Arautegia
InprimatuUNIQUAL. IRAGARKIA, UNIQUAL EUSKAL UNIBERTSITATE SISTEMAREN KALITATEA EBALUATU ETA EGIAZTATZEKO AGENTZIAKO ZUZENDARIARENA, ABENDUAREN 10EAN UNIQUAL EUSKAL UNIBERTSITATE SISTEMAREN KALITATEA EBALUATU ETA EGIAZTATZEKO AGENTZIAKO ADMINISTRAZIO KONTSEILUAK ONARTURIKO EHUKO IRAKASLE ETA IKERTZAILEEN OSAGARRI GEHIGARRIAK EBALUATZEKO ETA ESLEITZEKO PROTOKOLOA JAKINARAZTEN DUENA.
Identifikazioa
- Lurralde-eremua: Autonomiko
- Arau-maila: Ebazpena
- Organo arau-emailea: Hezkuntza, Unibertsitate eta Ikerketa Saila
- Jadanekotasuna-egoera: Indarrean
Aldizkari ofiziala
- Aldizkari ofiziala: EHAA (Euskal Herria)
- Aldizkari-zk.: 241
- Hurrenkera-zk.: 7013
- Xedapen-zk.: ---
- Xedapen-data: 2008/12/15
- Argitaratze-data: 2008/12/17
Gaikako eremua
- Gaia: Gizarte gaiak eta emplegua; Administrazioaren antolamendua; Hezkuntza
- Azpigaia: Lana eta enplegua; Sailak; Funtzio publikoa
Testu legala
Euskal Herriko Unibertsitateko irakasle eta ikertzaileen osagarri gehigarriak ebaluatzeko eta esleitzeko Protokoloa
Lege esparrua.
Euskal Unibertsitate Sistemaren otsailaren 25eko 3/2004 Legearen II. tituluaren 2. kapituluaren bosgarren ataleko 34. artikuluan, ordainsari gehigarriei buruzkoa, Gobernuak irakasle eta ikertzaileentzat (funtzionario eta kontratatuak), ordainsari gehigarriak ezarri ahal izango dituela xedatzen du, irakaskuntzari, ikerketari eta kudeaketari dagokienez egoki irizten dien irizpideen arabera, eta hizkuntzari dagozkion merituak ere kontuan hartuko direla. Era berean, Eusko Jaurlaritzari dagokio, unibertsitate-arloko departamentu eskudunak proposatuta, ordainsari horien mugak ezartzea eraginkortasun- eta efikazia-irizpideen arabera, eta Gizarte Kontseiluari dagokio, Unibertsitateko gobernu-kontseiluak proposatuta, ordainsari horiek modu berezi eta indibidualean esleitzea erabakitzea, Uniqual - Agencia de Evaluación de la Calidad y Acreditación del Sistema Universitario Vasco - Euskal Unibertsitate Sistemaren Kalitatea Ebaluatu eta Egiaztatzeko Agentziak merituak balioetsi ondoren.
2004ko abenduan Eusko Jaurlaritzaren Hezkuntza, Unibertsitate eta Ikerketa sailak eta Universidad del País Vasco / Euskal Herriko Unibertsitateak akordio bat sinatu zuten finantzaketa-eredu egonkorra garatzeko eta ordainsari gehigarrien eredu bat ezartzeko. Horrela, ordura arte ezagutzen ez zen bide berri bat urratu zen UPV/EHUko irakasle eta ikertzaileen baldintzak hobetzeko.
Azkenik, urriaren 17ko 209/2006 Dekretua UPV/EHUko irakasle eta ikertzaileen jarduera eta lanbide-garapena sustatzeko eta aitzatesteko helburuarekin sortu zen, Euskal Unibertsitate Sistemaren Legean adierazitako eraginkortasun, efikazia eta kalitate kontzeptuak ezarriz, eta osagarri berezi horien arautzea Jaurlaritzak planifikazio-tresna egokien bidez, eta batez ere Unibertsitate Planaren bidez ezarritako unibertsitate-politikaren helburuetara egokituz. Esparru horretan, ordainsari osagarri gehigarriak UPV/EHUko irakaskuntza-jardueren, ikerketa-jardueren eta irakasle eta ikertzaileen kudeaketaren kalitatea hobetzea suspertzeko eta sustatzeko tresna dira. Hala ere, horien soldata-baldintzak onartzeko eta hobetzeko selekzio-mekanismo indibidualizatua den arren, ez dute inola ere Euskal Unibertsitate Sistemaren Legearen 33. artikuluan xedatutako unibertsitateko irakasleen eta ikertzaileen ordainsari-erregimen orokorrean barne hartutako ordainsari osagarria osatzen; hori dela-eta, erregimen hori ez zaie aplikatuko. Ordainsari horien bidez lortu nahi dena irakaskuntzari, ikerketari eta kudeaketari loturiko betebeharrak saritzea besterik ez da, betebehar horiek gutxieneko kalitate-estandarren eta oinarrizko betekizunak betetzeari buruzko gutxieneko estandarren gainetik egiten direnean. Osagarri horiek izaera berezia dute arrazoi hauengatik: aldakorrak dira eta ez-finkagarriak, eta gainera, oinarri dituzten merituen aldizkako ebaluazioari loturik daude.
EUSLaren 80.3 artikuluaren i) letran eta 209/2006 Dekretuaren 8.1 artikuluan (Uniqualen estatutuak) aurreikusitakoari jarraiki, Agentziak, bere funtzioen artean, espresuki esleituta du irakaskuntzako, ikerketako eta kudeaketako merituen ebaluazioa [5.1.i) artikulua], lege horren 34. artikuluan UPV/EHUko irakasle eta ikertzaileentzat aurreikusitako ordainsari osagarriak esleitzearren.
Eskumen hori betez, eta EUSLaren 83.c) artikuluak xedatutakoari jarraiki, Uniqualen Administrazio Kontseiluak, 2008ko abenduaren 10eko bilkuran, prozedurari eta ebaluazio-irizpideei buruzko Protokoloa onartu du. Protokolo berri honetan idazketa-aldaketa txikiak sartu dira atal batzuetan, ebaluazio-prozesu guztiari segurtasun juridiko handiagoa emateko helburuarekin. Horrela, alde batetik, EAEko Auzitegi Nagusiko Administrazioarekiko Auzien Salaren irailaren 26ko 594/2008 Epaiak baliogabetutako kontzeptuak ezabatu dira; eta bestetik, enuntziatu argiagoak eta zehatzagoak erabili dira, 2006ko Protokoloa aplikatzean sortutako arazoak saihestearren. Protokolo horren edukiak ez du aldaketa nabarmenik jasan.
