Zabaletak, lehenik eta behin, adierazi du pozik dagoela “ez garelako geurea den zerbaiti buruz hitz egiten ari, gizarte gisa guztioi dagokigun zerbaiti buruz baizik” “ahalegin partekatuaren” eta “alderdi bakoitzaren interes partikularrak gainditzen dituen borondatearen” ondorioz.

“Gatazkak —adierazi du— tentsioa baino ez dakar. Eskubideez eta erantzukizunez hitz egitea da partaidetzarako sare zuzenak hedatzeko bide bakarra. Ahaleginak bateratu nahi ditugu, eta egun hauetan horixe egin dugula ziurtatzeko moduan nago. Zintzotasunez aritu gara lanean. Eta leialtasuna eta diskrezioa erabiliz, konfiantza-giroa sortu dugu, akordio berrietara iristeko oinarririk onena eta sendoena izango dena, zalantzarik gabe.

Eteteko Enplegu Erregulazioko Espedienteek eraginpean hartutako langileentzako prestakuntzaren alorreko akordioa

Enpleguko sailburuak adierazi du lortutako lehen akordioak kontratua etetea dakarten espedienteetan sartuta dauden enpresek eta langileek prestakuntza-plan espezifikoak baliatzeko aukera izateko deialdia berrikustea eta aldatzea biltzen duela.

Zabaletak, halaber, esan du agindu horrek (aurreko Gobernuak jarri zuen abian martxoan) “ez zuela lortu gauzatzea"; izan ere, espedienteen eraginpeko ia 42.000 lagunetik soilik 394k heldu diote Planari, eta 15 milioi euro gastatuko zirela aurreikusita bazegoen ere, soilik 400.000 euro erabili dira.

“Horregatik –nabarmendu du sailburuak– ondorioztatu dugu laguntzei buruzko deialdi berriak hura baliatzeko baldintzak malgutu beharko lituzkeela. Ez zirudien gomendagarriena zenik zorroztasunaren alde egitea ezegonkortasun-egoeretan”.

Elkarrizketa Mahaia osatzen dutenen arabera, prestakuntza-eskaintzak “gehiago egokitu behar du langileen premietara eta enpresen ezaugarrietara”.

Era berean, kide horien ustez nahitaezkoa da “EEE egoeran dagoen langileari erabakitzeko autonomia handiagoa ematea”. Izan ere, uste dute aurrerapena izan daitekeela espediente batean sartuta dauden langileek beren prestakuntzarako laguntza ordaindua baliatu ahal izatea, nahiz eta beren enpresak ez erabaki laguntza horiek hartzea eta ikastaroak egiteko aukera planifikatzea.

Enpresek eta langileek abenduaren 30era bitarteko epea izango dute eskabideak aurkezteko eta Hobetuzek hilero aztertuko ditu.

Horregatik, sailburuaren iritziz, “ezinbestekoa da lanari ekitea, eta prestakuntzan inbertitzea gauzak aldatzen laguntzea da. Enpleguarekiko babesa langileen prestakuntza hobetzearekin lotuta dago”.

Laneko osasun eta segurtasunari buruzko akordioak

Lortutako lehenengo akordioa izan da Eusko Jaurlaritzak Lan Segurtasunaren  eta Osasunaren arloan 2007-2010 urteetarako onartu zuen Plan Estrategikoaren lehentasunak ezartzea.

Zazpi jarduera-ardatz daude eta hogeita hamar jarduera-lerro garatuko dira. 

Bigarren akordioari dagokionez, Lan Osasuneko Mahaiak erabaki du “estrategia berri bat praktikan jartzea sindikatuen, enpresarioen eta administrazioaren ahaleginak batzeko”, istripu gehienak eragiten dituzten arriskuak prebenitzeko asmoz. Eraikuntzan alturetatik gertatzen diren erorketetatik hasiko dira.

Elkarrizketa Mahaia osatzen dutenen arabera, “mahaiak metodologia hori beste sektore guztietara zabaltzeko asmoa du” eta ahaleginak bilduko ditu sektore bakoitzean gertatzen diren arrisku nagusietan.

Orain arte, lan-talde zehatz bat osatu da. Lan-talde horrek proiektu hori abian jarriko du, emaitzak aztertuko ditu eta egoki deritzon hobekuntzak garatzea proposatuko ditu.

