Erantzukizun zibileko aseguru bat eratu beharko da, eta alderdi hauek estaliko ditu: hirugarren pertsonei edo horien ondasunei sortutako balizko kalteengatiko kalte-ordainak, eta baimen honek onartutako jardueraren ondorioz ingurumen aldatua konpondu eta berreskuratzeko kostuak.

Aseguruaren gutxieneko zenbatekoa «Hondakinen Kudeaketa – Baldintza Partikularrak» atalean ezarritakoa izango da.

Aseguru horren zenbatekoa urtero eguneratu daiteke, ingurumen-organoak hala eskatuta, aurreko 12 hilabeteetako KPIa kontsumoko prezioen indizearen arabera handituta.

«Hondakinen Kudeaketa – Baldintza Partikularrak» atalean zerrendatutako hondakinak bakarrik kudeatu ahal izango dira, baldin eta horien EHZ kodeak Europako Hondakinen Zerrendan jasota badaude. Zerrenda horren bitartez aldatu zen hondakinen zerrendari buruzko 2014ko abenduaren 18ko 2000/532/EE Erabakia, Europako Parlamentuaren eta Kontseiluaren 2008/98/EE Zuzentarauari jarraikiz.

Hondakin arriskugabeak soilik kudeatuz gero, jasotako hondakin horiek ezingo dute izan 2008/98/EE Zuzentarauaren III. eranskina ordezten duen Batzordearen 2014ko abenduaren 18ko 1357/2014 Erregelamenduan ezarritako arrisku-ezaugarrietako bat ere.

Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen II. eranskineko kodeak dagozkie jarduera kudeatzeko eragiketei.

Euskadiko Hondakinak Prebenitu eta Kudeatzeko 2030eko Planak hondakinen kudeaketan ezartzen dituen autosufizientzia- eta hurbiltasun-printzipioak betez, ahal dela, EAEn sortutako hondakinak kudeatuko dira.

Balorizatzeko onargarriak diren hondakinak «Hondakinen Kudeaketa – Baldintza Partikularrak» atalean xehatzen dira.

Sustatzaileak hondakinak balorizatuko ditu, «Hondakinen Kudeaketa – Baldintza Partikularrak» atalean deskribatutako jardueraren bidez.

Instalazioan tratatzea aurreikusten den hondakin-jatorri berri bakoitzeko, operadoreak dagokion tratamendu-kontratua igorriko dio organo honi, eta kontratu horretan, hala badagokio, hondakina onartzeko parametro mugatzaile edo baldintzatzaileen proposamena erantsiko da. «Ingurumena Zaintzeko Programa – Baldintza Orokorrak» atalean ezarritako moduan entregatuko da.

Tratamendu-kontratu horietan hasieran proposatutako baldintzetan aldaketaren bat balego, ekoizlea eta kudeatzailea aldatu ez arren, kontratuak ingurumen-organo honetara bidaliko dira berriro, «Ingurumena Zaintzeko Programa – Baldintza Orokorrak» atalean ezarritakoaren arabera.

Hondakin jakin bat onargarria dela egiaztatu ondoren, jardueraren titularrak dokumentu horren titularrari onarpena ziurtatzen duen agiria igorriko dio, onarpen horren baldintzak ezarrita. Horrez gain, hondakina onartzeko parametro mugatzaileak edo baldintzatzaileak jasoko dira, eta, hala badagokio, hondakin-partida bakoitza hartu aurretik aztertu beharreko parametroak. Instalazioan inolaz ere ez dira onartuko baimendu ez diren hondakinak, edo hondakin onargarrien artean adierazitakoak izanik ere, bestelako hondakin mota generikoren batekin nahastuta egoteagatik kutsatuta daudenak.

Hondakin bat baztertzen denean, eta hondakin horren EHZ kodea hondakin baimenduena bada, tratamendu-kontratuan aurreikusitakoarekin bat etorriz, organo honi jakinarazpen bat bidaliko zaio berehala (ippc@euskadi.eus helbide elektronikora), eta honako hauek jakinarazi beharko zaizkio:

• Baztertzeko arrazoia.
• Baztertutako hondakina lekualdatzeko operadoreak aukeratu duen ordezko aukera kudeatzeko bidea.

Baldin eta onartu ez den partida beste autonomia-erkidego batetik badator, jatorrizko ingurumen-organoari ere jakinarazi egin beharko zaio.

Hondakin bat ezin bada onartu, zeinaren EHZ kodea hondakin baimenduen artean baitago, tratamendu negatiboaren kontratu bat egin beharko da, hondakin horiek kudeatzeko ezintasunaren arrazoiak azalduz.

