Albisteak

Turismo, Merkataritza eta Kontsumo Sailak eta Repsol Gidak Hornidura Merkatura eraman dute Edorta Lamo

17-03_Show_Cooking_Mercado_de_Abastos.jpg

2022-03-17

  •  Repsol Gidak Euskadiko merkatuetara eraman ditu bere Eguzkiak. Gasteizko Abastos merkatuan egin da “Atrévete con” izeneko showcookinga, eta, bertan, sasoiko produktuekin hainbat errezeta prestatzen erakutsi digu Edorta Lamok.

  • Repsol Gidako Eguzkiek Euskadin jarraitzen dute joan den otsailaren 28an eman zirenetik, tokiko merkatuek pertsonen eta tokiko produktuaren arteko elkargune gisa betetzen duten zeregina babestu eta aldarrikatzeko.

Turismo, Merkataritza eta Kontsumoko sailburua Gasteizko Abastos Merkatuan izan da, Repsol Gidako Eguzkiak banatzeko ekitaldiari lotutako ekintza bat egin baita bertan. “Atrévete con” goiburupean, Repsol Gidako 2 Eguzki lortu dituen Arrea! Jatetxeko Edorta Lamo sukaldariak hainbat errezeta landu ditu sasoiko produktuekin.

Showcooking horren bidez, Repsol Gidako Eguzkiak merkatuetara iritsi dira, merkatuek pertsonen eguneroko bizitzan betetzen duten zeregina nabarmendu eta aldarrikatzeko. Ekimen hori bertakoek eta kanpokoek Edorta Lamo sukaldari ospetsuarekin zuzenean gozatu ahal izateko pentsatuta zegoen. Sukaldariak ez du zalantzarik izan, eta sasoiko hainbat produktu erabili ditu Eguzkiak dituzten bi errezeta lantzeko: oilasko-hanka frijitua & etxeko barbakoa, tripaki-arrabak & pipermin hartzitua eta aza gorri marinatua, sagarra & jogurta.

Edorta Lamok Arabako Mendialdean hartu du aterpe, bere sustrai existentzial eta gastronomiko propioari atxikitzeko. Arrea! jatetxeko jangela nagusiak goseari, beharrari, furtibismoari, artisautzari eta tokiko beste usadio eta ohitura batzuei lotutako proposamen emozional zaporetsu baten alderdirik gastronomikoena agertzen digu. Amuarrainak, orkatzak, oreinak, bertako barazkiak, zuhaixketako fruituak, belarrak, perretxikoak, boilurrak, arkumeak, basurdeak, eperrak… Lamok paisaia kozinatzen du, eta bere upeltegian lurraldeko ardoentzako leku bat dago.

Laugarren ustez segidan, Repsol Gidak, Euskadiko Turismo, Merkataritza eta Kontsumo Sailak eta Donostiako Turismo Jasangarriko Zinegotzigoak finkatu egin dute sektore gastronomiko eta turistikoarekiko konpromisoa. “Llega el plato fuerte” goiburupean, Repsol Gidako Eguzkien aurtengo edizioak sektorearekiko babesa agertu du, eta 2022. urtea azpimarratu du, Estatuko gastronomiaz eta turismoaz berriz gozatzeko urtea izango delakoan.