Sarrera.
Uniqualeko irakasleak ebaluatzeko programaren arabera, irakaskuntza-, ikerketa- eta kudeaketa-jarduerak ebaluatzea beharrezkoa da UPV/EHUko irakasle eta ikertzaileei osagarri indibidualak ordaintzeko. Ildo horretan, UPV/EHUko Gizarte Kontseiluak, Unibertsitateko Gobernu Kontseiluak proposatuta, irakasle eta ikertzaileei ordainsari osagarriak modu berezi eta indibidualean esleitzea erabaki du, urriaren 17ko 209/2006 Dekretuan aurreikusitako modalitateen barruan eta bertan ezarritako mugekin.
Dekretu horretako 1. artikuluan aurreikusitakoaren arabera, osagarriak esleitzeko, osagarri horien oinarri diren merituak aurrez positiboki balioetsi eta ebaluatzea eskatuko du Uniqualek.
Garatu beharreko ebaluazio-prozesua Uniqualen Kode Etikoan jasotako printzipio hauetan oinarrituko da beti:
Independentzia. Eskaeren balioespena batzorde teknikoek egingo dute. Batzorde horiek izen handiko adituek osatuko dituzte, eta horiek aplikatuko dituzte 209/2006 Dekretuaren eranskinean jasotako irizpide orokorrak, eskatzailearen ekarpenen kalitatearen arabera. Aditu horiek hirugarren alderdiekiko askatasunez jardungo dute eta, hala badagokio, euren ekintzen ondorioen erantzule izango dira.
Gardentasuna. Eskatzaileek prozesuan zehar gardentasuna jasoko dutela ziurtatuko da, prozesuaren konfidentzialtasuna arriskuan jarri gabe. Ildo horretan hartutako neurriak hauek dira:
Beharrezkotzat jotzen den informazio guztia jendaurrean jartzea, eskaerak egiteko, agiriak jasotzeko, merituak ebaluatzeko, txostenak egiteko eta erreklamazioei erantzuteko prozesuak aurrera eramateko.
Konfidentzial gisa sailkatutako agiri eta/edo informazio guztien konfidentzialtasunari eustea, eta arduraz jokatzea ebaluatzerakoan erabili ahal edo behar den gainerako informazioarekin.
Eraginkortasuna. Prozesu bakoitzerako ahalik eta ebaluazio-prozesu sinpleena bilatuko da, ebaluazioari bizkor erantzuteko.
Ekitatea. Eskaera guztietarako tratu-berdintasuna ziurtatu behar da. Arlo bereko eskaerak banaka ebaluatuko dituzte batzorde bakoitzeko kideek, eta ondoren, baterako bilera batean, eskaera bakoitzaren ebaluazioaren emaitzak bateratu eta adostuko dituzte.
Ebaluazio Organoak.
Uniqualek bere ebaluazio-organoen bidez ebaluatuko ditu jasotako eskaerak. Ebaluazio-organoetako kideak guztiz inpartzialak izango dira euren jardunean, gerta litezkeen interes-gatazken berri emango dute, eta hala badagokio, ez dute prozesu osoan edo zati batean parte hartuko.
Ebaluazio-prozesuan eskuratutako informazio guztia konfidentziala da.
Ebaluazio Batzordeak ebaluazio-prozesuaren koordinazio-organoak dira. Horien lana da prozedura guztia planifikatu, kontrolatu eta aztertzea, eta egindako irizpen teknikoak ikusita, behin betiko txosten indibidualak egitea.
Osaera:
Ebaluazio Batzorde bakoitzak zazpi kide izango ditu gutxienez, eta kide horiek unibertsitateko irakasleen kidegoetako doktoreen edo irakasle kontratatu iraunkorren artean hautatuko dira. Beren irakaskuntza-jardueraren aldeko ebaluazioak izan beharko dituzte (dedikazioko 12 urteri dagokiona), eta gutxienez ikerketa-jarduerari eskainitako bi aldiren (seiurteko) aintzatespena izango dute. Publikoak ez diren Unibertsitateetako irakasleen kasuan, kanpotik egiaztatutako meritu baliokideak beharko dira. Uniqualen zuzendariak izendatuko ditu Ebaluazio Batzordeko presidente eta idazkari izango diren kideak, eta horiek karguaren berezko funtzioak beteko dituzte kide anitzeko organo batean. Ebaluazio Batzordeko kideak independenteak, inpartzialak eta gardenak izango dira euren jardunean, eta funtzio hori betetzen duten bitartean ez dute Euskal Autonomia Erkidegoko unibertsitateetako ordezkaritza-kargurik beteko.
Izendapena:
Batzordeko kideak Uniqualen zuzendariak izendatuko ditu, Adituen Batzordeak proposatuta eta Administrazio Kontseiluak aurrez onartuta. Batzordearen osaera Euskal Herriko Agintaritzaren Aldizkarian eta Uniqualen web-orrian argitaratuko da.
Ebaluazio Batzordeen kopurua:
Jakintza-arlo guztiak biltzen dituzten bost arlo zientifiko handi hauen araberako Ebaluazio Batzordeak ezarriko dira:
Zientzia Esperimentalen Batzordea.
Medikuntza eta Osasun Zientzien Batzordea.
Irakaskuntza Teknikoen Batzordea.
Gizarte Zientzia, Zientzia Juridiko eta Ekonomia Zientzien Batzordea.
Giza Zientzien Batzordea.
Prozesuaren deskribapena.
Unibertsitateko Gobernu Kontseiluak proposatuta, UPV/EHUko Gizarte Kontseiluak, urtero, merituen ebaluazioa eta ordainsari gehigarriak esleitzeko epeak, modua eta baldintza orokorrak finkatuko dituen deialdia onartu eta argitaratuko du.
Urriaren 17ko 209/2006 Dekretuaren 2. artikuluan aurreikusitako ordainsari gehigarrien ebaluaziorako aukera izateko, lehenengo ebaluazioaren kasuan izan ezik, ezinbesteko baldintza izango da UPV/EHUrekin lan-, estatutu- edo administrazio-lotura izatea ebaluatu nahi den epe osoan zehar. Horretarako, ez dira kontuan izango zerbitzu-eginkizunak, zerbitzu bereziak eta antzeko egoerak direla-eta izandako etenuneak.
