Lehenengoa. Honako ebazpen honetan atzeman diren hutsak zuzentzea: Ebazpena, 2025eko abuztuaren 4koa, Ingurumeneko sailburuordearena, ingurumen-inpaktuaren txostena formulatzen duena eta ingurumen-baimen integratua aldatzea eskatzen duen instalazioaren aldaketa ez-funtsezkotzat jotzen duena Petróleos del Norte SAk (Petronor) jakinarazitako aldaketa-proiektuari dagokionez, petrolioa fintzeko jardueran eta erregai sintetikoen eta hidrogeno elektrolitikoaren instalazioan (HUB instalazioa), Muskiz, Zierbena eta Abanto y Ciérvana-Abanto Zierbenako udal-mugarteetan (Bizkaia).

Bigarrena. Zuzenketek atal hauei eragiten diete: I. eranskina (ingurumen-inpaktuaren txostena), 5. apartatua, eta ingurumen-baimen integratuaren lehenengo apartatua. Horrenbestez, honela geratuko dira:

«Lehenengoa. Petróleos del Norte SAri (Petronor) egoitza soziala: San Martin 5, 48550 (Muskiz, Bizkaia); IFK: A-48053243, ingurumen-baimen integratua ematea, petrolio-finketaren jarduerarako eta erregai sintetikoen eta hidrogeno elektrolitikoaren instalaziorako (HUB instalazioa), Muskiz, Zierbena eta Abanto y Ciérvana-Abanto Zierbenako udal-mugarteetan (Bizkaia) sozietate horrek duen instalazioan.

Abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginaren arabera, jarduera hori honako kategoria hauetan dago: 1.2.a) "Petrolioa edo petrolio-gordinkia fintzeko instalazioak"; 1.1.b) "Guztizko potentzia termiko izendatua gutxienez 50 MW-koa duten errekuntza-instalazioak (kogenerazio-instalazioak, galdarak, labeak, lurrun-sorgailuak edo industria batean egon daitekeen beste edozein errekuntza-ekipamendu edo -instalazio, industriaren jarduera nagusia izan edo ez)"; 4.1.a) "Produktu kimiko organikoak fabrikatzeko instalazio kimikoak, bereziki hidrokarburo sinpleak (linealak edo ziklikoak, aseak edo asegabeak, alifatikoak edo aromatikoak)" eta 4.2.a) "Produktu kimiko inorganikoak fabrikatzeko instalazio kimikoak, hala nola hauek ekoiztekoak: gasak eta, bereziki, amoniakoa, kloroa edo hidrogeno kloruroa, fluorra edo hidrogeno fluoruroa, karbono oxidoak, sufrearen konposatuak, nitrogeno oxidoak, hidrogenoa, sufre dioxidoa eta karbonilo dikloruroa".

Ingurumen-baimen integratu horrek ez ditu barnean hartzen Kotorrio ibaiaren ondoan dagoen biltegiratze-eremua eta San Martingo zerbitzu-eremua.

Petróleos del Norte SAren (Petronor) jardueraren helburua da automobilgintzarako karburatzaileak eta erregaiak prestatzea (PGLak, gasolinak, gasolioak, kerosenoa, hidrogenoa, etab.), baita asfaltoak eta propilenoa, nafta, kokea eta sufre solidoa ere, petrolio-gordinkiaren bidez.

Jarduera hori Muskiz, Zierbena eta Abanto y Ciérvana-Abanto Zierbenako udal-mugarteetan kokatzen da, Bilbotik 18 km-ra eta Muskizko haraneko Luzueroko puntako portu-instalazioetatik 5 km-ra, eta instalazio horiek 220 hektarea hartzen dituzte. Findegiak zenbait oliobide ditu Zierbena udal-mugarteko Superportutik gordinkiak findegiko deposituetara garraiatzeko, baita produktuak kanpora bidaltzeko ere.

Findegiak konbertsio-eskema bat du, 12.000.000 t/urte destilatzeko gaitasunarekin.

Industria-konplexuak hiru eremu nagusi ditu:

"1. eta 2. Instalazioak" dauden eremua: bi findegi tradizional ditu, hidrogenoa ekoizteko bi unitate eta gasolioaren hutseko desulfuraziorako unitate bat barnean direla.

"Konbertsio" eremua: hutseko destilazio-unitateak, biskositate-murrizketa eta cracking katalitikoa (FCC).

"Fuel-olioa murrizteko" eremua: unitate horien helburua findegiko fuel-olioaren ekoizpena murriztea eta frakzio arinagoen ekoizpena handitzea da. Horretarako, ohe fluidizatuko cracking katalitikorako prozesuaren unitatetik jasotako gordinkiaren destilazioan eta olio dekantatuan lortutako osagai astuna erabiltzen da lehengai moduan. Kokizazio-unitateak, era berean, ur-arazketarako instalazioetan existitzen diren hidrokarburo-bereizgailuen lohi urtsuen eta tratamendu biologikoko lokatzen zati bat prozesatzen du, alegia, tanga hondoetan pilatzen diren lohi oliotsuak prozesatzen ditu.

Hona hemen enpresak une honetan dituen unitate nagusien deskribapena:

Gordinkiaren bi unitate, C1 eta C2: itsasontziz jasotako petrolioa ("gordinkia" ere deitua) oliobidetik bidaltzen da unitateetara eta aurreberotu egiten da hor. Jarraian, presio atmosferikoko destilazioa egiten zaio zatikapeneko bi zutabetan (findegi bakoitzean bat). Horrela, frakzio hauek bereizten dira: gas nagusia, kerosenoa, diesel-olioak eta olio astunak edo gordinki murriztua. Gas nagusia nafta-egonkortzailera bidaltzen da, non hiru frakzio bereizten baitira: findegi-gasa, gas likidotuak (PGL) eta naftak. Gordinki murriztua hutseko unitatera (V3) bidaltzen da. Bitarteko frakzioak, hainbat stripping-prozesutatik igaro ondoren, nahasketa-, desulfurazio- edo egokitzapen-instalazioetara bidaltzen dira. Gordinkiaren unitateek 12.000.000 t/urteko baterako tratamendu-ahalmena dute.

