L’Herbier, Marcel
Frantses zinema zuzendaria (Paris, 1888 - 1979). Ikasketa anitzeko gaztea, kritikaria, poeta eta musikaria. Lehen Mundu Gerran ezagutu zuen zinema, Frantziako Gudarostearen Zinema Zerbitzuetan hartu zutenean. Garrantzi handiko lan teorikoak egin zituen, eta laster Eldorado (1921), Matias Pascal zena (1925, Le feu Mathias Pascal), Gizagabea (1924, L’inhumaine), eta Dirua (1928, L’argent) egin zituen, zinema mutuaren garaiko lan bikain eta garrantzitsuak. Zinema ahostuna sortu zenean abangoardia utzi eta lan komertzialak egin zituen, kalitatearen eta interesaren kaltean. Bere bizitzaren azkenaldian telebistan jardun zuen.
