Herritarrak Artatzeko eta Administrazioa Berritzea

1. Enpleguaren abenduaren 21eko 15/2023 Legearen arabera, Lanbide-Euskal Enplegu Zerbitzu Publikoa zuzenbide pribatuko ente publikoa da, eta izaera juridiko propioa eta bere xedeak betetzeko eskumen osoa dauka.

2. Eusko Jaurlaritzan enpleguaren gaineko eskumena duen sailari atxikita dago, sail horren sailburuaren bidez. Azken hori arduratzen da zuzendaritza estrategikoaz, goi-mailako zuzendaritzaz, eta irizpenak ebaluatu eta kontrolatzeaz, Euskal Sektore Publikoaren maiatzaren 12ko 3/2022 Legearen 58. artikuluaren 1. eta 2. paragrafoetan aurreikusitako baldintzetan.

   Sailburuak aurreko paragrafoan aipatzen diren eskumenak eskuordetu ahalko dizkio arlo horretan eskumena duen sailburuordetzako titularrari.

3. Vitoria-Gasteizen du egoitza nagusia, baina Euskal Autonomia Erkidegoko beste udalerri batzuetan ere ezar ditzake bulegoak, baldin eta beharrezkoa bada aginduta dituen zerbitzuak behar bezala ematen direla bermatzeko.

   Lanbide-Euskal Enplegu Zerbitzu Publikoaren egoitza elektronikoak argitaratuko ditu egoitza nagusiaren eta bulegoen zerrenda eguneratua, kokapen geografikoa eta harremanetarako datuak, hargatik eragotzi gabe Euskal Autonomia Erkidegoko Administrazioaren egoitza elektronikoan argitaratu beharreko informazioa, ekainaren 20ko 91/2023 Dekretuan xedatutakoaren arabera (91/2023 Dekretua, herritarrei arreta integral eta multikanala ematekoa eta zerbitzu publikoak bitarteko elektronikoz irispidean izatekoa).

1. Lanbide-Euskal Enplegu Zerbitzu Publikoak Enpleguaren abenduaren 21eko 15/2023 Legean, estatutu hauetan eta, Euskal Autonomia Erkidegoko sektore publikoan txertatutako zuzenbide pribatuko ente publikoei aplikagarri zaien heinean, Euskal Sektore Publikoaren maiatzaren 12ko 3/2022 Legean eta gainerako xedapen orokorretan ezarritakoa beteko du.

2. Hirugarren pertsona fisiko eta juridikoekiko harremanetan eta bere jardueraren garapenean, oro har, zuzenbide pribatua beteko du.

   Administrazio-zuzenbideari jarraituko dio bai administrazio-ahalak betetzeko, bai barne-funtzionamendurako eta bere organoen borondatea gauzatzeko, bai gardentasunaren eta herritarren parte-hartzearen arloko betebeharretarako, bai Enpleguaren abenduaren 21eko 15/2023 Legearen 97. artikuluan aipatzen diren betebeharretarako, bai eta Euskal Sektore Publikoaren maiatzaren 12ko 3/2022 Legean eta aplikagarri zaizkion beste lege batzuetan ezartzen diren gainerako gaietarako ere.

1. Enpleguaren abenduaren 21eko 15/2023 Legearen 91. artikuluaren arabera, Lanbide-Euskal Enplegu Zerbitzu Publikoaren xedea da lan duina izateko eskubidea erabat garatzen laguntzea, eta langileen enplegagarritasuna bermatzen, enpresen eskakizunei egokitutako langile-premiak asetzen eta gizarte- eta lurralde-kohesioa bultzatzen efizientziaz laguntzeko moduko lan-merkatua eratu dadin erraztea.

2. Ahalik eta efikazia eta efizientzia handiena bermatuko du bere eginkizunak betetzean eta zerbitzuak ematean, erabiltzaileen parte-hartzearen printzipioaren arabera, eta haien eskubideak eta interesak eta beste administrazio batzuen eskumenak errespetatuz.

3. Entearen jarduerak arau hauetan (edo arauok ordezten dituztenetan) ezarritako printzipioak bete beharko ditu: Enpleguaren abenduaren 21eko 15/2023 Legearen 91. artikulua; Inklusiorako eta Diru-sarrerak Bermatzeko Euskal Sistemaren abenduaren 22ko 14/2022 Legearen 3. artikulua; eta apirilaren 30eko 438/2024 Errege Dekretuaren 4. artikulua, Enplegu Sistema Nazionalaren zerbitzuen zorro komuna eta Enpleguaren otsailaren 28ko 3/2023 Legean ezarritako zerbitzu bermatuak garatzen dituena.

   Halaber, Enpleguaren abenduaren 21eko 15/2023 Legearen 5. artikuluan jasotako printzipioen arabera jardungo du, eta Laneko eta Gizarte Segurantzako Ikuskaritzarekin lankidetzan.

Lanbide-Euskal Enplegu Zerbitzu Publikoak, Euskadin duen eskumen-esparruaren barruan, Enpleguaren abenduaren 21eko 15/2023 Legearen 92.1 artikuluan jasotako eginkizunak beteko ditu. Halaber, legeek edo Eusko Jaurlaritzak egozten dizkioten edozein motatako eginkizunak beteko ditu, edo enplegu- eta inklusio-politiken arloan eskuordetzen edo agintzen zaizkionak.

Enpleguaren abenduaren 21eko 15/2023 Legearen 92.1 artikuluaren arabera, hauek dira Lanbide Euskal Enplegu Zerbitzu Publikoaren eginkizunak Euskal Autonomia Erkidegoaren eskumen-esparruan:

1. Enplegagarritasuna hobetzeko eskubideak bermatzea, eta Euskal Enplegu Sarearen zerbitzu-zorroko zerbitzuak bermatzea eta kudeatzea, lege horretan ezartzen den gisan, eta Euskal Autonomia Erkidegoan Enplegu Sistema Nazionalaren zerbitzu-zorro komuneko zerbitzuak eta zerbitzu bermatuak ematea (Enpleguaren otsailaren 28ko 3/2023 Legean aurreikusita daude zerbitzuok).

2. Enplegagarritasuna eta okupagarritasuna hobetzeko programa osagarriez gain, enplegu-programa espezifikoak egitea eta garatzea, laneratzeko eta gizarteratzeko zailtasun bereziak dituzten kolektiboentzat, eta enplegu duina sortzeko.

3. Lan-merkatuaren premiak, profil okupazionalen bilakaera, lanbide-eskakizunak eta lan-orientazioa aztertzeko eta informatzeko eginkizun guztiak betetzea, eta Euskal Enplegu Sarea osatzen duten entitateek erabili beharko dituzten arreta, informazio eta prospekziorako tresna komunak diseinatzea eta mantentzea.

4. Europar Batasunaren Eures sareari (Europako Enplegu Zerbitzuak) dagozkion eginkizunak betetzea.

5. Lan-bitartekaritza kudeatzea, enplegu-zerbitzuen eskatzaileen erregistroa egitea, eta lan-kontratuen komunikazio-erregistroa kudeatzea.

6. Enpleguko, gazte-enpleguko, lanerako prestakuntzako eta autoenplegua eta enpresen sorrera, gizarte-ekonomia eta ekintzailetza kolektiboa sustatzeko programak kudeatzea, Euskal Autonomia Erkidegoak enpleguaren arloan dituen erronkei bereziki erantzuteko.

7. Aztertzea ea betetzen diren enplegu-eskatzaile gisa langabezia-prestazioen eskatzaileek edo onuradunek dituzten betebeharrak, eta, hala badagokio, ez-betetzeen berri ematea prestazioak kudeatzen dituen entitateari.

8. Zehatzeko ahala erabiltzea enpleguari eta langabeziari buruzko gaietan, legeria espezifikoan ezarritako moduan.

9. Betekizunak betetzen diren aztertzea eta behar diren kontrol- eta ikuskapen-jarduketak egitea Euskal Autonomia Erkidegoaren eremuan diharduten enplegatze-agentziei dagokienez.

10. Ikerketako, diseinuko eta berrikuntza aplikatuko proiektuak garatzea orientazioaren, prospekzioaren, lan-bitartekaritzaren, ekintzailetzaren eta lanerako prestakuntzaren eremuetan, bai eta enplegu-politikaren beste eremu batzuetan ere, eta proiektu esperimentalak kudeatzea, batez ere Europakoak, enplegu-zerbitzuak ematean ikuspegi eta konponbide berriak garatzea ahalbidetzeko.

