Euskal Herriko Agintaritzaren Aldizkaria

43. zk., 2010eko martxoaren 4a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Justizia Administrazioa

Vitoria-Gasteizko Lehen Auzialdiko 1 Zenbakiko Epaitegia

1207

EDIKTUA, 794/08 prozedura arruntaren ondoriozkoa.

Vitoria-Gasteizko Lehen Auzialdiko 1 zenbakiko Epaitegia.

Judizioa: 794/08 prozedura arrunta.

Alderdi demandatzailea: Txagorritxuko Miguel de Unamuno etxaldearen Jabeen Elkartea.

Alderdi demandatua: Manuel Prieto Santos.

Gaia: kontratuak, oro har.

Aipatutako judizioan ebazpena eman da. Hona ebazpen horren testua:

182/2009 EPAIA

Epailea: Juan José Carbonero Redondo.

Lekua: Vitoria-Gasteiz.

Eguna: bi mila eta bederatziko azaroaren hamaseia.

Alderdi demandatzailea: Txagorritxuko Miguel de Unamuno etxaldearen Jabeen Elkartea.

Abokatua: Francisco Javier Berisa Villamayor.

Prokuradorea: Mercedes Botas Armentia.

Alderdi demandatua: Manuel Prieto Santos.

Abokatua.

Prokuradorea.

Judizioaren gaia: kontratuak, oro har.

AURREKARIAK

Lehenengoa.- Elkarte auzi-jartzailearen izenean eta ordez, Botas Armentia prokuradoreak demandatuaren aurkako demanda-idazkia aurkeztu zuen zenbateko bat erreklamatzeko. Bere ustez aplikatzekoak ziren egitate eta zuzenbideko oinarriak alegatu ondoren, idazkia amaitzen zuen ondokoa eskatuz: idazkia onartzeko, legezko izapideak egin ondoren demanda guztiz baiesten duen epaia emateko, eta auzi-jartzaileari hiru mila eta hirurogeita hamazazpi euro eta hirurogeita zazpi zentimo (3.079,67) ordaintzera kondenatzeko, interesak eta kostuak barne.

Bigarrena.- Demanda izapideak egiteko onartu eta epaitegi honek horren berri izateko eskumena duela onartuta, legeak agindu bezala epatu zen demandatua. Behar den moduan demandatua ez zenez aurkeztu, auzi-ihesean deklaratu zen epaitegi honek 2009ko irailaren 1ean emandako probidentziaz.

Hirugarrena.- Alderdiei dei egin zitzaien PZL-an aurreikusitako entzunaldira, eta auzi-jartzailea bertan zela -eta demandatu barik- egin zen entzunaldia. Egintza horretan, beren demanda-idazkia berretsi zuen auzi-jartzaileak, eta frogaldia egiteko eskatu zuen. Frogaldia egiteko eskaria onarturik, auzi-jartzaileak agiri bidezko froga proposatu zuen. Proposatutako froga gauzatu ondoren, autoak epaia emateko prest utzi ziren.

Laugarrena.- Legezko agindu guztiak bete dira prozedura hau izapidetzerakoan.

ZUZENBIDEKO OINARRIAK

Lehenengoa.- Hiru mila eta hirurogeita hemeretzi euro eta hirurogeita zazpi zentimo (3.079,67 euro) erreklamatzeko demandatuaren aurkako demanda jarri du auzi-jartzaileak, erreklamazioa egiten duen elkarteko kide izateagatiko kuotak ordaindu gabe utzi dituelako. 2004ko urriaren eta 2008ko apirilaren artean ordaindu gabe utzitako kuotei dagokie zenbateko hori, hau da: bi mila, zortziehun eta hogeita hamahiru euro eta hamazortzi zentimo (2.833,18 euro), gehi berrehun eta berrogeita sei euro eta berrogeita bederatzi zentimo (246,49 euro) zenbateko horrek demanda aurkeztu artean sortutako interesengatik.

