Euskal Herriko Agintaritzaren Aldizkaria

1. artikulua.– Xedea.

1.– Agindu honen xedea kulturartekotasuna sendotzeko laguntzetarako dei egitea da. Laguntza horien xedea ondokoa da: gure erkidegoan elkarrekin bizi diren jatorri ezberdinetako kulturen eta pertsonen arteko harremanak bultzatzea, laguntzea, ezagutzea eta berdintasunean baloratzea; herritarren prestakuntza eta sentsibilizazioa, immigrazioaren zergatiak zeintzuk diren azalduz eta pertsona guztiek eskubide, betebehar eta aukera berdinak izan behar dituztela adieraziz, pertsona horien jatorria, etnia, kultura, erlijioa, sexua edo hizkuntza edozein izanik ere; eta elkartasunaren, aniztasunaren, parte-hartzearen, elkarbizitzaren eta desberdintasunean egokitzearen balioak sustatzea.

2.– Diru-laguntza jaso dezaketen jarduerak 2004. urtean egingo dira.

2. artikulua.– Erakunde onuradunak.

Nortasun juridiko propioa duten, helburu publiko bat edo gizarte-intereseko helburu bat irabazi asmorik gabe lortzea sustatzen duten eta aurreko artikuluan adierazitako helburuarekin Euskal Autonomia Erkidegoan programak garatzen dituzten erakunde pribatu edo publikoek eska ditzakete laguntza hauek.

3. artikulua.– Aurrekontu-kreditua.

Kapitulu honen barruan diru-laguntza jaso dezaketen 2004rako programetara zuzendutako aurrekontu-kreditua 360.000,00 eurokoa da. Zenbateko hori aldatu ahal izango da ekainaren 25eko 155/2002 Dekretuaren 3.1.2 artikuluan aurrez ikusitako baldintzetan.

4. artikulua.– Eskabideen aurkezpena: modua eta epea.

Eskabideak, Agindu honi I. eranskin gisa gehitutako instantzia bidez eta, II., III., VI. eta V. eranskinen arabera, beharrezko diren eskabide-orri eta dokumentazioarekin, Etxebizitza eta Gizarte Gaietako Saileko Inmigrazio Zuzendaritzara bidali beharko dira (Donostia kalea, 1 – 01010 Vitoria-Gasteiz), urtarrilaren 13ko 4/1999 Legeak aldatutako Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean aurrez ikusitako moduan.

Eskabideak aurkezteko epea hilabetekoa izango da, Agindu hau indarrean sartzen denetik aurrera kontatzen hasita.

5. artikulua.– Dokumentazioa.

Eskabidea aurkezteko unean ondokoak eramango dira:

1.– Eranskinen araberako eskabide-inprimakia, behar bezala beteta.

2.– Lortu nahi diren helburuen deskribapena.

3.– Jardueraren bidezkotasunaren eta egokitasunaren justifikazio arrazoitua.

4.– Aurrez ikusitako sarreren eta gastuen aurrekontu xehatua.

5.– Zerga-betebeharrak eta gizarte-segurantzakoak bete izana egiaztatuko duen Foru Ogasunaren eta Gizarte Segurantzako Diruzaintzaren ziurtagiri eguneratua, agindu hau argitaratu baino hilabete lehenagoko datarekin, gehienez ere, eta Identifikazio Fiskaleko Kodearen fotokopia.

6.– Erakunde eskatzaileak jaso dituen edo eskatuta dituen eta ebazteko geratzen diren diru-laguntzei buruz egindako zinpeko aitorpena eta, hala badagokio, Erakundeak jarduera egiteko dagokion partaidetza ekonomikoaren emaitzazko kopuruaren ziurtagiria.

7.– Elkartearen Estatutuen kopia.

8.– Jarduera eta Planen memoria eta ebaluatzeko adierazleak.

9.– Baldintzak betetzen direla egiaztatzen duten eta deialdi honetan aurrez ikusitako laguntza-eskabidearen azterketarako interesa duten bestelako dokumentuak.

6. artikulua.– Eskabidearen akatsen zuzenketa.

Diru-laguntzak jasotzeko eskabideak osorik betetzen ez badira edo adierazitako dokumentazioa falta bada, interesatuari errekerimendua egingo zaio hamar eguneko epean akatsa zuzen dezan edo aginduzko dokumentuak aurkez ditzan. Halaber, hala egin ezean bere eskaera atzera egintzat hartuko dela adieraziko zaio, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42. artikuluan aurreikusi bezala eman beharreko ebazpenaren ondoren.

7. artikulua.– Esleipen eta ponderazio irizpideak.

Laguntzetarako esleipen eta ponderazio irizpideak ondokoak izango dira:

a) Ekintzaren helburu izan daitezkeen pertsonen kopurua. Hamabost puntura bitartean.

b) Jardueraren originaltasuna. Hamabost puntura bitartean.

c) Jarrera eta jokabide arrazisten prebentzioa eta kulturen arteko komunikazioari eta elkarbizitzari lotutako azturen eskurapena. Hogeita hamar puntura bitartean.

d) Ekintza xede den taldearen ezaugarrietara egokitzea eta aldez aurreko azterketa egitea. Hogei puntura bitartean.

e) Jardueraren formulazioan, edukian eta garapenean genero-ikuspegia barne hartzea, emakumezkoen eta gizonezkoen egoera, baldintza eta behar ezberdinak kontuan hartuta. Hamar puntura bitartean.

f) Kultur jatorri ezberdineko pertsonek jarduera lantzen eta gauzatzen parte hartzea. Hamar puntura bitartean.

8. artikulua.– Deialdiaren ebazpena.

1.– Etxebizitza eta Gizarte Gaietako Immigrazioko zuzendariak, Euskal Autonomia Erkidegoko immigrazioaren esparruan jarduerak egiteko laguntzak arautzen dituen Dekretuan aurrez ikusitako kide anitzeko organoak aurkeztu diren eskabideei buruz egindako txostena aldez aurretik aztertu ondoren, diru-laguntzak emateari buruzko Ebazpena emango du eta erakunde interesatuei jakinaraziko die sei hilabeteko gehieneko epean, Agindu hau indarrean sartzen denetik aurrera kontatzen hasita. Ondoren, ebazpena EHAA aldizkarian argitaratuko da.

2.– Adierazitako epea amaitu eta jakinarazpena egin ez bada, egindako eskaera ezetsitzat hartu ahal izango da Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 44.1 artikuluan ezarritakoaren ondorioetarako, Lege horrek Administrazioari berariaz ebazteko ezartzen dion betebeharraren kaltetan izan gabe.

9. artikulua.– Betebeharrak.

1.– Agindu honen babesean emandako diru-laguntzen Erakunde onuradunek immigrazioaren esparruan jarduerak egiteko laguntzak arautzen dituen ekainaren 25eko 155/2002 Dekretuaren 8. artikuluan aurrez ikusitako betebeharrak dituzte.

2.– Adierazitako araudiak aipatzen dituen memoriak eta egiaztagiriak aurkezteko epea bi hilabetekoa izango da, jarduera amaitzen denetik aurrera kontatzen hasita.

AZKEN XEDAPENAK