247. zk., 2011ko abenduaren 30a, ostirala
- Bestelako formatuak:
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
Herri-Kontuen Euskal Epaitegia
6341
56/2011 EBAZPENA, abenduaren 22koa, Herri Kontuen Euskal Epaitegiaren lehendakariarena, erakunde horretako langileen lanpostu-zerrenda aldatzen duen epaitegi honen osoko bilkuraren erabakia argitara ematen duena.
Administrazioak bere barne egiturak arrazionalizatu eta antolatzeko erabili ohi duen baliabidea da lanpostu-zerrenda: langile-beharrak zehaztu, lanpostuak betetzeko eskatzen diren betekizunak finkatu eta betekizun bakoitza sailkatzen du.
Langileriaren egituraketa eta antolamenduaren zerbitzuko den lanpostu-zerrendak aldian behingo egokitze lana eskatzen du, une oro antolamendu administratiboak dituen beharrak asetzearren.
2005eko irailaren 9ko Euskal Herriko Agintaritzaren Aldizkarian, 172. zenbakian, argitaratu zen HKEEren azken lanpostu-zerrenda eta 2006ko urriaren 24ko buletinean (203. zk.) argitaratutako ebazpenaren bitartez aldarazi zen.
Momentu honetan, lanpostu-zerrenda aldatu beharra dago, batetik, egituraren barruan auditoria eta administrazioko langile gehiago behar direlako, eta horregatik sortuko dira auditore laguntzailearen lau lanpostu berri, behin-behinean 24. mailako lanpostu osagarria izango dutenak eta behin-betiko balorazioa egin zain geratuko direnak; eta bestetik, administrari plaza berri bat. Gainera, administrari laguntzaileen hiru lanpostu amortizatuko dira, 2003ko urtean abiarazitako prozesua amaituz eta ordenantza-gidari lanpostuaren dedikazio bereziko erregimena aldatuko da, ez baita beharrezkoa, lanaldi arrunteko erregimen era aldatuz.
Lanpostu berrien hizkuntza-betekizunei dagokienez, 2. hizkuntza eskakizuna esleituko zaie auditore laguntzailearen sortze berriko lanpostuei, behin-behineko monografiarekiko egoki iritzi baitzaio. Bestalde, 2008-2012 aldian indarrean dagoen hizkuntza normalizaziorako planaren derrigortasunez bete beharreko indizea errespetatzearren, beharrezkoa da 6. derrigortasun data berri ezartzea, hori guztia apirilaren 15eko 86/1997 Dekretuaren 20. artikuluan eta ondokoetan aurreikusitako izendapen-irizpideei jarraiki; honela, bada, derrigortasun datak lanpostu hauei ezarriko zaizkie: bat, ordenantza menpekoaren lanpostuari; bi administrari lanpostuei, 3. eta 10. dotazioak; beste bat auditore atxikitu lanpostuari, 19. dotazioa; eta beste bi, sortu berri diren auditore laguntzaile lanpostuen 1 eta 2 zenbakiko dotazioei.
Sortu berri diren lanpostuek dagokion aurrekontuko kreditua dute 2011ko ekitaldi honetarako onetsitako aurrekontuan.
Honenbestez, Euskal Funtzio Publikoaren uztailaren 6ko 6/1989 Legearen II. idazpuruko 1. kapituluan araututakoari jarraiki eta Herri Kontuen Euskal Epaitegiaren otsailaren 5eko 1/1988 Legearen 21.4 artikuluan xedatutakoaren indarrez, epaitegi honen Osoko Bilkurak abenduaren 22ko bilkuran honako hau erabaki du:
Lanpostu-zerrendaren gaine egindako beste aldaketa bat onartzea, ebazpen honekin batera doan eranskin gisa argitara ematen dena.
Vitoria-Gasteiz, 2011ko abenduaren 22a.
Lehendakaria,
JOSÉ IGNACIO MARTÍNEZ CHURIAQUE.
(Ikus .PDF)