Euskal Herriko Agintaritzaren Aldizkaria

98. zk., 2007ko maiatzaren 23a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Herri-Kontuen Euskal Epaitegia

2937

ERABAKIA, Herri-Kontuen Euskal Epaitegiaren Osokoak 2007ko martxoaren 9ko bilkuran hartua, Euskadiko Erkidegoko Estatutu Politiko Berriaren Proposamenaren Fiskalizazio Txostena behin betiko onesten duena.

Herri-Kontuen Euskal Epaitegiaren Osokoak 2007ko martxoaren 9an egindako bilkuran

ERABAKI DU:

Euskadiko Erkidegoko Estatutu Politiko Berriaren Proposamenaren Fiskalizazio Txostena, erabaki honen eranskin gisa ageri dena, behin betiko onestea.

HKEEren 1/1988 Legeko 13.2 artikuluak aurreikusten duena betez, txostenaren ondorioak Euskal Herriko Agintaritzaren Aldizkarian argitaratzeko agintzea.

Vitoria-Gasteiz, 2007ko martxoaren 9a.

HKEEren lehendakariordea,

JESÚS ÁLVAREZ GALDÓS.

HKEEren idazkari nagusia,

BEGOÑA MARIJUÁN ARCOCHA.

ERANSKINA

EUSKADIKO ERKIDEGOKO ESTATUTU POLITIKO BERRIAREN PROPOSAMENAREN FISKALIZAZIO TXOSTENA

I.– Sarrera.

Herri-Kontuen Euskal Epaitegiak, Eusko Legebiltzarraren Osokoak eskatuta, Euskadiko Erkidegoko Estatutu Berriaren Proposamena (aurrerantzean Estatutu Berriaren Proposamena) mamitu eta zabaltzen gauzatutako gastuen fiskalizazio lan hau eta legezkotasunaren azterketa egin ditu.

Lanaren mamia proposamen hori gauzatu eta zabaltzean egindako gastuen zenbatekoa kalkulatzea ez ezik, horiek diru-publikoak kudeatzeko gaietan indarreko legedira egokitzen direla egiaztatzea izan da, honako muga hauekin:

A) EAEren Administrazio Orokorrak (aurrerantzean Gobernua) egindako gastuak aztertu ditugu. Helburu informatiboarekin soilik, hiru lurralde historikoetako hiriburuetako aldundi eta udalei gutuna igorri zaie Estatutu Berriaren Proposamena zabaltzeak eragindako gastuen zenbatekoa eta kontzeptua, baleude, jakinarazteko eskatuz; ez dute, ordea, kontzeptu horrekin gasturik aitortu.

B) Lanak egiteko Gobernuaren zerbitzura diharduen langileriaren esku-hartze maila jakitea bideratuko duen kostuen kontabilitate bat edo kudeaketa sistema bat ez izateak eragotzi egiten digu proiektuari ezargarria zaion langileriaren kostua ezagutzea.

Lanaren zabalak izan dituen mugez gain, beharrezkoa izan da gastua osorik identifikatzeko ahalegin itzela egitea, batik bat, egindako gastuak aurrekontu arrunten hainbat kontu-sailetan zati-banatuak daudelako; honi gehitu behar zaio lanak denboran zehar besarkatu duen aldia, aurrekontuko bost ekitalditan garatu baita.

Aztergai dugun aldia mugarrituko duten ekintzak izango dira, batetik, 2001eko uztailaren 11ko inbestidura-hitzaldia; bertan, Lehendakariak Eusko Legebiltzarraren Osokoaren aurrean Gernikako Estatutua gaurkotzeko beharra azaldu zuen eta bestetik, Diputatuen Kongresuaren aurrean 2005eko otsailaren 1ean egindako Estatutu Berriaren Proposamenaren aurkezpena.

II.– Txostenaren xedea eta egindako lana.

II.1.– Euskadiko Erkidegoko Estatutu Politiko Berriaren Proposamena. Bilakaera Kronologikoa.

Gobernuaren programaren baitan eta 2001eko uztailaren 11ko inbestidura hitzaldian, Lehendakariak Eusko Jaurlaritzaren izenean eta berau ordezkatuz, Eusko Legebiltzarraren aurrean Gernikako Estatutua gaurkotzeko beharra azaldu zuen. Gerora, 2001eko urriaren 25eko Osoko bilkuran ebazpen proposamen bat onetsi zen, Gernikako Estatutua osorik eta premiaz betetzeko errebindikatu eta eskatzen zuena, egungo marko juridiko eta politikoen legezkotasun demokratikoa aitortu eta autogobernua sakontzeko Batzorde Parlamentarioa sortzeko konpromisoa hartzen zuena, hitzarmen estatutarioa gorde eta betetzea eta hori gaurkotzeko aukerak, dituen ahalmenen arabera, aztertuko zuena.

Autogobernurako Batzorde Parlamentario honek, hainbat hilabeteko lanaren ondoren, Legebiltzarrari aurkeztu zizkion ondorioak eta honek 2002ko uztailaren 12ko bilkuran erabaki zuen euskal herria ordezkatzen duten erakundeen lidergotik mamitzen eta garatzen hastea aurkeztu eta onetsitako ebazpenean bildutako proposamen multzoa, ordenamendu juridikoko proiektu berri bat edo batzuk gauzatu eta artikulatzeko. Prozesu ireki baten ondorio izango den garapena eta artikulazioa, euskal gizartearen multzoan bideratutakoa eta politika, ekonomia, sindikatu, gizarte eta kultur mailako eragileen ahalik eta esku hartze handienarekin.