Bigarrena.- Ezetsi egin behar da auzi-jartzailearen uzia. Jabeen Elkarteko Zuzendaritza Batzordeko idazkariaren alde bateko egiaztagiria besterik ez daukagu frogatzat auzi honetan, non esaten den -zehaztu gabe- 2004tik aurrera ordaindu gabe utzitako errezibuak zor dituela demandatuak, eta erreklamatutako zenbatekoak banakatuta agertzen diren (2. dokumentua). Horri guztiari 3. dokumentu bat gehitu zaio, zirkular bat, non auzi-jartzailearen abokatuak zenbateko bat erreklamatzen dion demandatuari, baina ez dago inon jasota hartzaileak, Prieto jaunak, zirkularra jaso duenik.

Dena den, oinarrizkoa ez dago jasota edo egiaztatuta, hau da, demandatua elkarte horretako kide dela, hori egiaztatzea gauza erraza izanik; nahikoa zen epaiketa aurreko entzunaldiko izapidean elkarrizketa proposatzea, edo demandatua elkarteko kide gisa agertzen den elkarteko zerrenda erantsita duen elkarteko idazkariaren egiaztagiria aurkeztea, edota afiliazioa jasotzen duen zerrenda edo zerrendaren zatia aurkeztea. Beraz, aurkeztutako dokumentazioa ez da nahikoa lortu nahi diren ondorioetarako. Dagokion zenbatekoa zehazteko elkarteko organo eskumendunak hartutako erabakirik ez dago jasota, ezta kide berankor den aldetik demandatuari erreklamatzekorik ere, ez eta organo eskumendunaren erabakirik ere demandatuari dirua eskatzeko.

Beraz, ez denez jasotzen demandatua benetan elkarte auzi-jartzaileko kide denik, auzi-jartzailearen uziak ezin du aurrera egin.

Hirugarrena.- PZLko 394.1 artikuluan xedatutakoarekin bat, demanda guztiz ezesten da, eta kostuak alderdi demandatzaileari ezartzen zaizkio berariaz.

Azaldutako guztiagatik, honakoa da

EPAITZA

Guztiz ezezten dut Mercedes Botas Armentia prokuradoreak elkarte auzi-jartzailearen izenean eta ordez jarritako demanda eta, horrenbestez, demandatua absolbitu egiten dut beste aldetik etorri zaizkion eskarietatik, eta kostuak alderdi demandatzaileari ezartzen zaizkio berariaz.

Jakinaraz bekie alderdi biei ebazpen honen aurka apelazio-errekurtsoa aurkez daitekeela, Arabako Probintzia Auzitegian. Horretarako idazkia epaitegi honetan aurkeztu beharko da eta epea epaia jakinarazten den egunaren biharamunean hasi eta bost egunekoa izango da.

Errekurtsoa jarri ahal izateko, 50 euroko gordailua eratu beharko da, eta baldintza hori bete ezean ez da hura izapidetzea onartuko. Gordailua honelaxe gauzatu beharko da: epaitegi honen Gordailu eta Kontsignazioen Kontuan kontsignatuaz aipatu zenbatekoa; kontu hori Banesto (Banco Español de Crédito) taldekoa da, eta 0009000000079408 zenbakia du; errekurtsoa aurkeztean egiaztatu beharko da kontsignazioa (BJLOko 15. xedapen gehigarria).

Errekurtsoa aurkezteko gordailua eratu behar izatetik salbuetsita daude aipatutako xedapenaren 5. paragrafoan aipatzen direnak, eta doako laguntza juridikorako eskubidea aitortua dutenak.

Eta epai honen bidez, erabaki, agindu eta sinatzen dut.

Argitalpena.- Epaiari dagokion egunean, jendaurreko entzunaldia egiten ari zelarik, epaia eman zuen magistratu berberak eman, irakurri eta argitaratu zuen. Eta nik, Epaitegiko idazkari naizenez, guzti horren fede ematen dut Vitoria-Gasteizen, bi mila eta bederatziko azaroaren hamaseian.

Alderdi demandatuaren gaur egungo helbidea edo bizilekua ezezaguna denez, Prozedura Zibilaren 1/2000 Legeko 156.4 eta 164. artikuluetan xedatutakoarekin bat etorriz, epaileak, 2009ko abenduaren 16ko probidentziaz, Euskal Herriko Agintaritzaren Aldizkarian ediktu hau argitaratzea ebatzi du, 2009ko azaroaren 16ko 182/2009 epaia jakinarazteko eginbidea burutzeko.

Vitoria-Gasteiz, 2009ko abenduaren 16a.

IDAZKARI JUDIZIALA.

Azterketa dokumentala