Lanbidek 12,9 milioi eurora arte handitu ditu enplegua mantentzeko konpromisoa duten mikroenpresentzako laguntzak
2022-08-29
- 10,5 milioiko hasierako partidari jasotako eskaeren bolumen handia dela-eta, beste 2,4 gehitu zaizkio
Lanbide-Euskal Enplegu Zerbitzuak mikroenpresei enplegua mantentzeko laguntzen programa handituko du 2,4 milioi eurorekin. Kopuru hori, Europako funtsekin ere lotuta dagoena, hasieran emandako 10,5 milioiei gehitzen zaie, eta ekintzailetzari eta trantsizio ekologiko eta digitalerako inbertsioak egin dituzten enpresei lagundu nahi die.
Idoia Mendia lehendakariorde eta Lan eta Enpleguko sailburuak proposatuta, Gobernu Kontseiluak bihar onetsiko du "Oreka eta ekitatea lortzeko lurralde-proiektu berriak. Ekintzailetza eta mikroenpresak" programaren baliabide ekonomikoak gehitzea, Europar Batasuna–Next GenerationEUk finantzatutako Suspertze, Transformazio eta Erresilientzia Planaren esparruan.
Deialdi hau joan den abenduan onartu zen, eta haren helburua da mikroenpresen jarduerari eta enpleguari eusten laguntzea, baldin eta mikroenpresa horiek inbertsioak egin badituzte ingurumena gehiago errespetatzen duen edo digitalizatuago dagoen ekoizpen bateranzko trantsizioa errazteko. Horrela, enpresa txikien jarduera ekonomikoaren eta enpleguaren jarraitutasuna babesten da, enpresa horiek osatzen baitute beren jarduera garatzen duten biztanleguneetan gehien errotutako enpresa-sarea, eta, aldi berean, ekoizpen-modu iraunkorragoetara eta modernoagoetara aldatzea sustatzen da. Lehenengo deialdi horri 1.534 enpresa atxiki zaizkio, eta 3.700 enplegu inguru konprometitu.
Hasieran aurreikusitako 10,5 milioiak esleitu ondoren, eta jasotako eskaeren kopuru handiaren ondorioz, partida 2,4 milioi eurotan handitzea erabaki da, mikroenpresa txiki eta ertainen eskariagatik. Inflazioak sortutako zailtasunak gorabehera, energiaren eta lehengaien prezioek enpleguari sei hilabetez eusteko konpromisoa hartu dute.