Enplegu eta Gizarte Gaietako sailburuak bere agerraldia amaitzeko azpimarratu duenez, “hainbat konpromiso hartu dugu, eta hau hasiera baino ez da. Ziur naiz elkarren arteko ulerkuntzaren bidetik hasi baino ez dugula egin, eta datozen hilabeteetan jarraitu egingo dugula. Izan ere, elkarrizketa zabala, barneratzaile eta zintzoari esker hobetuko baitira gauzak”.

Otsailaren 24ko AGINDUAREN laburpenen helburua azken helburua —enplegu-erregulazioek eragindako enpresen lehiakortasuna eta langileen enplegu-aukerak hobetzea— eraginkortasuna handiagoz betetzea da. Jarraian hobekuntza nagusiak aipatzen dira, aurreko egoera eta Elkarrizketa Sozialerako Mahai Sektorialaren ekarpenekin adostutako AGINDU berria alderatuz.

1. Irekitako eskaintzaren barruan etengabeko prestakuntzara sartzeko aukeren hobekuntza Enplegu-erregulazioak eragindako langilearentzat, haren borondatea eta prestakuntza-plan bat antolatzeko enpresak duen gaitasuna alde batera utzita.
Agindu berriaren bidez, enpresak prestakuntza-planik garatzeko asmorik ez badu, edo gehienezko iraupenaren azpitik dagoen bat aurkeztu badu, lan-kontratuaren etendura dakarren enplegu-erregulazioak eragindako langileek etengabeko prestakuntza jasotzeko aukera izango dute banaka, irekitako eskaintzaren barruan, eta dagozkien pizgarri ekonomikoak jaso ahal izango dituzte horregatik, AGINDU berrian aurreikusitako gehienezko zenbatekoarekin.

2. Enpresaren lehiakortasunaren aldeko apustua: enplegu-erregulazioko espedienteak eragindako langile guztien prestakuntza.
Enpresaren lehiakortasuna hobetzeko haren langileen prestakuntza beharrezkoa delakoan, prestakuntza-planetan parte hartu ahal izango dute, enplegu-erregulazioak eragindako langileez gain, eragina nozitu ez dutenek ere, eta deialdian enpresarentzat aurreikusten den laguntza guztien prestakuntza finantzatzeko erabiliko da.

3. Prestakuntzaren iraupena eta egutegia malgutzea
AGINDU berrian gutxienekoa 6 ordura jaisten da, eta gehienezko iraupena 270 ordura zabaltzen.
Aldaketa hori erabakitzeko kontuan izan da prestakuntza mota horrek malgutasuna behar duela iraupenari dagokionez, enpresa bakoitzaren eta horietako langileen prestakuntza-beharrei egokitzeko, baita iraupena enplegu-erregulazioaren iraupenari egokitzeko ere.

4. Langileentzako diru-laguntza igotzea, prestakuntzan parte hartzeagatik
Diru-laguntza kalkulatzeko metodoa aldatu da, eta orduen arabera ordaintzen da, ikastaroa zenbat egunetan egiten den kontuan izan gabe, eta 600 eurotik 800 eurora igotzen da langile bakoitzak enplegu-erregulazioko espediente osoan edo enpresarekiko lan-harremana eteten den epeetan jaso dezakeen diru-kopurua.
Aldaketa horrekin diru-laguntza justuagoa izango da prestakuntza-ahalegin trinkoagoa egiten duten langileentzat, eta, aldi berean, egun gehiagotan luzatzen diren baina egunean ordu gutxiagokoak diren prestakuntza-planak dituzten  langileen kasuan, gehienezko iraupena igotzeak eramangarriago egingo dio langileari enplegu-erregulazio luzeagoa jasatea.

5. Prestakuntza-planak enplegu-erregulazioko espedientearen eboluzioari egokitzea eta diru-laguntzen kobraketa bermatzea enpresari eta langileei 
Egindako orduen araberako ordainketa proportzionalari esker, bermatuta geratzen da enpresak eta langileak benetan egindako prestakuntza-ordu guztiei dagokien laguntza jasoko dutela, lanera bueltatu beharragatik prestakuntza-ekintza eten edo bertan behera utzi behar izanez gero.

6. Enpresak eta kooperatibak diru-laguntzen deialdi bakar batean sartzea
Orain, enpresa edo kooperatiba mota edozein dela ere, haren langileek eta langile-bazkideek deialdi integratuan parte hartu dezakete; eta horrela deialdi hori kudeatzeko baliabideak modu arrazionalagoan eta egokiagoan erabiliko dira.

