Ferneyhough, Brian
Britainiar musikagilea (Coventry, Ingalaterra, 1943). Musikarekin izan zuen lehen harremana banda eta txarangetan izan zen. Birminghamgo Musika Eskolan musika klasikoa ikasten ari zela (1961-1963), Anton Webern, Karlheinz Stockhausen eta Pierre Boulezen lana ezagutu zuen. Konposizioa ikasi zuen sir Lennox Berkeley-ekin Royal Academy of Music-en (1966-1967). Hirurogeita hamarreko hamarkadaren hasierarako lortua zuen musikagile ospea. Irakasle izan da Friburgon (1973-1986), Hagako Kontserbatorioan (1986-1987) eta Kalifornia eta San Diegoko unibertsitateetan (1987. urteaz geroztik). Bere lanik aipagarrienak hauek dira: harirako lau kuartetoak (1967,1980,1987 eta 1990), hiru Time and Motions Studies (1974-1977) eta Carceri d'Invenzione (1981-1987).