11. Inklusiorako eta Diru-sarrerak Bermatzeko Euskal Sistemaren prestazio ekonomikoak izapidetzea eta kudeatzea; prestazio horiei lotutako kontrol-, ikuskapen- eta zehapen-ahalak baliatzea, eta inklusiorako tresnak eta zerbitzuak kudeatzea.

12. Zentro- eta entitate-laguntzaileak homologatzeko eta aitortzeko irizpideak ezartzea, bai eta haien funtzionamendua gainbegiratu eta kontrolatzea ere, hargatik eragotzi gabe erregelamenduak egiteko ahala erabiltzeko aukera.

13. Laneratzeko Enpresen Erregistroa eta Enplegu Zentro Berezien Euskal Erregistroa kudeatzea.

14. Beste zernahi eginkizun garatzea, legeek edo Eusko Jaurlaritzak egozten dizkiotenak edo enplegu- eta inklusio-politiken arloan eskuordetzen edo agintzen zaizkionak.

1. Enpleguaren abenduaren 21eko 15/2023 Legearen 93. artikuluan aurreikusitakoaren arabera, Lanbide-Euskal Enplegu Zerbitzu Publikoaren gobernu-organoak administrazio-kontseilua eta zuzendaritza nagusia dira.

2. Administrazio-kontseilua eta zuzendaritza nagusia organo administratiboak dira, eta esleituta dituzten eginkizun publikoetan administrazio-ahalak betetzen dituzte.

   Beren ebazpenek administrazio-bidea agortzen dute, eta administrazioarekiko auzien jurisdikzioan edo lan-arloko jurisdikzioan aurkaratu daitezke (dagokionaren arabera), hargatik eragotzi gabe berraztertzeko errekurtsoa jartzeko aukera.

1. Administrazio-kontseilua Lanbide-Euskal Enplegu Zerbitzu Publikoko zuzendaritza- eta kontrol-organo gorena da, hiru alderdik osatua, era paritarioan.

2. Kontseiluburua, idazkaria eta hamalau kide ditu, honela banatuta:

   1. Kontseiluburua eta lau kide Euskal Autonomia Erkidegoko sektore publikoari dagozkio, eta kargu horien titularrak izango dira Eusko Jaurlaritzan enpleguaren gaineko eskumena duen saileko titularra, Lanbide-Euskal Enplegu Zerbitzu Publikoko zuzendari nagusia, enpleguaren gaineko eskumena duen sailburuordea eta lanbide-heziketaren eta garapen ekonomikoaren gaineko eskumena duten sailen proposamenez izendatutako bi kide, guztiak Euskal Autonomia Erkidegoko Administrazio Orokorrekoak.

   2. Bost kide Euskal Autonomia Erkidegoan ordezkaritza handiena duten sindikatuetakoak izango dira.

      Kideak Euskal Autonomia Erkidegoan sindikatuetako bakoitzak egiaztatzen duen ordezkagarritasunaren proportzioan esleituko dira eta, edonola ere, administrazio-kontseiluan egon beharko dira ordezkaritza handiena dutenak.

   3. Bost kide Euskal Autonomia Erkidegoan ordezkaritza handiena duten sektorearteko enpresetakoak izango dira, enpresa bakoitzak egiaztatutako ordezkagarritasunaren proportzioan izendatuta, baldin eta izaera hori egiaztatu dutenak hainbat badira.

3. Administrazio-kontseiluaren osaerak gaitasun, eskumen eta prestakuntza egokia duten emakume eta gizonen presentzia orekatua bermatuko du.

4. Administrazio-kontseiluan ordezkaritza duten sindikatu- eta enpresa-antolakundeek, ordezkaritza hori benetan baliatzen badute, dirulaguntza bat jaso ahal izango dute organo horretan parte-hartze instituzionaleko lanak garatzeko finantzaketa gisa.

   Horretarako, dagokion aurreikuspena egingo da zuzenbide pribatuko ente publikoaren aurrekontuetan.

   Dirulaguntzaren baldintzak ezartzea eta haren banaketa enpleguaren arloan eskumena duen sailaren titularraren zeregina izango da urtero, eta kontuan hartuko ditu antolakunde bakoitzaren ordezkaritza eta kide anitzeko organoaren funtzionamenduan haiek ordezkatzen dituzten kideen parte-hartze eraginkorra.

1. Administrazio-kontseiluaren burua Eusko Jaurlaritzan enpleguaren gaineko eskumena duen sailburua izango da.

2. Lanpostua hutsik badago, karguduna ez badago edo hura gaixorik badago, Euskal Autonomia Erkidegoko Administrazio Orokorrean enpleguaren gaineko eskumena duen sailburuordeak hartuko du kontseiluburuaren lana.

3. Kontseiluburuak eta haren ordezkoak eginkizun hori betetzeari utziko diote, Gobernu Kontseiluaren ekainaren 30eko 7/1981 Legearen 24. eta 29. artikuluetan eta hura ordezten duen arauan ezarritako kasuetan.

4. Kontseiluburuak eginkizun hauek izango ditu:

   1. Administrazio-kontseilua ordezkatzea.

   2. Ohiko eta ezohiko bileretarako deialdia egitea adostea, eta gai-zerrenda finkatzea, kontseiluburuak premiazkoa dela irizten dionean salbu; kasu horretan, deialdian bertan jaso beharko da. Eta adierazi beharko da bilera zein egunetan egingo den, zein ordutan izango diren lehenengo eta bigarren deialdia eta non egingo den.

   3. Bilkuretako buru izatea, eta eztabaidak moderatzea.

   4. Kontseiluaren erabakien aktak eta ziurtagiriak ontzat ematea.

   5. Berdinketarik badago, bere botoaren bidez ebaztea, erabakiak hartu ahal izateko.

   6. Beste pertsona batzuei baimena ematea administrazio-kontseiluaren bileretara joateko, aditu gisa, kontseiluari laguntza egokia emateko. Aditu horiek hitz egiteko aukera izango dute, baina ezingo dute botorik eman.

   7. Kontseiluburuaren berezko beste eginkizun batzuk, edo legez edo erregelamenduz esleitzen zaizkionak.

1. Administrazio-kontseiluaren idazkaria kontseiluburuak izendatuko du, zuzendaritza nagusiak proposatuta, aholkularitza juridikoko eginkizunak betetzen dituzten Lanbide-Euskal Enplegu Zerbitzu Publikoko langileen artetik.

   Idazkariaren lanpostua hutsik badago, titularra ez badago edo hura gaixorik badago, kontseiluburuak haren baldintza berdinak dituen ordezko bat izendatuko du.

2. Idazkariak eginkizun hauek beteko ditu:

   1. Administrazio-kontseiluak hartutako erabakien legezkotasuna zaintzea.

   2. Kontseiluaren bileretara joatea, hitz egiteko aukerarekin, baina botoa eman gabe.

   3. Bilerak deitzea, kontseiluburuak aginduta, eta horien berri ematea kideei, bai eta, hala badagokio, bertaratzeko baimena duten adituei deitzea ere.

   4. Kideek administrazio-kontseiluarekin izandako komunikazio-egintzak jasotzea, bai eta jakinarazpenak, datu-eskariak edo bestelako idatziak ere, baldin eta kontseiluak horien berri izan behar badu.

   5. Administrazio-kontseiluaren bilerak prestatzea, eta, kontseiluburuaren oniritziarekin, horien aktak idatzi eta baimentzea.

   6. Akta-liburua eraman eta zaintzea.

   7. Hartutako erabaki, kontsulta eta irizpenen ziurtagiriak egitea.

   8. Idazkaritzako titularrari dagozkion edo kontseiluburuak berariaz esleitzen dizkion bestelako eginkizunak.

3. Idazkariak bere eginkizuna betetzeari utziko dio, karguari uko eginda (kontseiluburuak onartuta), kontseiluburuaren ebazpen arrazoituaren bidez edo Lanbide-Euskal Enplegu Zerbitzu Publikoarekin duen zerbitzu-harremana edo aholkularitza juridikoko eginkizunak esleituta dituen lanpostuko jarduna amaitzea dakarten arrazoiak direla eta.

