Euskal Herriko Agintaritzaren Aldizkaria

116. zk., 2011ko ekainaren 20a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Hezkuntza, Unibertsitate eta Ikerketa Saila

3191

ERABAKIA, 2011ko maiatzaren 17koa, Unibasq Euskal Unibertsitate Sistemaren Kalitatea Ebaluatu eta Egiaztatzeko Agentziaren Administrazio Kontseiluarena; honen bidez, kontratatutako doktore-tituludun ikertzaileen ebaluazioa eta egiaztapena lortzeko deialdia onartzea eta argitaratzea erabaki da.

Euskal Herriko Unibertsitateko irakasle eta ikertzaile kontratatuengandik Unibasq Euskal Unibertsitate Sistemaren Kalitatea Ebaluatu eta Egiaztatzeko Agentziaren ebaluazioa eta egiaztapena lortzeko prozedura arautzen duen abenduaren 28ko 350/2010 Dekretuak eraldatutako azaroaren 13ko 192/2007 Dekretuaren 2. artikuluan xedatutakoa betez, eta Unibasq Agentziaren Administrazio Kontseiluak 2009ko apirilaren 20an hartutako Erabakiaren bidez onartutako Protokoloaren 4. puntuan ezarritakoari jarraiki, Agentziaren Administrazio Kontseiluak,

ERABAKI DU:

Bakarra.- Euskal Unibertsitate Sistemari buruzko otsailaren 25eko 3/2004 Legearen II. tituluan aurreikusitako lanbide-kategorietako batean kontratatzeko eta egiaztatzeko beharrezkoa den irakasleen irakaskuntza-jardueraren eta/edo ikerketa-jardueraren ebaluaziorako deialdia onartzea eta argitaratzea, honako oinarri hauei jarraiki:

OINARRIAK

Lehenengoa.- Xedea.

1.- Euskal Herriko Unibertsitateko doktore-tituludun ikertzaile gisa kontratatu ditzaten nahi dutenen irakaskuntza-jarduera eta/edo ikerketa-jarduera ebaluatzea da deialdi honen xedea.

Bigarrena.- Doktore-tituludun ikertzaile figurarako eskabidea aurkezteko baldintzak.

Doktore-titulua edukitzea.

Baldintza horiek beti bete behar dira ebaluazioa eskatzeko ezarritako epemuga baino lehen. Hori guztia frogatzen duten ziurtagiriak bidali beharko dira.

Hirugarrena.- Ebaluazioaren edo txostenaren eskabidea aurkezteko epea.

Eskabideak aurkezteko epea hilabete izango da, deialdi hau Euskal Herriko Agintaritzaren Aldizkarian argitaratu eta biharamunetik aurrera kontatzen hasita, eta Herri Administrazioen Araubide Juridikoaren eta Administrazio Prozedura Erkidearen azaroaren 26ko 32/1992 Legearen 48. artikuluan aurreikusitakoari jarraiki.

Laugarrena.- Ebaluazioaren eskabidea aurkezteko lekua eta modua.

1.- Eskabideak Unibasq Euskal Unibertsitate Sistemaren Kalitatea Ebaluatu eta Egiaztatzeko Agentzian aurkeztuko dira, eta, interesdunaren curriculumarekin batera, aplikazio informatiko baten bidez sortuko dira. Aplikazio hori Agentziaren web-orrian dago eskuragarri (www.unibasq.org).

Eskabidea, halaber, deialdi honen I. eranskin gisa gaineratutako eredua bete ondoren aurkez daitezke.

2.- Eskabidea, halaber, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan ezarritako edozein baliabideren bidez aurkeztu ahal izango da.

3.- Eskabidea posta-bulegoetan aurkezten duten interesdunek posta-zerbitzuak emateko Araudia onartzen duen abenduaren 3ko 1829/1999 Errege Dekretuaren 31. artikuluan ezarritakoari jarraitu beharko diote. Artikuluak honako hau dio:

«Herritarrek edo erakundeek posta-zerbitzu unibertsala emateko agindua jaso duen operadorearen bitartez herri-administrazioen organoetara bidaltzen dituzten eskabideak, idazkiak eta komunikazioak gutunazal irekian aurkeztuko dira, eta bulegoaren izena eta onarpenaren lekua, ordua eta minutua jasoaraziko dira, argi eta garbi, bidali nahi den dokumentuaren lehen orriaren goiburuan. Halaber, bidali nahi den dokumentu nagusiaren kopiaren, fotokopiaren edo beste erreprodukzio mota baten lehen orrialdean bidalketaren zirkunstantziak jasoaraztea eskatu ahal izango du igorleak, identitatea jatorrizkoarekin konparatu ondoren. Dokumentua administrazio-organo eskudunari aurkeztu izana egiaztatuko duen agiri gisa aurkeztuko da.