Hondakinak lekualdatzeko, hondakinak lekualdatzen diren guztietan, bai instalaziotik kanpora, bai kanpotik instalaziora, behar bezala bete beharko da ekainaren 2ko 553/2020 Errege Dekretua eta Euskal Autonomia Erkidegoan gerora egiten den arau horren garapena.

Horrekin bat etorriz, hondakinak lekualdatzeko, identifikazio-agiri bat aurkeztu beharko da, jarraipen eta kontrola egiteko, Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen 31.2 artikuluaren arabera.

Unean uneko egoeraren ezaugarriei erreparatuta, ingurumen-organoak azalpenak eska ditzake, argitu diezaioten zergatik den ekonomikoki eta teknikoki ezinezkoa baimen honen barruko hondakinak Euskal Autonomia Erkidegoan kudeatzea, eta hori egingo du autosufizientzia- eta gertutasun-printzipioak aintzat hartuta eta Euskadiko Hondakinak Prebenitu eta Kudeatzeko 2030eko Planeko helburu estrategikoetan ezarritakoarekin bat etorriz.

Jardueraren titularrak lekualdaketari buruzko informazioa jaso beharko du bere fitxategi kronologikoan, eta identifikazio-agiriaren kopia sinatua gorde beharko du hiru urtez; bertan, hondakinak entregatu eta onartu izana adieraziko da.

Aldez aurretik jakinarazi beharreko hondakinen lekualdaketak identifikatzeko dokumentuen kasuan, jardueraren titularrak hondakina jasotzen denetik gehienez 30 eguneko epea izango du identifikazio-agiri hori organo eskudunari bidaltzeko.

Bidalketa hori gauzatzeko, Industria, Trantsizio Energetiko eta Jasangarritasunaren Sailaren ingurumen-informazioa kudeatzeko sistema baliatuko du.

Kudeatu beharreko hondakinak beste estatu batzuetatik datozen kasuetan, Europako Parlamentuaren eta Kontseiluaren 2024/1157 (EB) Erregelamenduan, 2024ko apirilaren 11koan, hondakinak lekualdatzeari buruzkoan, ezarritakoa bete beharko da. Erregelamendu horrek 1257/2013 (EB) eta 2020/1056 (EB) erregelamenduak aldatzen ditu, eta 1013/2006 (EE) Erregelamendua indargabetzen du.

Gainera, aurreikusten bada zabortegian deuseztatu beharko direla inportatu beharreko hondakinak zein inportatutako hondakinen helmugako instalazioan aurreikusitako balorizatze- eta deuseztatze-tratamendutik lortutako korronte nabarmenen bat, orduan, kontsulta bat egin beharko zaio organo honi, justifikatuz aurreikusitako mugaz gaindiko lekualdaketak bat datozela EAEko Hondakinak Prebenitzeko eta Kudeatzeko 2030 Planean zehaztutako hondakinen inguruko plangintzaren helburuekin.

Bai ontziratzeko eta biltzeko baldintzek, bai sustatzaileak hondakin arriskutsuak errepidez garraiatzeko erabili beharreko garraiobideek, gai horiek errepidez garraiatzeari buruzko indarrean dagoen legerian ezarritako xedapenak bete beharko dituzte.

Baimenean jasotako hondakin arriskutsuak salgai arriskutsutzat jotzen badira Salgai Arriskutsuen Errepideko Nazioarteko Garraioari buruzko Europako Akordioaren (ADR) B. eranskinaren arabera, eta hondakin horiek ibilgailu propioekin garraiatzen badira, ontziratzeko eta biltzeko baldintzek eta sustatzaileak erabili beharreko garraiobideek salgai arriskutsuen errepideko garraioari buruz indarrean dagoen legerian ezarritako xedapenak bete beharko dituzte.

Nolanahi ere, sustatzaileak deklaratutako garraio-unitate bakoitzeko hondakin arriskutsuen kantitatearen eta salgaiak paketatzeko baldintzen arabera, xedapen horiek 1.1.3.6.2 apartatuan (kopuruengatiko salbuespen partziala garraio-unitate bakoitzeko) eta 3.4 kapituluan (bilgarriagatiko salbuespenak kopuru mugatuetan) ezarritakoetara mugatu ahal izango dira, puntu horietan jasotako zehaztapenak betetzen badira.

Instalaziora tratamendua egiteko iristen diren hondakinen kontrola egin beharko da, baimeneko baldintzen arabera instalazioan onargarriak direla bermatzeko.

