo Herri Administrazioen Araubide Juridikoaren eta Administrazio Prozedura Erkidearen Legean aurreikusitako edozein bitarteko erabilita, eta Interneteko https://www.spri.es/idi/idi helbidean ere bete ahalko dira.

2.- Eskabideak aurkezteko epea deialdia egiteko ebazpen hau Euskal Herriko Agintaritzaren Aldizkarian argitaratzen den egunaren biharamunean hasiko da eta 2012ko martxoaren 30ean bukatu.

XEDAPEN GEHIGARRIA

Ogasun eta Herri Administrazioko sailburuaren 2007ko apirilaren 26ko Aginduaren 5.3. artikuluaren bitartez, Euskal Autonomia Erkidegoko Aurrekontu Orokorren kargurako gastu-espedienteen aldez aurretiko izapideketa arautzen da. Bada, agindu horrekin bat etorriaz, ebazpen honetan aipatutako laguntzak emateko, kreditu egokia eta aski dena izan beharko da, Autonomia Erkidegoaren 2012ko ekitaldirako Aurrekontu Orokorretan.

AZKEN XEDAPENAK

Lehenengoa.- Agindu hau Euskal Herriko Agintaritzaren Aldizkarian argitaratzen den egunaren biharamunean hasiko da indarrean.

Bigarrena.- Ebazpen honen aurka, gora jotzeko errekurtsoa aurkeztu ahal izango zaio Eusko Jaurlaritzaren Industria, Berrikuntza, Merkataritza eta Turismoko sailburuari, hilabeteko epean, ebazpena Euskal Herriko Agintaritzaren Aldizkarian argitaratu eta biharamunetik hasita.

Vitoria-Gasteiz, 2011ko azaroaren 30a.

Berrikuntza eta Teknologiako sailburuordea,

JUAN IGNACIO GOICOLEA RUIGÓMEZ.