Adierazitako eginbideen ondoren, igorleak berak itxiko du gutunazala, eta enplegatuak onarpenaren ordezkagiria egin eta emango du. Ordezkagiri horren jatorrizkoa bulegoan artxibatuko da.

Artikulu honetan aurreikusitako betebeharrei jarraiki, posta-zerbitzu unibertsala emateko agindua jaso duen operadoreak onartutako bidalketak behar bezala aurkeztutzat hartuko dira, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38. artikuluan eta haren garapen-araudian aurreikusitako ondorioetarako».

Bosgarrena.- Eskabidearen edukia.

Eskabidean, ebaluazioa edo txostena egiteko eskaera zer kontratu motari eta zer arlo ezagutzari dagokion adierazi beharko da.

Ezin da deialdi berean arlo ezagutza ezberdinetan eskatu ebaluazio edo txostena egiteko kontratu mota berdinerako.

Erantsian dagoen eredua jarraituz, Agentziaren web-orrian eskuragarri izango dena, ere aurkeztu daiteke (Aplikazio informatikoan eskaera «itxi» ezean, edo I. Erantsia egoki betetzen eta bidaltzen ez bada, eskaera bertan behera geldituko da).

Seigarrena.- Ebaluazio-eskabidearekin batera aurkeztu beharreko dokumentazioa.

1.- Eskabidearekin batera, Agentziaren web-orrian (www.unibasq.org) eratu daitekeen curriculum vitae aurkeztu beharko da. Curriculum vitae eredu hau deialdi honen I. eranskin gisa aurki daiteke.

Halaber, eskatutako titulazioa edukitzea eta interesdunaren historial akademikoa osatzen duten meritu guztiak egiaztatzen dituen dokumentazioaren kopia aurkeztu beharko da. Meritu horiek beti bete behar dira ebaluazioa eskatzeko ezarritako epemuga baino lehen.

2.- Interesdunek ez dituzte, ezein kasutan, jatorrizko dokumentuak aurkeztu behar, ez baitira itzuliko.

Aurrekoa aparte utzi gabe, legez eskatutako baldintzak edo alegatutako merituak betetzen direla egiaztatzeko beharrezkoa den guztietan eskatu ahal izango die Uniqual agentziak eskatzaileei dokumentazioa aurkeztea.

3.- Dagokion espedientearen aipamen zehatzaren bidez, aurreko egiaztapen-ebaluazioaren edo txostenaren beste eskabide batzuekin batera aurkeztu izanagatik Uniqual agentziak dagoeneko baduen egiaztatzeko dokumentazioaren kopiak aurkezteko beharra salbuetsi ahal izango da.

4.- Ebaluazio-eskabidearekin batera, egiazkotasunaren deklarazioa sinatuta aurkeztu behar dute interesdunek. Deklarazio hori egiteko, Unibasq agentziaren web-orrian argitaratutako formularioa erabil behar da.

Zazpigarrena.- Ebaluazio-eskaerak jasotzea eta bideratzea.

1.- Unibasq agentzian eskabidea jaso ondoren, eskatzaileari eta eskatutako irudiari emandako identifikazio-kode batekin erregistratuko da eta espediente bat irekiko da, sarrera-data adierazita.

2.- Deialdi bakoitzean, eskatzaile eta irudi bererako espediente bakarra sortu ahal izango da. Interesdunak irudi bererako hainbat espediente sortzen baditu, erregistro publiko batean paperean aurkeztutako azkeneneko eskabidea soilik hartuko da kontuan.

Zortzigarrena.- Ebaluazio-irizpideak.

1.- Unibasq agentziak 2008ko uztailaren 29ko 149/2008 Dekretuaren bidez eta abenduaren 28ko 350/2010 Dekretuak eraldatutako azaroaren 13ko 192/2007 Dekretuaren eranskinean aurreikusitako irizpideei jarraiki kontratu-irudi bakoitzerako onartutako ebaluazio-irizpideen arabera beteko dute beren zeregina Ebaluazio Batzordeek.

Bederatzigarrena.- Ebazpena.

1.- Ebaluazioa edo txostena lortzeko prozesuen emaitzak Uniqual agentziako zuzendariaren ebazpen bidez formalizatuko dira. Eskaera bakoitzak bere ebazpena izango du. Ebazpen horren aurka berraztertzeko errekurtsoa jarri ahal izango da, nahi izanez gero, adierazitako Agentzian, hilabeteko epean, edota, zuzenean, administrazioarekiko auzi-errekurtsoa Administrazioarekiko Auzietako Epaitegi eskudunetan, bi hilabeteko epean (bi kasuetan, ebazpena jakinarazten den hurrengo egunetik aurrera kontatzen hasita).

