Euskal Herriko Agintaritzaren Aldizkaria

9. zk., 2004ko urtarrilaren 15a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Iragarpenak

Hezkuntza, Unibertsitate eta Ikerketa Saila

222

EDIKTUA, María Teresa González Gallo andreak jarritako gora jotzeko errekurtsoa ezesteko, Hezkuntza, Unibertsitate eta Ikerketa Saileko Administrazio eta Zerbitzu sailburuordeak 2003ko urriaren 30ean emandako Ebazpena jakinarazteko dena.

Idazki honetako idazpuruan aipatutako ebazpena, 2003ko urriaren 30ekoa, ezin izan zaio María Teresa González Gallo andreari jakinarazi, beraz, ondoko artikuluan zehaztutako eran jakinarazten zaio: Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 59.4 artikulua.

Ebazpena, 2003ko urriaren 30ekoa, Administrazio eta Zerbitzu sailburuordearena, María Teresa González Gallo andreak jarritako gora jotzeko errekurtsoak ezesten dituena.

Hezkuntza, Unibertsitate eta Ikerketa Saileko Langileriaren Kudeaketa zuzendariaren 2003ko uztailaren 28ko Ebazpenaren bitartez, ondoko kidegoetan sartzeko hautaketa-prozesuak gainditu dituzten izangaien zerrendak ematen dira argitara: Maisu-maistren Kidegoa, Bigarren Hezkuntzako Irakasleen Kidegoa, Lanbide Heziketako Irakasle Teknikoen Kidegoa, Hizkuntza Eskola Ofizialetako Irakasleen Kidegoa, eta Euskal Autonomia ERkidegoko Musika eta Arte Eszenikoen Irakasleen Kidegoa. Ebazpen horren kontra, María Teresa González Gallo andreak jarritako gora jotzeko errekurtsoa aztertu delarik, ebazpena ematen da ondoko aurrekarietan oinarriturik:

AURREKARIAK

I.– Hezkuntza, Unibertsitate eta Ikerketa sailburuaren (2002ko azaroaren 14ko EHAA) azaroaren 8ko Aginduaren bitartez, ondoko kidegoetan sartzeko hautaketa-probetarako deialdia egin zen: Euskal Autonomia Erkidegoko Musika eta Arte Eszenikoen Irakasleen Kidegoa, Maisu-maistren Kidegoa, Bigarren Hezkuntzako Irakasleen Kidegoa, Lanbide Heziketako Irakasle Teknikoen Kidegoa eta Hizkuntza Eskola Ofizialetako Irakasleen Kidegoa.

II.– Lanbide Heziketako Irakasle Teknikoen kidegora —Sanitate- eta Asistentzia-Prozeduren Adarrera— sartzeko hautaketa-prozesuan parte hartzeko izangaien zerrendan onartu egin zen errekurtso-egilea.

III.– 2003ko uztailaren 28ko aipatu Ebazpenaz (2003ko uztailaren 31ko EHAAn argitaratutakoaz), aipatu hautaketa-prozesua gainditu zuten izangaien zerrendak eman ziren ezagutzera.

IV.– Emaitzekin ados ez zela-eta, aipatu ebazpenaren kontra gora jotzeko errekurtsoak jarri zituen errekurtso-egileak, 2003ko abuztuaren 5eko idazkien bitartez, legezko era eta sasoian, emandako puntuazioarekin ados ez zela alegatuaz, eta epaimahaiko kide batekin izan zuen lan-harreman txarrak izan zezakeen eragina aipatuaz, hortaz, ebazpena berraztertzeko eskatzen du. Oposizio-faseko nota partzialak eman diezazkiotela ere eskatzen du, eta bai deialdiko 1. eranskineko 3. paragrafoko meritu gisa Hezkuntza Eskolako Gaitasun Agiria zenbatu diezaiotela ere. Azkenik, Estibaliz Elorriaga Arandía andrearen notak baliogabetzeko eskatzen du, epaimahaiak birritan deitu duelako.

Aurrekari horiei zuzenbideko oinarri hauek aplikatu behar zaizkie

ZUZENBIDEKO OINARRIAK

Lehenengoa.– Azaroaren 26ko 30/1992 Legeko 73. artikuluarekin bat etorriaz, "prozedura bat hasi edo izapidetzen duen administrazio-organoak, hasteko era edozein izan delarik ere, funtsean antzeko den edo lotura handia duen bati batzea xedatu dezake". Interesatuak aurkeztutako errekurtsoen artean aipatu bezalako lotua dagoenez, oraingo honekin ebaztea erabaki da.

