Urriaren 24an ospatuko da VIII. Heziketa Topaketa, Hezkuntza Saila eta eLankidetza – Lankidetzarako eta Elkartasunerako Euskal Agentzia elkarlanean antolatutako ekimena, hezkuntza antiarrazista eta dekoloniala izango duena ardatz nagusi.

Topaketa Berritzegune Nagusian (Gasteiz Hiribidea 93, Vitoria-Gasteiz) egingo da, 9:15etik 14:00etara, eta arrazakeriak eta kolonialismoak hezkuntzan duten eraginaz hausnartzeko eta esperientziak partekatzeko gune izango da.

Jardunaldiak hiru une izango ditu: Egunera zaitez, gaia aurkezteko eta testuinguruan kokatzeko; Esperientziak elkarbanatu, praktika esanguratsuak trukatzeko espazioa; eta Ikaskuntzak sortu, etorkizuneko hezkuntza-praktiketarako gomendioak identifikatzeko parte-hartze saioa.

Parte hartuko dutenen artean izango dira Afrocolectiva, Calala Emakumeen Funtsa, Munduko Medikuak Euskadi, Bakea eta Elkartasuna – Meloia Zuritzen, AMUGE, Fahafahana eta Bidaya Emakume Musulmanen Elkartea.

Izena emateko epea irekita dago jada, eta eLankidetzaren webgunearen bidez egin daiteke.

Izena emateko azken eguna 2025eko urriaren 20a izango da, eta leku mugatua egongo da.

Informazio gehiago: www.elankidetza.euskadi.eus

Harremanetarako helbidea: agencia@elankidetza.eus