RSS
202. zk., 2003ko urriaren 16a, osteguna
- Bestelako formatuak:
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
Bestelako Xedapenak
Justizia, Lan eta Gizarte Segurantza Saila
5569
AGINDUA, 2003ko irailaren 17koa, Justizia, Lan eta Gizarte Segurantza sailburuarena, "Fundación para la Investigación Endocrino-Metabólico-Nutricional Beta / Beta Endokrinologi Iraskundea" Euskal Autonomia Erkidegoko Fundazioen Erregistroan inskribatzeari buruzkoa.
"Fundación para la Investigación Endocrino-Metabólico-Nutricional BETA / BETA Endokrinologi Iraskundea" Euskal Autonomia Erkidegoko Fundazioen Erregistroan inskribatzeko eskatuz aurkeztutako espedientea ikusi eta aztertu da.
AURREKARIAK
1.– José Antonio Vázquez García jaunak, Alicia Cortazar Galarza andreak, María Sonia Gaztambide Sáenz andreak, María Begoña Quintana San José andreak, José Antonio Pinies Raposo jaunak eta Ignacio Goicolea Opacua jaunak "Fundación para la Investigación Endocrino-Metabólico-Nutricional BETA / BETA Endokrinologi Iraskundea" izeneko fundazioa sortu dute, Bilbon 2002ko urriaren 9an Bilboko Notarioen Elkargoko Juan María Larrucea Urtiaga jaunaren aurrean egindako eskritura publikoaz (2.103 protokolo zk.).
Fundazioa eratzeko eskritura publiko hori osatu egin zen 2003ko otsailaren 27an notario beraren aurrean egindako notariotza-eskrituraz (438 protokolo-zenbakia) eta 2003ko apirilaren 9an notario beraren aurrean egindako eskritura-publikoaz (821 protokolo-zenbakia).
2.– "Fundación para la Investigación Endocrino-Metabólico-Nutricional BETA / BETA Endokrinologi Iraskundea" fundazioaren helburua, estatutuetako 3. artikuluan jartzen duenez, honako hau da:
"...diziplina hauetako ikerkuntza zientifiko eta sanitariora zuzendutako edozein motatako lan, azterketa, entsegu, sinposio… sustatzea, gauzatzea, laguntzea, finantzatzea eta bultzatzea.
Helburu zabal horien barruan, hona hemen, zehaztuta, berehala egingo diren ekintza garrantzitsuenak:
Endokrinologiaren, Metabolismoaren eta Nutrizioaren etengabeko prestakuntza eta erabateko garapena sustatzea.
Endokrinologiaren, Metabolismoaren eta Nutrizioaren zabalkundea eta hedapena; horretarako, artikuluak, hitzaldiak, sinposioak eta fundazioak helburu horretara iristeko egokitzat jotzen dituen euskarriak erabiliko dira. Halaber, Fundazio honen antzeko helburuak dituzten elkarte, fundazio eta erakundeekin harremanak izatea eta lankidetzan aritzea bultzatuko da.
Endokrinologia-patologiarekin, Metabolismoarekin eta Nutrizioarekin zerikusia duten zientzia eta osasunaren alorreko alderdien ikerkuntza.
Azterketa epidemiologikoak egitea Endokrinologian, Metabolismoan eta Nutrizioan.
Bekak, laguntzak eta sariak deitzea aipaturiko helburu horiek lortzeko.
Osasuna sustatzea eta endokrinologiako, metabolismoko eta nutrizioko gaixotasunen prebentzioa bultzatzea.
Baliabideak biltzea.
Fundazioaren egitekoak gauzatzeko lagungarri izan daitekeen beste edozein.
3.– Fundazioaren egoitza, Fundazioaren Estatutuetako 5. artikuluan jartzen duenez, hau da: Doctor Luis Bilbao Líbano kalea, 9, 5. F, Leioa (Bizkaia), 48940. Jardute-eremua batez ere Euskal Autonomia Erkidegoa izango da, estatutuetako 6. artikuluan jartzen duen moduan.
4.– Fundatzaileek hasieran jarritako dotazioa hamabi mila eurokoa (12.000) da, eta kopuru hori ordaindu dela jasota geratu da erregistro-inskripzioan, hala agintzen baitu 404/1994 Dekretuaren 31.1.c artikuluak.
Ondarea askitzat jotzen da fundazioaren lehenengo programa lortzeko. Izan ere, Euskal Autonomia Erkidegoko Fundazioei buruzko ekainaren 17ko 12/1994 Legearen 9. artikuluak hala eskatuta, aditu independente batek egindako bideragarritasuneko ekonomia-azterketak hori erakusten du; azterketa hori, bestalde, administrazio-espedienteari erantsi zaio.
