Euskal Herriko Agintaritzaren Aldizkaria

247. zk., 2011ko abenduaren 30a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

Hezkuntza, Unibertsitate eta Ikerketa Saila

6348

ERABAKIA, 2011ko azaroaren 29koa, Unibasq Euskal Unibertsitate Sistemaren Kalitatea Ebaluatu eta Egiaztatzeko Agentziaren Administrazio Kontseiluarena; honen bidez, irakasle lankideak kontratatu aurreko txostena lortzeko eta irakasle osoak, irakasle agregatuak, irakasle atxikiak eta unibertsitate pribatuko irakasle doktoreen ebaluazioa eta egiaztapena lortzeko deialdia onartzea eta argitaratzea erabaki da.

Euskal Herriko Unibertsitateko irakasle eta ikertzaile kontratatuengandik, unibertsitate pribatuetako irakasle doktoreengandik Unibasq Euskal Unibertsitate Sistemaren Kalitatea Ebaluatu eta Egiaztatzeko Agentziaren ebaluazioa eta egiaztapena lortzeko eta Euskal Herriko Unibertsitateko irakasle lankideak kontratatu aurreko txostena lortzeko prozedura arautzen duen azaroaren 13ko 192/2007 Dekretuaren 2. artikuluan xedatutakoa betez, 350/2010 Dekretuak eraldatutakoa, eta Unibasq Agentziaren Administrazio Kontseiluak 2011ko azaroaren 29an hartutako Erabakiaren bidez onartutako Protokoloaren 4. puntuan ezarritakoari jarraiki, Agentziaren Administrazio Kontseiluak, honako hau

ERABAKITZEN DU:

Unibertsitate pribatuetako irakasle doktore eta Euskal Herriko Unibertsitateko irakasle oso, agregatu, atxiki eta lankide gisa kontratatu ditzaten nahi dutenen irakaskuntza-jarduera eta/edo ikerketa-jarduera ebaluatzeko deialdia onartzea eta argitaratzea, honako oinarri hauei jarraiki:

OINARRIAK

Lehenengoa.- Xedea.

1.- Unibertsitate pribatuetako irakasle doktore eta Euskal Herriko Unibertsitateko irakasle oso, agregatu, atxiki eta lankide gisa kontratatu ditzaten nahi dutenen irakaskuntza-jarduera eta/edo ikerketa-jarduera ebaluatzea da deialdi honen xedea.

Bigarrena.- Figura ezberdinetarako eskabidea aurkezteko baldintzak.

a) Irakasle osoaren modalitatea kontratatzeko ebaluazioan, doktoretza-titulua eskatzen duen unibertsitateko edozein irakasle-taldetako kide izatea, edo irakasle agregatu izatea eta, gutxienez, unibertsitateko irakasle edo ikertzaile gisa hiru urteko jarduna egiaztatzea.

b) Irakasle agregatuaren modalitatea kontratatzeko ebaluazioan, doktore-titulua edukitzea eta, gutxienez, irakasle edo ikerlari gisa hiru urtez jardun izana, doktore egin eta gero, ahal dela.

c) Irakasle atxikia modalitatea kontratatzeko ebaluazioan, doktore-titulua izatea.

d) Unibertsitate Pribatuko Irakasle doktore modalitatea kontratatzeko ebaluazioan, doktore-titulua izatea.

e) Irakasle lankidea modalitatea kontratatzeko txosten-eskaeran, lizentzia-titulua, arkitekturakoa, ingeniaritzakoa edo unibertsitate diploma, arkitektura teknikoko titulua edo ingeniaritza teknikoko titulua izatea.

Baldintza horiek beti bete behar dira ebaluazioa eskatzeko ezarritako epemuga baino lehen. Hori guztia frogatzen duten ziurtagiriak atxiki beharko dira.

Hirugarrena.- Ebaluazioaren edo txostenaren eskabidea aurkezteko epea.

Irakasle lankide, atxiki, agregatu, oso eta Unibertsitate pribatuetako irakasle doktoretarako eskabideak aurkezteko epea hilabete izango da, deialdi hau Euskal Herriko Agintaritzaren Aldizkarian argitaratu eta biharamunetik aurrera kontatzen hasita, eta Herri Administrazioen Araubide Juridikoaren eta Administrazio Prozedura Erkidearen azaroaren 26ko 32/1992 Legearen 48. artikuluan aurreikusitakoari jarraiki.

Laugarrena.- Ebaluazioaren eskabidea formalizatzea.

1.- Interesdunak telematikoki egin behar du eskaera, Agentziaren webgunean (www.unibasq.org), horretarako argitaratutako aplikazio informatikoa erabilita (2007ko ekainaren 22ko 11/2007 Legearen 27.6 artikuluarekin bat), azaroaren 13ko 192/2007 Dekretuko 3.2 artikuluan ezarritakoaren arabera (abenduaren 28ko 350/2010 Dekretuak aldatu du).

