Ingurumen-ebaluazioa

Dekretuaren xedea:

1. Igogailuak mantentzeko lanen irismena eta maiztasuna eta igogailuak zaintzeaz arduratzen diren enpresen betebeharrak zehaztea.

2. Igogailuak aldizka ikuskatzeko prozedura arautzea, ikuskapena arauzko baldintzen araberakoa izateko.

Agindu honetako xedapenak Euskal Autonomia Erkidegoko igogailu guztiek bete behar dituzte, haien erabilera dena delakoa izanda ere, baldin eta otsailaren 8ko 88/2013 Errege Dekretua, azaroaren 8ko 2291/1985 Errege Dekretuaren bidez onartutako Jasotzeko eta Mantentze Lanetako Aparatuen Erregelamenduko AEM 1 «Igogailuak» jarraibide tekniko osagarria onartzekoa, bete behar badute.

1. Igogailuak mantentzeko ikuskapenen bidez egiaztatu behar da igogailuen segurtasun-baldintzak ahalik eta onenak direla eta, matxurarik izateko arriskua ahal bezainbat txikituta, instalazioak ahalik eta eraginkorrenak direla.

2. Aurreko paragrafoan finkatutako helburua lortzeko beharrezko elementu guztiak ikuskatu behar dira; hala ere, igogailuak mantentzeko ikuskapenek gutxienez dekretu honetako I. eranskinean aipatutako irismena izango dute.

3. Maiztasun honekin egin behar dira igogailuak mantentzeko ikuskapenak:

   Familia bakarrarentzako etxebizitzetako igogailuak eta 0,15 m/s-ko abiadura edo txikiagoa dutenak mantentzeko ikuskapenak, lau hilabetean behin.

   Gainerako igogailuak mantentzeko ikuskapenak, hilabetean behin.

1. Jasotzeko eta Mantentze Lanetako Aparatuen Erregelamenduko 11., 12. eta 19. artikuluek eta AEM 1 «Igogailuak» jarraibide tekniko osagarriaren 5.3.1, 5.4. eta 7. atalek xedatzen dituztenez gain azaroaren 8ko 2291/1985 Errege Dekretuaren bidez onartu zuten Jasotzeko eta Mantentze Lanetako Aparatuen Erregelamendua, artikulu honetako betebeharrak dituzte igogailuak zaintzeaz arduratzen diren enpresek.

2. Hauen berri eman behar diete titularrei, idatziz:

   1. Noiz egiten dituzten instalazioak mantentzeko ikuskapenak eta zer emaitza lortzen dituzten.

   2. Zer elementu aldatzen dituzten edo aldatu behar dituzten, igogailuak ondo ibiltzeko.

   3. Zer akats dituzten instalazioek.

   4. Zer aldaketa dauden legedian.

   5. Noiz egin behar duten aldizkako hurrengo ikuskapena.

3. Dekretu honen 6. artikuluan aipatutako jakinarazpena egingo dute.

4. Hauen berri eman behar diote industria-gaien gaineko eskumena duen lurralde-ordezkaritzari, idatziz:

   1. Zer aldaketa dauden beren ardurapeko instalazioen zerrendan igogailuak zaintzen dituzten enpresak aldatzeagatik edo instalazioak urte-sasoi batzuetan bakarrik erabiltzeagatik. Gehienez, 30 egun dituzte horrelakoak jakinarazteko, eta II. eranskineko eredua erabili behar dute.

      Igogailuei alta emateko, II. eranskineko agiria ez ezik beste hauek ere aurkeztu behar dira: mantentze-lanak egiteko kontratua; aldizkako azken ikuskapenaren ziurtagiria baimendutako kontrol-erakundeek ikuskatu behar dituzte igogailuak; eta igogailuaren kokapenaren eta instalazioaren ezaugarrien plano edo krokis bat.

   2. Ea badagoen instalazioei, pertsonei edo ondasunei kalte egiten dien istripurik. Lehenbailehen jakinarazi behar dituzte horrelakoak, eta, gehienez ere, 24 orduan. Horretarako, III. eranskinean adierazitako eredua erabiliko da.

   3. Beren ardurapeko instalazioen zerrendako zer igogailu ez dituzten ikuskatzen, aldizkako ikuskapena egiteko epea igarota ere.