Kontuan izan behar da pertsona bakoitzak eskatzen duen lehenengo ebaluazioan eskatzaileak bere bizitza akademiko guztiko merituak, 2008ko abenduaren 31 arte, arrazoitu beharko dituela, UPV/EHUko Irakasle eta Ikertzaileen ordainsarien osagarri gehigarriei buruzko urriaren 17ko 209/2006 Dekretuaren bigarren xedapen iragankorreko lehenengoaren azken intzisoan ezarritakoari kalterik egin gabe. Ondorengo ebaluazioak aurreko ebaluazioaren eta deialdiaren arteko denbora-tartean garatutako jarduerari buruzkoak izango dira.
Ebaluazio positiboak bost urteko baliozkotasuna izango du. Eskatzailea, beraz, ezingo da deialdi batera aurkeztu aurreko ebaluazioaren baliozkotasuna agortzen den arte eta, ebaluazio berririk eskatzen ez badu, horri loturiko eskubide ekonomikoak galduko ditu.
Salbuespen gisa, Unibertsitateari eskainitako lanbide-jarduna aintzatestera bideratutako osagarriak (C tartea) esleitzeko pertsona bakoitzaren lehenengo ebaluazioak baldintza hauek baino ez ditu kontuan izango:
Bere irakaskuntza-jardueraren aurkako txostenik ez egotea (ez-betetze formalik, edo tutoretzei, irakaskuntzari, akten epeei eta abarrei buruzkorik ez egotea).
Irakaskuntzari buruzko inkestak sistematikoki betetzea, eta horietan errepikatutako balioespen negatiborik ez izatea.
Eskaerak jasotzea
Eskaerak norberak aurkeztuko ditu eta UPV/EHUko Gobernu Kontseilura zuzenduko dira. Eskaeran adierazi beharko da zer maila eta tartetarako eskatzen den ebaluazioa. Eskaera deialdian aurreikusitako lekuetan aurkeztuko da, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan xedatutakoari kalterik egin gabe.
Aurrekoa horrela izanik ere, ebaluazio-eskaera interesdunaren curriculumarekin batera sortu ahal izango da, Uniqualen web-orrian eskuragarri dagoen informatika-aplikazio baten bidez. Betetako eskaera deialdiari erantsitako eredua beteta ere entrega daiteke, baina espedientea izapidetzea motelagoa izaten da horrelakoetan.
Eskatzaileek ebaluazioa behar bezala egiteko egokien iruditzen zaien moduan justifikatuko dituzte euren merituak. Uniqualek egoki irizten dionean agiri original osagarriak eskuratu ahal izango ditu, aurkeztutakoetatik ezin badira adierazitako merituak behar bezala ondorioztatu. UPV/EHUk ebaluazio-prozesua erraztuko du beti, Uniqualek eskatzen dizkion eta unibertsitateko irakasleek adierazitako merituak egiaztatzen dituzten ziurtagiriak eta agiriak aurkeztuz.
Eskaera bakoitzean, Uniqualen langileek hau egiaztatuko dute:
Aurrez ezarritako legezko baldintzak betetzen direla. Baldintza horiek ebaluazioa eskatzeko epea amaitu baino lehen betetakoak izango dira beti.
Agiriek deialdian ezarritako baldintza formalak betetzen dituztela.
Uniqualen zuzendariaren ebazpen bidez, epez kanpo hartutako eskaerak artxibatu egin direla jakinaraziko zaie interesdunei.
Epearen barruan aurkeztutako eskaerek deialdian ezarritako baldintzak betetzen ez badituzte, eskatutako datuak jasotzen ez badituzte, beharrezko agiriak eransten ez badira, edo horiek akats formalak badituzte, interesdunari hamar egun balioduneko epea emango zaio, jakinarazten zaion biharamunetik kontatzen hasita, hutsegitea zuzentzeko edo eskatzen zaizkion agiriak aurkezteko, Herri Administrazioen Araubide Juridikoaren eta Administrazio Prozedura Erkidearen 30/1992 Legearen 71.1. artikuluan aurreikusitakoaren arabera. Eskatzaileak adierazitako epearen barnean hutsegitea zuzentzen ez badu, edo agiriak aurkezten ez baditu, bere eskaerari uko egin diola ulertuko da, 30/1992 Legearen 42. artikuluari jarraiki, Uniqualen zuzendaritzak aurrez ebazpena emanda.
Ebaluazioa:
Urriaren 17ko 209/2006 Dekretuaren 8. artikuluari jarraiki, Uniqualek Protokolo honen arabera egingo du eskaeren ebaluazioa.
Ebaluazio Batzordeak, prozesuaren koordinazio-organoa den aldetik, deialdi bakoitzaren hasieran ebaluazio-prozesuaren plangintza orokorra egingo du. Plangintza horretan, Batzordeek ebaluazio-lanak egiteko dituzten epeak adieraziko dira, interesdunei Uniqualen ebazpena deialdian adierazitako gehienezko epean iritsiko zaiela bermatzearren. Oro har, jakintza-arloaren eta eskatzaileak adierazitako arloaren arabera esleituko zaizkio aurkeztutako eskaerak dagozkion Ebaluazio Batzordeari. Hala ere, eskaera eskatzaileak adierazitako arloa ez den bati atxiki ahal izango zaio, eta hortaz beste batzorde bati, adierazitako merituak arlo zientifiko horri hobeto egokitzen zaizkiola uste bada, eta beti ere Agentziak inguruabar hori behar bezala justifikatzen badu.
Batzordeen Ebaluazioa: Uniqualen administrazio-zerbitzuek ebaluatzaileen esku jarriko dituzte, behar bezala antolatuta eta sailkatuta, ebaluazioa egiteko eskaerak, eta baita horien laburpen-zerrendatu bat ere. Batzorde bakoitzeko kideek banaka eta euren kabuz ebaluatuko dituzte espedienteak, aldez aurretik ezarritako egutegiko epeen barruan. Salbuespen gisa, Uniqualek espezialisten berariazko aholkularitza eskatu ahal izango du, gomendagarria bada. Banakako azterketa eta ebaluazioa egin ondoren, Batzorde bakoitzeko presidenteak kide guztien bilkura egiteko eguna eta ordua ezarriko ditu, Uniqualen egoitzan espedienteen ebaluazio bateratua egiteko. Bilera horren ondorioz, ebaluazio-eskaera bakoitzerako txosten bakarra egingo da, eta Ebaluazio Batzordeko presidenteak izenpetuko du. Bileraren ondoren, idazkariak ebaluazioan izandako gorabeherak eta Batzordeak egindako txosten guztiak biltzen dituen akta idatziko du. Batzordeen txostenek epai tekniko bat bilduko dute, eta negatiboa bada, justifikatu egin beharko da.