PGLen Merox desulfurazioaren hiru unitate. (M1, M3 eta M6): Prozesuaren helburua sufre-konposatua kentzea da (SH2 eta merkaptanoak). Lehenik eta behin, SH2 bereizten da aminen bidezko kontaktuaren bidez. Ondoren, merkaptanoak erauzten dira soda-soluzio baten bidez. Merox katalizatzaile bat, airea eta beroa gehituta, merkaptanoak disulfuro bihurtu, eta horiek bereizi egiten dira, eta ondorengo desulfurazio-unitateetara bidaltzen dira. PGLen Merox desulfurazio-unitate horien ahalmen bateratua 950.000 t/urte ingurukoa da.

Kerosenozko Merox (MK-3) unitate bat, non erregai horren espezifikazioa amaierako produktu moduan egokitzen baita. 401.000 t/urte inguruko gaitasuna du.

Gasak Berreskuratzeko bi unitate (B1 eta B2): Merox Unitatetik eta Platformatu Unitatetik jasotako PGLak bi etapako bereizketa-prozesu batean sartzen dira unitate horretan. Dorre desetanizatzailean frakzio arinagoak bereizten dira, eta fluxua despropanizatzailera bidaltzen da, non propanoa eta butanoa bereizten baitira. Desetanizatzailearen frakzio nagusia, sufrea kentzeko bi absortzio-prozesu izan ondoren, fuel-gas edo findegi-gas moduan aprobetxatzen da.

Naften Desulfuraziorako bi unitate (N1 eta N2): egonkortzaileetatik jasotako naften bidez elikatzen da bereziki. Funtsean, nafta hidrogenoarekin nahasten da; ondoren, berotu eta nahasketa hori katalizatzaile batetik pasatzen da, non desulfurazio-erreakzioak sortzen baitira. Bestetik, desulfuratutako nafta splitter- edo zatikapen-dorrera bidaltzen da, non nafta bereizten baita, alegia, gas arinen frakzio astunena (zeinak Platformatu Unitateko karga osatzen baitu). Gas horiek aminarekin arazten dira, SH2 gasaren fueletik bereizteko. "Gas azidoa", SH2-n aberatsa dena, Sufrea Berreskuratzeko unitateetara bidaltzen da. Naften Desulfuraziorako unitateen baterako tratamendu-gaitasuna 1.816.000 t/urte inguru da.

Konbertsio Naften Desulfuraziorako bi unitate (NF3 eta NC6): cracking katalitikorako unitateetatik, ohe fluidizatuko cracking katalitikotik edo cracking termikotik eta CK6tik jasotako naftaz elikatzen da. Eskema aurreko kasuaren antzekoa da: SH2-n Sufrea Berreskuratzeko unitateetara bidaltzen da. Desulfuratutako nafta, egonkortu ondoren, blendingera bidali eta gasolinaren edo nafta komertzialaren formulazioaren parte bilakatzen da. Konbertsio Naften Desulfuraziorako unitate horien ahalmena 1.130.000 t/urte ingurukoa da.

Destilatu ertainen desulfuraziorako lau unitate (G1, G2, G3 eta G4): destilatu ertainak (olio arinak, astunak eta kerosenoa) unitate horietan desulfuratzen dira. Prozesua N unitateen antzekoa da, hau da, desulfuratu beharreko produktua, H2-rekin nahastu ondoren, berotu eta katalizatzailea duen erreaktore batera bidaltzen da, non kargaren sufrea SH2-ra pasatzen den. Zenbait prozesu egin ondoren, desulfuratutako produktua (gasolioa edo kerosenoa) gas arinengandik (gasaren fuel moduan erabiltzen dena) eta SH2-rengandik bereizten da. Destilatu ertainak desulfuratzeko unitateen baterako tratamendu-gaitasuna 4.535.000 t/urte baino handiagoa da.

Erreformatze Katalitikorako edo Platformaturako bi Unitate (P1 eta P2): helburua oktano-indize altuko gasolinak ekoiztea da, oktano-indizearen balio baxuak dituen frakzioen bidez (bereziki, naftak). Prozesu horren bidez, osagaien molekulak berregokitu egiten dira katalizatzaile bat dagoenean eta tenperatura altua denean. H2 kopuru handiak askatzen dira, naften desulfurazio-unitatean erabiltzeko, bereziki. Karga dorrearen hondotik ateratzen da, eta horrek "Platformatua" osatzen du, gasolinaren formulazioan oinarrizko produktua dena. Erreformatze Katalitikorako unitateen baterako ekoizpenaren gaitasuna 1.282.100 t/urte inguru da.

Hidrogenoa ekoizteko bi unitate (H3 eta H4). H3 unitatearen helburua H2 sortzea da, fuel-gasaren, gas naturalaren, propanoaren edo nahasketa baten bidez. H4 hidrogeno-unitateak H2 sortzen du, naftaren edo gas naturalaren bidez. Hidrogeno hori amaierako produktu komertzialaren propietateak desulfuratzeko eta egokitzeko hainbat unitatetan erabiltzen da. Unitate horien baterako tratamendu-gaitasuna 41.200 t/urte ingurukoa da.

Hutseko unitate bat (V3): gordinkiaren destilazio atmosferikoaren bidez (C1-C2) jasotako hondakin-olioa edo "gordinki murriztua" tratatzen du presio txikian, eta horren bidez lortzen den destilatuak (hutseko gasolioa) cracking katalitikorako unitatearen karga (FCC) osatzen du. Frakzio astuna CK6 unitateko karga da, edo asfaltoen formulaziorako oinarria ere izan daiteke. Hutseko unitatearen gaitasuna 4.888.000 t/urte ingurukoa da.