5. Nahiz eta igogailu bat beren ardurapeko instalazioen zerrendatik kanpo gelditu, agiri hauek urtebetez gorde behar dituzte, eguneratuta:

   1. Jasotzeko aparatuen erregistro-zenbakia (RAE zenbakia).

   2. Igogailuen ezaugarriak.

   3. Igogailuaren kokapenaren eta instalazioaren ezaugarrien planoa edo krokisa.

   4. Instalazioak martxan jartzeko agirien kopiak.

   5. Mantentze-lanak noiz egiten diren frogatzeko egiaztagiriak (gutxienez, azken bi urteetakoak).

   6. Matxurak eta abisuak (gutxienez, azken bi urteetakoak).

   7. Aldizkako ikuskapenen ziurtagirien kopiak (gutxienez, azken biak).

   8. Hala badagokio, akatsak konpondu izanaren ziurtagiriak.

6. Igogailuaren liburua egunean izan behar dute. Industria, Merkataritza eta Turismoko sailburuaren 2001eko apirilaren 3ko Aginduak ezarri zuen igogailuaren liburua.

   IV. eranskinean adierazitako jarduna gauzatzeko behar diren jarduera-prozedurak izango dituzte eskura.

8. Igogailuak aldizka ikuskatzerakoan antzemandako akatsak konpondu izana egiaztatu behar dute.

9. Aldizkako ikuskapenekin zerikusia duten prozedurak kudeatzeko, industria-gaien gaineko eskumena duen Eusko Jaurlaritzako Sailak horretarako prestatutako aplikazio informatikoa erabiliko dute.

10. Baldin eta industria-gaien gaineko eskumena duen lurralde-ordezkaritzak informazio edo agiririk eskatzen badie, haren eskura jarri behar dute. Bereziki, agiri hauek aurkeztu behar dizkiote, urtarril bakoitzean:

    1. Beren ardurapeko igogailuen kopurua, antzinatasun, erabilera eta igogailu motaren arabera sailkatuta.

    2. Azken urtean Lurralde Historikoan gertatutako istripuak eta, tartean, igogailuen mantentzea egiten duten pertsonek izandakoak.

    3. Pertsonak erreskatatu diren igogailuak.

    4. Lurralde Historikoan sarri matxuratzen diren igogailuak, baita igogailu bakoitzak urtean dituen matxuren batez bestekoa ere, antzinatasun, erabilera edo igogailu motaren arabera. Alde horretatik, igogailu batek matxura gehiegi ditu baldin eta urtean 10 matxura baino gehiago baditu, edo, igogailua industrian edo eraikin publikoetan erabiltzen bada, baldin eta 15 baino gehiago baditu.

    5. Solairu-parekatzearekin zerikusia duten matxurak.

1. Igogailuak erabilgarri diren bitartean ikuskatuko dira, arauz ezarritako industria-segurtasunaren eskakizunak betetzen dituztela egiaztatzeko. Ikuskapen horiek horretarako gaitutako kontrol-erakundeek egingo dituzte. Maiztasuna ITC-AEM 1 «Igogailuak» Jarraibide Tekniko Osagarrian ezarrita dago, edo hura ordezten duen araudian.

2. Igogailuen titularrek (jabeek edo errentariek) arduratu behar dute dagokionean igogailuak ikuskatzeko eskatzeaz, eta ikuskapenak egiten lagundu behar diete kontrol-erakundeei, instalazioetan sartzen utzita.

3. Igogailuak ikuskatzeko, «Igogailuen aldizkako ikuskapenen eskuliburu»ko irizpideak erabili behar dira.

4. Igogailuak aldizka ikuskatzeko datak martxan jartzeko dataren araberakoak dira. Igogailuak ez ikuskatzeak edo ikuskapenak egiten atzeratzeak ez dakar ikuskapenak dagokionean egin behar ez izatea.