1. Eusko Jaurlaritzan enplegu-arloko eskumena duen saileko titularraren agindu baten bidez izendatuko dira kideak eta haien ordezkoak (kargua hutsik dagoenean, titularra ez dagoenean edo hura gaixorik dagoenean), hurrengo apartatuetan ezarritako izendapen-arauen arabera.

   Izendapena hiru urterako izango da.

2. Euskal Autonomia Erkidegoko sektore publikoko ordezkaritzari dagokion izendapena (beren karguaren zioz kideak direnena eta egitura organikoaren dekretuaren eta estatutu hauen arabera horien ordezkoak direnena salbu) lanbide-heziketaren eta garapen ekonomikoaren gaineko eskumena duten sailburuek egingo dute (ahal dela, organo gorenen titularren artean), Euskal Sektore Publikoaren maiatzaren 12ko 3/2022 Legearen 13. artikuluan xedatutakoaren arabera.

3. Euskal Autonomia Erkidegoan ordezkaritza handiena duten sektorearteko enpresek eta sindikatuek dagozkien kideak izendatuko dituzte.

4. Administrazio-kontseiluko kideei dagokie:

   1. Bilkuretara bertaratzea, eta bilkurako eztabaidetan parte hartzea.

   2. Boto-eskubidea egikaritzea eta boto partikularra ematea, bai eta haren esanahia eta arrazoiak azaltzea ere.

   3. Proposamenak, iradokizunak eta galderak egitea.

   4. Esleitutako eginkizunak betetzeko behar den informazio eta dokumentazio zehatza eskuratzea.

   5. Administrazio-kontseiluko kide moduan dituzten bestelako eginkizun, eskubide eta betebeharrak.

1. Kideek beren kargua utzi ahalko dute, arrazoi hauetakoren baten ondorioz:

   1. Agintaldia amaitzea. Agintaldia amaitzean, administrazio-kontseilua osorik berrituko da, prozedura honen arabera:

      1. Agintaldia amaitu eta hurrengo hilabetearen barruan, kontseiluburuak administrazio-kontseilua osorik berritzeko prozesua hasiko du, eta aurreko artikuluaren 3. apartatuan aipatzen diren sindikatu eta enpresei hilabeteko epea emango die titularrak eta ordezkoak izendatzeko, horietako bakoitzak egiaztatutako ordezkaritzaren proportzioan.

         Epe horretan bertan, Euskal Autonomia Erkidegoko Administrazio Orokorreko sailek (aurreko artikuluaren 2. apartatuan aipatzen direnek) beren ordezkariak eta horien ordezkoak izendatuko dituzte.

      2. Sindikaturen batek ez baditu izendapenak aurreko puntuan aipatutako epean egiten, dagozkion kideak haren taldeko gainerako entitateei gehituko zaizkie, bakoitzaren ordezkaritzaren proportzioan. Horretarako, epe barruan izendapenik egin ez dela egiaztatuta, kontseiluburuak gainerako sindikatuei hilabeteko epea emango die hutsik geratu direnak beteko dituzten titularrak eta ordezkoak izendatzeko, bakoitzak egiaztatuta duen ordezkaritzaren proportzioan.

         Zenbaki honetan xedatutakoa aplikatuko zaie Euskal Autonomia Erkidegoan ordezkaritza handiena duten sektorearteko enpresei, baldin eta hainbat badira administrazio-kontseiluan ordezkariak izendatzeko eskubidea dutenak eta horietakoren batek ez badu izendapena epe barruan egiten.

   2. Saileko edo ordezkatzen duten sindikatu- edo enpresa-antolakundeko kargua uztea, bai eta antolakundeek kide berriak izendatzea ere.

      Beren karguaren zioz izendatzen diren karguak alde batera utzita, administrazio-kontseiluko buruak Euskal Autonomia Erkidegoko Administrazio Orokorreko sail, sindikatu eta enpresa inplikatuei eskatuko die titularrak eta, hala badagokio, ordezkoak izenda ditzatela, hilabeteko epean. Paragrafo honetan ezarritakoa ez da aplikatuko, baldin eta kargugabetzea erakundeen ekimenez kide berriak izendatzeagatik gertatzen bada.

      Sindikatu eta enpresek ez badituzte izendapenak epe barruan egiten, a) letrako 2. zenbakian zehaztutakoa beteko da.

   3. Ebazpen judizial edo administratibo irmo bat, kargu publikoak betetzeko desgaikuntza edo kargualdi publikoa etetea dakarrena. Izendapena b) letran ezarritako prozeduraren arabera egingo da.

   4. Ebazpen administratiboa, kideak behin eta berriz ez bertaratzeagatik, ordezkatzen duten sindikatuak erabakita. Izapide hauek jarraituko dira:

      1. Kontseiluburuak ez bertaratzearen arrazoia zehazteko prozedura hasiko du, eta sindikatu interesdunari 10 eguneko epea emango dio bere eskubideari komeni zaizkion alegazioak egin ditzan.

         Behin eta berriz ez bertaratzea dela ulertuko da, baldin eta sindikatu bateko ordezkari diren kideak hiru bileratara huts egiten badute, jarraian, justifikaziorik gabe, edo lau bileratara, txandaka, urtebeteko epean.

      2. Alegazioak jaso ondoren edo horretarako emandako epea alegaziorik egin gabe igaro ondoren, kontseiluburuak dagokion ebazpena emango du, administrazio-kontseiluko gainerako kideekin kontsultatu ondoren, 10 eguneko epean.

      3. Ez-bertaratzea sindikatuaren erabakia izan dela egiaztatutzat jotzen duen ebazpenak, halaber, sindikatuen ordezkari izendatutako kideen kargu-uztea deklaratuko du.

      4. Hutsik dauden kidetzak gainerako sindikatuek izendatutako pertsonek beteko dituzte, beren ordezkaritzaren proportzioan, a) letrako 2. zenbakian ezarritakoaren arabera.

         Letra honetan xedatutakoa aplikatuko zaie Euskal Autonomia Erkidegoan ordezkaritza handiena duten sektorearteko enpresa-antolakundeei, baldin eta horietakoren batek edo batzuek beren ordezkariak administrazio-kontseilura ez joatea erabakitzen badute.

2. Hiru urteko epea bete arte geratzen den denborarako izendatuko dira kideak eta, hala badagokio, horien ordezkoak, 1. apartatuko b), c) eta d) letretan araututako kargu-uzteen ondoriozkoak direnean.

Administrazio-kontseiluari dagokio eginkizun hauek betetzea:

1. Aurrekontuaren aurreproiektua, jardueren urteko memoria eta zuzenbide pribatuko ente publikoan aurreikusitako urteko kontuak onartzea. Halaber, finantzaketa-proposamenak onartzea dagokio.

2. Kontratu-programa proposatzea, Eusko Jaurlaritzak onartzeko, Enpleguaren abenduaren 21eko 15/2023 Legearen 96. artikuluaren arabera.

3. Eusko Jaurlaritzari zuzendaritza nagusiko titularra izendatzeko proposatzea.

4. Lanbide-Euskal Enplegu Zerbitzu Publikoaren jarduera-irizpideak onartzea, enpleguaren gaineko eskumena duen sailburuak ematen dituen irizpide estrategikoen arabera. Kontratu-programaren indarraldi bera izango du, ahal dela.

5. Lanbide-Euskal Enplegu Zerbitzu Publikoaren antolaketa- eta funtzio-egitura onartzea, estatutu hauetan xedatutakoa osatzeko, hargatik eragotzi gabe estatutuak aldatu beharra, hala badagokio.

   Era berean, zuzendaritzako langileak izendatzea eta kargugabetzea, zuzendaritza nagusiak proposatuta, Enpleguaren abenduaren 21eko 15/2023 Legearen 99.3 artikuluaren arabera.

6. Zuzenbide pribatuko ente publikoaren lanpostu-zerrenda, zuzendaritza-izaerako lanpostuak antolatzeko tresna eta entearen mendeko langile lan-kontratudunen hitzarmen kolektiboak onartzea.

7. Ente publikoaren jarduera-plan orokorrak eta lanerako prestakuntzaren plangintza eta ebaluazioa onartzea, Enpleguaren abenduaren 21eko 15/2023 Legearen 65.1.c) artikuluan aurreikusitako baldintzetan, bai eta asistentzia, ikuskapen eta kontroleko urteko plana ere, Inklusiorako eta Diru-sarrerak Bermatzeko Euskal Sistemaren abenduaren 22ko 14/2022 Legearen 96. artikuluaren arabera.