Ebazpena:
Ebaluazioaren ebazpena banakakoa izango da eskaera bakoitzerako, eta epai teknikoa, puntuazio xehatua eta tarte bakoitzaren ebaluazioa positiboa edo negatiboa den zehaztuko du.
Uniqualen zuzendariak banaka jakinaraziko die interesdunei deialdi bakoitzaren babesean eskatutako ebaluazioaren ebazpenaren edukia, erabakia hartzen den egunetik hasita 10 eguneko epean. Ebaluazioa jakinarazteko gehienezko epea ezingo da sei hilabetetik gorakoa izan, deialdian eskaerak aurkezteko aurreikusitako epea amaitzen denetik kontatzen hasita.
Errekurtsoa:
Uniqualen zuzendariaren ebazpenak, Agentziaren Estatutuen 15.5. eta 21.3. artikuluen arabera, administrazio-egintzatzat hartzen dira eta administrazio-bidea amaitzen dute. Horien aurka, aukerako berraztertze-errekurtsoa jarri ahal izango da, edo zuzenean administrazioarekiko auzi-errekurtsoa aurkeztu ahal izango da dagokion Administrazioarekiko Auzien Epaitegien aurrean, bi hilabeteko epean, jakinarazpena forman egiten denetik kontatzen hasita.
Berraztertze-errekurtsoaren kasuan, Ebaluazio Batzordeak berrikusiko du espediente osoa, eskatzailearen alegazioak aztertuko ditu eta horri buruzko txosten berria egingo du. Uniqualen zuzendariak, Batzordearen txostena ikusi ondoren, berraztertze-errekurtsoa ebatziko du eta interesdunari jakinaraziko dio, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 117.2 artikuluan ezarritakoari jarraiki.
Ebaluazio irizpideak.
Ebaluazio-irizpideak eta irizpide horien balizko aldaketak Uniqualen Administrazio Kontseiluaren erabaki bidez onartuko dira. Osagarriak aintzatetsi aurretik Uniqualek egin behar duen merituen ebaluazioa irizpideak aplikatzeko 209/2006 Dekretuko erregela hauen arabera egingo da:
Irizpideen aplikazio arauak.
Ebaluazio-sistema objektiboa, orekatua eta gardena bermatzeko xedearekin, gehienezko balioak ezarri dira irizpide bakoitzean, printzipio hauen arabera:
Ebaluazio positiboa edo aldeko txostena jasotzeko, eskatzaileak tarte eta maila bakoitzerako ezarritako baldintzak bete behar ditu, eta irizpide bakoitzean lortutako balioen batuketaren ondoriozko puntuazioak osagarri mota bakoitzerako behar den puntuazioa gainditu behar du.
Urriaren 17ko 209/2006 Dekretuaren 8.6 artikuluaren ondorioz, eskatzaileak bere bizitza akademiko osoko merituak adierazi ahal izango ditu lehen ebaluazioan. Ondorengo ebaluazioak aurreko ebaluazioaren eta dagokion deialdiko ebaluazio-eskaerak aurkezteko epea amaitu arteko denbora-tartean garatutako jarduerari buruzkoak izango dira. Pertsona bakoitzaren bigarren eta ondorengo ebaluazioetako C mailako osagarrien ebaluazioan, 209/2006 Dekretuaren eranskinean adierazitako baldintzak hartuko dira aintzat.
Uniqualek, Unibertsitateak igorritako ziurtagiri ofizialak ikusita, eskatzaileak adierazitako UPV/EHUrekiko lotura-aldiak egiaztatuko ditu. UPV/EHUk egiaztatu behar dituen beste merituekin (doktoregoak, etab.) prozedura berari jarraituko zaio.
Gainera, aurreko ebaluazioetan lortutako puntuei formula honen arabera eutsiko zaie:
Esleitutako puntu berriak = A *(T / T+1) + P
Non:
A = Aurreko ebaluazioan lortutako puntu kopurua.
T = Unera arte ebaluatutako bost urteko aldien kopurua.
P = Azken 5 urteetako ebaluazioan lortutako puntu kopurua.
Vitoria-Gasteiz, 2008ko abenduaren 15a.
UNIQUALeko zuzendaria,
ANA FERNÁNDEZ SAINZ.
C maila: Universidad del País Vasco / Euskal Herriko Unibertsitateari eskainitako lanbide jarduna aintzatesteko osagarri gehigarria.
Unibertsitateari eskainitako lanbide-jarduna aintzatesteko osagarri gehigarriaren maila, pertsona bakoitzaren lehenengo ebaluazioan, bereizitako bi tartetan antolatuko da, lehen xedapen iragankorrari jarraiki:
C1. Betekizunak: UPV/EHUrekiko 3 urteko lotura, irakaskuntza-jardueraren aurkako txostenik ez egotea (ez-betetze formalik, edo tutoretzei, irakaskuntzari, akten epeei eta abarrei buruzkorik ez egotea) eta irakaskuntzari buruzko inkestak sistematikoki betetzea, horietan errepikatutako balioespen negatiborik izan gabe.
C2. Betekizunak: UPV/EHUrekiko 7 urteko lotura, irakaskuntza-jardueraren aurkako txostenik ez egotea (ez-betetze formalik, edo tutoretzei, irakaskuntzari, akten epeei eta abarrei buruzkorik ez egotea) eta irakaskuntzari buruzko inkestak sistematikoki betetzea, horietan errepikatutako balioespen negatiborik izan gabe.
B maila: Kalitatearen aintzatespenari eta etengabeko hobekuntzara bideratutako osagarri gehigarria.
Oharra: B tarteko edozein mailatan behar den puntuazioa lortzeko (25, 50 eta 75 puntu), II. eranskineko balorazio-irizpideak hartuko dira kontuan. Antzinatasuna kalkulatzeko, Universidad del País Vasco / Euskal Herriko Unibertsitatearekin izandako edozein lan-, estatutu- edo administrazio-loturaren mendean izandako irakaskuntza-, ikerketa- eta kudeaketa-jarduera guztiak izango dira kontuan (209/2006 Dekretuaren 5.6 artikulua).
B1. Betekizunak: C1, 5 urteko harremana Unibertsitatearekin eta 25 puntu lortzea.
Puntu horiek lortzeko, irakaskuntza-, ikerketa- eta kudeaketa-aldi bat identifikatu behar da eta balorazio-irizpideen atalaren arabera balioetsi. Aldeko beste ebaluazioak ere kontuan hartuko dira, ebaluazio horien irizpideak ordainsari gehigarrien dekretuaren eranskinean adierazitako irizpideekin funtsean bat datozenean.