2.- Eskabidearekin batera, aplikazio informatikoaren bidez, eskatzailearen curriculum vitae osoa aurkeztu beharko da. Halaber, legez eskatutako baldintzak eta interesdunaren historial akademikoa osatzen duten meritu guztiak egiaztatzen dituen dokumentazioa eskaneatuta atxiki beharko da. Meritu horiek beti bete behar dira ebaluazioa eskatzeko ezarritako epemuga baino lehen.

3.- Dagokion espedientearen aipamen zehatzaren bidez, aurreko egiaztapen-ebaluazioaren edo txostenaren beste eskabide batzuekin batera aurkeztu izanagatik Unibasq agentziak dagoeneko baduen egiaztatzeko dokumentazioaren kopiak aurkezteko beharra salbuetsi ahal izango da.

4.- Aurrekoa aparte utzi gabe, legez eskatutako baldintzak edo alegatutako merituak betetzen direla egiaztatzeko beharrezkoa den guztietan eskatu ahal izango die Unibasq agentziak eskatzaileei dokumentazioa aurkeztea.

Bosgarrena.- Eskabidearekin batera aurkeztu beharreko dokumentazioa.

1.- Eskaera betetzeaz gain, interesdunak, behin eskaera amaituta, aplikazio informatikoak sortutako eskaeraren laburpena behar bezala sinatu eta postaz bidali behar du Unibasqera, deialdian ezarritako epearen barruan.

2.- Aplikazio informatikoak sortutako eskaeraren laburpena, halaber, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan ezarritako edozein baliabideren bidez aurkeztu ahal izango da.

Seigarrena.- Eskabidearen edukia.

Eskabidean, datu-pertsonalez gain, ebaluazioa edo txostena egiteko eskaera zer kontratu motari dagokion eta zer arlo ezagutzari dagokion adierazi beharko da. Ezin da deialdi berean arlo ezagutza ezberdinetan eskatu ebaluazio edo txostena egiteko kontratu mota berdinerako.

Zazpigarrena.- Ebaluazio-irizpideak.

1.- Unibasq agentziak 2011ko azaroaren 8ko 228/2011 Dekretuaren bidez eta azaroaren 13ko 192/2007 Dekretuaren eranskinean aurreikusitako irizpideei jarraiki, 350/2010 Dekretuak eraldatutakoa, kontratu-irudi bakoitzerako onartutako ebaluazio-irizpideen arabera beteko dute beren zeregina Ebaluazio Batzordeek.

Zortzigarrena.- Ebazpena.

1.- Ebaluazioa edo txostena lortzeko prozesuen emaitzak Unibasq agentziako zuzendariaren ebazpen bidez formalizatuko dira. Eskaera bakoitzak bere ebazpena izango du. Ebazpen horren aurka berraztertzeko errekurtsoa jarri ahal izango da, nahi izanez gero, adierazitako Agentzian, hilabeteko epean, edota, zuzenean, administrazioarekiko auzi-errekurtsoa Administrazioarekiko Auzietako Epaitegi eskudunetan, bi hilabeteko epean (bi kasuetan, ebazpena jakinarazten den hurrengo egunetik aurrera kontatzen hasita).

2.- Ebazpenetan, ebaluazioa zer kontratu-irudirako egin den, ebaluazioa positiboa edo negatiboa izan den, eta txostena aldekoa edo kontrakoa izan den adierazi beharko da. Halaber, dagokion batzordeak egindako ebaluazioaren edo txostenaren laburpena gaineratuko zaie kontrako ebazpenei.

3.- Eskatzaileek ebaluazio positiboa lor dezakete kontratu-irudi jakin baterako, beti ere ezinbesteko baldintzak betetzen dituztenean:

- Irakasle osoa: gutxienez, 80 puntu lortzea; horrez gain, 1. atalean 50 puntu eskuratzea, eta, 2. atalean, 25 puntu.

Ikerkuntza-jarduerako hiru aldirekin pareka daitezkeen merezimenduak egiaztatzea; aldi horiek irakasleen ordainsariei buruzko abuztuaren 28ko 1086/1989 Errege Dekretuan egindako zehaztapenen arabera nahiz horri egindako aldaketen arabera aitortuko dira. Baldintza hori ez da nahikoa izango, baina bai ezinbestekoa aldeko egiaztapena lortzeko.

Gutxienez, bi doktoretza-tesi zuzenduta izatea; gutxienez, bi ikerkuntza-proiekturen ikertzaile nagusi izatea; edo, sei hilabetez, atzerriko unibertsitate batean doktoratu ondoko egonaldia egina izatea. Baldintza hori ez da nahikoa izango, baina bai ezinbestekoa aldeko egiaztapena lortzeko.

- Irakasle agregatua: gutxienez, 65 puntu lortzea; horrez gain, 2. atalean 35 puntu eskuratzea, eta, 3. atalean, 10 puntu.

Ikerkuntza-jarduerako aldi batekin pareka daitezkeen merezimenduak egiaztatzea; aldi hori irakasleen ordainsariei buruzko abuztuaren 28ko 1086/1989 Errege Dekretuan egindako zehaztapenen arabera nahiz horri egindako aldaketen arabera aitortuko da. Baldintza hori ez da nahikoa izango, baina bai ezinbestekoa aldeko egiaztapena lortzeko.