   Era berean, entearen dirulaguntzen arloko plangintza estrategikoa proposatu behar du, enpleguaren arloan eskumena duen saileko titularrak onar dezan, eta plangintza horren ebaluazioa egin behar du, Dirulaguntzen Araubidea Erregulatzeko abenduaren 21eko 20/2023 Legearen 6. artikuluan aurreikusitako ondorioetarako.

8. Hizkuntza ofizialak erabiltzeko irizpideak, plan estrategikoa eta kudeaketa-, jarraipen- eta ebaluazio-planak onartzea, Euskal Sektore Publikoan euskararen erabilera normalizatzeko otsailaren 22ko 19/2024 Dekretuaren arabera.

9. Lankidetza-hitzarmenak, jarduera-protokolo orokorrak eta bestelako lankidetza-formulak sinatzea onartzea, 4. artikuluan aipatzen den eremu funtzionalaren barruan.

10. Dirulaguntzen oinarri arautzaileak onartzea eta deialdiak egitea, baldin eta administrazio-kontseiluari badagokio gastua baimentzea, k) letran xedatutakoaren arabera.

    Halaber, hala badagokio, emate zuzeneko prozedura bidez ematen diren laguntzek bete beharreko baldintzak onartzea.

11. Milioi bat eurotik gorako gastuak (BEZa barne) baimentzea. Gastua kontratu edo akordio ireki bat egitera bideratzen bada, hori baimentzea.

12. Lanbide-Euskal Enplegu Zerbitzu Publikoaren funtzionamenduaren ebaluazio-plana onartzea, eta haren helburuak hobeto betetzeko beharrezkotzat jotzen diren neurriak proposatzea, hargatik eragotzi gabe Enpleguaren abenduaren 21eko 15/2023 Legearen 89. artikuluan ezarritakoa.

    Era berean, Euskal Sektore Publikoari buruzko maiatzaren 12ko 3/2022 Legearen 52. artikuluan aipatzen den ebaluazio-dokumentua onartzea dagokio, enpleguaren eta administrazio publikoaren arloan eskumena duten Eusko Jaurlaritzako sailei bidaltzeko.

13. Estatuko Enplegu Zerbitzu Publikoari proposatzea betetzeko zailak diren lanbideak.

14. Lanbide-Euskal Enplegu Zerbitzu Publikoari dagozkion egintza judizialen eta errekurtsoen egikaritzea adostea, bai eta ekintza edo errekurtsoetan atzera egitea, kereilatik aldentzea edo kontrako alderdiaren uziei amore ematea ere.

15. Eusko Jaurlaritzari proposatzea merkataritza-sozietateak edo bestelako entitate publiko edo pribatuak sortzea eta horietan parte hartzea.

16. Administrazio-kontseiluaren funtzionamendu-erregelamendua eta estatutuak aldatzeko proposamena onartzea.

1. Administrazio-kontseiluak aurrez aurre edo urrutitik egingo ditu bilerak.

   Urrutitik egiten diren bileretan, kideak leku desberdinetan egon ahalko dira, baldin eta bitarteko elektronikoen bidez (telefonikoak barne) eta ikus-entzunezkoen bidez behar bezala egiaztatzen bada kideak edo horien ordezkoak nor diren, zer adierazten duten eta adierazpen horiek zein unetan egiten diren. Gainera, horien arteko elkarrekintza edo komunikazioa benetako denboran gertatu behar da, eta bileran bitarteko egokiak izan behar dira. Bitarteko elektroniko egokitzat joko dira, besteak beste, posta elektronikoa, audiokonferentziak eta bideokonferentziak.

2. Ohiko bilera gutxienez bi hilean behin egingo da, eta ezohikoa, kontseiluburuak deialdia egin ondoren, berak eskatuta edo kideen gutxienez heren batek proposamen arrazoitua eginez gero. Azken kasu horretan, kontseiluburuak ezohiko bilerarako deia egingo du eskaera egin eta hurrengo zazpi egun naturalen barruan, eta gai-zerrendan eskaera arrazoituaren xede diren puntuak sartu beharko ditu, hargatik eragotzi gabe interesgarritzat jotzen dituen beste puntu batzuk gehitzeko aukera.

3. Kontseiluburuak gutxienez bost egun natural lehenago egingo du bileretarako deia, ezohiko bileren kasuan izan ezik. Azken horietarako deia bi egun balioduneko epean egin ahal izango da.

   Deialdia posta elektroniko bidez bidaliko zaie kontseiluko kideei. Bertan, bileren gai-ordena jasoko da eta, aurreko paragrafoan aipatzen diren epeetan, gai-ordenan agertzen diren puntuei buruzko informazioa jarriko da kideen esku.

4. Bilerak lehen edo bigarren deialdian egingo dira, eta horien artean ordu erdiko tartea egongo da.

5. Lehen deialdian, administrazio-kontseilua behar bezala eratuko da baldin eta, kontseiluburuaz eta idazkariaz edo horien ordezkoez gain, kideen erdiak baino gehiago badaude; bigarren deialdian, berriz, horien herena edo gehiago badaude.

   Edonola ere, behar bezala eratuta geratuko da, deialdia egiteko baldintzak bete ez direnean ere, baldin eta, kide guztiak bertan egonda, aho batez hala erabakitzen badute.

6. Kontseiluaren erabakiak bertaratutako pertsonek igorritako botoen gehiengo soilez hartuko dira. Boto horien artean, Euskal Autonomia Erkidegoko sektore publikoa ordezkatzen dutenen aldeko botoa jaso beharko da.

   Berdinketa bada, kontseiluburuaren botoaren bidez ebatziko da.

7. Ezingo da erabakirik hartu gai-zerrendan sartu ez diren gaiei buruz, salbu eta bileran kide guztiak badaude eta gaia premiazkoa dela adierazten bada gehiengoaren aldeko botoarekin, aurreko paragrafoan ezarritako arauari jarraikiz.

8. Ezinezkoa bada Lanbide-Euskal Enplegu Zerbitzu Publikoaren eginkizunak betetzeko beharrezkoak diren erabakiak hartzea, eta gaia atzerapenik gabe ebatzi beharra badago, kontseiluburuak, behar eta premia hori justifikatu ondoren, salbuespen gisa ezarri ahal izango du gai baten aparteko bozketa egitea. Hartara, dagokion erabakia hartu ahalko da, eta hura onartzeko aski izango da Euskal Autonomia Erkidegoko sektore publikoa ordezkatzen duten kideen gehiengoaren aldeko botoa.

   Apartatu honen ondorioetarako, 11. artikuluaren a), b), c), d), e), f), g), i), j), k), n) eta o) letretan aurreikusitako eginkizunei buruzko erabakiak ezin direla atzeratu ulertuko da, estatutuak aldatzeko proposamenari dagokionez.

   Behin eta berriz erabakiak hartu ezina gutxienez bi administrazio-kontseilutan egiaztatu beharko da, xedapen hauetan aurreikusitako eginkizunak betetzeari dagokionez: 11. artikuluaren a), b), c), e) (bigarren paragrafoa) eta n) letrak. Gainerako kasuetan, lau administrazio-kontseilutan, gutxienez.

9. Bilera bakoitzaren akta egingo da, eta, bertan, bertaratu diren pertsonak, lekuaren eta egunaren datuak, eztabaidagai nagusiak, bozketaren modua eta emaitzak, eta erabakien edukia jasoko dira.

   Aktak elektronikoki sinatuko ditu idazkariak, kontseiluburuaren oniritziarekin, eta administrazio-kontseiluaren bileran bertan edo hurrengoan onartuko dira.

10. Kontseiluko kideen gehiengoaren erabakiz, batzorde teknikoak edo lantaldeak eratu ahal izango dira gaien edo lurralde-eremuen arabera, hiru alderdikoak eta paritarioak. Horietan, landuko diren gaietan adituak diren kanpoko pertsonek parte hartu ahal izango dute, eta taldearen bileretara joango dira; hitza izango dute, baina botorik ez.