Cracking katalitikorako unitate bat ohe fluidizatu batean FCC (F3): cracking katalitikoaren helburua hutseko unitatearen destilatuen (hutseko gasolioa) molekulak haustea da, frakzio arinagoak lortzeko, batez ere gasolinak, baina propilenoa, PGLa eta gasolioa ere bai. FCC unitatearen gaitasuna 2.306.000 t/urte ingurukoa da.

Zazpi Amina unitate (S1, S2, S3 eta G3, G4, F3 eta SC6 unitateetakoak): Unitate horietan SH2 gasa bereizi egiten da desulfurazio-unitateetan bereziki sortzen diren gas arineko korronteetatik (esaterako, G1, G2, G3, G4, N1, N2, NC6, NF3, HD3, CK6...). Gas arina SH2-a xurgatzen duen aminazko ur-disoluzio batekin garbitzen da, eta aldi berean, SH2 soluzio horretan bereizi egiten da beroaren bidez. Aminazko soluzioa berrerabili egiten da. Dagoeneko sufrerik ez duen gasa (fuel-gasa) erregai moduan erabiltzen da instalazioko hainbat galdaratan eta labetan.

Uren stripping-unitateak edo prozesu-uren oinarrizko arazketa (TG3, TV3, TH3, TF3 eta TC6; C1 eta C2 gordinkiaren unitateetan existitzen direnez gain). Prozesu-unitateen bidez jasotako H2S-rekin kutsatutako ur azidoak tratatzen ditu. Ur tratatua beste hainbat erabileratarako bidaltzen edo HUA instalaziora eramaten da. Dekantatutako hidrokarburoak findegian existitzen diren unitateetan prozesatzen dira. Ekoiztutako gasa, NH3 eta H2S-n aberatsa dena, sufrea berreskuratzeko unitateetan tratatzen da, non sufre komertzial eta gas geldo bilakatzen den.

Sei sufre-unitate (SR-3A, SR-3B, SR-4, SR-5, SR-6-A eta SR-6-B): SH2 gasa (aminen unitateetan, merox-unitatean eta ur azidoen stripping-unitateetan banatzen dena) kalitate komertzialeko sufre bilakatzen dute, gas hori bere horretan edo sufre-oxidoen forman atmosferara isurtzea saihestuz.

Alkilazio-unitate bat (AK-3): unitate horren helburua petrolio-gas likidotuak butanoak alkilato bihurtzea da; kalitate altuko gasolinen osagai moduan erabiltzen den produktu likidoa da alkilatoa. Alkilatoak propietate ezin hobeak ditu gasolinen osagai moduan: oktano ugari du; ez dauka hidrokarburo aromatikorik, ezta olefinikorik ere, eta lurrun-presioa nahiko baxua du. Alkilazio-unitatearen gaitasuna 195.000 t/urte ingurukoa da.

Bentzenoa Murrizteko unitate bat (RB4): bentzenoa murrizteko unitatea P1 eta P2 Platformatu Unitateetatik jasotako nafta erreformatua prozesatzeko diseinatu da, bentzenorik gabeko "erreformatze" bat lortzeko. Unitate horren tratamendu-gaitasuna 890.000 t/urte ingurukoa da.

Disolbatzaileak Hidrogenatzeko unitate bat (D3): unitate horretan disolbatzaileetan (hexano eta heptano) dauden hidrokarburo aromatikoen edukia murriztu egiten da, produkturako eskatzen diren zehaztapenak bete daitezen. Unitate horren gaitasuna 24.000 t/urte ingurukoa da.

Diolefinak Hidrogenatzeko bi unitate (BD3 eta BD6): unitate horietan butano olefinikoa tratatzen da, industria petrokimikoaren zehaztapen komertzialetara egokitzeko. Unitate horien gaitasuna 175.000 t/urte ingurukoa da.

Biskomurrizketa-unitate bat (VB3): biskositatea murrizteko instalazioaren helburua destilazio atmosferikoan eskuratutako "gordinki murriztuaren" biskositatea murriztea da, hidrokarburoen molekula handiak hausten dituen cracking termiko moderatu baten bidez. Biskomurrizketa-unitatearen ekoizpen-gaitasuna 1.816.000 t/urte ingurukoa da.

Gasolio astunaren Hidrodesulfurazio-unitatea (HD3): unitate horren helburua karga araztea da; horretarako, funtsean, sufrea eta beste kutsagarri batzuk bereizten dira, esaterako, nitrogenoa, etab., konposatu kimikoak osatzen dituztenak. Unitate horren ekoizpen-gaitasuna 1.801.000 t/urte ingurukoa da.

Eterrak ekoizteko unitatea (ET3): unitate horretan eter-terbutilikoa edo ETBEa ekoizten da, konposatu oxigenatu bat dena, eta funtsean, gasolinaren osagai moduan erabiltzen dena, oktano kopurua hobetzeko ezaugarri onak dituelako. Truke ionikoko erretxina bat erabiltzen da, eta, horri esker, erreakzioa gauzatu daiteke tenperatura nahiko baxuetan. Unitate horren ekoizpen-ahalmena 62.000 t/urte ingurukoa da.

Oxigenatuak kentzeko unitatea (OR3): OR3 unitatea BD3 unitatetik datorren butano finduak dauzkan eta ET3 unitatean, bigarren mailako erreakzioetan, sortu diren konposatu oxigenatuak kentzeko diseinatu da. Konposatu horiek kentzeko Alkilazio Unitateko operazioan hobekuntza bat ematen du, kontsumo azidoaren eta alkilatoaren kalitatearen ikuspuntutik. Unitate horren tratamendu-gaitasuna 376.680 m3/urte da.

Kokizazio atzeratuko unitatea (CK6): unitate horretan produktu astunak produktu arinago bihurtzen dira termikoki. Prozesu hori biskositatea murrizteko unitatearen antzekoa da, baina zorroztasun handiagoa du. Kokizazio-unitateak 2.000.000 t/urte inguruko gaitasuna du eta honako sekzio hauek jasotzen ditu:

Karga berotzeko eremua, kokizazio- eta zatikapen-prozesua edo erreakzioan lortutako produktuen banaketa.

Kontzentrazio-eremua, aminekin garbitzea eta gasen berreskurapena (GASCON sekzioa).

