Euskal Herriko Agintaritzaren Aldizkaria

202. zk., 2003ko urriaren 16a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Ogasun eta Herri Administrazio Saila

5567

239/2003 Dekretua, urriaren 7koa, Euskal Autonomia Erkidegoaren Administrazioari Aberekin, S.A. akziokako baltzuaren kapital gehikuntzan parte hartzeko baimena ematen diona.

Aberekin S.A. (hazia jartzeko zentroa) honako bazkide hauek osatutako akziokako baltzua da: Kantabriako Gobernua, Arabako Foru Aldundia, Bizkaiko Foru Aldundia, Gipuzkoako Foru Alundia, Bizkaia, Asociación Alavesa de Criadores de Ganado Selecto Raza Frisona (ASGAFAL), Asociación Frisona de Gipuzkoa (GIFE), Asociación Frisona de Bizkaia (BIFE), Asociación Frisona de Girona (AFRIGI), Asociación Frisona de Navarra (AFNA), Asociación de Ganado Pirenaica de Bizkaia (ASGAPIR), Herri Behi Elkartea (HEBE), Vacuno de Razas Cárnicas de Araba (VARACA), Asociación Pirenaica de Navarra (ASPINA), Asociación Frisona Andaluza (AFA), Covap (S.C.A Ganadera del Valle de los Pedroches), Asociación Frisona de Cantabria (AFCA) eta ITG-Ganadero.

Baltzu horren helburua estatutuen 2. artikuluan zehaztuta dago: "Abereak hautatzeko eta ugaltzeko teknikak garatzea eta aplikatzea, bai eta, helburu hori betetzeko osagarri edo/eta komenigarri diren ekintzak ere.".

Aberekin, S.A. akziokako baltzuaren akziodunen Batzorde Orokorrak 2003ko maiatzaren 8an izandako bilkura berezian, Administrazio-Batzordeak proposatuta, baltzuaren kapitala hirurehun mila eta euro bat eta hamazazpi zentimotan (300.001,17) gehitzea erabaki zuen, 49.917 akzio berri jaulkiz, B seriekoak. Akzio bakoitzaren balio nominala sei euro eta zentimo (6,01) batekoa da, eta, horien zenbakiak 50.870tik 100.787ra doaz, biak barne.

Nekazaritza eta Arrantza Sailak Aberekin S.A. baltzuaren kapital-gehikuntzan parte hartu nahi du, baltzu horren helburuak bat baitatoz Sailaren helburu eta ekintza-bideekin.

Horregatik, Administrazio-Batzordeak kapitala gehitzeko egindako txostena aztertu eta gero, egoki iritzi zaio kapital hori gehitzeari. Horrela, EAEko Administrazioak %8,63rekin parte hartuko du Aberekin, S.A. baltzuaren kapitalean, hori guztia, Euskadiko Ondareari buruzko 1983ko uztailaren 27ko 14/1983 Legeak 44. artikuluan xedatzen duen prozedurarekin bat (EHAA, 117. zk., 1983ko abuztuaren 6koa).

Horren indarrez, Ogasun eta Herri Administrazio sailburuak eta Nekazaritza eta Arrantza sailburuak proposatuta, Jaurlaritaren Kontseiluak 2003ko urriaren 7an izandako bileran eztabaidatu eta onartu ondoren, honako hau

XEDATU DUT:

1. artikulua.– Baimena ematea Euskal Autonomia Erkidegoaren Administrazioari ABEREKIN, S.A. akziokako baltzuaren akziodunen batzorde orokor berezian 2003ko maiatzaren 8an adostutako kapital-gehikuntzan parte hartzeko, jaulkitako sei euro eta zentimoko (6,01) balio nominala duten 33.278 akzio harpidetuz. Akzioak B seriekoak dira, eta, horien zenbakiak 50.870tik 100.787ra doaz, biak barne. Guztira berrehun mila euro eta hirurogeita hemezortzi zentimo (200.000,78) ordainduko lituzte, eta, EAEko Administrazioak baltzu horren kapitalean daukan partaidetza %8,63 izango litzateke.

2.– Euskal Autonomia Erkidegoaren Administrazioak, harpidetutako akzioei dagokien diru-kopuru osoa ordainduko du 2003. ekitaldian, hau da, 2003ko abenduaren 31 arte.

2. artikulua.– Euskal Autonomia Erkidegoaren Administrazioari dagozkion bazkide-eskubideak Nekazaritza eta Arrantza sailburuak izango ditu bere esku. Ahalmen horiek sailburuorde edo zuzendari baten esku utzi ditzake, orokorrean edo kasu berezietarako. Lehenengo kasuan, beharrezkoa da eskuordetzea Euskal Herriko Agintaritzaren Aldizkarian argitaratzea.

3. artikulua.– Ogasun eta Herri Administrazio Saileko Ondare eta Kontratazio zuzendariari baimena ematea, Euskal Autonomia Erkidegoaren Administrazioaren izenean, akzioen zenbateko harpidetu eta estaltzeko beharrezkoak diren ordainketak eta ekarpenak egin ditzan, bai eta 1. artikuluan xedatutakoa betetzeko beharrezkoak diren gainerako jarduketetarako ere.

Vitoria-Gasteizen, 2003ko urriaren 7an.

Lehendakaria,

JUAN JOSE IBARRETXE MARKUARTU.

Ogasun eta Herri Administrazio sailburua,

IDOIA ZENARRUTZABEITIA BELDARRAIN.

Nekazaritza eta Arrantza sailburua,

GONZALO SAENZ DE SAMANIEGO BERGANZO.