1. Aldizkako hurrengo ikuskapena egiteko epea amaitu baino bi hilabete lehenago gutxienez, igogailuak zaintzeaz arduratzen diren enpresek jakinarazpen bat bidali behar diete titularrei, dagokion ikuskapena egiteko epea noiz bukatzen den adierazteko, eta ikuskapenei buruzko araudi teknikoa ere bidali behar diete. Gainera, industria-gaien gaineko eskumena duen lurralde-ordezkaritzak egindako agiri bat bidali behar diete, jakinarazteko ikuskapenak nahitaezkoak direla legez eta azaltzeko zer kontrol-erakundek ikuska ditzaketen igogailuak eta zer ondorio izan ditzakeen igogailuak epe barruan ez ikuskatzeak.

2. Igogailuak ikuskatu aurretik, kontrol-erakundeek jakinarazi behar diete titularrei noiz duten asmoa igogailuak ikuskatzeko.

1. Ikuskapenetan, honako elementu hauek ikuskatuko dira:

   1. Hutsunera sartzeko ateak eta euren katigatze-dispositiboak.

   2. Esekitze-kableak eta lokailuak.

   3. Abiadura mugatzailea, kabina-geldiarazlea, bastidorea eta gidariak.

   4. Kabina.

   5. Kontrapisua eta gidariak. Kontrapisu-jausgailua.

   6. Kabinako motelgailuak eta kontrapisua.

   7. Aginteak eta beste segurtasun-dispositibo batzuk.

   8. Hutsunea eta esparrua.

   9. Makina-gela, trakzio-ekipoa eta maniobra-koadroa. Polea-gela. Igogailuek ez badute makina-gelarik, makinak gordetzeko guneak.

      V. eranskinak zehazten du zer egiaztatu behar den.

1. Igogailuak ikuskatzeko, kontrol-erakundeek instalazioetara bidali behar dituzte igogailuak zaintzeaz arduratzen direnak, beharrezko egiaztapenak eta probak egiteko.

2. «Igogailuen aldizkako ikuskapenen eskuliburu»ko egiaztapenak eta probak egin behar dituzte kontrol-erakundeek.

3. Igogailuak ikuskatu eta hamabost egunean gehienez ere, kontrol-erakundeek ikuskapenen ziurtagiriak bidali behar dizkiete instalazioen titularrei, eta haien kopiak igogailuak zaintzeaz arduratzen diren enpresei. Gainera, epe berean, ikuskapenaren datu guztiak adierazi behar dituzte Eusko Jaurlaritzaren barruan industria-gaien gaineko eskumena duen sailak berariaz prestatutako aplikazio informatikoan.

4. Ikuskapenaren ziurtagirian honako hauek adierazi behar dira gutxienez:

   Kontrol-erakundearen izena.

   Ziurtagiri-zenbakia, jasotzeko aparatuen erregistro-zenbakia eta ikuskapenaren indarraldia.

   Ikuskapena egiten duen pertsonaren izena eta sinadura.

   Zein espezifikazio teknikorekin egiten den ikuskapena.

   Instalazioaren ezaugarriak.

   Akatsen identifikazioa eta deskripzioa, VI. eranskinaren arabera.

   Akatsen kalifikazioa eta haiek konpondu izana egiaztatzeko epea.

   Ikuskapenaren emaitzak.

   Ikuskapenean dauden pertsonak.

   Ikuskapenaren data.

   Interesgarri iritzitako oharrak.

5. Ikuskapenen aktekin batera, instalazioetan antzematen diren akats guztien zerrendak bidali behar dira. Akatsek VI. eranskinean zerrendatutakoen artekoak izan behar dute.

6. Ikuskapenekin ados ez badaude, instalazioen titularrek erreklamazioa aurkez dezakete industria-gaien gaineko eskumena duen lurralde-ordezkaritzan, ikuskapenen aktak berrikus ditzan. Erreklamazio horien ebazpenen aurka, gora jotzeko errekurtsoa aurkeztu ahal izango da, indarreko legedian aurreikusitakoari jarraikiz.

7. Dagozkion prozeduren bidez, industria-gaien gaineko eskumena duen lurralde-ordezkaritzak kontrol-erakundeen ikuskapen-lana kontrola dezake, eta instalazioetan bertan egon daiteke, igogailuak 2. atalean adierazitako aldizkako ikuskapenen eskuliburuan esaten den bezala ikuskatzen direla egiaztatzeko.