PGLa desulfuratzeko eremua, MEROX M-6 unitateari dagokiona.

Biltegiratzeko eta kokea bidaltzeko eremua (AL6): kokea kokizazio-ganberetatik hobi batera deskargatzen da; hobi horretan, ganberak hozteko eta mozketarako erabilitako uretik bereizten da kokea. Bereizitako ur hori egokia da hozteko eta mozketarako ur moduan berrerabiltzeko. Zubi-garabi batek toberaren, baheketaren, bereizgailu magnetikoaren eta errotaren sistemara eramaten du kokea (50 mm-ko kokea lortzeko), eta hortik zinta tubular baten bidez garraiatzen da amaierako biltegiratze itxira, atmosferara hauts gutxiago igortzeko eta soinu-kutsadura moteltzeko. Kokea findegiaren kanpoaldera eramateko, materia hori garraiatzeko egokitutako kamioiak erabiltzen dira. Kargagunea automatizatuta dago eta atmosferara hauts gutxiago igortzea ahalbidetzen du.

Solteko solidoak biltegiratzeko eta bidaltzeko instalazioa, honako hauetan datzana: kamioiei harrera egiteko sistemak, barne-banaketarako zinta estaliak, bi nabe bereizi eta sufrea eta petrolio-kokea gordetzeko estalkiak eta kargatzeko eta bidaltzeko sistemak.

H7 hidrogeno elektrolitikoa ekoizteko unitatea, 2,5 MW-ko kontsumo elektrikokoa, 500 Nm3/h-ko hidrogeno-emari izendatua sortzeko diseinatua.

Bilboko portuko instalazioetan, Ceballos lurmuturreko pantalanaren eta Zierbenako dikearen arteko lurzatia batean (gutxi gorabeherako azalera: 46.700 m2).

Erregai sintetikoak ekoizteko demo unitatea (frogantza teknologikorako instalazio honek 8 urteko iraupena izango duela kalkulatzen da): unitatea honako sekzio hauez osatuta dago:

Reverse water gas shift (RWGS) sekzioa.

Fischer-Tropsch (FT) sekzioa.

Upgrading products sekzioa.

Produktu likidoen 50 bbl/d-ko ekoizpen-ahalmena du. Instalazioa elektrolisi-unitatetik datorren H2 berriztagarriz elikatuko da, baita findegitik datorren CO2-z eta hidrogenoaren elektrolisi alkalinoko unitate beretik eratorritako O2-z ere. Instalazio honetan, jarduera Synkedia Biscay AIE sozietateak gauzatuko du.

10 MW-ko elektrizitate-kontsumoa duen elektrolisi-unitatea, gutxi gorabehera 180 kg/h-ko H2 ekoizpena duena (2.000 Nm3/h), gutxi gorabehera 8.400 h/urteko zerbitzu-faktorearekin. Unitatea ur desmineralizatuz eta potasaz elikatuko da. Prozesu horretarako teknologia tenperatura baxuko elektrolisia izango da. Ekoitzitako H2-a Demo unitateko RWGS sekzioan kontsumituko da, eta soberakina findegira bidali ahalko da HUBeko lurzatia La Caldera eremuarekin lotzen dituen poliduktu berriaren medioz. Ekoitzitako O2-a erregai sintetikoen instalaziora bidaliko da, edo leku seguru batean haizatuko da atmosferara. Instalazio horretan, Basque Hydrogen SL taldeak gauzatuko du jarduera.

Erantzukizunak Petróleos del Norte SA (Petronor), Synkedia Biscay AIE eta Basque Hydrogen SL taldeen artean banatuta egongo da, eta kontratu pribatu baten medioz mugatuko dira erantzukizun horiek.

Findegiaren hego-ekialdeko muturrean, 27.590 m2 inguruko lurzati batean, Abanto y Ciérvana-Abanto Zierbenako udal-mugartean, hidrogenoa ekoizteko instalazioa dago ur-elektrolisiaren bidez, teknologia alkalinoarekin (100 MW-ko elektrolizagailua). Honako elementu hauek osatzen dute instalazioa:

Elektrolizagailua: 10 modulu elektrolizatzaile ditu guztira. Modulu bakoitzak bi gelaxka (edo pila) eta elektrolizagailua bereizteko/hozteko unitateak ditu.

Azpiestazio elektrikoa eta artezgailua.

H2 arazteko unitatea: mendebaldean dago, rack nagusitik gertu. H2 lehor eta araztuaren linea findegiko hidrogeno-konektoreekin eta portuarekin konektatuko da.

Hozteko uraren sistema:

Hozte-dorrea. Sistemak honako hauek ditu: ura metatzeko putzu bat, bi gelaxkadun hozte-dorre bat, tiro induzituko haizagailuekin, urak zirkulatzeko bi ponpa, iragazte-sistema bat eta tratamendu kimikorako pakete bat. Diseinu-arazorik gabe ur berrerabilia erabili ahal izateko diseinatuta dago. Gainera, sareko ur gordinaren konexio bat dago, ur berrerabilirik ez badago erabili ahal izateko.

Elektrolizagailuen zirkuitu itxia. Honako hauek ditu: espantsio-andela, bi zirkulazio-ponpa, bero-trukagailuak eta tratamendu kimikoko pakete bat. Elektrolizagailuen eraikinaren hegoaldean dago.

Ur desmineralizatuko eta arazteko sistema. Honako hauek ditu: ur desmineralizatuaren andela, ura tratatzeko hornidura-ponpak, ur desmineralizatuaren tratamendua, ur desmineralizatu araztuaren andela eta ur araztuaren ponpak. Elektrolizagailuen eraikinaren hegoaldean dago sistema.

Elektrolito-potasa sistema (KOH) eta drainatze-bilketa: KOH soluzioa hornitzeko zisternak deskargatzeko ponpa bat, KOH soluzioa biltegiratzeko andel bat, KOH zirkulazio-ponpa bat, guztiak elektrolizagailuen eraikinaren mendebaldean kokatuak. Eraikin horren hegoaldean, KOH biltzeko biltegi bat eta KOH biltzeko ponpa bat daude.