- Irakasle atxikia: gutxienez, 55 puntu lortzea, eta, horrez gain, 2. atalean, 25 puntu eskuratzea.

Argitalpenei dagokienez, eskatzailearen ezagutza-arloarekin lotutako kalitate handiko (JCR edo baliokidea) bi ekarpen, gutxienez, argitaratu izana egiaztatu beharko da. Baldintza hori ez da nahikoa izango, baina bai ezinbestekoa aldeko egiaztapena lortzeko.

- Irakasle lankidea: egiaztapena lortzeko, gutxienez, 55 puntu lortu behar dira guztira.

- Unibertsitate pribatuko irakasle doktorea: egiaztapena lortzeko, gutxienez, 60 puntu lortu behar dira; horrez gain, 2. atalean 25 puntu eskuratu behar dira, eta, 3. atalean, 20 puntu.

4.- Ebaluazioaren ebazpenak deialdi honetan eskabideak aurkezteko ezarritako epea amaitu eta hurrengo sei hilabeteen barruan jakinarazi beharko zaizkie interesdunei, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42.5 artikuluan xedatutakoa aparte utzi gabe.

5.- Aurreko idatzi-zatian adierazitako epearen barruan ebazpenik izan ezean, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 44.1 artikuluan aurreikusitako ondorioak sortuko dira.

6.- Ebaluazio negatiboa edo kontrako txostena jaso duen interesdunak ezin izango du beste ebaluazio-eskaera bat edo txosten-eskaera bat aurkeztu dagokion ebazpena jakinarazi eta sei hilabete igaro arte prozedura arautzen duen azaroaren 13ko 192/2007 Dekretuaren 8.2 artikuluan aurreikusitakoari jarraiki, 350/2010 Dekretuak eraldatutakoa. Dekretu honen bidez, Unibasqen ebaluazioa eta akreditazioa lortzeko prozedura erregularizatzen da.

Bederatzigarrena.- Dokumentu-erregimena eta datu pertsonalen inguruko eskubideak.

1.- Datu pertsonalak babesteari buruzko abenduaren 13ko 15/1999 Lege Organikoari jarraiki, interesdunek emandako datuak Unibasq agentziaren titulartasunpeko fitxategi automatizatu pertsonal batean sartuta geratu ahal izango dira Agentziak deitutako beste prozesu batzuk garatzeko, betiere interesdunak prozesu horietan parte hartzen badu.

2.- Fitxategi pertsonala Unibasq agentziaren Zuzendaritzaren erantzukizunpean geratuko da (San Prudentzio kalea, 8, 01005 Vitoria-Gasteiz).

3.- Datu pertsonalak babesteari buruzko abenduaren 13ko 15/1999 Lege Organikoa garatzeko Araudia onartzen duen abenduaren 21eko 1720/2007 Errege Dekretuan ezarritakoari jarraiki tratatuko dira datu pertsonalak, eta informazioaren konfidentzialtasuna eta osotasuna bermatzeko beharrezkoak diren segurtasun neurriak hartuko dira.

Gainera, tratamendu egokia jasoko dute datu horiek, Datu Pertsonaletarako Jabetza Publikoko Fitxategiei eta Datuak Babesteko Euskal Bulegoa Sortzeari buruzko otsailaren 25eko 2/2004 Legean eta Lege hori garatzen duen urriaren 18ko 308/2005 Dekretuan xedatutakoaren arabera.

4.- Interesdunek eskuratzeko, zuzentzeko, deuseztatzeko eta aurka egiteko eskubideak baliatu ahal izango dituzte Unibasq agentziaren bulegoetan, Datu Pertsonalak Babesteari buruzko Lege Organikoan ezarritakoa betez.

Hamargarrena.- Errekurtsoak.

Deialdi hau eta haren oinarriak behin betikoak dira administrazio-bidean, eta horien aurka administrazioarekiko auzi-errekurtsoa jarri ahal izango diete interesdunek Euskal Autonomia Erkidegoko administrazioarekiko auzietako jurisdikzio-organoei bi hilabeteko epean, Euskal Herriko Agintaritzaren Aldizkarian argitaratu eta hurrengo egunetik aurrera kontatzen hasita, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 109. artikuluan eta Administrazioarekiko Auzietarako Jurisdikzioa arautzen duen uztailaren 13ko 29/1998 Legearen 14. eta 46. artikuluetan ezarritakoari jarraiki. Halaber, nahi izanez gero, berraztertzeko errekurtsoa jarri ahal izango diote Agentziari hilabete bateko epean, adierazitako 30/1992 Legearen 116. eta 117. artikuluei jarraiki.

Erabaki honek Euskal Herriko Agintaritzaren Aldizkarian argitaratu eta hurrengo egunetik aurrera sortuko ditu ondorioak.

Vitoria-Gasteiz, 2011ko azaroaren 29a.

Unibasqeko Administrazio Kontseiluaren burua,

MARÍA ISABEL CELAÁ DIÉGUEZ ANDREA.

Azterketa dokumentala