Euskal Herriko Polizia Kidegoetako funtzionarioen lanpostuak hornitzeko indarreko araudian, abenduaren 22ko 388/1998 Dekretuaren bidez onartutakoan, hainbat irizpide zehaztu ziren zerbitzu-eginkizunen nahitaezko esleipena gauzatzeko. Zenbait antolakuntza-unitatetan langile gutxi egoteagatik, ezohiko hornitze-prozedura hori erabili behar izan da, eta, halakoetan, aipatutako irizpide horiek aplikatzea ez da batere erraza izan. Bistan denez, aipatutako araudiaren 25. artikuluan egun indarrean dagoen 3. ataleko lehen irizpidea ezin da aplikatu horrelako kasuetan; izan ere, irizpide horren arabera, zerbitzu-eginkizunok antolamendu-unitatean bertan ari diren langileei esleitu behar zaizkie. Hala ere, Ertzaintzaren kasuan behinik behin, aipatutako atalean zehazten den bigarren irizpidea ere ezin da kasu askotan erabili, hain zuzen hurbilen dagoen edo bertaratzeko erraztasun gehien duen herrian aritzen diren unitateko langileei zerbitzuak esleitzea; izan ere, unitate horrek agian ez dauka langileak uzteko aukerarik, bere dotazio operatiboa oso lanpetuta egoteagatik, eta, aitzitik, langile gehiago behar ditu.

Hortaz, bidezkoa da aipatutako artikuluan zehazten diren zerbitzu-eginkizunak derrigorrez esleitzeko irizpideak aldatzea, eta honako hau ezartzea: beste edozein irizpide aplikatu aurretik, organo eskudunak beren beregi landutako txosten tekniko-polizialean zehaztu beharko da zein unitate dagoen langileak uzteko moduan eta zenbat eta zein hurrenkeratan utzi behar dituen; horiek zehazteko, zerbitzuaren beharrei buruzko irizpide objektiboak aplikatuko dira eta unitateen dotazio operatiboaren okupazio-tasa aintzat hartuko da.

Bestalde, aldaketa honen bidez, lanpostuak hornitzeko araudian dagoen hutsune bat beteko da; izan ere, lanpostuak aldi baterako hornitzeko zerbitzu-eginkizunak bakarrik izango dira nahitaezkoak, eta ez, ordea, eginkizunak aldi baterako esleitzeko zerbitzu-eginkizunak. Ildo horretatik, Euskal Herriko Poliziari buruzko Legeko 72. artikuluko 1. eta 2. atalek ez dute inolako zalantzarik uzten: edozein zerbitzu-eginkizunek izaera bikoitza izango du, borondatezkoa eta nahitaezkoa.

Azkenik, merezimendu-lehiaketa bidez bete beharreko lanpostuen kasuan, lehiatzaileen artean gaitasun berdina baldin badago, berdinketa hori hausteko ezarritako arauak aldatu egiten dira emakumeei lehentasuna emanez, Euskal Funtzio Publikoaren Legean egindako aldaketan ezarritakoari jarraiki. Aldaketa hori Emakumeen eta Gizonen Berdintasunerako otsailaren 18ko 4/2005 Legearen bidez egin zen.

Horrenbestez, Euskal Autonomia Erkidegoko Udaltzaingoak Koordinatzeko Batzordeak eta Ertzaintza Kontseiluak txostena eman ondoren, Euskadiko Aholku Batzorde Juridikoarekin bat etorriz, Herrizaingo sailburuaren proposamenez, eta Jaurlaritzaren Kontseiluak 2008ko abenduaren 30ean egindako bilkuran aztertu eta onartu ondoren,