Haizatze-sistema: prozesuan, haizatze-sistema hauek daude:

Hidrogenoa: elektrolizagailuetako abiadura handiko haizatzeak eta biltegiratze-andelen larrialdiko despresurizazioa findegiko 1. zuzirantz bidaliko dira. Elektrolizagailutik datozen abiadura txikiko haizatzeak eta emaria atmosferara haizatuko dira.

Oxigenoa: abiadura handiko haizatzea eta abiadura txikikoa kolektore independenteen bidez egingo dira atmosferara.

Nitrogenoa: normalean ez da sortuko, gainpresio bat gertatzen ez bada.

H2 konpresio- eta biltegiratze-sistema: kolektore elektrolitikoaren H2ren zati bat konpresio bidez biltegiratuko da, bi etapako konpresore batekin. Konpresorea eta biltegiratze-ontziak elektrolisi-eremutik kanpo daude, espazio-mugak direla eta. Kanpoko rack batek konektatuko ditu hozte-dorreak H2 biltegiratzeko eremuarekin eta elektrolizagailu zentralaren eremuarekin. Hidrogeno erabilgarria biltegiratzeko ahalmena 8.000 kg-koa da.

Sistema osagarriak: H2 zuziz despresurizatzea, oxigenoa leku seguru batera haizatzea, tresnen airea, nitrogenoa, efluente likidoak.

Halaber, proiektuak interkonexio hauek ditu bere barnean:

Poliduktutik interkonexioa egitea hidrogeno elektrolitikoaren kolektorearekin.

Nortegasko poliduktuarekiko interkonexioa Abantoko Parke Teknologikorantz.

Interkonexioa H4 unitateko kolektorearekin.

Interkonexioa H3 unitateko kolektorearekin.

Zerbitzu osagarri guztiak findegitik hartzen dira, elektrizitatea eta hozteko ura izan ezik. Hozte-dorre berriko ekarpen-ura lehendik dagoen findegiko kolektore baten bidez egingo da.

Proiektuak bi ur-kontsumo nagusi ditu:

Ur desmineralizatua H2 ekoizteko elektrolizagailuan, sareko uraren 211.200 m3/urteko kontsumoarekin.

Hozte-zirkuiturako berrerabilitako ura (lurrunketa eta purgatzeak), 734.000 m3/urtean, findegiko ur-saretik datorrena.

Gainera, urtean 78.000 m3 sareko ur kontsumitzen da zerbitzu osagarrietarako (suteen aurkako sistemak, begiak garbitzeko dutxak, etab.).

Proiektuak 400 kV-ko elektrizitate-hargune bat barne hartzen du Abantoko azpiestaziotik. Lineak 670,1 m-ko luzera du, zirkuitu bikoitzekoa; horietatik 325,6 m airetik doaz eta 344,5 m lurperatuta. Linea 59,57 m igarotzen da findegiaren barrutik, eta gainerako zatia findegitik kanpo luzatzen da, Abantoko azpiestazioraino. Lineak 4 euskarri ditu, elektrolizagailuaren portikoaz gain. Aireko lineak elektrokuzioaren aurkako babesa eta talken aurkako babesa izango ditu, abifauna babesteko.

Hidrogenoa ekoizteko instalazioa findegiko sistema elektrikoetatik elektrikoki independentea da. Instalazioaren kontsumo elektrikoa urtean 1.092.000 MWh-koa izango da gehienez, eta horren hornidura iturri berriztagarrietatik bermatu behar da. Elektrolizagailua jatorri berriztagarriko elektrizitatearekin soilik elikatuko da, proiektuari esleitutako dirulaguntzak eskatzen duen bezala. Dirulaguntza horren arabera, erakunde onuradunek urtero frogatu beharko dute, instalazioaren bizitza baliagarri osoan zehar eta dagokion ziurtagiriaren bidez, ekoitzitako hidrogenoak betetzen duela berotegi-efektuko gasen emisioak murrizteko irizpidea, zeina jatorri ez-biologikoko erregai berriztagarrietarako eskatzen baita Iturri berriztagarrietatik sortutako energiaren erabilera sustatzeari buruzko Europako Parlamentuaren eta Kontseiluaren 2018ko abenduaren 11ko 2018/2001 (EB) Zuzentarauan, bai eta betearazteko egintzetan eta delegatuetan ere. H2-ren ekoizpena % 100ekoa izango da elektrolizagailuan (16.800 t/urtean), baina energia berriztagarriaren hornidurak horretarako aukera ematen badu soilik. Instalazio horretan, Bay of Biscay Hydrogen SL taldeak gauzatuko du jarduera.

Erantzukizunak Petróleos del Norte SA (Petronor) eta Bay of Biscay Hydrogen SL sozietateen artean banatuta egongo da, eta kontratu pribatu baten bidez mugatuko dira erantzukizun horiek.

Instalazio laguntzaile nagusiak hauek dira:

Energia elektrikoa sortzeko unitateak:

11,2 MW-ko turbohedagailua.

Kogenerazio-unitatea (CG1): 38 MW-ko gas-turbina oinarri harturik.

Kogenerazio-unitatea (CG6): 43,37 MW-ko potentziako gas-turbina baten bidez.

Azpiestazio elektrikoak energia elektrikoaren banaketa kapilarrerako.

Sufre komertziala biltegiratzeko eta bidaltzeko azpiegitura (siloak, etab.).

Lehengaietarako, bitarteko produktuetarako edo amaitutako produktuetarako deposituen parkea.

Interkonexioak eta hoditeria-rackak, unitateak elkarrekin konektatzeko.

Zazpi galdara, lurruna sortzeko 530 t/h inguruko gaitasuna dutenak.

Bost hozte-dorre, egunean 782.000 m3ko emari zirkulatzailea dutenak.

Findegiak segurtasunez jarduteko behar dituen zerbitzuen azpiegitura (presio bidezko airea, nitrogenoa, ura, lurruna, kondentsatua, gehigarriak eta abar sortzea).

