Smolensk
Errusiako hiria, izen bereko probintziako (49.8000 km2 eta 1.134.000 biztanle) hiriburua, Dnieper ibaiaren ertzean. 321.000 biztanle (1983). Elektroteknia, kimika eta ehungintza industriak. Errusiako hiri zaharrenetakoa da; Smolenski buruzko lehenengo berriak 863koak dira. Historian zehar garrantzi handiko komunikabide eta salerosketa gunea izan da; besteak beste, Itsaso Beltzaren eta Baltiko itsasoaren arteko baregoen igarobidea izan zen. Poloniak, Errusiak eta Lituaniak bere mendean hartu nahi izan zuten; XIV. mendean Lituaniaren esku gelditu zen, eta 1664an Errusiak bereganatu zuen. Bigarren Mundu Gerran alemaniarrek hartu zuten baina 1943an berriro errusiarren mende gelditu zen.
