Kultura eta Hizkuntza Politika Saila

Manet, Édouard

Frantses margolaria eta grabatzailea (Paris, 1832 - Paris, 1883). Thomas Couture margolariaren ikasle izan zen (1850-56). Louvre museoko maisuen obrak aztertu zituen eta Italian, Holandan, Alemanian, Austrian (1856) eta, gero, Espainian izan zen (1865), kolorearen erabilera aztertzen. Espainiako margolariak, Goya eta Velázquez batez ere, sakonago aztertu zituen. Japoniako margolaritza ere aintzat hartu zuen. Hasieran, Baudelaire-ren eraginez batez ere, errealismoari lotu zitzaion, eta eguneroko bizimodua islatu zuen bere koadroetan: Asentsio edalea(1858). 1863an pintura modernoaren abiapuntutzat hartzen diren bi obra nagusiak margotu zituen: Gosaria belar gainean eta Olinpia. Bere koadroetan emakume biluziak agertzen zirela eta, Frantziako Errege Akademiaren Aretoak sarrera debekatu zien bertan. Manet-en estilo baina geroago inpresionismoari jarraitu zioten margolari gazteen miresmena irabazi zuen, eta 1873tik aurrerako obra inpresionismoaren aitzindaritzat hartzen da. Manet-en estiloaren ezaugarri nagusiak koloreen argitasuna eta argien eta itzalen nahasketa dira. Harenak dira, besteak beste, Espainiar gitarrista (1861), Lola Valentziakoa, Musika Tullerietan (1863), Zezenaren heriotza (1866), Balkoia (1868), Bikotea arraunlari jantzia (1874), Argenteuil (1875), Naná (1877) eta Folies-Bergère-ko taberna.