Euskal Herriko Agintaritzaren Aldizkaria

134. zk., 2005eko uztailaren 14a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Justizi Administrazioa

Barakaldoko Lehen Auzialdiko 5 Zenbakiko Epaitegia

3712

EDIKTUA, adostasunik gabeko dibortzio baten gainean bideratutako L2 826/04-E prozeduraren ondoriozkoa.

JAKINARAZPEN-ZEDULA

Aipatu prozeduran epaia eman da, zeinaren idazpurua eta epaitza honako hauek baitira:

310/05 EPAIA

Epailea: José Gabriel Álvarez López.

Lekua: Barakaldo (Bizkaia).

Eguna: bi mila eta bosteko maiatzaren hemezortzia.

IZO: Prozedura: L2 826/04, adostasunik gabeko dibortzioa.

Alderdi demandatzailea: Eduardo Rodríguez Sanz.

Abokatua: Amelia de Treviño Gómez Casero.

Prokuradorea: Juan Setién García.

Alderdi demandatua: María del Mar Ávila Pérez.

Judizioaren gaia: adostasunik gabeko dibortzioa.

Nik, José Gabriel Álvarez Lópezek, Barakaldoko Lehen Auzialdiko (Familia) 5 zenbakiko epaile magistratu naizen aldetik, ikusiak ditut adostasunik gabeko dibortzioari buruzko 826/04 Autoak (PZLb). Auzi-iheslari deklaratutako María del Mar Ávila Pérez andrearen aurka, Eduardo Rodríguez Sanz jaunaren izenean eta ordez, Amelia de Treviño Sanz letratuaren laguntzarekin Juan Setién García prokuradoreak aurkeztutako demandaren ondorioz izapidetu ziren aipatu autoak, Ministerio Fiskalak ere parte hartuz. Nik, Erregearen izenean eta Konstituzioak ematen dizkidan ahalmenez baliatuz, ematen dut ondoko epaitza

EPAITZA

Baietsi egiten dut Juan Setién García prokuradoreak, Eduardo Rodríguez Sanz jaunaren izenean eta ordez aurkeztutako dibortzio-demanda, María del Mar Ávila Pérez andrearen aurkakoa, eta hala egin behar-eta auzilarien arteko dibortzioa agintzen dut, legezko ondorio guztiekin; halaber, ondoko neurriak hartzea erabaki dut:

a) Amak izango du Ander eta Eneko semeen zaintza eta babespea eta guraso-ahala bi gurasoena izango da. Aitaren bisita-erregimena ondokoa izango da: bi asteburutik behin semeak berekin izan ahalko ditu, larunbat goizetik igande arratsaldera arte; amaren etxetik jaso eta bertara itzuliko ditu haurren ohiko ordutegia errespetatuz. Halaber, astean zehar gurasoek adostutako arratsalde batez ere izango ditu, eskolatik jaso eta amaren etxera erretiratuz, betiere haurren ohiko ordutegia errespetatuta. Gabonetan, semeek euren eskolako oporraldiaren erdia aitarekin igaroko dute eta beste erdia amarekin; gurasoen artean desadostasunak egonez gero, guraso bakoitzak urte batez aukeratzeko lehentasuna izango du, amari urte bikoitiak dagozkiolarik eta aitari urte bakoitiak. Aste Santua semeek urte batean aitarekin igaroko dute eta hurrengoan amarekin, txandaka. Udan, uztaileko eta abuztuko eskola-oporraldiari dagokionez, semeek hilabete bat aitarekin igaroko dute eta bestea amarekin; hau gurasoek adostu beharko dute aldez aurretik. Adostasunik ez badago, amak urte bikoitiak aukeratuko ditu eta aitak urte bakoitiak. Semeekin dagoen gurasoak beste gurasoarekiko komunikazioa utzi eta erraztuko du, ohiko orduz kanpo, justifikaziorik gabe edota modu guratsuan ez bada eskatzen behintzat. Oporraldietan asteburuetako eta aste barrurako finkatutako bisitak bertan behera utziko dira. Gurasoetako batek adin txikikoak toki ezagun batetik beste toki ezezagun batera eramaten baditu, beste gurasoari jakinaraziko dio eta telefonorik balego, telefono berriaren zenbakia emango dio. Semeak gaixorik jartzen badira, guraso batek besteari jakinarazi beharko dio bere etxera bisitan etortzea utziz, eta edozein kasutan ere bestearen ikuspuntua kontuan hartu beharko du mediku, tratamendu, ospitale eta abarrei dagokionez... Ezkontideek hitzarmen hau adin txikikoen interesak eta babesa kontuan hartuta interpretatzeko eta semeek gurasoekiko duten maitasun eta errespetuari eragingo dioten jarrerak saihesteko konpromisoa hartzen dute.

b) Aitaren ekarpena, semeen elikadura-pentsio gisa, hirurehun eta hirurogeita hamaika euro eta laurogeita hemezortzi (371,98 euro) eurokoa izango da. Zenbateko hori hilero, aurreratuta eta hil bakoitzaren lehenengo bost egunen barruan sartu beharko da emazteak Caja Laboral entitatean duen 3035-0123-20-123.0.70243.6 zenbakiko kontuan. Pentsio hori, bestalde, urtero eguneratu beharko da, betiere Estatistikako Institutu Nazionalak edo ordezko erakunde batek argitaratutako KPIk dituen aldakuntzekin bat.

Ez da kosturik ezarriko.

Epai hau irmoa egin ostean, horren testigantza egin eta Barakaldoko Erregistro Zibilera igorri, dagokion idazpena egiteko.

Eta María del Mar Ávila Pérezen bizilekua ezezaguna denez gero, jakinarazpen zedulatzat balio dezan ematen dut idazki hau.

Barakaldo (Bizkaia), 2005eko ekainaren 16a.

IDAZKARIA.