Kontrol horretan, ingurumen-organo honek onartutako tratamendu-kontratuan ezarritako egiaztapena egin beharko da. Agiri horretan, muga-parametroak eta onartzeko baldintzak ezarriko dira. Egiaztatze hori sarrera-kontroleko agiri batean erregistratuta geratuko da.

Tratamendu-kontratuak Estatuaren lurralde barruko hondakinen lekualdaketa arautzen duen ekainaren 2ko 553/2020 Errege Dekretuaren 5. artikuluan ezarritakoa bete beharko du, eta, besteak beste, honako alderdi hauek jaso beharko ditu: hondakinei emango zaien tratamendua, hondakin horiek onartzeko baldintzak eta alderdiek dituzten betebeharrak hartzaileak hondakina baztertzen badu.

Ezin izango dira onartu baimen honetan adierazitakoez bestelako hondakinak. Nolanahi ere, beste hondakin batzuk ere kudeatu nahi badira, beharrezkoa izango da aldez aurretik organo honen onespena, ingurumen-baimen bateratuan xedatutakoari jarraikiz.

Hondakin horien zamalanak egiteko ibilgailuen aparkalekuek zola iragazgaitza izango dute, eta behar diren maldak eta balizko isuriak biltzeko sareak, horiek kutxatila itsurantz edo biltzeko putzurantz zuzentzeko, bidean ibilgailuaren azpitik igaro gabe edo beste ibilgailu edo instalazio batzuetara hurbildu gabe.

Zamalanak egitean, hondakin arriskutsuak kudeatuz gero, gai arriskutsuak manipulatzeko eskatutako segurtasun-baldintzak bete beharko dira.

Instalazioan egiten diren hondakinen zamalanek eta manipulazioek, ekipoen estankotasunak eta deskargatzeetan biltegiratutakoen xurgapenak emisio lausoak edo kontrolik gabeak saihestu beharko dituzte, edo, saihestu ezin denean, ahalik eta gehien murriztu.

Hondakinak «Hondakinen Kudeaketa – Baldintza Partikularrak» atalean ezarritako gehieneko epean biltegiratu ahal izango dira.

Ezingo da gainditu ezarritako biltegiratze-ahalmena, baimenean kopururen bat zehaztu bada.

Solteko hondakinei dagokienez, izaera homogeneokoak batera biltegiratuko dira, eta aldez aurretik karakterizazioa egin beharko da elkarrekin biltegiratzeak ez duela arriskua areagotzen, ezta haren azken kudeaketa zailtzen ere ziurtatzeko.

Tratatu beharreko hondakinak biltegiratzeko instalazioek lurzoru iragazgaitzak izango dituzte, aurreikusitako zamak jasateko eta egon litezkeen ihes edo isuriei eusteko modukoak, eta biltegiratze-eremu bereiziak izan beharko dituzte hondakin onargarrien mota generiko bakoitzerako.

Hondakin arriskutsuak biltegiratzearen ondoriozko arriskuak murrizte aldera, jardueraren titularrak eremu bereizi bat jarri beharko du instalazioetan horiek biltegiratzeko. Gune horrek estalita egon beharko du, eta lurzoru iragazgaitzak izan beharko ditu.

Instalazioan onartutako hondakinak biltegiratzeko orduan, prezipitazio atmosferikoak sartzea eta haizeak hondakinak arrastatzea saihestu beharko da.

Hauts-itxurako hondakinak eta soltean jasotakoak pabiloiaren barruan gorde beharko dira, multzotan edo gelaxketan, tratamendua egiteko unea iritsi arte.

Pilak edo bateriak kudeatzen badira, plastiko indartuzko edukiontzietan biltegiratuko dira.

Egoera fisiko likidoan edo oretsuan dauden edo oso bustita daudelako isurketak edo lixibiatuak sor ditzaketen hondakinen kasuan, horiek biltzeko kubeta edo sistema egokiak jarriko dira, ezbeharrez gerta daitezkeen isurketak kanpora irten ez daitezen. Bilketa-sistemek independenteak izan behar dute isuriren bat gertatu eta nahasiz gero arriskugarritasuna handitzea edo kudeaketa zailtzea dakarten hondakin motetarako.

Hondakinak desagertu edo galtzen badira, edo ihesen bat gertatzen bada, berehala jakinaraziko da gertatutakoa ingurumen-organo honetan eta udalean.

Instalazioaren etenaldi teknikoaren egoera berezietan, edo instalazioaren ezohiko funtzionamenduaren ondoriozko bestelako egoeretan, instalazioaren titularrak baimendutako hondakinen transferentzia-zentro gisa jardun ahal izango du, hondakinak kudeatzeko beste instalazio baimendu batera eramateko.