2.- Ebazpenetan, ebaluazioa zer kontratu-irudirako egin den, ebaluazioa positiboa edo negatiboa izan den, eta txostena aldekoa edo kontrakoa izan den adierazi beharko da. Halaber, dagokion batzordeak egindako ebaluazioaren edo txostenaren laburpena gaineratuko zaie ebazpenei.

3.- Eskatzaileek ebaluazio positiboa lor dezakete kontratu-irudi jakin baterako, beti ere aurkeztutako merituekin hurrengo puntuazio minimoak lortzen dituztenean:

- Doktore-tituludun ikertzailea: guztira 75 puntu baino gehiago lortzea eta, horrez gain, Ikerketa-jarduerak eta ezagutza transferitzea atalean gutxienez 60 puntu lortzea eta Irakaskuntza-jarduera eta esperientzia profesionala atalean gutxienez 10 puntu lortzea.

4.- Ebaluazioaren ebazpenak deialdi honetan eskabideak aurkezteko ezarritako epea amaitu eta hurrengo sei hilabeteen barruan jakinarazi beharko zaizkie interesdunei, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42.5 artikuluan xedatutakoa aparte utzi gabe.

5.- Aurreko idatz-zatian adierazitako epearen barruan ebazpenik izan ezean, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 44.1 artikuluan aurreikusitako ondorioak sortuko dira.

6.- Ebaluazio negatiboa edo kontrako txostena jaso duen interesdunak ezin izango du beste ebaluazio-eskaera bat edo txosten-eskaera bat aurkeztu dagokion ebazpena jakinarazi, sei hilabete igaro arte prozedura arautzen duen abenduaren 28ko 350/2010 dekretuak eraldatutako azaroaren 13ko 192/2007 Dekretuaren 8.2 artikuluan aurreikusitakoari jarraiki.

Hamargarrena.- Dokumentu-erregimena eta datu pertsonalen inguruko eskubideak.

1.- Datu pertsonalak babesteari buruzko abenduaren 13ko 15/1999 Lege Organikoari jarraiki, interesdunek emandako datuak Unibasq agentziaren titulartasunpeko fitxategi automatizatu pertsonal batean sartuta geratu ahal izango dira Agentziak deitutako beste prozesu batzuk garatzeko, betiere interesdunak prozesu horietan parte hartzen badu.

2.- Fitxategi pertsonala Unibasq agentziaren Zuzendaritzaren erantzukizunpean geratuko da (San Prudentzio kalea, 8, 01005 Vitoria-Gasteiz).

3.- Datu pertsonalak babesteari buruzko abenduaren 13ko 15/1999 Lege Organikoa garatzeko Araudia onartzen duen abenduaren 21eko 1720/2007 Errege Dekretuan ezarritakoari jarraiki tratatuko dira datu pertsonalak, eta informazioaren konfidentzialtasuna eta osotasuna bermatzeko beharrezkoak diren segurtasun neurriak hartuko dira.

Gainera, tratamendu egokia jasoko dute datu horiek, Datu Pertsonaletarako Jabetza Publikoko Fitxategiei eta Datuak Babesteko Euskal Bulegoa Sortzeari buruzko otsailaren 25eko 2/2004 Legean eta Lege hori garatzen duen urriaren 18ko 308/2005 Dekretuan xedatutakoaren arabera.

4.- Interesdunek eskuratzeko, zuzentzeko, deuseztatzeko eta aurka egiteko eskubideak baliatu ahal izango dituzte Unibasq agentziaren bulegoetan, Datu Pertsonalak Babesteari buruzko Lege Organikoan ezarritakoa betez.

Hamaikagarrena.- Errekurtsoak.

Deialdi hau eta bere oinarriak behin betikoak dira administrazio-bidean, eta horien aurka administrazioarekiko auzi-errekurtsoa jarri ahal izango diete interesdunek Euskal Autonomia Erkidegoko administrazioarekiko auzietako jurisdikzio-organoei bi hilabeteko epean, Euskal Herriko Agintaritzaren Aldizkarian argitaratu eta hurrengo egunetik aurrera kontatzen hasita, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 109. artikuluan eta Administrazioarekiko Auzietarako Jurisdikzioa arautzen duen uztailaren 13ko 29/1998 Legearen 14. eta 46. artikuluetan ezarritakoari jarraiki. Halaber, nahi izanez gero, berraztertzeko errekurtsoa jarri ahal izango diote Agentziari hilabete bateko epean, adierazitako 30/1992 Legearen 116. eta 117. artikuluei jarraiki.

Erabaki honek Euskal Herriko Agintaritzaren Aldizkarian argitaratu eta hurrengo egunetik aurrera sortuko ditu ondorioak.

Vitoria-Gasteiz, 2011ko maiatzaren 17a.

Unibasqeko Administrazio Kontseiluaren burua,

MARÍA ISABEL CELAÁ DIÉGUEZ.

Azterketa dokumentala