-
Jarduketak barne hartzen ditu bide berriko 430 metro, lehendik dauden 2,7 km-ko hobekuntza, bi begiratoki panoramiko eta oinezkoentzako eta txirrindularientzako erraztasunak
Arabako ibilbide berdeen sareak bideak eta bidezidorrak zabaltzen eta hobetzen jarraitzen du, hala nola oraintsu amaitu duena Foru Aldundiak presa eta Langara Ganboa artean urtegiaren ibilbide berdean. Jarduketa horren bidez, tartea egokitu da, bai eta Aldaieta eremuan malda egokia duen saihesbide bat eta segurtasun handiagoko baldintzak sortu ere. Guztira, bide berriaren 430 metro lineal ireki dira eta bidean lehendik zeuden 2,7 kilometroak hobetu, eta, gainera, errepidetik gertu dagoen eremu bat ingurumenaren aldetik itxuraberritu da.
Era berean, Aldaietako tartean ikuspegi onak dituen gunea aprobetxatzea eta begiratoki txiki bat eraikitzea aurreikusten da, ingurune horretara hurbiltzen diren pertsona guztiek hartaz goza dezaten. Gune horri ekipamendua eman zaio, eserlekuak eta bizikleta aparkalekua barne, aisialdirako espazio seguru eta irisgarria sustatuz.
Saray Zárate Ekonomia Garapenaren eta Jasangarritasunaren Saileko foru diputatua, Clara Navas Eusko Jaurlaritzako Turismo eta Ostalaritzako zuzendaria, Arratzua-Ubarrundiako alkatea eta Landako Administrazio Batzordeko presidentea bertan izan dira dagoeneko martxan dagoen trazadura berria bisitatzen.
Saray Záratek balioa eman die Araba inguratzen duten ibilbide berdeei; izan ere, “Foru Aldundiaren politiken funtsezko pieza bat dira, Arabako herritarrei ongizatea eta aisialdi osasungarria ekarriko dizkien giza garapen jasangarria 2050erako lortzeko. Horrez gain, tokiko azpiegitura eraldatzen duen tresna da, lurralde jasangarriagoa eta erresilienteagoa lortzeko”.
Clara Navasek azpimarratu duenez, gaur aurkezten den jarduketa "urrats erabakigarria da turismo eredu orekatuagoa, errespetutsuagoa eta gure lurraldea definitzen duten ingurumen balioekin bat datorrena lortzeko. Ekimen honekin berresten dugu turismoarekin dugun konpromisoa, bisitariak erakartzeaz gain, gure nortasuna babestu, tokiko ekonomia dinamizatu eta klima aldaketaren aurkako borrokan laguntzen baitu".
Esku hartzeak Urtegiaren Ibilbide Berdea hobetzen du, eta mugikortasun jasangarria ere sustatzen du; hala, CO" emisioak murrizten laguntzen du, eta inguruneko natura- eta kultura-ondareari lotutako turismo eskaintza dinamizatzen du.
Lurraldeko ibilbide berdeen sarea oinez eta bizikletaz ibiltzeko egokituta dago eta diseinatu da Arabako natura ondarea, paisaia eta biodibertsitatea kontserbatzeko eragile gisa. 1.000 kilometro bide baino gehiago ditu zerbitzuan, eta urtean 650.000 pertsona baino gehiagok erabiltzen dute batez beste; martxotik urrira bitarteko hilabeteetan izaten dira zifra handienak.
Esku hartzeari esker neguan ere erabili ahal izango baitira orain arte oso irisgarriak ez ziren tarteak, lokatza, hezetasuna eta zoruaren egoera txarragatik.
Saray Zárate Ekonomia Garapenaren eta Jasangarritasunaren Saileko foru diputatuaren ustez, “zifra horiek erakusten dute sareak onura funtzionalak, lurraldekoak eta ekonomikoak dakartzala argi eta garbi, lurralde kohesioa eta konektibitate estrategikoa sustatzen baititu landa ingurunea eta hiri ingurunea lotzeko, eskualdea egituratu eta antolatu nahian”.
Obra horretarako aurrekontua 298.998,13 euro da, BEZa barne, eta Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planak finantzatzen du.
"Uribarri Ganboako urtegiko hondartzak eta ingurune naturala" HTJPn kokatutako proiektu horrek, honako hau jasotzen du Efizientzia Energetikoaren ardatzean: "mugikortasun jasangarrirako egokitzea eta, zehazki, Uribarri Ganboako urtegiaren ibilbidean oinezkoen eta bizikleten erabilerarako trazadura egokitzea eta hobetzea".
Informazio gehiago Irekia atarian (Leiho berrian irekiko da)