Euskal Herriko Agintaritzaren Aldizkaria

135. zk., 2001eko uztailaren 14a, larunbata

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Industria, Merkataritza eta Turismo Saila

4047

EBAZPENA, 2001eko ekainaren 20koa, Eusko Jaurlaritzaren Industria, Merkataritza eta Turismo Sailaren Energia zuzendariarena, "Ermuko sarea-1. zabalkuntza 1 zk.ko Addendum-erako 1 zk.ko aldaketa" izeneko proiektuko etxebizitza eta merkataritza gas naturalaz hornitzeko gasbidearen instalazioa herri onurakotzat onartzeko eskaerari buruzkoa".

Erref.: GUD-IV-Eru CG-B-99/36 GH/AOK

Pilar Urruticoechea Uriarte andreak, Euskadiko Gas Baltzua, S.A. (NATURGAS) enpresaren izen eta ordezkaritzan, Bizkaiko Lurralde Historikoko Ermua udalerria etxebizitza eta merkataritzarako gas naturalaz hornitzeko instalazioaren banaketa-sarea, "Ermuko sarea-1. zabalkuntza 1 zk.ko Addendum-erako 1. zk.ko aldaketa" izenekoa, onura publikokotzat onartzeko eskaria aurkeztu du 2001-01-24an.

Espediente honi ebazpena ematerakoan, ondorengoak kontuan hartu eta horiei buruzko aipamena egin beharko da:

GERTAKARIAK

Bat.– Industria eta Merkataritza Sailaren 1989-05-02ko Aginduz, NATURGAS enpresari eman zitzaion Bizkaiko Lurralde Historikoko zenbait herri, eta horien artean Ermua, etxebizitza eta merkataritza erabilerako gas naturalaz hornitzeko zerbitzu publikoaren emakida administratiboa.

Bi.– NATURGAS, S.A. enpresa Euskadiko Gas Baltzua, S.A. enpresarekin, xurgatze-bidez, bat egitea zela eta, Lurralde Ordezkaritza honek baimena eman zuen 1996-11-07an Euskadiko Gas Baltzua, S.A. enpresaren eskura aldatzeko NATURGAS, S.A.ri aurretik emandako titularitate administratibo guztiak, Ermua udalerria etxebizitza eta merkataritza erabilerako gas naturalaz hornitzeko emakida administratiboa barne.

Hiru.– Euskadiko Gas Baltzua, S.A. enpresa "Ermuko sarea. 1. zabalkuntza-1 zk.ko addendum-erako 1 zk.ko aldaketa" izeneko Proiektuan aipatzen diren instalazioak jartzeko baimenaren titularra da eta baimen hori Energia zuzendariak 2000ko urtarrilaren 19an hartutako Ebazpenez eman zitzaion, eta orain instalazio horiek herri-onurakotzat onartzeko eskatzen du aipatu enpresak.

Lau.– Erreferentziako espedientea jendaurrerako epean ikusgai jarri zen eta, izapidea bete ondoren, dagokion iragarkia argitaratu zen EHAAn 2001eko apirilaren 4an, eta BAOn 2001eko martxoaren 28an, baita 2001eko martxoaren 19ko Deia eta El Correo egunkarietan ere. Halaber, iragarki bera zegokion udalari bidali zitzaion udaletxeko iragarki-oholean ikusgai jar zezan 2001eko ekainaren 4tik 25era. Eskakizun horiek bete direlarik, ez da inolako alegaziorik aurkeztu.

Honako hauek dira Ebazpen honen.

OINARRI JURIDIKOAK

Bat.– Energiako Zuzendaritza da ebazpen hau emateko eskumenak dituen organoa, halaxe baitago xedatuta Industria, Merkataritza eta Turismo Sailaren egitura organikoa eta funtzionala ezartzen duen otsailaren 23ko 131/1999 Dekretuan (1999-02-26ko EHAA).

Bi.– Urriaren 7ko 34/1999 Legeak, hidrokarburoen sektorekoak (1998-10-08ko EAO), herri-onurakotzat jotzen ditu Legearen IV. tituluan aipatzen diren instalazioak, gas-erregaiak kanalizazio bidez hornitzeari dagozkionak, alegia.

Hiru.– Espedientearen izapideetan, aipatutako legean ezarritako baldintzak betetzen direla bermatzen da.

Aipatutako legeak eta oro har aplikatzekoak diren bestelako xedapenak aztertuta, honakoa.

EBATZI DUT:

"Ermuko sarea-1. zabalkuntza 1 zk.ko Addendum-erako 1. zk.ko aldaketa" izeneko proiektuko instalazioak herri onurakotzat jotzea. Adierazpen horrek berarekin bat dakar ondasunak okupatu beharra edo eskubideak eskuratu beharra. Era berean, 1954ko abenduaren 16ko Nahitaezko Desjabetzaren Legeko 52. artikuluarekin bat etorriz, okupazioa presaz egin behar da eta lege horretako 53. artikuluan aipatzen diren erregistratze-arauak betez.

Instalazio hau ondoko baldintzen eraginpean egongo da:

– Igarotzeko behin betiko bide-zorra: 4 metroko zabalera duen –2 metro hodiaren ardatzaren albo bakoitzean– lur-zerrenda; bertan lurpetik bideratuko dira gasa eramateko behar diren hodiak eta 34/1998 Legearen, hidrokarburoen sektoreari buruzkoa, babesean bertatik eraman daitezkeen lineak eta telekomunikaziorako behar direnak. Lur-zerrenda hori, halaber, honako jabari-mugapenetara lotuko da:

a) 50 zentimetro baino sakonago goldatzeko lanak edo antzekoak egitea debekatuta dago betiko bide-zorra egotzi zaion lur honetan, baita zurtoin handiko zuhaitzak edo zuhaixkak landatzea ere.

b) Instalazioen mantenimendurako beharrezko langileek eta ekipoek sarrera librea dute, eta kalterik eragiten badute, beraiek ordaindu beharko dute.

– Trazaduraren ardatzaren alde batean edo bestean debekatuta dago 5 metro baino gutxiagoko tartean instalazioen funtzionamendu egokia eragotzi edo kaltetu dezaken obrarik egitea edo beste edozein ekintzarik egitea. Distantzia hori murriztu egin daiteke behin betiko bide-zorrarekin bat etorri arte, betiere berariaz eskatu eta Administrazioko erakunde eskudunak ezarritako baldintzak betetzen badira.

– Aldi baterako okupazioa, obrak egiteak bere baitan dakarren beharra den aldetik; traba guztiak kendu egin beharko dira: finken planoetan finka bakoitzerako islatzen dena eta ukitutako ondasun eta eskubideen zerrenda zehatz eta indibidualizatuan biltzen dena aintzat hartuta.

Ebazpen honek ez du administrazio-bidea amaitzen, eta, ondorioz, interesdunak gorako errekurtsoa aurkez dezake Energia, Antolamendu eta Industria Administrazioko Sailburuordetzari zuzenduta hilabeteko epean, betiere azaroaren 26ko Herri Administrazioen Araubide Juridikoaren eta Administrazio Prozedura Erkidearen 30/1992 Legea aldatzen duen 4/1999 Legean ezarritakoaren arabera.

Vitoria-Gasteiz, 2001eko ekainaren 20a.

Energia zuzendaria,

TXABER LEZAMIZ CONDE.