1. Agindu honen helburua Batxilergoko Sari Bereziak arautzea da, eta haiek emateko baldintzak ezartzea.

2. Agindu hau honako ikasle hauei izango zaie aplikagarri: maiatzaren 3ko 2/2006 Lege Organikoak, Hezkuntzari buruzkoak, Batxilergorako zehazten dituen zeinahi modalitate aprobetxamendu bereziz egin duten, eta Euskal Autonomia Erkidegoko ikastetxe publiko zein pribatuetan Batxilergoko titulua jaso duten ikasleei.

1. Mila ikasleko, edo bostehun ikasletik goragoko frakzioko, Batxilergoko Sari Berezi bat eman ahal izango da, oinarri hartuta urteko deialdiari dagokion ikasturtean Batxilergoko bigarren mailan matrikulatutako ikasle guztiak.

2. Aurreko atalean jasotako ondorioetarako, kontuan hartuko dira ikastetxe publikoetan eta pribatuetan Batxilergoko erregimen guztietan matrikulatutako ikasleak.

3. Sariak emateko, urtero deituko den proba espezifikoko emaitzak hartuko dira kontuan.

1. Baldintza hauek betetzen dituzten ikasleek egin ahal izango dute proba:

   1. Euskal Autonomia Erkidegoko ikastetxeren batean Batxilergoko modalitateren bateko bigarren maila egin izana.

   2. Ikasketa horiek deialdiari dagokion ikasturtean amaitu izana.

   3. Batxilergoko zeinahi modalitatetako bi ikasturteetako nota, batez beste, 8,75 puntukoa edo hortik gorakoa izatea.

2. Batxilergoko espedientearen batez besteko nota kalkulatzeko, kontuan hartuko dira, soilik, ikasleak Batxilergoko bi mailetan egindako ikasgai komunetan, modalitateko ikasgaietan eta hautazkoetan lortutako kalifikazioak. Batez besteko nota horretan, ez da kontuan hartuko Erlijioko ikasketetan lortutako kalifikazioa.

3. Batez besteko notak bi hamartar izango ditu, eta aurreko atalean aipatutako ikasgai guztien noten batez besteko aritmetikoa izango da. Datu akademikoak eta datu pertsonalak ikastetxeko idazkariak bermatuko ditu, eta ez dira onartuko batez besteko nota zenbakiz adierazita ez duten eta idazkariaren eskuko sinaduraren eta ikastetxeko zigiluaren bidez berretsita ez dauden inskripzioak.

1. Hezkuntza, Unibertsitate eta Ikerketa Sailak urtero deituko du Batxilergoko Sari Bereziak lortzeko proba, Hezkuntza, Unibertsitate eta Ikerketa Saileko Titularraren agindu bidez; eta sari kopurua ezarriko du, 2.1 artikuluan jasotakoaren arabera, bai eta diru kopurua ere. Horrez gainera, eskaerak aurkezteko epea zehaztuko da, bai eta proba non eta noiz egingo den eta zer organok prestatuko duen ere. Eskaera-eredua aginduari erantsiko zaio.

2. Baldin eta Hezkuntza Berriztatzeko Zuzendaritzak eskabidean akats edo okerren bat dagoela sumatzen badu, interesatuari agindeia egingo zaio, hamar eguneko epearen barruan akatsa zuzendu edo manuzko diren agiriak aurkez ditzan; halaber, ohartaraziko zaio ezen, hala egin ezean, bere eskaerari dagokionez atzera egin duela ulertuko dela, Herri Administrazioen Araubide Juridikoaren eta Administrazio Prozedura Erkidearen Legearen 42. artikuluan ezartzen denarekin bat etorriz bideratuko den ebazpena eman ondoren.

3. Datu Pertsonalak Babesteari buruzko abenduaren 13ko 15/1999 Lege Organikoan eta Datu Pertsonalen Fitxategi Publikoei eta Datuak Babesteko Euskal Agentzia sortzeari buruzko otsailaren 25eko 2/2004 Legean ezarritakoarekin bat etorriz, deialdiko parte-hartzaileek baimena ematen dute deialdi hau izapidetzean jasotako datu pertsonalak tratatu eta argitaratzeko. Datuok, bestalde, Batxilergoko Sari Berezia izeneko fitxategi batean sartuko dira, deialdi hau kudeatzeko, bai eta deialdira biltzen direnei deialdiaren garapenaren berri emateko ere. Hezkuntza Berriztatzeko Zuzendaritza izango da fitxategiaren arduraduna. Datuetara sartzeko, horiek zuzentzeko, ezerezteko eta horien aurka egiteko eskubideak betetzeko, Hezkuntza Berriztatzeko Zuzendaritzara jo beharko da, honako helbide honetara, hain zuzen ere: Donostia kalea 1, 01010 Vitoria-Gasteiz.

   Era berean, deialdi honetara bildutako pertsonek baimena ematen diote Hezkuntza Berriztatzeko Zuzendaritzari beste erakunde publiko batzuetan aurkeztutako dokumentuak egiazkoak diren frogatzeko.