Bai transferentzia-zentro gisa jardunda jaso daitezkeen hondakinak, bai jardueraren garapenean bertan sortutako hondakin guztiak, horretarako baimendutako kudeatzaileari entregatu beharko zaizkio.

Edonola ere, birziklatu edo balorizatu daitezkeen hondakin kudeatuak helburu horietara bideratuko dira, eta jardueraren titularrak hondakin horien hartzaileekin egindako tratamendu-kontratuetan jasoko da gertaera hori.

Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen 64. artikuluan ezarritakoari jarraikiz, jardueraren titularrak fitxategi elektroniko bat izan beharko du, eta bertan, esku hartutako jarduera guztiei buruzko datuak jasoko dira ordena kronologikoan. Aipatutako fitxategi kronologikoan sartuko da, orobat, hondakinen ekoizpen- eta kudeaketa-lanen agiri bidezko egiaztapenean bildutako informazioa, eta bertan, gutxienez, honako datu hauek jasoko dira:

1. Onartutako hondakinen jatorria (jatorria eta prozesua, enpresa sortzailea eta enpresa garraiolaria).
2. Hondakin horien kantitateak, izaera, konposizioa eta identifikazio-kodea.
3. Hondakin-partida bakoitzaren onarpen- eta harrera-data, eta, hala dagokionean, ematean sortutako identifikazio-agiria.
4. Onartu ez diren hondakin-partidei buruzko datuen erregistroa (jatorria, kopurua, enpresa garraiolaria, ez onartzeko arrazoiak eta ordezko helmuga).
5. Biltegiratutako hondakinak instalazioko zer tokitan dauden.
6. Hondakinak aldez aurretik egokitzeko edo multzokatzeko eragiketak, hondakin-partiden datak, parametroak eta haiei buruzko datuak, hondakinen ondorengo helmuga eta partida
   bakoitzari emandako EHZ kodea.
7. Instalazioko kudeaketa-lanen datak edo azken kudeatzaile baimenduari bidalketa egin zaionekoa, kudeatzaile horren identifikazio-datuak, eta, hala badagokio, sortutako identifikazio-agiriarenak.
8. Izaera eta frakzioa (pisuan), bereizitako hondakin arriskutsuen mota bakoitzeko.

Artxibo kronologiko hori bost urtez gorde beharko da gutxienez, eta urtero bidali beharko da organo honetara, «Ingurumena Zaintzeko Programa – Baldintza Orokorrak» atalean ezarritakoaren arabera.

Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen 65. artikuluarekin bat etorriz, urte bakoitzeko martxoaren 1a baino lehen aurkeztu beharko da fitxategi kronologikoan jasotako informazioaren memoria laburra, dagokion urteko ingurumena zaintzeko programaren barruan.

Laburpen-memoriak ekitaldi bakoitzaren amaieran behin-behinean biltegiratutako hondakinen eta hondakin kopuruen zerrenda ere jasoko du, instalazioan tratatzeko onartuta baina oraindik tratatzeke dauden hondakinena, bai eta sortutako hondakinena ere.

• ARTXIBO KRONOLOGIKOA. Hondakinen kudeaketaren urteko adierazpena/memoria

Larrialdirik gertatuz gero, berehala esku hartzeko beharrezkoak diren material guztiak edukiko dira, kopuru nahikoan: berriro ontziratzeko erreserbako edukiontziak, beharrezkoa izanez gero; gerta daitezkeen isuriei eusteko produktu xurgatzaile selektiboak; segurtasuneko edukiontziak; kaltetutako inguruneak isolatzeko hesiak eta seinaleztapen-elementuak; eta norbera babesteko ekipamenduak.

Suteak itzaltzeko, industria-establezimenduetan suteen aurkako segurtasunaren arloan eskumena duten organismoek eskatutako ekipoak eta agenteak instalatuko dira. Hondakin erregaiak (plastikoak, pneumatiko erabiliak, etab.) biltegiratzeko berariazko eremuan sute-arriskuak prebenitzeko neurri zorrotzak ezarriko dira, esaterako, gehiegizko metatzeak saihestuko dira.

Hondakin izateari utzi zaiola deklaratzeko, Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legeren 5. artikuluan xedatutakoa aplikatuko da.

• Azpiproduktuak eta hondakin izateari uztea

«Hondakinen Kudeaketa – Baldintza Partikularrak» atalean eskatutako hondakinek hondakin izateari uzten ez badiote, hondakin gisa kudeatu beharko dira, indarrean dagoen araudia aplikatuta.