bakuba
iz. Zaireko herri bateko kidea, Sankuru eta Kasai ibaien artean bizi dena. Antzinako Kongon erresuma handia osatu zuen herri honek. Erregeen gortean erabiltzen zen ia erabat hauen artea: erregea irudikatzen duten estatuatxoak dira (XVII. mendekoak) zaharrenak. Aipagarriak dira bakubek egiten zituzten emakume-buru itxurako edontziak eta maskarak. Fama handia dute, halaber, marrazki geometrikoz apaindutako Kasaiko oihalek.