Bigarrena.– 2002ko azaroaren 8ko Aginduak, aipagai dugun hautaketa-prozesua arautzeko oinarriak finkatzen ditu, eta 5.1 puntuan zera xedatzen du "hautaketa-prozedura honetako parte-hartzaileen hautaketa hartarako izendatutako hautaketa-batzordeen eta epaimahaien bitartez egingo da…", eta 5.2.2 puntuan zera dio "epaimahaia izendatzeko, espezialitate-printzipioa zaindu beharko da, zeinaren arabera epaitu behar den espezialitateko titular izan beharko dute epaimahaiko gehiengoa egiten duten kideek". Bestalde, 5.9.5 oinarrian zehazten denez, "Herri-Administrazioen Araubide Juridikoaren eta Administrazio-Prozedura Erkidearen Legean xedatutakoarekin bat etorri beharko du hautaketa-organoen jarduerak".

Hirugarrena.– Kasu honetan, oposizio-fasean egindako probak berraztertzeko eskatzen du María Teresa González Gallo andreak, eta horretaz aipatu behar dugu eze, jurisprudentzia-doktrina ugaria dagoela epaimahai aztertzaileek duten diskrezionalitate tekniko zabalaz, eta doktrina horren adierazgarri dira besteak beste ondoko epaiak: Auzitegi Gorenaren 2003ko urtarrilaren 28koak, Administrazioarekiko Auzietarako Salak emandakoak eta legea interpretatzeko indarra dutenak, eta sala horrek berak 2000ko urriaren 10ean emandakoa.

Eta jurisprudentzia-doktrina ondoko kontsiderazioetan oinarrituta finkatu da:

- Funtzio publikora sartzeko hautaketa-prozeduretan epaimahai kalifikatzaileek duten funtzioa honako hau da: ebaluazio profesionaleko zereginak, —hautaketa-prozesuen funtsa direnak— burutzeko ezagutzak ez baditu administrazio-organoak, ezagutza horiek eskaintzea organo horri.

- Gai espezifikoei dagokienez epaimahaiei dagokien organo espezializatuen izaerak honako hau dakar: euren jarduera ebaluatzailean balioespen-tartea zabala dutela, hau da, doktrinan diskrezionalitate teknikoa deitu izan dena.

Diskrezionalitate hori dela-eta haien jarduera kontrolatzeko posibilitateak bi kasutara mugatzen dira: araututako elementuak ez errespetatzea —esate baterako, deialdiaren oinarriak— eta errakuntza nabarmen eta agerikoa. Hortaz, organo kalifikatzaileak egindako ebaluazioaren berraztertzea edo ebaluazio alternatiboa bakarrik eskatzen duten uziak aipatu kontroletik kanpo geratzen dira, eta horixe da María Teresa González Gallo andreak planteatutako kasua.

Kasu honetan legez, errekurtsoa ebazteari dagokionez, kontrola egiteko ezintasunak Administrazioari eragitez gain, organo jurisdikzionalei ere galarazi egiten die epaimahai kalifikatzaileen irizpidea, estimazio tekniko libreaz osatutakoa, aldatzea. Eta Konstituzio Auzitegiak bere egiten du esandako hori 34/1995 eta 353/1993 epaietan.

Laugarrena.– Kontsiderazio horietan oinarrituta, oposizio-faseko proba berriro baloratzeko uzia, errekurtso-egilearena, ezin da onartu, izan ere, bere espedientea aztertu ezkero, ez dira atzematen errakuntza agerikoak edo oinarriak ez betetzeak, hain justu ere epaimahaiak emandako kalifikazioak indargabetzen dituztenak.

Puntuazio txikian eragina izan zezakeelako edo, epaimahaiko kide batekiko harreman txarrari buruzko erreferentzia ezin da kontuan izan, izan ere, ez zen baliatu garaiz deialdiaren 5.5 oinarrian zehaztutako ahalmenaz, zeina ondoko kasuan gauzatu daitekeen: Herri-Administrazioen Araubide Juridikoaren eta Administrazio-Prozedura Erkidearen Legearen 30/92 Legearen 29. artikuluak zehaztutako kasuren baten egon ezkero. Aipatu artikuluak 28.2 artikuluan xedatzen denari egiten dio erreferentzia, zeinak c) idatz-zatian "Etsaitasun agerikoa" aurreikusten baitu aipatu kausetariko bat moduan, edozelan ere, aipatu beharrekoa da eze, alegatutako harreman txarraz ondokoa probatu beharko zuela interesatuak: harreman txarraren izaria zela-eta izendatuaren objetibotasunari txarrera eragiten zitzaiola.