Prestakuntzaren arloko ekintzak:

• Hezkuntza Sailarekin batera, haurtzaroan (lehen, bigarren eta derrigorrezko hezkuntzan) LAP sartzea proposatu eta adostu. (2009)

• LH zentroetan prestakuntza-programa garatu. Arrakasta-faktoreak zehaztu eta Osalan-IVAC ekimenak sustatu. (2010)

• Deustu, EHU eta MU unibertsitateekin hitzarmenak egin, LAP-i buruzko hitzaldiak emateko. (2009)

• MIRren 1. maila ezartzea Lanaren Medikuntzan eta Lanaren Erizaintzan Osalanen. (2009-2010)

• Enpresetako profesional eta zuzendaritza-karguekin kolaboratu haien enpresetan LAP sartzeko foroak sortu ahal izateko. (2010)

• Osalanen on-line prestakuntzari eutsi (web bidez). (2009)
 
• LAP-i buruzko masterrak egiten dituzten ikasleentzako bekak finantzatu. (2009) 

• Etengabeko Gela. (2009)

• Prebentzio-ordezkarientzat etengabeko prestakuntza eta on-line birziklatzeko prestakuntza. (2010)

Kudeaketa integratzeko arloko ekintzak:

• “Jardunbide Egokiak” baliabide informatikoa ezarri eta horren berri eman (web bidez). (2009)

• LAP-i buruzko autoebaluaketa egiteko baliabidea bukatu, horren berri eman eta ezarri (web bidez eta aurreko ekintzarekiko lotura  zehatz batekin). (2009)

• LAP-en inguruko jardunbide egokietan enpresei saritzea. (2009)

• “Enpresa-jarduerak koordinatzeko gida” egin, orokorra eta egileak pilatzen diren kasuetan. (2010)

• Enpresentzako inkesta, prebentzioko zerbitzuei eta egiten dituzten ekintzei buruzko iritzia ezagutzeko. (2010)

Kontzientziazio eta Sentsibilizazio arloko ekintzak:

• EAEn Prebentzio-ordezkarien garrantzia zabaltzeko jarduerak: foiletoak, dibulgaziozko kanpainak, Gela Mugikorra, eta abar… (2009 y 2010)

• Herritar guztiei zuzendutako publizitate-kanpaina. (2009)

• Enpresek Osalani buruz zein iritzi duten jakiteko inkesta bat egiteko proposamena. Enpresei egindako inkestarekin batera. (2010)

• Enpresei zuzendutako “Hurbiltze-plana” egin, (batez ere PYMESei begira.  (2010)

Ikuskaritza eta Kontrol arloko ekintzak:

• Ikuskaritza-jarduera optimizatu eta modernizatu eta  txostenak eta TICak batzeko kontzeptu berriak sartu. (2010)

Informazio eta Sistema arloko ekintzak:

• S.I.S.L. berriro egituratu, istripuen eta morbilitatearen adierazleak lortzeko eta, horrela, aldizkako txostenak eta estatistikak lortzeko web bidez. (2010)

• EE.PP egon daitekeen zabaltzeko sistema bat, web bidez, garatu SPAren aldetik eta S.I.S.L. delakoan sartu.  (2010)

Erakundeen arteko konpromisoaren arloko ekintzak:
 
• Osakidetzarekin eta Osasun Sailarekin harreman egonkorra eta zuzena ezarri, hainbat ekintza estrategikori buruzko datu garrantzitsuak lortzeko. (2010)

• Lan Ministerioarekin Gizarte Segurantzaren arloan eta Ingurumenaren arloan kolaboratzeko eta koordinatzeko  bideak ezarri. (2010).

• Industria Sailburuordetzarekin kolaboratzeko eta koordinatzeko  bideak ezarri.

• Instituto Nacional de Seguridad e Higiene en el Trabajo izenekoarekin koordinatzeko bideak ezarri. 

Ikerkuntza arloko ekintzak:

• Nano-partikulekin lan egiteari buruzko ikerketak egiteko bideak ezarri, goi mailako teknologia ikertzen duten erakundeekin batera.  (2010).

• EAEko enpresetan lan arriskuen prebentzioa kudeatzeko inkesta bukatu eta horren berri eman.  (2009)

• Marmol-enpresetan, fundizioetan eta antzeko industrietan silize-hautsak izan dezakeen eragina ikertu.

• EAEn lan arloan dagoen droga-mendekotasuna ikertzeko proiektu bat egin.

• EAEn arrisku psikosozialak ikertzeko proiektu bat egin.

• Abian dagoen asma okupazionalaren proiektu pilotuaren ondorioak eta bere jarraipenaren balorazioa aurkeztu.