B2. Betekizunak: Doktoregoa, C1, C2, 10 urteko harremana Unibertsitatearekin eta 50 puntu lortzea.
Puntu horiek lortzeko, irakaskuntza-, ikerketa- eta kudeaketa-aldi bat identifikatu behar da eta balorazio-irizpideen atalaren arabera balioetsi. Aldeko beste ebaluazioak ere kontuan hartuko dira, ebaluazio horien irizpideak ordainsari gehigarrien dekretuaren eranskinean adierazitako irizpideekin funtsean bat datozenean.
B3. Betekizunak: Doktoregoa, C1, C2, 10 urteko harremana Unibertsitatearekin eta 75 puntu lortzea.
Puntu horiek lortzeko, irakaskuntza-, ikerketa- eta kudeaketa-aldi bat identifikatu behar da eta balorazio-irizpideen atalaren arabera balioetsi. Aldeko beste ebaluazioak ere kontuan hartuko dira, ebaluazio horien irizpideak ordainsari gehigarrien dekretuaren eranskinean adierazitako irizpideekin funtsean bat datozenean.
A maila: Bikaintasuna aintzatestera bideratutako osagarri gehigarria.
A1. Betekizunak: Doktoregoa, C1, C2, 10 urteko harremana Unibertsitatearekin eta 90 puntu lortzea.
Puntu horiek lortzeko, irakaskuntza-, ikerketa- eta kudeaketa-aldi bat identifikatu behar da eta balorazio-irizpideen atalaren arabera balioetsi. Aldeko beste ebaluazioak ere kontuan hartuko dira, ebaluazio horien irizpideak ordainsari gehigarrien dekretuaren eranskinean adierazitako irizpideekin funtsean bat datozenean.
A2. Betekizunak: A1eko betekizunak eta UPV/EHUren izen ona sustatzen duten beste meritu garrantzitsu batzuk: izen oneko sariak, aintzatespen garrantzitsuak, izen oneko ikerketa-laborategien zuzendari izatea, Unibertsitaterako ohiz kanpoko zerbitzuak, nazioarteko ikerketa-sareak koordinatzea, etab.
B eta A mailetarako proposatutako eskema.
B1 B2 B3 A1 A2 gehienezko %
Irakaskuntza C1 C1, C2 C1, C2 50
Ikerketa Doktorea Doktorea Doktorea Doktorea 45
Kudeaketa 5
Guztira 100
Gutxieneko puntuak eta urteak 25 puntu
5 urte 50 puntu
10 urte 75 puntu
10 urte 90 puntu
10 urte 10 urte
n II.1. Irakaskuntza (Gehienez: 300 puntu; normalizatuta, 75 dira)
Irakaskuntzaren kalitatea hobetzeko eta berrikuntza bultzatzeko jarduerak: Gehienez: 110 puntu.
Nazioarteko irakasleen/ikasleen truke-programetan parte hartzea (Erasmus edo beste batzuk). Koordinatzaile gisa parte hartzea beste maila batean parte hartzearen bikoitza balioetsiko da. Gehienez: 15 puntu.
Ikasketak amaitzean egonaldiak atzerriko zentroetan. 1 puntu hilabeteko, 5 puntu seihilekoko. Gehienez: 10 puntu.
UPV/EHUko kalitate-programetan parte hartzea (gradukoak eta graduondokoak). Gehienez: 15 puntu.
Berrikuntza pedagogikoan frogatutako gaitasuna. Gehienez: 15 puntu.
UPV/EHUko campus birtualean parte hartzea. Gehienez: 15 puntu.
UPV/EHUko irakaskuntzan IKTak erabiltzea eta horien erabilera bultzatzea (eguneratutako web-orria, etab.). Gehienez: 10 puntu.
Berrikuntza eta unibertsitateko kalitatezko irakaskuntza ematea. Saileko zuzendariaren aldeko txosten arrazoitu eta argudiatua, irizpide hauetan oinarrituta (horiek justifikatzeko agiriak idatziz erantsi beharko dira): Gehienez: 30 puntu.
Ikasleen ebaluazioak, baldin badaude.
Tutoretzak bete izanaren ikuskarien txostenak.
Programari, irakasgidari eta autoinformeari buruzko txostena.
Saileko Kontseiluaren txostena.
Berariazko prestakuntza-jarduerak: Gehienez: 90 puntu.
Tesiak (EHUn edo kanpoan), tesinak eta ikerketa-lanak zuzentzea. Gehienez: 30 puntu.
Europako tesiak zuzentzea. Doktoregoko aparteko saria lortu duten tesiak zuzentzea. Gehienez: 28 puntu.
Karrera-amaierako proiektuak zuzentzea. Gehienez: 12 puntu.
Ikasleen prestakuntza akademikorako jarduerak prestatzea (enpresetara bisitaldiak, landa-praktikak, etab.). Gehienez: 10 puntu.
UPV/EHUn egindako ikerketa ezagutarazteko eta zabaltzeko jardueretan parte hartzea, unibertsitate-hedapenerako ikastaroen bidez edo Unibertsitatearen lana gizarteari jakinaraztera bideratutako bestelako jardueren bidez. Gehienez: 10 puntu.
Irakaskuntza-jarduera eta irakaskuntza-materialak sortzea: Gehienez: 90 puntu.
Izen oneko beste unibertsitate batzuetan ikastaroak, mintegiak eta udako ikastaroak ematea. Gehienez: 15 puntu.
Doktorego-programak koordinatu eta bertan parte-hartzea. Gehienez: 25 puntu.
Ofizialak ez diren hizkuntza batean baino gehiagotan eskolak ematea. 1 puntu emandako kredituko. Gehienez: 10 puntu.
Irakaskuntza-materialak sortzea (ISBNdunak), batez ere jakintza-arlo defizitarioetarako, ikus-entzunezko materialak eta liburu-kapituluak barne. Gehienez: 15 puntu.
GHEE berriaren diseinuarekin zerikusia duten materialak sortzea eta argitaratzea. Gehienez: 15 puntu.
Hizkuntza-eskakizuna eskakizun elebidun batera borondatez aldatzea. Gehienez: 10 puntu.
Beste meritu batzuk: Gehienez: 10 puntu.
Beste meritu batzuk. Gehienez: 10 puntu.
