Savoia
(Fr. Savoie). Frantziako hego-ekialdeko departamendua [73], antzinako Savoiako lurraldearen hegoaldean. 6.270 km2 eta 323.675 biztanle. Mugak: iparraldean, Savoia Garaia (Haute-Savoie) eta Ain; ekialdean, Italia (Piemonte); hegoaldean, Alpe Garaiak, eta mendebalean, Isère. Hiriburua: Chambéry. Hiri nagusiak: Albertville, Saint-Jean-de-Maurienne. Lurralde menditsua da, eta Isère ibaia igarotzen da erdialdetik, mendialde garai batzuen artean: Belledonne (2.981 m), Grandes Rousses (3.468 m), Beaufort eta Vanoise (3.852 m). Haran ugari dago (Tarantaise, Maurienne, Combe de Savoie, Arly…) eta mendate garaiak: Mont-Cenis, Iseran, Petit-Saint-Bernard. Chambéry hiriburua eta Bourget aintzira Isère eta Rhône ibaien arteko haranen bitarteko ordokietan daude. Turismoa guztiz garrantzitsua da (mendiko eta neguko kirolak).