1. Igogailuak aldizka ikuskatzerakoan antzematen diren akatsak arriskuaren arabera kalifikatu behar dira, irizpide hauek kontuan izanik:

   1. Akats oso larria: akats oso larriak dira pertsonei edo instalazioei kalte egiteko moduko berehalako arrisku larria ekar dezaketenak. Oso akats larririk antzematen bada, igogailua berehala gelditu behar da, eta ezin da martxan jarri akatsa konpondu arte.

   2. Akats larria: akats larriak dira, batetik, pertsonen eta gauzen segurtasuna berehalako arriskuan jartzen ez dutenak baina instalazioek huts egiten badute arriskuan jar dezaketenak eta, bestetik, instalazioak erabiltzeko aukera murrizten dutenak.

   3. Akats arina: akats arinak dira oso larriak edo larriak ez direnak.

      VI. eranskinak dakar akatsen zerrenda eta ebaluazioa.

Igogailuak ikuskatu izana nabarmentzeko, baldin eta ikuskapenen emaitzak onak badira, alegia, akats larririk edo oso larririk ez badago, kontrol-erakundeek VII. eranskineko ezaugarri-eredua jarri behar dute kabinan eta beheko solairuko atean, ondo ikusten den leku batean.

1. Baldin eta oso akats larririk antzematen bada igogailuak ikuskatzerakoan, kontrol-erakundeen ekimenez, igogailuak zaintzeaz arduratzen diren enpresek zerbitzu egin gabe utzi behar dituzte igogailuak, eta titularrei jakinarazi ezin dituztela jarri martxan akatsak konpondu arte.

2. Kontrol-erakundeak lehenbailehen jakinaraziko dio industria-gaietako Lurralde Ordezkaritzari kautelaz geldiarazi dela instalazioa.

3. Industria-gaien eskumena duen zuzendaritzak geldiarazte hori berretsi edo indargabetuko du.

1. Instalazioen titularrek arduratu behar dute akatsak konpontzeaz, eta baimendutako enpresa bat kontratatu behar dute horretarako. Akatsak konpontzen ez badituzte, isun hertsagarriak jar dakizkieke, eta/edo zigor-espediente bat abiarazi.

2. Igogailuak ikuskatzerakoan antzematen diren akatsak lehenbailehen konpondu behar dira, eta konponketa-egiaztagiria aurkeztu behar da konpondu izana egiaztatzeko. Igogailuak zaintzeaz arduratzen diren enpresek akatsak konpondu dituztela jakinarazi behar diete igogailuak ikuskatzen dituzten kontrol-erakundeei, Eusko Jaurlaritzaren barruan industria-gaien gaineko eskumena duen sailak berariaz prestatutako aplikazio informatikoaren bidez.

3. Hurrengo ikuskapenean egiaztatuko da akats arinak zuzendu egin direla. Aurreko ikuskapenetan atzemandako akatsak berriro gertatzen badira, hala zehaztu beharko da ikuskapen-ziurtagirian.

4. Akats larriak igogailuak ikuskatu eta sei hilabetean konpondu behar dira gehienez ere. Igogailuen titularrek edo, haien izenean, igogailuak zaintzeaz arduratzen diren enpresek akatsak konpondu dituztela jakinarazten badiete, berriz, kontrol-erakundeek egiaztapen-ikuskapena egin beharko dute, jakinarazpena hartu eta 30 egun naturaleko epean. Sei hilabete igaro eta igogailuak zaintzeaz arduratzen diren enpresek ez badute jakinarazten akatsak konpondu dituztela, kontrol-erakundeek ikuskapen-bisita egin beharko dute berriro, akatsak konpondu diren egiaztatzeko, eta, ikusten badute akatsak ez direla konpondu, oso larritzat kalifikatu behar dituzte, eta igogailuak zerbitzutik kanpo utzi.

5. Instalazioa geldiaraztea eragin duten eta oso larriak diren akatsak zuzentzeko, kontrol-erakundeek egiaztatu beharko dute titularrak edo haren izenean ari den kontserbazio-enpresak jakinarazi duela akatsak zuzenduta daudela, igogailuak atzera martxan hasi aurretik. Ikuskapen-bisitan akatsak zuzendu direla egiaztatu ondoren, kontrol-erakundeek aldeko ikuskapen-ziurtagiria emango dute.