Oharra: gehienez 300 puntu lortu ahal izango dira. Lortutako kopurua zati 4 egingo da. Beraz, kontzeptu honegatik gehienez 75 puntu lortu ahal izango dira. Nolanahi ere, irakaskuntza-arloko ataleko (II.1) guztizko azken batuketa ezin izango da 50etik gorakoa izan, eta 50etik gorako edozein kopuru automatikoki 50era murriztuko da.
n II.2. Ikerketa (Gehienez: 280 puntu; normalizatuta, 70 dira).
Produkzio zientifikoa: Gehienez: 150 puntu.
Argitalpenak (ISBNdunak):
UPV/EHUren izenean sinatutako artikuluak, liburuak, liburuen kapituluak, monografiak eta arlo horretako ikerketa-komunitatean egindako izen oneko ikerketa-jarduerarekin zerikusia duten beste argitalpen batzuk. Arreta berezia eskainiko zaie liburuei, liburuen kapituluei, monografiei eta Euskal Autonomia Erkidegoan defizitarioak diren eta interes berezia duten arloei dagozkien argitalpenei. Artikuluko edo liburu-kapituluko gehienez: 8 puntu Liburuko gehienez: 15 puntu Lor daitezkeen puntuak gehienez: 110 puntu.
Puntuak haztatu egingo dira, ahal bada, argitalpenaren ospearen arabera nazioartean aintzatetsitako ordenazioei jarraiki (Science Citation Index, Social Science Citation Index, eta abar).
Sorkuntza bultzatzea eta azpiegitura zientifikoak eta ikerketa-azpiegiturak erabiltzea UPV/EHUn zein Euskal Autonomia Erkidegoan. Gehienez: 10 puntu.
Biltzarretan parte hartzea. Gonbidatutako txostena. Komunikazioa. Batzorde zientifikoa edo antolatzailea. Erakusketetako komisariotzak barne hartzen dira. Gehienez: 30 puntu.
Enpresekin egindako elkarlanak, patenteak eta antzekoak: Gehienez: 50 puntu.
Ustiatutako edo erositako patenteak erregistratzea. Gehienez: 30 puntu.
Txostenak egitea, UPV/EHUko erakunde eskudunen bitartez izapidetuak, organismo publikoentzat, erakundeentzat eta egiaztatutako garrantzia duten enpresentzat, gutxienez 12.000 euroko zenbatekoarekin (BEZ barne). Gehienez: 20 puntu.
Ikerketa-proiektuak zuzentzea edo bertan parte hartzea: Gehienez: 60 puntu.
Ikerketa-talde bateratuak eta/edo errendimendu handiko taldeak eta/edo UPV/EHUko taldeak zuzentzea eta/edo bertan parte hartzea. Gehienez: 10 puntu.
Urteko iraupeneko edo horren baliokidea den urte anitzeko iraupeneko lehiaketa-deialdietako ikerketa-proiektuetan parte-hartze aktiboa eta/edo proiektu horiek zuzentzea. ZTBPari jarraiki, Euskal Autonomia Erkidegoarentzat interes berezia duten ikerketak kontuan hartuko dira. Hasiera-urtea eta amaiera-urtea adieraziko dira, baita lankidetza-maila ere (zuzendaria, taldeko kidea, bekaduna, eta abar). Gehienez: 20 puntu.
Ekipamendu, prestakuntza-beka edo laguntzeko teknikari gisa irabaziak UPV/EHUri itzultzen dizkioten enpresen ikerketa-proiektuetan parte-hartzea. Enpresa horiek euskal gizartean proiekzioa izango dute Unibertsitateko ohiko sistemen bitartez (OTRI, Euskoiker, berariazko hitzarmenak, etab.), eta gutxienez 20.000 euroko zenbatekoa (BEZ barne). Hasiera-urtea eta amaiera-urtea adieraziko dira, baita lankidetza-maila ere (zuzendaria, taldeko kidea, bekaduna, eta abar). Gehienez: 30 puntu.
Beste meritu batzuk. Gehienez: 20 puntu.
Oharra: Ikerketan gehienez 45 puntu lortu ahal izango dira.
n II.3. Kudeaketa (Gehienez: 40 puntu; normalizatuta, 10 dira).
Kargu akademikoak betetzea. Urte bakoitzeko puntuak. Gehienez: 20 puntu.
Errektorea; errektoreordea; dekanoa edo ikastetxeko zuzendaria; dekanordeak eta zuzendariordeak; institutuko edo saileko zuzendaria; institutuko edo saileko idazkaria, eta UPV/EHUko estatutuetan jasotako guztiak.
Beste meritu batzuk. Gehienez: 20 puntu.
Lan ez-aitortuetan parte hartzea osagarri gehigarriarekin edo irakasteko salbuespenarekin: izen oneko aldizkariko batzordeko kidea, proiektuen/artikuluen ebaluatzailea, kalitate-aipamena duten doktoretza programen arduraduna, interes akademikoa duten bestelako batzordeetako kidea.
Jarduera aitzindari edo berriak abian jartzea: titulazio akademiko berria, lehenengo edizioko graduondoko programak, etab.
Zerbitzu bereziak UPV/EHUko administrazioaren funtzionamendurako bestelako kudeaketa-lanetan.
UPV/EHUko katedra askeen koordinatzaileak.
Zerbitzu bereziak Administrazio Publikoan.
Beste parte-hartze akademiko eta zientifiko-teknologiko batzuk.
Oharra: Lortutako puntu kopurua (gehienez 40) zati 4 egingo da. Nolanahi ere, kudeaketa kontzeptuagatik gehienez 5 puntu zenbatuko dira.
n II.4. Euskara.
Unibertsitate-jardueraren (irakaskuntzan eta ikerketan) erdia gutxienez euskaraz gauzatzen dutenek irakaskuntzan eta ikerketan jasotako puntuak 1,2rekin biderkatuko dituzte. Guztizko batuketak ezin izango ditu inola ere 50 puntu gainditu irakaskuntzaren atalean eta 45 ikerketaren atalean.
Azken oharrak
Irakasle bakoitzak zehaztu behar du zer tarte eta maila nahi duen.
Lehenengo deialdian ebaluatzen den azken urtetik aurrera egingo da hurrengo ebaluazioa. Ebaluazio Batzordeak, nolanahi ere, zer tarte eskaintzen duen erabaki dezake, eta eskatzaileak adierazten duenaren ezberdina izan daiteke.
Argi adierazi beharko da zer urte ebaluatu nahi diren. Ebaluatzaileak aldi guztiak orokorrean zenbatuko ditu eta aldi bakoitzean lortutako puntuak batuko ditu irakaskuntzako, ikerketako eta kudeaketako atal bakoitzean lortutako puntu guztien azken emaitza izan arte. Lehen ebaluazioa «bizitza akademiko guztiaren» arabera egingo da.