11. Estatutu hauetan eta, hala badagokio, ezartzen diren funtzionamendu-arau osagarrietan aurreikusi ez diren alderdietan, Sektore Publikoaren Araubide Juridikoaren urriaren 1eko 40/2015 Legeak kide anitzeko organoen araubideari buruz ezarritakoa aplikatuko da.

1. Zuzendaritza nagusia Lanbide-Euskal Enplegu Zerbitzu Publikoko kide bakarreko gobernu-organoa da.

2. Enpleguaren abenduaren 21eko 15/2023 Legearen 93.3 artikuluaren arabera, zuzendaritza nagusiaren titularra Eusko Jaurlaritzak izendatuko du, administrazio-kontseiluak proposatuta.

3. Zuzendaritza nagusiaren titularra goi-karguduna da, sailburuorde-mailakoa.

1. Zuzendaritza nagusiari dagokio Lanbide-Euskal Enplegu Zerbitzu Publikoaren ohiko zuzendaritza eta ordezkaritza, hargatik eragotzi gabe administrazio-kontseiluari eta haren kontseiluburuari esleitutakoa.

   Horretarako, kontseiluak erabakitzen dituen lankidetza-hitzarmenak, kudeaketa-gomendioko akordioak, protokoloak eta lankidetza-tresnak sinatzea dagokio.

2. Entearen zerbitzuen exekuzio, zuzendaritza eta koordinazioko eginkizunak eta 4. artikuluan aurreikusitako eginkizunak kudeatzekoak betetzen ditu, administrazio-kontseiluari eta zuzendaritza exekutiboei dagozkienak salbu. Zehazki, hauek dira zuzendaritza nagusiaren eginkizunak:

   1. Administrazio-kontseiluari proposamenak egitea hark onartu, erabaki, baimendu edo izendatzeko eskumena duen gaietan.

   2. Aurrekontuen aurreproiektua egitea eta administrazio-kontseiluari proposatzea, eta programa-kontratuaren zirriborroa egitea 11.b) artikuluan aurreikusitako ondorioetarako.

   3. Administrazio-kontseiluaren aurrean gaiari buruzko eta, zehazki, aurrekontuaren betearazpenari buruzko kontuak ematea. Era berean, kontseiluari informazioa eman behar dio, hark eskatutako gaien inguruan; bereziki, f) eta g) letretan aurreikusitako eginkizunen ingurukoa.

   4. Lanbide-Euskal Enplegu Zerbitzu Publikoaren zerbitzuak zuzendu eta ikuskatzea, eta administrazio-kontseiluaren erabakiak egikaritu eta betearaztea, hargatik eragotzi gabe zuzendaritza exekutiboei dagozkien eginkizunak.

   5. Milioi bat edo gutxiagoko gastuak eta 500.000 eurotik gorakoak (BEZa barne) baimentzea, eta ordainketak agintzea, salbu eta zuzenbide pribatuko ente publikoaren zuzendaritza exekutiboei esleitutakoak.

   6. Espedientea onartzea, Lanbide-Euskal Enplegu Zerbitzu Publikoaren berezko gaiei buruzko kontratuak sinatzea eta sektore publikoko kontratuei buruzko legediaren arabera kontratazio-organoei esleituta dauden eskumen eta ahalmenak betetzea, lizitazioaren oinarrizko aurrekontuaren zenbatekoa milioi bat eurokoa edo gehiagokoa denean (BEZa barne).

      Era berean, akordio irekiak, kudeaketa itunduko akordioak eta sektore publikoko kontratuei buruzko legeriaren mende ez dauden kontratuak sinatzea dagokio, baimendutako gastuaren zenbatekoa aipatutako zenbatekoaren berdina edo handiagoa denean.

   7. Euskal Autonomia Erkidegoko Aurrekontu Orokorretan nominatiboki aurreikusitako dirulaguntzak ematea, dirulaguntzen oinarri arautzaileak eta deialdiak onartzea, baldin eta gastua baimentzea zuzendaritza nagusiari badagokio, eta norgehiagoka-prozedurei lotutako deialdiak ebaztea.

   8. Langileen zuzendaritza-lana betetzea, 28. artikuluan ezarritakoaren arabera.

   9. Zehatzeko ahala betetzea enpleguari eta langabeziari buruzko gaietan, eta Inklusiorako eta Diru-sarrerak Bermatzeko Euskal Sistemaren prestazio ekonomikoei buruzkoetan.

   10. Entearen zuzendaritzen ebazpen eta administrazio-egintzen aurka jartzen diren errekurtsoak eta bide judizialera jo aurretiko erreklamazioak ebaztea, salbu eta, legezko edo arauzko xedapenaren arabera, amaiera ematen badiote administrazio-bideari.

       Era berean, zuzendaritza nagusiak edo zuzendaritza exekutiboek emandako egintzak ofizioz berrikustea dagokio, egintzak errebokatzea eta azken horien akatsak zuzentzea izan ezik.

   11. Ondare-erantzukizuneko prozedurak ebaztea.

   12. Maileguak, kredituak, abalak edo beste berme batzuk kontratatzeko baimena eskatzea finantzen arloan eskumena duen sailari, Euskal Autonomia Erkidegoko Finantzen azaroaren 8ko 8/1996 Legean edo hura ordezten duen araudian xedatutakoaren arabera, administrazio-kontseiluaren adostasuna jaso ondoren.

   13. Zuzenbide pribatuko ente publikoaren auditoretza garatzea, haren helburuak lortzeko egon daitezkeen arriskuak kudeatzea eta zerbitzu eta jardueren barneko kontrol eta ikuskapenak egitea.

   14. Ohiko zuzendaritzako, administrazioko eta kudeaketako bestelako eginkizunak, Lanbide-Euskal Enplegu Zerbitzu Publikoko beste organo bati esleituta ez daudenak.

3. Zuzendaritza nagusiaren titularraren lanpostua hutsik dagoenean, titularra ez dagoenean edo hura gaixo dagoenean, hurrengo artikuluan aipatzen diren zuzendaritza exekutiboen titularrek, agertzen diren hurrenkeran, organo horri esleitutako eskumenak baliatuko dituzte.

4. Zuzendaritza nagusiaren ebazpenek amaiera ematen diote administrazio-bideari.

   2. SEKZIOA

   KUDEAKETA-ORGANOAK

1. Zuzendaritza exekutiboak Lanbide-Euskal Enplegu Zerbitzu Publikoaren eginkizunak kudeatzen dituzten organoak dira.

2. Zuzendaritza exekutiboak zuzendaritza nagusiaren mende daude organikoki eta funtzionalki, eta hauek dira:

   1. Koordinazio eta Komunikazio Zuzendaritza.

   2. Administrazioaren eta Zerbitzu Orokorren Zuzendaritza.

   3. Prestazioen Zuzendaritza.

   4. Enplegu eta Prestakuntza Zuzendaritza.

   5. Enpresen eta Ekintzailetzaren Zuzendaritza.

3. Zuzendaritza exekutiboen titularra zuzendari publiko profesionala izango da, eta Lanbide-Euskal Enplegu Zerbitzu Publikoarekiko zerbitzu-harremana formalizatuko du, Enpleguaren abenduaren 21eko 15/2023 Legearen 99. artikuluaren 3. eta 4. paragrafoetan ezarritakoaren arabera.

   Goi-kargudunaren pareko izaera du, Kargu Publikodunen Jokabide Kodea eta Haien Interes Gatazkak Arautzen dituen ekainaren 26ko 1/2014 Legearen edo hura ordezten duen arauaren ondorioetarako.

4. Zuzendaritza exekutiboetako titularren postuak hutsik badaude, edo titularrak ez badaude edo haiek gaixorik badaude, zuzendariek beteko dituzte haiei esleitutako eginkizunak (betiere egoera hori gertatu aurretik eginkizun horiek eskuordetu ez badira), estatutu hauetan agertzen diren hurrenkeraren arabera, eta lehenengo agertzen dena zuzendaritza nagusiko titularrak beteko du.

Oro har, zuzendaritza exekutiboek eginkizun hauek beteko dituzte:

1. Atxikita dituzten zerbitzuak zuzendu, planifikatu, koordinatu eta sustatzea.

2. Beren jarduera-eremuko gaiak ebaztea, hargatik eragotzi gabe administrazio-ahalak betetzeari buruz xedatutakoa, estatutu hauen arabera eskumen hori duen administrazio-organoaren ardura izango baita hori.