5.– Fundazioa ordezkatzea, administratzea eta gobernatzea Patronatuari utzi zaizkio. Patronatuko kideek dohainik beteko dituzte beren egitekoak, Fundazioaren Estatutuetako 12. artikuluan jartzen duen moduan.
6.– Patronatuko kideak, hasieran, fundazioa eratzeko eskrituran jartzen duenez, hauek izango dira:
Lehendakaria: José Antonio Vázquez García jauna.
Lehendakariordea: María Sonia Gaztambide Sáenz andrea.
Idazkaria: Alicia Cortazar Galarza andrea.
Diruzaina: Juan Antonio García Sánchez-Gabriel jauna.
Kideak:
María Begoña Quintana San José andrea.
José Antonio Pinies Raposo jauna.
Ignacio Goicolea Opacua jauna.
Francisco Javier Santamaría Sandi jauna.
Amaia María Uriarte Arana andrea.
Federico Vázquez San Miguel jauna.
Guztiek onartu dituzte dagozkien karguak, Euskal Autonomia Erkidegoko Fundazioei buruzko ekainaren 17ko 12/1994 Legearen 12.1 artikuluan jasotako moduen bidez.
ZUZENBIDEKO OINARRIAK
Lehenengoa.– Justizia, Lan eta Gizarte Segurantza sailburuari dagokio fundazioaren eraketa inskribatzeko ebazpena hartzea agindu-bidez. Hala dago aginduta Euskal Autonomia Erkidegoko Fundazioei buruzko Legearen 40. artikuluan eta Euskal Autonomia Erkidegoko Fundazioen Erregistroa eta Babeslaritza Antolatu eta Jardunean Jartzeko Erregelamendua onartu zuen urriaren 18ko 404/1994 Dekretuaren 7 a) artikuluan.
Bigarrena.– Horretarako legitimazioa daukan pertsona juridiko pribatu batek sustatu du espediente hau. Espedienteari, bestalde, funtsezkotzat jotzen diren datu eta agiriak erantsi zaizkio, eta bereziki, Euskal Autonomia Erkidegoko Fundazioei buruzko Legearen 6., 7. eta 9. artikuluetan eta urriaren 18ko 404/1994 Dekretuaren 31. eta 34. artikuluetan ezarritako betekizunak konplitu dira.
Lege eta arau hauek ikusi dira: indarrean dagoen Konstituzioa; Euskal Autonomia Erkidegoko Autonomia Estatutua; Euskal Autonomia Erkidegoko Fundazioei buruzko ekainaren 17ko 12/1994 Legea; Euskal Autonomia Erkidegoko Fundazioen Erregistroa eta Babeslaritza Antolatu eta Jardunean Jartzeko Erregelamendua onartu zuen urriaren 18ko 404/1994 Dekretua eta orokorrean aplikatzekoak diren gainerako arauak. Ondorioz,
Justizia, Lan eta Gizarte Segurantza sailburuak, honako hau
EBATZI DU:
Lehenengoa.– Gaur, F-151 zenbakiaz, Leioako "Fundación para la Investigación Endocrino-Metabólico-Nutricional BETA / BETA Endokrinologi Iraskundea", Euskal Autonomia Erkidegoko Fundazioen Erregistroan inskribatzea, bai eta patronatuko hasierako osaera ere. Patronatuko kideak seigarren aurrekarian aipatzen dira eta guztiek modu adieraziz onartu dituzte beren karguak.
Bigarrena.– Fundazio hori, dituen helburuak kontuan hartuta, Euskal Autonomia Erkidegoko Fundazioen Erregistroko 1. sekzioan inskribatzea, irakaskuntza eta ikerketari buruzko fundazioen sekzioan hain zuzen, Euskal Autonomia Erkidegoko Fundazioen Erregistroa eta Babeslaritza Antolatu eta Jardunean Jartzeko Erregelamendua onartu zuen urriaren 18ko 404/1994 Dekretuaren 14. artikuluan agindutakoaz bat etorriz.
Hirugarrena.– Agindu hau Euskal Herriko Agintaritzaren Aldizkarian argitaratzea.
Agindu hau azkena da administrazio bidean. Horren aurka aukerako berraztertzeko errekurtsoa aurkez dakioke Justizia, Lan eta Gizarte Segurantza sailburuari, hilabeteko epean, agindua jakinarazi, eta biharamunetik aurrera; bestela, administrazioarekiko auzi-errekurtsoa aurkez daiteke, Euskal Autonomia Erkidegoko Auzitegi Nagusiko Administrazioarekiko Auzietako Salan, bi hilabeteko epean, agindua jakinarazi eta biharamunetik aurrera.
Vitoria-Gasteiz, 2003ko irailaren 17a.
Justizia, Lan eta Gizarte Segurantza sailburua,
JOSEBA AZKARRAGA RODERO.