Itsas terminala Luzueroko puntako kai-muturrean, sei atrakaleku dituena; Mendebaldeko Dikera atxikitako kaian eta kargatzeko pantalanean daude atrakaleku horiek.

Ur desmineralizatua ekoizteko eta desgasifikatzeko instalazioa eta hozteko ura sortzeko instalazioa.

CO2 konpresorea eta findegiko goi-presioko sarearekiko interkonexioak.

Instalazioak honako energia-baliabideak kontsumitzen ditu: energia elektrikoa, erregai gaseosoa eta fuel-olioa findegiko labeak eta galdarak hornitzeko.

Emisio atmosferikoei dagokienez, enpresak 23 emisio-foku sistematiko horietako 22, findegian hauek ditu: I. instalazioko tximinia (U-STK-02), II. instalazioko tximinia (U2-STK-01), III. instalazioko tximinia (U3-STK-01), III. instalazioko tximinia FCC (U3-STK-02), alkilazio-tximinia (AK3-STK-01), I. kogenerazio-tximinia (CG-STK-01), itsas terminaleko lurrun-andela (TM), hidrogenoa ekoizteko unitateko tximinia (H4-STK-01), naftak desulfuratzeko tximinia (NF3-STK-01), gasolioa desulfuratzeko tximinia (G4-STK-01), II. lurrun-andela (itsas-terminaleko berogailuaren lurrun-andela), kogenerazio-galdararen tximinia (CG6-STK-01), kokizazio-labeko tximinia (CK6-STK-01), kokizazio-naftaren HDT labeko tximinia (NC6-STK-01), kokea biltegiratzeko pabiloiaren aireztapena (AL6-F-01 A), kokea biltegiratzeko pabiloiaren aireztapena (AL6-F-01 B), kamioiak kokez kargatzeko siloen xurgaketa (AL6-F-02 A), kamioiak kokez kargatzeko siloen xurgaketa (AL6-F-02 B), kamioiak kokez kargatzeko siloen xurgaketa (AL6-F-02 C), kamioiak kokez kargatzeko siloen xurgaketa (AL6-F-02 D) eta sufrea biltegiratzeko siloen xurgaketa (SR6-X-11), KOLak berreskuratzeko unitatearen haizatzea eta bat HUB instalazioan (23. fokua), KOLak ezabatzeko sistema.

Foku horiez gain, lau zuzi daude prozesu-unitateetan (3 findegian eta 1 HUB instalazioan) gehiegi ekoitzitako gasak modu seguruan eroan eta erretzeko, larrialdiko deskargetarako eta aldizkako beste deskarga batzuetarako; gelditze- eta abiarazte-aldietarako diseinatuta daude bereziki zuzi horiek. Era berean, hidrogenoa ekoizteko instalazioak (100 MW-ko elektrolizagailua) H2, N2 eta O2 haizatzeko hiru sistema ditu.

Udal-hondakinen barnean, olio eta gantz jangarriak eta beste biohondakin batzuk kudeatzen dira; zehazki, produktu jasangarriak formulatzeko hidrodesulfurazio-prozesuetara bideratzen dira horiek, hidrokarburoen sektoreko araudian ezarritako baldintzak betez betiere (R0102 kudeaketa-eragiketa).

Era berean, instalazioetako ur oliotsuak ere autogestionatzen dira, baita 1. eranskineko Marpol (A eta B motakoak) eta II. eranskineko Marpol Y hondakinak ere: substantzia kaltegarri likidoak, flotagarri iraunkorrak.

Findegiko hondakin-ur guztiak tratamendurako instalazio komun batera bidaltzen dira (HUA instalazioa). HUA instalazioaren tratamenduaren eskemak hiru lerro ditu funtsean:

Prozesu-uren lerroa (L1), gordinki-deposituen drainatzeen eta gordinkia gezatzearen ondoriozko uren tratamendurako.

Ur koipetsuen lerroa (L2), kutsatutako euri-uren, prozesu-instalazioetako uren, eremu-garbiketen ondoriozko uren, ur-stripper-etako uren eta laborategi-uren tratamendurako. Lerro horretan ur beltzak ere tratatzen dira (L3).

Kaleetako areketatik eta uraldietan jasotako euri-uren, hozkuntza-dorreen purgen ondoriozko uren, galdara-purgetako uren eta neutralizazio-uren lerroa (L4).

Gainera, findegiak itsasontzien lasta-urak tratatzeko instalazio bat du; lehenik eta behin, biltegiratze-deposituetan dekantatzen dira, eta, ondoren, API bereizgailu batean tratatu.

Tratatutako urak, bai HUA instalazioan, bai lasta-urak tratatzeko instalazioan, itsas zabaleko isurgune bakar batean isurtzen dira, Luzueroko puntako portuko terminaleko kanpoko aldean, findegitik 4 km inguruko distantzia batera.

Instalazioetan kontsumitzen den ura bi iturritatik jasotzen da: alde batetik, findegi-ura berreskuratzeko sistemaren bidez jasotako ur birzirkulatua, eta bestetik, Bilbao-Bizkaia Ur Partzuergoko hornidura-sareko ura.

HUA instalazioa eguneratu egin da instalazio horren gaitasuna hobetzeko, usain-jarioen inpaktuak murrizteko eta ura berreskuratzeko prozesua faboratzeko. Horrela, honako ekipamendu hauek erantsi dira:

Solido lodien arbastuak.

Atmosferara itxita dauden API erako grabitatearen bidezko hidrokarburo-bereizgailuak.

Larrialdi-bereizgailuak (uraldi handiak), API bereizgailuen antzeko neurriekin eraikiak.

Ur-ponpaketa API bereizgailuen irteeran.

CPI erako plaka koaleszenteen bidezko bereizgailua, ur oliotsu itxientzat.

Ekaitz-urak husteko biltegiratze-sistema, antzinako metaketa-baltsen ordez.