3. Beren jarduera-eremuan hizkuntza ofizialak erabiltzeko irizpideak eta administrazio-kontseiluak onartzen dituen planak betetzen direla zaintzea, eta horien jarraipen eta ebaluazio egokia egiten laguntzea.

4. Zuzendaritza nagusiari proposamenak egitea beraren jarduera-eremuaren barruan eta organo horri dagozkion gaiei buruzko informazioa ematea.

5. Beren jarduera-eremuan ordainketak agintzea.

Koordinazio eta Komunikazio Zuzendaritzari eginkizun hauek dagozkio, aurreko artikuluan aurreikusten direnez gain:

1. Zuzendaritza nagusiari laguntzea plangintza- eta ebaluazio-proposamenak egiten eta haien jarraipena egiten, bai eta horiek koordinatzen eta gainbegiratzen ere, eta, horretarako, zuzendaritza exekutiboek beren jardun-eremuei buruzko informazioa emateko prozedurak proposatzea.

2. Entearen jardueraren ebaluazioa bermatuko duen adierazle-sistema baten ezarpena zuzendu eta koordinatzea, zuzendaritza nagusiaren jarraibideetan oinarrituta, bat etorriz Lanbide-Euskal Enplegu Zerbitzu Publikoaren funtzionamendua ebaluatzeko planarekin.

   Paragrafo honetan xedatutakoak ez ditu eragotziko enplegu- eta gizarteratze-politikak ebaluatzeko organoari dagozkion eskumenak.

3. Zuzendaritza exekutiboekin batera lan egiteko mekanismoak definitzea, entearen antolaketaren ekintza bateratua bermatzeko.

4. Zuzendaritza exekutiboek arreta, informazio eta prospekziorako baliabide komunak diseinatzeko eta mantentzeko izan behar duten parte-hartzea koordinatzea.

5. Enpleguko lurralde-bulegoak zuzendu, koordinatu eta gainbegiratzea, hargatik eragotzi gabe zuzendaritza exekutiboen mendekotasun funtzionalari buruz 24. artikuluan ezarritakoa.

6. Lanbide-Euskal Enplegu Zerbitzu Publikoak Euskal Enplegu Sarean duen parte-hartzea koordinatzea.

7. Lanbide-Euskal Enplegu Zerbitzu Publikoari dagokion arreta kudeatzea, bai eta entearen arreta integral eta multikanala ere, Herritarrei arreta integral eta multikanala emateko eta zerbitzu publikoak bitarteko elektronikoz irispidean izateko ekainaren 20ko 91/2023 Dekretuaren arabera edo hura ordezten duen arauaren arabera, 25. artikuluaren 3.g) eta 4. apartatuetan tokiko enplegu-bulegoei buruz xedatutakoa alde batera utzi gabe.

8. Lanbide-Euskal Enplegu Zerbitzu Publikoaren informazio- eta komunikazio-politika diseinatu, aholkatu eta ezartzea, Euskadiko Publizitate eta Komunikazio Instituzionalari buruzko abenduaren 23ko 6/2010 Legearen arabera.

1. Administrazioaren eta Zerbitzu Orokorren Zuzendaritzari eginkizun hauek dagozkio, 16. artikuluan aurreikusten direnez gain:

   1. Lanbide-Euskal Enplegu Zerbitzu Publikoko giza baliabideak kudeatzea, eta Euskal Enplegu Publikoaren abenduaren 1eko 11/2022 Legearen 19.1 artikuluan aurreikusitako eginkizunak betetzea, aipatu aginduko a), b) eta d) letretan ezarritakoak salbu.

   2. Entearen aurrekontua eta ekonomia kudeatzea, hargatik eragotzi gabe administrazio-kontseiluari eta zuzendaritza nagusiari esleitutako eginkizunak. Era berean, Europako Gizarte Funtsetik edo beste funts batzuetatik datozen eta enteari esleitu zaizkion baliabideak administratzeko beharrezkoak diren jarduerak egitea.

   3. 500.000 euroko edo zenbateko horretatik beherako gastuak (BEZa barne) baimentzea.

   4. Espedientea onartzea, Lanbide-Euskal Enplegu Zerbitzu Publikoaren berezko gaiei buruzko kontratuak sinatzea eta sektore publikoko kontratuei buruzko legediaren arabera kontratazio-organoei esleituta dauden eskumen eta ahalmenak betetzea, lizitazioaren oinarrizko aurrekontuaren zenbatekoa milioi bat euro baino txikiagoa denean (BEZa barne).

      Halaber, akordio irekiak, kudeaketa itunduko akordioak eta sektore publikoko kontratuei buruzko legeriaren mende ez dauden kontratuak sinatzea dagokio, baimendutako gastuaren zenbatekoa milioi bat euro baino txikiagoa denean (BEZa barne).

   5. Dirulaguntzen deialdiak prestatzea eta haien oinarriak onartzea, Administrazioaren eta Zerbitzu Orokorren Zuzendaritzari dagokionean gastua baimentzea eta ondoz ondoko emate-prozedurei lotutako dirulaguntzak ebaztea.

   6. Enteak behar dituen informazio- eta komunikazio-sistemak, datu-baseak, sareak eta sistema eragileak antolatu eta kudeatzea, ekipo eta programa informatikoak mantentzea, eta datu pertsonalen babesari buruzko araudia betetzen dela bermatzea, hargatik eragotzi gabe Euskal Autonomia Erkidegoko Administrazio Publikoko datuak babesteko ordezkariari dagozkion eginkizunak.

      Zehazki, arreta, informazio eta prospekzioko tresna komunak diseinatzea eta mantentzea, Enpleguaren abenduaren 21eko 15/2023 Legean aurreikusitakoaren arabera, gainerako zuzendaritza exekutiboekin lankidetzan.

   7. Ondare-erantzukizuneko espedienteak abiaraztea (hala badagokio) eta izapidetzea.

   8. Enpleguaren eta langabeziaren gaineko zehapen-espedienteak bideratzea, legedi espezifikoan ezarritako baldintzetan.

   9. Zuzenbide pribatuko ente publikoaren aholkularitza juridikoa.

   10. Atxikita dituen EAEko ondarearen ondasunak eta eskubideak administratu eta zaintzea, eta EAEko Ondarearen Ondasun eta Eskubideen Inbentario Orokorra egiten laguntzea. Apartatu honetan xedatutakoak ez ditu eragotziko Euskal Autonomia Erkidegoko Administrazio Orokorrean ondare-arloko eskumena duen saileko organoek esleituta dituzten eginkizunak.

   11. Enteko Segurtasun eta Osasun Unitatearen jarduerak zuzentzea, hargatik eragotzi gabe Prebentzio Zerbitzuaren eskumenak.

   12. Emakumeen eta gizonen arteko berdintasunaren arloko indarreko plan eta arauetan aurreikusita dauden neurriak bete daitezen sustatzea.

   13. Lanbide-Euskal Enplegu Zerbitzu Publikoko langileen erregistroa zuzentzea eta kudeatzea.

   14. Diru-bilketaren kudeaketa egitea, ezertan eragotzi gabe diruzaintzaren arloan eskumena duen zuzendaritzari dagozkion eskumenak, bat etorriz Euskal Autonomia Erkidegoko Ogasun Nagusiaren Diru-bilketa Erregelamendua onartzen duen urtarrilaren 12ko 1/2021 Dekretuarekin.

2. Administrazioaren eta Zerbitzu Orokorren Zuzendaritza organo administratiboa da, eta administrazio-ahalak baliatzen ditu, aurreko apartatuan aipatzen diren izaera publikoko eginkizunetan.

3. Zuzendaritza horren ebazpenek ez diote administrazio-bideari amaiera ematen, salbu eta dirulaguntzen oinarriak eta dirulaguntza-deialdiak onartzeko direnetan.

1. Prestazioen Zuzendaritzari eginkizun hauek dagozkio, 16. artikuluan aurreikusitakoez gain:

   1. Azaroaren 21eko 173/2023 Dekretuaren bidez onartutako Diru-sarrerak Bermatzeko Errentaren Erregelamenduan aurreikusitako prozedurak abiarazi, izapidetu eta ebaztea, hargatik eragotzi gabe c) letran zehapen-prozedurei buruz ezartzen dena.

