Gobernuak adimen-desgaitasuna duten pertsonek enplegu publikora jo dezaten sustatzeko jardun-ildoak onetsi ditu (Gobernu Bilera 2019-10-1)
2019.eko urriak 01
- Helburua da Euskadiko Administrazio Orokorrean eta erakunde autonomoetan % 33ko edo gehiagoko adimen-desgaitasuna duten pertsonen % 2ra iristea
- Eusko Jaurlaritzak, horrela, tratu-berdintasuneko eta bazterketarik gabeko baldintzetan lanera jotzeko duten eskubidea bermatuko du
Gaurko Gobernu Kontseiluak adimen-desgaitasuna duten pertsonek enplegu publikora jo dezaten sustatzeko eta bermatzeko jardun-ildo orokorrak onetsi ditu. Helburua da Euskadiko Administrazio Orokorrean eta erakunde autonomoetan % 33ko edo gehiagoko adimen-desgaitasuna duten pertsonentzako plaza publikoen % 2ko erreserba betetzea.
“2020rako Enplegu Plan Estrategikoaren” esparruan, Gobernu Kontseiluak, jardun-ildo berezi horien bidez, Euskal Administrazio Publikoan dagokien lekua eman nahi die adimen-desgaitasuna duten pertsonei, eta tratu-berdintasuneko eta bazterketarik gabeko baldintzetan lanera jotzeko duten eskubidea bermatu nahi die.
JARDUN-ILDOAK
Gaur onetsitako neurriek prozesu osoa hartzen duen jarduketa integrala dakarte: lanpostu egokienak identifikatzea; hautaketa-prozesua egokitzea; harrera, orientazioa eta zaintza egitea, dagokien lanpostuetan daudenean. Zehazki, 8 lan-ildo berezi dira:
- Kolektibo horiekin lanean diharduten elkarteekin lankidetzan jardutea, enplegu publikora sar daitezen eta beren erabateko lan-integrazioa sustatzeko.
- Profilera egokitzen diren lanpostuak, egokitzapenen beharra eta postuan egin beharreko egokitzapenak aztertzea.
- Kolektibo horrentzako adskripzio esklusiboko lanpostuak sortzea eta, horretarako, Lanpostuen Zerrenda aldatzea.
- Kolektiboaren behar berezietara egokitutako hautaketa-prozesuak diseinatzea.
- Lanpostuak aldi baterako betetzeko lan-poltsa deitzea.
- Lanpostuetara jotzen duten pertsonen prestakuntzarako, laguntzarako edo tutoretzarako hasierako fasea diseinatzea.
- Lan-poltsen araudi erregulatzailea egokitzea.
- Haiek behin betiko betetzeko enplegu-eskaintza publikoa egitea eta hautaketa-prozesuak deitzea.