Bosgarrena.– Interesatuari jakinarazi dakioke B15 epaimahaiak ez dituela eman oposizio-fasea proben kalifikazio partzialak, eta hori dela-eta Administrazioak ezin du eman informaziorik esandako horretaz.

Arazo honetaz deialdiko oinarriek ez zuten berariaz eskatzen bereizterik; hortaz, prozesuko azken buruko emaitza soilik emanez aditzera, bere autonomia funtzionalaz —lehenengo oinarrian aipatutakoaz— baliatuaz, organo kalifikatzaileak bete egin bere obligazioa

Bestalde, interesatuari jakinarazi dakioke epaimahaiko bost kideek emandako notak ondokoak izan zirela: 3,0359 / 3,5359/ 3,5359 / 4,0359 eta 3,0359. Baina, aktan ez da jasotzen euretariko bakoitza epaimahaiko zein kidek eman zuen, bost puntuazioak antzekoak direla ikusten da, beraz, ezin da ondorioztatu epaimahaiko bideetariko baten objektibotasun faltarik, interesatuak alegatzen duena.

Seigarrena.– Deialdiko 1. eranskineko 3 paragrafoko meritu gisa, Hizkuntza Eskola Ofizialeko Gaitasun Titulua zenbateko eskabideari dagokionez, interesatuari zera jakinarazten zaio: 3 paragrafoan zehaztutakoak eta konputagarriak diren hiru merituetariko (beste meritu batzuk) bat ere ez dela, izan ere, sartzeko eskatutako mailaz beherako titulu bat baita.

Zazpigarrena.– Azkenik, Estibaliz Elorriaga Arandía andrearen egoerari dagokionez, epaimahaiaren uztailaren 7ko aktan zera jasotzen da: aipatu egunean ez zen agertu andre hori, baina epaimahaiak hile bereko 9rako deitzea erabaki zuen, izan ere, bai baitzen justifikatutako motibo medikorik.

Ildo horretan, deialdiko 6.1 oinarriko 3. paragrafoan berariaz jasotzen da ondokoa: "epaimahaiak hartakotzat jo baditu, behar bezala justifikatutako ezinbesteko kasuetan" izendatuko orduan agertu ez den izangaia hautaketa-prozesutik ez baztertzeko aukeraz baliatu daiteke epaimahaia; eta kasu honetan, aipatu zirkunstantzia dagonenez, aukera-berdintasunaren printzipioa haustea, errekurtso-egileak aipatutakoa, ez da jazotzen.

Aipatutako arauak eta gai honi lotuta oro har aplikatzekoak diren gainerakoak aztertuta, eta eman zaizkidan eskumenak erabiliz, honako hau

EBATZI DUT:

Langileriaren Kudeaketa zuzendariaren 2003ko uztailaren 28ko Ebazpenaren bitartez, ondoko kidegoetan sartzeko hautaketa-prozesuak gainditu dituzten izangaien zerrendak ematen dira argitara: Maisu-maistren Kidegoa, Bigarren Hezkuntzako Irakasleen Kidegoa, Lanbide Heziketako Irakasle Teknikoen Kidegoa, Hizkuntza Eskola Ofizialetako Irakasleen Kidegoa, eta Euskal Autonomia ERkidegoko Musika eta Arte Eszenikoen Irakasleen Kidegoa. Bada, ebazpen horren kontra, María Teresa González Gallo andreak jarritako gora jotzeko errekurtsoak ezetsi egiten dira.

ERREKURTSOAK

Ebazpen honek amaiera ematen dio administrazio-bideari. Horren aurka, administrazioarekiko auzi-errekurtsoa aurkez dezake interesdunak, Euskal Autonomia Erkidegoko Auzitegi Nagusiko Administrazioarekiko Auzietarako Salan, jakinarazpena egin eta hurrengo egunetik harako bi hilabeteko epearen barruan.

Vitoria-Gasteiz, 2003ko maiatzaren 6a.

Administrazio eta Zerbitzu sailburuordea,

KOLDO ARRESE GARCÍA.

María Teresa González Gallo andreari jakinarazpena egiteko ematen da hau, bere egonlekua ezezaguna baita.

Vitoria-Gasteiz, 2003ko abenduaren 9a.

Azterlan eta Lege Araubide zuzendaria,

UNAI ZIARRETA BILBAO.

Azterketa dokumentala