Beharrezko agiriek deialdian zehaztutako ereduaren araberako curriculum vitaea bilduko du beti ere.
Kargu akademiko batzuen, eta irakaskuntzatik salbuetsita edo zerbitzu berezietan dauden irakaskuntza- eta ikerketa-arloetako langile jakin batzuen inguruko berezitasunei begira, irakaskuntzaren atalean gehienez 2 puntu/urte zenbatuko zaie irakaskuntzako salbuespen-aldian zehar, eta kalkulua liberazio-mailak zehazten duen proportzioan egingo da beti. Horien ebaluaziorako, edonolako kargu akademikoak bete dituzten aldiak metatu ahal izango dira.
Ebaluatzaileren batek dokumentu honetan jaso ez den eta aurreikusitako egoeren barruan ebaluatzeko zaila den kasuren bat atzematen badu, ebaluazio-eskaera Adituen Batzordeari helaraziko dio, ebaluazioa batzorde horrek egin dezan.
Hainbat arrazoi direla-eta (kargu politikoak, adibidez) une honetan UPV/EHUtik kanpo dauden irakasleek egin ahal izango dute «bizitza akademiko guztiaren lehenengo ebaluazioa» etorkizunean, eta baita bizitza akademikoa erakunde horretatik kanpo hasi ondoren lehen aldiz UPV/EHUn sartzen diren irakasleek ere.
Bikaintasuna errazteko helburuarekin eta irakasle eta ikertzaileen ebaluazioa egin ondoren, meritu gehiago ziurtatzen duten irakasleei irakaskuntzan, ikerketan eta kudeaketan lortutako puntuen % 5 gehiago emango zaie bigarren kuartileko irakasleei, % 15 hirugarren kuartilekoei, eta % 25 laugarrenean daudenei. Helburua ebaluatutako edozein kontzeptutan, irakaskuntzan, ikerketan eta kudeaketan, meritu gehien ziurtatzen dutenak saritzea da.
Zientzia Esperimentalak.
arloa: Matematika eta Fisika.
005 Aljebra. 015 Analisi Matematikoa. 038 Astronomia eta Astrofisika. 075 Konputazio Zientzia eta Adimen Artifiziala. 247 Elektromagnetismoa. 250 Elektronika. 265 Estatistika eta Ikerketa Operatiboa. 385 Fisika Aplikatua. 390 Fisika Atomikoa, Molekularra eta Nuklearra. 395 Materia Kondentsatuaren Fisika. 398 Lurraren Fisika. 405 Fisika Teorikoa. 440 Geometria eta Topologia. 595 Matematika Aplikatua. 647 Optika. 785 Teknologia Elektronikoa.
arloa: Kimikoa.
555 Ingeniaritza Kimikoa. 640 Elikadura eta Bromatologia. 750 Kimika Analitikoa. 755 Kimika Fisikoa. 760 Kimika Ez-organikoa. 765 Kimika Organikoa. 780 Elikagaien teknologia. 790 Ingurumenaren Teknologiak.
arloa: Natur Zientziak.
028 Antropologia Fisikoa. 120 Kristalografia eta Mineralogia. 240 Edafologia eta Nekazaritzako Kimika. 280 Estratigrafia eta Sedimentologia. 427 Kanpoko Geodinamika. 428 Barneko Geodinamika. 430 Geografia Fisikoa. 630 Mikrobiologia. 685 Petrologia eta Geokimika. 790 Ingurumenaren Teknologiak.
arloa: Biologia Zelularra eta Molekularra.
050 Biologia Zelularra. 060 Biokimika eta Biologia Molekularra. 315 Farmakologia. 410 Fisiologia. 420 Genetika. 443 Histologia. 566 Immunologia. 630 Mikrobiologia. 660 Parasitologia.
arloa: Bizitzaren Zientziak.
063 Botanika. 220 Ekologia. 412 Landare Fisiologia. 420 Genetika. 630 Mikrobiologia. 655 Paleontologia. 819 Zoologia.
Medikuntza eta Osasun Zientziak.
arloa: Medikuntza eta Osasun Zientziak.
020 Anatomia Patologikoa. 025 Anatomia eta Anatomia Patologiko konparatua. 027 Giza Anatomia eta Enbriologia. 028 Antropologia Fisikoa. 050 Biologia Zelularra. 060 Biokimika eta Biologia Molekularra. 090 Kirurgia. 183 Dermatologia. 245 Gorputz eta Kirol Hezkuntza. 255 Erizaintza. 275 Estomatologia. 310 Farmazia eta Farmazia Teknologia. 315 Farmakologia. 410 Fisiologia. 413 Fisioterapia. 420 Genetika. 443 Histologia. 460 Zientziaren Historia. 566 Immunologia. 610 Medikuntza. 613 Lege eta Auzitegi Medikuntza. 615 Prebentzio Medikuntza eta Osasun Publikoa. 617 Animalia Medikuntza eta Kirurgia. 630 Mikrobiologia. 640 Elikadura eta Bromatologia. 645 Obstetrizia eta Ginekologia. 646 Oftalmologia. 653 Otorrinolaringologia. 660 Parasitologia. 670 Pediatria. 725 Psikobiologia. 745 Psikiatria. 770 Erradiologia eta Medikuntza Fisikoa. 773 Animalien Osasuna. 807 Toxikologia.
Irakaskuntza teknikoak.
arloa: Ekoizpenaren, Eraikuntzaren eta Garraioaren Teknologiak.
065 Materialen Zientzia eta Metalurgia Ingeniaritza. 083 Itsasketa Zientzia eta Teknikak. 100 Konposizio Arkitektonikoa. 110 Arkitektura Eraikuntzak. 115 Itsasontzigintza. 265 Estatistika eta Ikerketa Operatiboa. 295 Meategien Ustiaketa. 300 Arkitekturako Adierazpen Grafikoa. 305 Ingeniaritzako Adierazpen Grafikoa. 495 Ingeniaritza Aeroespaziala. 500 Nekazaritza eta Basozaintzako Ingeniaritza. 505 Kartografia, Geodesia eta Fotogrametria Ingeniaritza. 510 Eraikuntzako Ingeniaritza. 515 Fabrikazio Prozesuen Ingeniaritza. 525 Lurren Ingeniaritza. 530 Garraioen Ingeniaritza eta Azpiegitura. 535 Ingeniaritza Elektrikoa. 540 Ingeniaritza Hidraulikoa. 545 Ingeniaritza Mekanikoa. 550 Ingeniaritza Nuklearra. 555 Ingeniaritza Kimikoa. 565 Ehun eta Paper Ingeniaritza. 590 Makina eta Motor Termikoak. 595 Matematika Aplikatua. 600 Jariakinen Mekanika. 605 Ingurumen Jarraituen Mekanika eta Egituren Teoria. 700 Animalien Ekoizpena. 705 Landare Ekoizpena. 710 Meatze Prospekzio eta Ikerkuntza. 715 Arkitekturako Proiektuak. 720 Ingeniaritza Proiektuak. 780 Elikagaien Teknologia. 790 Ingurumenaren Teknologiak. 815 Hirigintza eta Lurralde Antolakuntza.
arloa: Informazioaren eta Komunikazioaren Teknologiak.
