babuino
iz. Zool. Papioiaren generoko Afrikako tximinoa, zerkopitezidoen familiakoa (Papio). Handia izaten da, 80 cm ingurukoa, eta muturra kanpoaldera luzatua izaten du, zakurraren antzera. Buztana luzea du; ilea kolore arre berdaxkakoa izaten du bizkarrean, eta zuri horixka matrailetan. Aurpegia, eskuak eta oinak kolore beltzekoak ditu. Antolaketa bereziko eta hierarkia zehatzeko talde handietan bizi da; babuino zahar indartsu bat izaten dute talde horiek buruzagi eta gidari. Afrikan, Saharaz behetiko lurraldeetan bizi da. 30 babuino mota inguru daude. Babuino edo papioi sakratua Abisinia aldekoa da jatorriz; egiptoarren Mandril Sakratua izan zen berau eta sarritan agertzen da tenpluetako marrazkietan. Egiptoko hilobietan tximino hauen momiak ere aurkitu dira.