Proba euskaraz edo gaztelaniaz egin ahal izango da, parte-hartzaile bakoitzak zer erabakitzen duen. Ikasgai komunei buruzko zenbait ariketa egongo dira, eta, Batxilergoko bigarren mailan parte-hartzaile bakoitzak bere modalitatean egindako ikasgaiei dagokienez, gutxienez bi egongo dira, ikasleak aukeran izango dituenak.

Probaren urteko deialdiak probako ariketak zehaztuko ditu eta, horretarako, kontuan hartuko dira honako dekretu honetako eskumenak: 122/2010 Dekretuz aldatutako 23/2009 Dekretua, otsailaren 3koa, Batxilergoko curriculuma zehaztu eta Euskal Autonomia Erkidegoan ezartzen duena.

1. Proba egingo duen epaimahaia Hezkuntza Berriztatzeko Zuzendaritzak izendatuko du, eta Hezkuntza, Unibertsitate eta Ikerketa Saileko funtzionarioek eta irakasle funtzionarioek osatuko dute. Funtzionarioek ikuskatzaile-lanetan aritu beharko dute, eta irakasle funtzionarioek adituak izan beharko dute proba osatzen duten ikasgaietan.

2. Epaimahaiko presidentetza ikuskatzaile-lanetan dihardutenen artean izendatuko da, eta epaimahaiko idazkaria antzinatasun txikiena duen irakaslea izango da.

3. Pertsona horiek izendatzeko, kontuan hartuko da 4/2005 Legeak, otsailaren 18koak, Emakumeen eta Gizonen Berdintasunari buruzkoak, 20.5 eta 6. artikuluetan xedatutakoa.

4. Epaimahaian lagundu eta parte hartzeagatiko ordainketak emango dira, 121/2006 Dekretuak, ekainaren 13koak, zerbitzuen ondoriozko kalte-ordainei buruzko dekretua hirugarren aldiz aldatzeko denak, jasotako irizpideei jarraiki.

1. Ariketak osotasunean hartuta kalifikazio onena lortzen dutenek jasoko dute saria. Epaimahaiak sari-kopuru jakin bat proposatuko du, ez dena urteko deialdian adierazitakoa baino handiagoa izango, eta aurkeztu diren pertsona guztiak eta haien kalifikazioak jasoko ditu.

2. Ebazpena Hezkuntzako lurralde-ordezkaritzetan argitaratuko da deialdiaren aginduan ezarritako epean, behin-behineko zerrenda duela, eta bost egun balioduneko epea ezarriko da erreklamazioak egiteko, argitaratze-egunetik zenbatzen hasita.

3. Deialdia Hezkuntza Berriztatzeko Zuzendaritzak ebatziko du, epaimahaiak proposatuta. Eskaerak aurkezteko epea bukatzen den egunetik hiru hilabeteko epean ez bada ebazpenik jakinarazi, eskaerak ezetsitzat jo daitezke, Herri Administrazioen Araubide Juridikoaren eta Administrazio Prozedura Erkidearen Legeko 44.1 artikuluan xedatutakoaren arabera.

4. Saritutako pertsonei Ebazpena jakinarazteaz gainera, Ebazpen hori ordezkaritzetako iragarki-oholetan eta Hezkuntza, Unibertsitate eta Ikerketa Saileko web-orrian jarriko da, zabalkunde osoa izan dezan.

5. Jakinarazitako Ebazpenaren aurka, edo ebazteko epea igarota berariazko ebazpenik eman ez bada, interesdunek gorako errekurtsoa jar dezakete, 30/1992 Legeak, azaroaren 26koak, Herri Administrazioen Araubide Juridikoari eta Administrazio Prozedura Erkideari buruzkoak, 114. artikuluan xedatutakoari jarraiki.

1. Batxilergoko Sari Berezia jasotzen dutenek egiaztagiria eta 935,80 euro jasoko dituzte. Diru kopuru hori eguneratu ahalko da, urteko deialdiak hala badio, aurreko abenduko eta Estatistikako Institutu Nazionalak argitaratutako urteko kontsumoko prezioen indizearen arabera. Gainera, Hezkuntza, Unibertsitate eta Ikerketa Sailak antolatzen duen bidaia-programan parte hartu ahalko dute, eta alemanezko, frantsesezko eta ingelesezko ikastaroak atzerrian egin ahalko dituzte, dagokion deialdian zehaztutakoaren arabera.

2. Sari Berezia jaso dutenek, beharrezko inskripzioa egin ondoren, dagokion Sari Nazionalean parte hartzeko aukera izango dute.

3. Sari Berezia lortu izana ikaslearen ikasketa-espedientean eta ikasketen historialean jasoko da, diligentzia bidez, eta ikasleak probaren inskripzioa egin duen ikastetxeko idazkariak egingo du. Orobat egingo da ikasleak Sari Nazionala lortuko balu.