2003ko irailaren 27an egin zen politika orokorreko eztabaidan, Gobernuak lanen ondorioak eta oinarri-arauen behin betiko garapena aurkeztu zituen. 2003ko urriaren 25ean Eusko Legebiltzarraren Lehendakariari artikuluen testua eman zitzaion, Gobernu Kontseiluak "Euskadiko Erkidegoaren Estatutu Politiko Berriaren Arauzko Proposamena" izenburupean onetsitakoa.

Azkenik, Eusko Legebiltzarrak 2004ko abenduaren 30ean Aparteko bilkuran gehiengo osoz Euskadiko Erkidegoaren Estatutu Politiko Berriaren behin betiko proposamena onetsi zuen, gerora, Gernikako Autonomia Estatutuaren 46. artikuluari jarraiki, Espainiako Gorteetara igorri zena.

II.2.– Egindako lana.

Lehendakaritza Sailak –proiektuaren arduradun denak- Estatutu Berriaren Proposamenaren garapenean gauzatu dituen gastu guztien gaineko informazioa eskuratu dugu; baita, Lehendakariak 2001-2005eko legegintzaldian egindako bidaien motibazioak eta programak eta aldi horretan agindu ziren ikerketa soziologikoak ere.

Honela, bada, bidai gastuak aztertzeko, Lehendakaritza Sailak aldi horretan Lehendakariak egin zituen bidai guztien programak iritsarazi dizkigu.

Halaber, Lehendakaritza Sailak gure eskura jarri ditu fiskalizazio-gai dugun aldian zehar gauzatu ziren prospekzio soziologikoa zuten azterlan guztiak.

Honek bide eman digu, kasu bietan, azterketa horien helburua egiaztatzeko eta honenbestez, Estatutu Berriaren Proposamena zabaltzeko eginak izan diren egiaztatzeko.

Bestalde, Lehendakaritza Saila oinarri hartuta, Gobernuaren datu-base informatikoan bilaketa gidatuak egin ditugu, gauzatu diren gastu guztiak eskuratu ditugula egiaztatzearren.

III.– Ondorioak.

III.1.– Egindako gastuak.

EAEren Administrazio Orokorrak Estatutu Berriaren Proposamena mamitu eta zabaltzen egindako gastuak honako hauek izan dira, urteen eta kontzeptuen arabera sailkatuak:

						Euroak

KONTZEPTUA	2001	2002	2003	2004	2005	 GUZTIRA

Argitalpenak eta banaketa		187.249	228.051	 5.620	120.426	541.346

Komunikabideetako hedapena	–	16.115	35.112	 51.000	72.129	174.356

Aurkezteko bidaiak	–	62.567	15.224	–	–	 77.791

Aurkezpen instituzionalak	–	190.713	–	–	–	 190.713

Beste batzuk	6.010	28.982	12.019	1.338	 18.845	67.194

GUZTIRA	6.010	485.626	290.406	57.958	 211.400	1.051.400

III.2.– Lege araudia betetzea.

Egotzi daitezkeen diren gastu guztiak araudi ezargarrira egokitzen direla egiaztatu dugu eta honako akats hauek azaleratu zaizkigu:

1.– Argitalpenen Zerbitzu Nagusiak kudeatutako hainbat gastu espedientetan, prozedura negoziatua erabili denetan (38, 39, 56, 57, 58 eta 59 espedienteak) eta 224.174 euro egin dutenetan, ez da 136/1996 Dekretuak agintzen duen kontratazio mahaia eratu.

2.– 2005eko ekitaldiaren hasieran hainbat komunikabidetan publizitatea kontratatu zen 65.170 euroan 5 enpresa ezberdinekin (63, 64, 65, 68, 69 eta 70 espedienteak) eta kontratuaren xedea zatikatu zen, APKLren 68. artikulua urratuz.

3.– Zundaketa Kualitatiboari dagokion espedientean (33. zk. espedientea) 11.890 euro ordaindu zitzaizkion pertsona fisiko bati, zerga araudiak aurreikusten duen PFEZ kontzeptuko nahitaezko atxikipena egin dela ageri ez dela.

4.– 2002ko urriaren 25ean Bilboko La Casilla Pabiloian egitekoa zen ekitaldia zela-eta, irratian publizitate sartzeak kontratatu ziren 32.705 euroko zenbatekoarekin (23. zk. Espedientea), Komunikaziorako Idazkaritza Nagusiaren publizitate espedientearen kontura; ordea, honek ez zuen gastu horri aurre egiteko behar besteko krediturik (saldoa 1.482 eurokoa zen) eta ez zen horren aurrean inongo kontratu aldaketarik izapidetu, edo kasua balitz, publizitate eta lehia printzipioak bermatuko zituen beste kontratu bat.

5.– Argitalpenen Zerbitzu Nagusiak 3 espediente (39, 41 eta 60 zk.) prozedura negoziatu bitartez aleko prezioen arabera 85.389 euroan esleitu zituen; alabaina, horien kontratuetan ez zen Kontratuen Legearen Erregelamendu Orokorraren 71.1 artikuluak aleko prezioen araberako ordainsariak dituzten zerbitzu kontratuentzat agintzen duen gehienezko zenbateko mugatzailea zehazten.

6.– Argitalpenen Zerbitzu Nagusiak prozedura negoziatu bitartez esleitutako 56 zenbakiko espedientean, sei eskaintza jaso dira eta guztiak bat datoz prezioan -37.150 euro- eta epean, bat izan ezik, 100 euro merkeagoa den prezioa ematen duena. Esleipena ez da eskaintzarik merkeenaren alde egin eta ez da behar hainbat justifikatu.

Azterketa dokumentala