   2. Bizitzeko gutxieneko diru-sarrera eta, hala badagokio, beste edozein prestazio edo laguntza kudeatzea (baldin eta horien kudeaketa Lanbide-Euskal Enplegu Zerbitzu Publikoari badagokio), Euskal Autonomia Erkidegoari agindu edo eskualdatzen zaizkion eginkizunak betez.

   3. Zehapen-espedienteak bideratzea, Inklusiorako eta Diru-sarrerak Bermatzeko Errentaren Sistemaren prestazio ekonomikoei dagokienez.

   4. Aztertzea ea betetzen diren enpleguaren arloko betebeharrak, baldin hauek jasotzearen ondoriozkoak badira: langabezia-prestazioa eta -subsidioa, Inklusiorako eta Diru-sarrerak Bermatzeko Euskal Sistemaren prestazioak edo Lanbide-Euskal Enplegu Zerbitzu Publikoak kudeatzen duen beste edozein prestazio, subsidio edo laguntza.

   5. Administrazio-kontseiluak onartzen duen laguntza, ikuskapen eta kontroleko urteko plana egikaritzea eta Inklusiorako eta Diru-sarrerak Bermatzeko Euskal Sistemaren abenduaren 22ko 14/2022 Legearen 93. artikuluan aurreikusitako eginkizunak garatzea.

2. Prestazioen Zuzendaritza organo administratiboa da, eta administrazio-ahalak baliatzen ditu, aurreko apartatuan aipatzen diren izaera publikoko eginkizunetan.

3. Prestazioen Zuzendaritzaren ebazpenek ez diote administrazio-bideari amaiera ematen, hargatik eragotzi gabe azaroaren 21eko 173/2023 Dekretuaren bidez onartutako Diru-sarrerak Bermatzeko Errentaren Erregelamenduaren 86., 88. eta 101. artikuluetan ezarritako kasuak.

1. Enplegu eta Prestakuntza Zuzendaritzari eginkizun hauek dagozkio, 16. artikuluan aurreikusten direnez gain:

   1. Inklusiorako eta Diru-sarrerak Bermatzeko Euskal Sistemaren erabiltzaileak gizarteratzeko eta laneratzeko tresnak eta zerbitzuak kudeatzea.

   2. Bermatzea, batetik, pertsonen eskubideak, eta, bestetik, enplegagarritasuna hobetzeko betebeharrak betetzen direla; horretarako, pertsonak laneratzeko zerbitzuak kudeatzea dagokio, hargatik eragotzi gabe lurralde-zerbitzuei dagozkienak.

      Era berean, enplegu-zerbitzuen erabiltzaileei zuzendutako esku hartzeko eta arreta emateko ereduak prestatzea dagokio, lurralde-zerbitzuek ezar ditzaten.

   3. Euskal Enplegu Sareko zerbitzuak diseinatu eta kudeatzea, enpleguaren eta enplegu-zerbitzuen eskatzaileei zuzenduta, bai eta enplegagarritasuna eta okupagarritasuna hobetzeko programa osagarriak ere, hargatik eragotzi gabe foru-aldundiei eta toki-entitateei dagokien kudeaketa.

      Berari dagokio, halaber, lan-merkatuari buruzko informazio aurreratuaren zerbitzua kudeatzea, Enpresen eta Ekintzailetzaren Zuzendaritzarekin batera.

   4. Arreta, informazio eta prospekzioko tresna komunak diseinatzen eta mantentzen laguntzea.

   5. Prestazioen Zuzendaritzari 19.1.d) artikuluan aurreikusitako eginkizunak betetzeko beharrezkoa den laguntza ematea.

   6. Enpleguaren eta enplegu-zerbitzuen eskaera-erregistroa eta Lanerako Prestakuntza Erakundeen Euskal Erregistroa kudeatzea.

   7. Lanerako Prestakuntza Plana egikaritzea; lanerako prestakuntza programatzea, Enpresen eta Ekintzailetzaren Zuzendaritzarekin koordinatuta.

   8. Pertsonen kualifikazioa eta birkualifikazioa etengabe bultzatzea, egungo eta etorkizuneko beharrei buruzko datu egiaztagarri eta eskuragarrietatik abiatuta.

   9. Prestakuntza Espezialitateen Euskal Katalogoa kudeatzea, eta hezkuntza-administrazioaren prestakuntza-eskaintzarekin behar bezalako koordinazioa egongo dela bermatzea.

   10. Euskal Autonomia Erkidegoan lanerako prestakuntzaren arloan jarduten duten organismo eta entitateekin koordinatzea eta lankidetzan aritzea.

   11. Lanbide-Euskal Enplegu Zerbitzu Publikoak pertsonen laneratzearen alde egiten dituen jarduerak kudeatzea, horiei euskarria ematea, horiek planifikatzea, diseinatzea eta gauzatzea, eta enplegu-programak, enplegua aktibatzeko programak eta enpleguari aktiboki laguntzeko programak kudeatzea, gizarteratzeko eta laneratzeko zailtasun bereziak dituzten pertsonei zuzendutakoak barne.

   12. Laneratzeko Enpresen Erregistroa eta Enplegu Zentro Berezien Euskal Erregistroa zuzentzea eta kudeatzea.

2. Aurreko apartatuan xedatutakoak ez ditu eragotziko Lanbide-Euskal Enplegu Zerbitzu Publikoaren gobernu-organoei eta Administrazioaren eta Zerbitzu Orokorren Zuzendaritzari kontratazio-organo gisa dagozkien eginkizunak, kontuan izanda deialdiak onartzeko, dirulaguntzak emateko eta, hala badagokio, lankidetza-tresnak sinatzeko organo eskudunak direla.

3. Enplegu eta Prestakuntza Zuzendaritza organo administratiboa da, eta administrazio-ahalak baliatzen ditu, 1. apartatuan aipatzen diren izaera publikoko eginkizunetan.

1. Enpresen eta Ekintzailetzaren Zuzendaritzari eginkizun hauek dagozkio, 16. artikuluan aurreikusten direnez gain:

   1. Euskal Enplegu Sareak enpresa eta entitate enplegatzaileei ematen dizkien zerbitzuak diseinatzea eta kudeatzea, eta haien eskubideak eta betebeharrak betetzen direla bermatzea, hargatik eragotzi gabe foru-aldundiei eta toki-entitateei dagokien kudeaketa.

   2. Lanbide-Euskal Enplegu Zerbitzu Publikoko zerbitzuen erabilera sustatzea enpresa eta entitate enplegatzaileen artean; horretarako, Euskal Autonomia Erkidegoko jarduera ekonomiko eta sozialean eragina duten eragile desberdinekin harreman sistematikoa ezartzea dagokio.

   3. Europar Batasunaren Eures sareari (Enplegu Zerbitzu Europarrak) lotutako eginkizunak betetzea.

   4. Aholkularitza ematea autoenplegurako, ekintzailetzarako eta gizarte-ekonomia sustatzeko, bai eta kontratazioa sustatzeko eskuragarri dauden pizgarri eta neurriei buruz ere.

   5. Enpresa eta entitate enplegatzaileekin lankidetza sustatzea, prestakuntza-behar orokor eta sektorialak detektatzeko.

   6. Arreta, informazio eta prospekzioko tresna komunak diseinatzen eta mantentzen laguntzea.

   7. Enpresen eta produkzio-sarearen egungo eta etorkizuneko beharrizanen jarraipena egiteko metodologiak diseinatzea, planifikatzea eta kudeatzea.

   8. Orokorrean, enpresa eta entitate enplegatzaileei arreta ematea, enplegu duina sortzen duten ekimenak babesteko eta sustatzeko, barne hartuta enpresak sortzen laguntzeko eta kontratazioa sustatzeko programen kudeaketa.

2. Aurreko apartatuan xedatutakoak ez ditu eragotziko Lanbide-Euskal Enplegu Zerbitzu Publikoaren zuzendaritza-organoei eta Administrazioaren eta Zerbitzu Orokorren Zuzendaritzari kontratazio-organo gisa dagozkien eginkizunak, kontuan izanda deialdiak onartzeko, dirulaguntzak emateko eta, hala badagokio, lankidetza-tresnak sinatzeko organo eskudunak direla.