Lohien tratamendurako instalazioa lokatzak pilatzeko depositu itxiarekin.

Instalazioan araztu beharreko korronteak hozteko sistemak.

Karga kutsatzaileak homogeneizatzeko depositua (TK 011), uren tratamenduaren egonkortasuna ahalbidetzeko.

Lerroen interkonexioa (L1/L2) eta instalazioaren gaitasuna hobetzeko sistemak.

Erregai sintetikoen eta hidrogeno elektrolitikoaren instalazioak (HUB instalazioa) hondakin-uren hiru fluxu bereizi ditu:

Korronte inorganikoetako urak (hozkuntza-dorreen purgatzea, instalazio elektrolisiko kondentsatuaren korrontea, alderantzizko osmosirako sistemaren aurreko harea-iragazkien kontragarbitzea): instalazio bat du (tratamendu fisiko-kimikoa + iragazketa), 6,15 m3/h-ko tratamendu-ahalmenarekin.

Korronte organikoetako urak (prozesu-urak eta ur sanitarioak): 2,28 m3/h-ko tratamendu-ahalmena duen instalazio bat du (lamela-bereizgailua, erreaktore biologikoa eta iragazketa).

Kutsadura arrastatu dezaketen eurien jariatze-urak: 3 m3/h-ko tratamendu-ahalmena duen lamela-bereizgailu bat du hidrokarburoetarako.

Behin araztuta daudela, isurketa-fluxuak itsas terminalera isurtzen dira.

Hidrogenoa ekoizteko instalazioak (100MW-ko elektrolizagailua) hiru efluente likido jarraitu sortzen ditu:

Ura arazteko unitatearen errefusak: barnean erabiliko da hozte-dorreetarako ur gisa.

Hozte-dorreen purgatzeak: instalazioetako gainerako hozte-unitateen purgatze-zirkuituan integratuko da, ondoren itsasora isurtzeko. Efluente horren bolumen zenbatetsia (25 m3/h) findegiaren egungo isurketa-baimenaren bolumenaren barruan sartzen da (6,9 Mm3/urtean), eta L4 izeneko isurketa-fluxuan integratzen da.

H2 araztea: elektrolisiaren ondoren gas-korrontetik datorren ura, hozte-dorreetarako ekarpen gisa berrerabiliko da.

Bestetik, sortutako hondakin arriskutsu nagusiak ekoizpen-prozesuaren hainbat etaparekin lotzen dira (alkilazioa, hidrotratamendua, hidrogenoaren fabrikazioa, desulfurazioa, sufre-instalazioa, lasta-urak, hondakin-uren tratamendua eta deposituen garbiketa), baita zerbitzu orokorren prozesuarekin ere. Hondakin arriskugabeei dagokienez, garrantzitsuenak honako hauek dira: cracking katalitikoa, enbalajeak, mantentze-lanak eta gas-ikuzketa. Instalazioan autogestio-prozesu bat egiten da ontzietako hondakinak garbitzeko, non "olio eta amina ez erabilgarriekin kutsatutako ontziak", esaterako, hondakinen ontziak, lurrunarekin eta urarekin garbitzen diren. Ontzi horien garbiketan sortzen diren urak industria-uren instalaziora eramaten dira.

Era berean, instalazioan hondakin arriskugabeetarako zabortegi bat dago, eta zabortegi hori zigilatu eta itxi beharra agindu zen 2008ko maiatzaren 26an, baita mantentze-lanetarako eta kontrolerako fasea abiarazi beharra ere zabortegi hori itxi ondoren.

Instalazioak Batzordearen 2014ko urriaren 9ko betearazpen-erabakia betetzeko beharrezkoak diren baliabideak ditu nola teknikoak hala antolaketa-alorrekoak. Erabaki horren bidez (2014/738/EB), petrolio- eta gas-finketan teknologia erabilgarri onenei (TEO) buruzko ondorioak ezartzen dira eta ondorio horietatik honako Ondorio hauek aplikatu behar dira: 1. TEO, 2. TEO, 3. TEO, 4. TEO, 5. TEO, 6. TEO, 7. TEO, 9. TEO, 10. TEO, 11. TEO, 12. TEO, 14. TEO, 15. TEO, 16. TEO, 17. TEO, 18. TEO, 19. TEO, 20. TEO, 24. TEO, 25. TEO, 26. TEO, 27. TEO, 28. TEO,29. TEO, 33. TEO, 34. TEO, 35. TEO, 36. TEO, 37. TEO, 38. TEO, 39. TEO, 40. TEO, 44. TEO, 45. TEO, 46. TEO, 47. TEO, 48. TEO, 49. TEO, 50. TEO, 51. TEO, 52. TEO, 53. TEO, 54. TEO, 55. TEO, 56. TEO, 57. TEO eta 58. TEO.

Era berean, honako neurri tekniko hauek daude:

Sufre-kontzentrazio txikiagoko erregaiak erabiltzea, karga FCCra desulfuratuz edo efizientzia energetikoa handituz, unitateen erabileraren adierazle altuen arabera.

Kutsatzaileak azkenean kentzea: hondakin-uren tratamenduko instalazioaren tratamendu biologikoetan errendimendu egokiak izatea, sabai flotagarridun deposituetan zigilu bikoitza izatea. Halaber, sufrea berreskuratzeko lau instalazioek prozesuetan ezabatutako sufrearen gas-korronteak tratatzen dituzte; zehazki, sufre solido bihurtzen dute (hala, ez dago emisio atmosferikorik).

Instalazio eta ekipamendu guztiek, normalean, prebentziorako mantentze-lanen programak izaten dituzte, energia-errendimendu hobeezina etengabe ziurtatzeko.

FCCn kargatzeko hidrotratamenduaren unitatea; horrela, aldez aurretik desulfuratzen da HD3 unitatean, eta korronte horren sufre- eta nitrogeno-edukia murrizten da.

Korronte gaseosoetan berreskuratutako H2S-ren tratamendurako sufre-berreskurapen unitatea. Horrela, sufre solido bihurtzen da eta atmosferara SO2 isurtzea saihesten da.