035 Konputagailuen Arkitektura eta Teknologia. 075 Konputazio Zientzia eta Adimen Artifiziala. 250 Elektronika. 265 Estatistika eta Ikerketa Operatiboa. 520 Sistemen Ingeniaritza eta Automatika. 560 Ingeniaritza Telematikoa. 570 Lengoaia eta Sistema Informatikoak. 595 Matematika Aplikatua. 785 Teknologia Elektronikoa. 800 Seinale eta Komunikazioen Teoria.
Gizarte Zientziak, Zientzia Juridikoak eta Ekonomia Zientziak.
arloa: Gizarte Zientziak, Zientzia Politikoak, Komunikazio Zientziak eta Hezkuntza Zientziak.
010 Eskualdeko Geografia Analisia. 030 Giza Antropologia. 040 Bibliotekonomia eta Dokumentazioa. 070 Politika eta Administrazio Zientzia. 105 Ikus-entzunezko Komunikazioa eta Publizitatea. 160 Nazioarteko Zuzenbide Publikoa eta Nazioarteko Harremanak. 187 Gorputz Adierazpenaren Didaktika. 189 Musika Adierazpenaren Didaktika. 193 Plastika Adierazpenaren Didaktika. 195 Hizkuntza eta Literaturaren Didaktika. 200 Matematikaren Didaktika. 205 Zientzia Esperimentalen Didaktika. 210 Gizarte Zientzien Didaktika. 215 Didaktika eta Eskola Antolakuntza. 245 Gorputz eta Kirol Hezkuntza. 435 Giza Geografia. 475 Politika Pentsamenduaren eta Gizarte Mugimenduen Historia. 620 Portaera Zientzien Metodologia. 625 Hezkuntzarako Ikerkuntza eta Diagnosi-metodoak. 675 Kazetaritza. 775 Soziologia. 805 Hezkuntzaren Teoria eta Historia. 813 Gizarte Langintza eta Gizarte Zerbitzuak.
arloa: Portaera Zientziak.
680 Nortasun, Ebaluaketa eta Tratamendu Psikologikoa. 725 Psikobiologia. 730 Oinarrizko Psikologia. 735 Bilakaeraren eta Hezkuntzaren Psikologia. 740 Gizarte Psikologia.
arloa: Zientzia Juridikoak.
125 Administrazio Zuzenbidea. 130 Zuzenbide Zibila. 135 Zuzenbide Konstituzionala. 140 Lan eta Gizarte Segurantzaren Zuzenbidea. 145 Estatuko Zuzenbide Eliztarra. 150 Finantza eta Zerga Zuzenbidea. 155 Nazioarteko Zuzenbide Pribatua. 160 Nazioarteko Zuzenbide Publikoa eta Nazioarteko Harremanak. 165 Merkataritzako Zuzenbidea. 170 Zuzenbide Penala. 175 Zuzenbide Prozesala. 180 Erromatar Zuzenbidea. 381 Zuzenbidearen Filosofia. 383 Filosofia Morala. 470 Zuzenbidearen eta Erakundeen Historia.
arloa: Ekonomia eta Enpresa Zientziak.
095 Merkaturatzea eta Merkatuen Ikerkuntza. 225 Ekonomia Aplikatua. 230 Finantza Ekonomia eta Kontabilitatea. 235 Nekazaritzaren Ekonomia, Soziologia eta Politika. 415 Analisi Ekonomikoaren Oinarriak. 480 Historia eta Ekonomia erakundeak. 650 Enpresen Antolaketa.
Giza Zientziak.
arloa: Geografia, Historia eta Artea.
010 Eskualdeko Geografia Analisia. 028 Antropologia Fisikoa. 030 Giza Antropologia. 033 Arkeologia. 040 Bibliotekonomia eta Dokumentazioa. 085 Zientzia eta Teknika Historiografikoak. 185 Marrazketa. 260 Eskultura. 270 Estetika eta Arteen Teoria. 285 Arabiar eta Islamiar Ikasketak. 290 Hebrear eta Aramear Ikasketak. 430 Geografia fisikoa. 435 Giza Geografia. 445 Antzinaroaren Historia. 450 Historia Garaikidea. 455 Amerikaren Historia. 460 Zientziaren Historia. 465 Artearen Historia. 470 Zuzenbidearen eta Erakundeen Historia. 475 Politika Pentsamenduaren eta Gizarte Mugimenduen Historia. 480 Historia eta Ekonomia Erakundeak. 485 Erdi Aroko Historia. 490 Aro Berriaren Historia. 568 Ekialde Urruneko Hizkuntza eta Kultura. 635 Musika. 690 Margolaritza. 695 Historiaurrea.
arloa: Filosofia, Filologia, Hizkuntzalaritza eta Literatura.
040 Bibliotekonomia eta Dokumentazioa. 285 Arabiar eta Islamiar Ikasketak. 290 Hebrear eta Aramear Ikasketak. 320 Aleman Filologia. 325 Katalan Filologia. 327 Eslaviar Filologia. 335 Frantses Filologia. 340 Filologia Grekoa. 345 Ingeles Filologia. 350 Italiar Filologia. 355 Latin Filologia. 360 Filologia Erromanikoa. 365 Euskal Filologia. 370 Galiziar eta Portugaldar Filologia. 375 Filosofia. 381 Zuzenbidearen Filosofia. 383 Filosofia Morala. 567 Gaztelania. 568 Ekialde Urruneko Hizkuntza eta Kultura. 575 Hizkuntzalaritza Orokorra. 580 Indoeuropar Hizkuntzalaritza. 583 Espainiar Literatura. 585 Logika eta Zientziaren Filosofia. 796 Literaturaren Teoria eta Literatura Konparatua. 814 Itzulpengintza eta Interpretaritza.