SO2, NOx, partikula solidoak, CO eta opakutasuna etengabe neurtzea hainbat tximiniatan instalatutako analizatzaileen bidez.

Erregailuen mantentze-lan egokia egitea, baita metxeroen aldizkako berrikuspenak ere.

Ixte bikoitz mekanikoa eta ihesak jasotzeko sistema duen hutsegite-alarma erabiltzea hidrokarburo arinekin lan egiten duten ekipamenduen ponpetan, konposatu organiko lurrunkorren (KOL) emisioak murrizteko. Sabai flotagarria duten deposituetan zigilu bikoitza jartzea hidrokarburoak biltegiratzean. Balbula-paketatzeak aldatzea eta laginak hartzeko prozedura zehatzak definitzea, KOLen emisio difusoak saihesteko. Jarioak hautemateko eta konpontzeko programa.

Drainatze zigilatuko sarean ur oliotsuak jasotzea, hidrokarburoak airearen eraginpean denbora gutxiagoan izatea eta homogeneizazio-baltsan aireztapen egokia izatea KOLen emisioak minimizatzeko.

Errekuntza-prozesuko baldintzen kontrola.

Errekuntza-baldintzak egokitzea nitrogeno oxidoen (NOx) emisioak minimizatzeko eta NOx baxuko erregailuak erabiltzeko.

Zikloien bidezko solidoak manipulatzearen ondoriozko partikulen emisioak minimizatzea, FCC birsortzailearen emisioak murrizteko.

Ur oliotsuak eta euri-urak drainatzeko sare independenteak ditu, eta horri esker, ur horiek eraginkortasun handiagoz trata daitezke. HUA instalazioak larrialdi-baltsa bat du instalaziora zuzenean bidali ezin daitezkeen isurketak kontrolatzeko.

Prozesu-eremuetatik jasotako euri-urak HUA instalaziora bideratzen dira, non ur oliotsuen tratamendua jasotzen duten.

Tratatutako ura hozkuntza-dorretara, suteen aurkako sistemara, landak ureztatzeko sistemetara eta gordinkia gezatzeko instalazioetara birzirkulatzea eta kondentsatu garbi guztiak berreskuratzea. Kokea mozteko prozesuan eta kokea garraiatzeko kamioien garbiketan erabilitako ura berrerabiltzea, koke-finak kentzeko dekantazio-sistema batetik pasa aurretik.

Ur oliotsuak eta prozesuko ur ez-oliotsuak drainatzeko sare independenteak, alde batetik, eta euri-ur garbiak, bestetik; horri esker, ur oliotsuak hozketa-dorreetan, instalazio-uretan eta suteen aurkako uretan erabili ahalko dira, tratamendua eraginkorragoa izanik.

Ur azidoen stripperrak ditu, non H2S eta NH3 maila altua duten urak tratatzen diren, prozesuan berriz ere sartu ahal izateko.

Kokizazio atzeratuko unitateak labe-sarrerako karga berotzeko tren batekin dihardu, efizientzia energetikoa hobetze aldera.

Gas-kokizazioa, aminen unitatean aldez aurretik araztu ondoren, URF unitateak elikatzeko erabiltzen da, SO2 isurketak eta partikulak murrizteko.

Gasak birzirkulatzeko eta errekuntza ondorengo teknika erabiltzea kogenerazio-unitatean, sortutako lurruna eta efizientzia energetiko globala handituz.

Kokearen egokitzapena eraikin itxi batean egiten da, ingurunearen, zarataren eta partikulen gainean ahalik eta eraginik txikiena sortzen dela bermatzeko, laino lehorraren sistema erabiliz, hautsa birrinketa-eremuan eta zinta arteko transferentzia-puntuetan konfinatze aldera.

Ekoitzitako kokea biltegiratzea, bereziki xurgatzeko eta hautsa iragazkien bidez jasotzeko sistema duen ontzi itxian bidaltzen denean.

Findegiko instalazioen barruan kokea garraiatzeko, zinta itxiak, tubularrak edo sandwich erakoak erabiltzen dira.

Kamioietan kokea kargatzeko toberetan mahuka-iragazkien bidezko xurgatze- eta iragazte-sistema izatea.

Gastatutako katalizatzaileen ex situ birsorkuntza.

Nitrogeno bidez geldotzea, kokizazio-unitatetik jasotako biltegiratutako produktuen deposituetan.

URF unitateek deskargatutako gasak berreskuratzeko sistemak instalatzea, eraztun likidoko erako konprimagailuaren bidez.

Grabitatearen bidezko hidrokarburo-bereizgailuetan (API) jasotako lohiak, lohi biologikoak eta olio dekantatuak kokizatzeko unitatea berrerabiltzea».

Hirugarrena. Ebazpen hau Petróleos del Norte SAri (Petronor) jakinaraztea.

Laugarrrena. Ebazpen hau jakinaraztea Muskiz, Zierbena eta Abanto y Ciérvana-Abanto Zierbenako udalei, Eusko Jaurlaritzako Osasun Sailari eta kontsulten izapidean parte hartu duten gainerako organismo eta elkarteei, jakinaren gainean egon daitezen eta behar diren ondorioak izan ditzan, eta, bereziki, legez eska daitezkeen beste lizentzia, baimen, erantzukizunpeko adierazpen edo komunikazio batzuk lortu ahal izateko.

Errekurtsoak.

Egintza honek ez dio amaiera ematen administrazio-bideari, eta, beronen aurka, gora jotzeko errekurtsoa jarri ahalko zaio Industria, Trantsizio Energetiko eta Jasangarritasuneko sailburuari, hilabeteko epean, jakinarazpena egin eta hurrengo egunetik hasita, Administrazio Publikoen Administrazio Prozedura Erkidearen urriaren 1eko 39/2015 Legearen 121. eta 122. artikuluetan xedatutakoarekin bat.

Vitoria-Gasteiz, 2025eko irailaren 3a.

Ingurumeneko sailburuordea,

JOSU BILBAO BEGOÑA.