3. Enpresen eta Ekintzailetzaren Zuzendaritza organo administratiboa da, eta administrazio-ahalak baliatzen ditu, 1. apartatuan aipatzen diren izaera publikoko eginkizunetan.

   3. ATALA.

   ZUZENDARITZA- ETA KUDEAKETA-ORGANOENTZAKO LAGUNTZA-ZERBITZUAK

1. Zuzendaritza- eta kudeaketa-organoentzako laguntza-zerbitzuak antolaketa-unitate nagusiak dira, hierarkikoki zuzendaritza nagusiaren mende daudenak, eta aholkularitza, informazioa eta laguntza ematen dizkiete zuzendaritza- eta kudeaketa-organoei.

2. Laguntza-zerbitzuak hauek dira:

   1. Kabinete Teknikoa, informazioa prestatu, aztertu eta ikertzen duena edo antzeko eginkizunak betetzen dituena. Halaber, Enpleguaren eta Prestakuntzaren Euskal Behatokiaz arduratzen da, Enpleguaren abenduaren 21eko 15/2023 Legearen 46. artikuluan aurreikusitako irismenarekin.

   2. Ikerketa eta Berrikuntza Zerbitzua, zeinaren ardura baita analisi, ikerketa, diseinu, berrikuntza aplikatu eta jardunbide onen programak garatzea, enplegu- eta inklusio-zerbitzuen berrikuntzarako eta etengabeko hobekuntzarako.

3. Administrazio-kontseiluak zuzendaritza- eta kudeaketa-organoei laguntzeko zerbitzu berriak sortu eta daudenak ezabatu edo aldatu ahalko ditu, eta horien mendetasun hierarkikoa eta eginkizunak ezarri.

Lanbide-Euskal Enplegu Zerbitzu Publikoaren lurralde-zerbitzuak lurraldeko eta tokiko enplegu-bulegoen sare batean antolatzen dira, eta, Euskal Enplegu Sarearen mapa betez, enteak esleituta duen zerbitzu publikoa hobeto ematen laguntzen dute.

1. Enpleguko lurralde-bulegoak organikoki Koordinazio eta Komunikazio Zuzendaritzaren mende daude, eta funtzionalki zuzendaritza exekutiboen mende, kasuan kasuko jarduera-eremuan.

   Koordinazio eta Komunikazio Zuzendaritzak zuzendaritza exekutibo guztien koordinazioa bermatuko du, enpleguko lurralde-bulegoen zuzendaritza funtzionala modu antolatuan garatzeko.

2. Lurralde-bulegoek, beren lurralde-eremuan, eginkizun hauek dituzte:

   1. Tokiko enplegu-bulegoen funtzionamendua zuzentzea, koordinatzea eta ikuskatzea.

   2. Lanbide-Euskal Enplegu Zerbitzu Publikoaren planak eta programak ezartzea, lurraldean garatu beharrekoak.

   3. Foru-aldundiekin, udalerriekin eta sektore publikoa osatzen duten gainerako tokiko ente eta entitateekin lankidetzan aritzea sustatzea, Euskal Enplegu Sarean sar daitezen, hargatik eragotzi gabe enpleguaren arloan eskumena duen Eusko Jaurlaritzako sailak haiek sarean sartzea adosteko duen eskumena.

      Era berean, lurraldean leihatila bakarren sorrera sustatzeko ardura dute, Euskal Enplegu Sareko zerbitzu-zorroa modu antolatu eta osagarrian garatzeko, Euskal Enplegu Sarearen maparen arabera.

   4. Lurraldeko jarduera ekonomiko eta sozialean eragina duten eragile desberdinekiko harreman sistematikoa dinamizatzea.

   5. Enpresen eta Ekintzailetzaren Zuzendaritzarekin koordinatuta, beren lurralde-eremuko enpresetan prospekzio-jarduerak garatzea, egungo eta etorkizuneko lanbide-beharrak detektatzeko eta tokiko enplegu-bulegoek garatzen dituztenak koordinatzeko.

   6. Administrazio-prozedurak izapidetzen laguntzea.

   7. Lanbide-Euskal Enplegu Zerbitzu Publikoko zuzendaritza-organoek eta zuzendaritza exekutiboek agintzen dizkieten bestelakoak.

3. Lanbide-Euskal Enplegu Zerbitzu Publikoak hiru lurralde-bulego ditu, bat lurralde historiko bakoitzeko.

1. Tokiko enplegu-bulegoak enplegu-zerbitzuak emateko oinarrizko unitatea dira. Horien kopurua eta kokapena administrazio-kontseiluak zehazten du, Euskal Enplegu Sarearen mapak ezartzen duenaren arabera.

2. Tokiko enplegu-bulegoak zein lurraldetan kokatuta dauden, hango lurralde-bulegoaren mende daude organikoki eta funtzionalki.

   Hala ere, Koordinazio eta Komunikazio Zuzendaritzak enpleguko lurralde-bulegoen eta zuzendaritza exekutiboen koordinazioa bermatuko du, tokiko bulegoen zuzendaritza funtzionala modu antolatu eta homogeneoan garatzeko.

3. Tokiko enplegu-bulegoek eginkizun hauek dituzte esleituta:

   1. Bulego bakoitzak esleituta dituen pertsonen enplegagarritasuna hobetzeko eskubideak bereiztea eta eskubide horiei dagozkien prestazioen edukia lortzea, bai eta betebeharrak betetzen direla kontrolatzea ere.

   2. Inklusiorako eta Diru-sarrerak Bermatzeko Euskal Sistemako prestazio ekonomikoen onuradunak (bulego bakoitzak esleituta dituenak) laneratzeko zerbitzuak ematea eta betebeharrak betetzen direla zaintzea, hargatik eragotzi gabe beste sistema batzuei dagozkienak.

   3. Diru-sarrerak bermatzeko errentaren onuradunen hitzorduak eta agerraldiak bideratzea, Inklusiorako eta Diru-sarrerak Bermatzeko Euskal Sistemaren abenduaren 22ko 14/2022 Legean eta azaroaren 21eko 173/2023 Dekretuaren bidez onartutako Diru-sarrerak Bermatzeko Errentaren Erregelamenduan ezarritakoaren arabera.

   4. Euskal Enplegu Sarearen zerbitzu-zorroko eta enplegagarritasuna eta okupagarritasuna hobetzeko programa osagarrietako zerbitzuak ematea, hargatik eragotzi gabe Enplegu eta Prestakuntza Zuzendaritzak eta Enpresen eta Ekintzailetzaren Zuzendaritzak zuzenean ematen dituztenak eta foru-aldundiek eta tokiko entitateek kudeatzen dituztenak.

   5. Enpleguko lurralde-bulegoarekin koordinatuta, harreman sistematikoa ezartzea ikastetxeekin, teknologia-zentroekin, administrazioekin, sindikatuekin, enpresekin, gizarte-zerbitzuekin eta sareko lanaren bidez Lanbide-Euskal Enplegu Zerbitzu Publikoari toki-mailan eginkizunak garatzen lagundu diezaioketen agente publiko edo pribatu guztiekin.

   6. Enpleguko lurralde-bulegoarekin eta Enpresen eta Ekintzailetzaren Zuzendaritzarekin koordinatuta, bitartekaritza-zerbitzuak ematea eta tokiko bulegoaren lurralde-eremuan dauden enpresetan prospekzio-jarduerak egitea, egungo eta etorkizuneko lanbide-beharrak detektatzeko.

   7. Informazioa eskaintzea eta laguntza ematea pertsona eta enpresei, Lanbide-Euskal Enplegu Zerbitzu Publikoak eskaintzen dituen prestazio eta zerbitzuei buruz, eta, hala badagokio, organo, unitate eta erakunde eskudunetara bideratzea.

   8. Pertsonak enpleguaren eta enplegu-zerbitzuen eskaera-erregistroan inskribatzea.

   9. Lan-kontratuen komunikazioetan bitarteko telematikoak erabiltzeko baimenak kudeatzea.

   10. Prestazioen Zuzendaritzari 19.1.d) artikuluan aurreikusitako eginkizuna betetzeko beharrezkoa den laguntza ematea.

   11. Lanbide-Euskal Enplegu Zerbitzu Publikoko zuzendaritza-organoek eta zuzendaritza exekutiboek agintzen dizkieten bestelako eginkizunak.

4. Tokiko enplegu-bulegoak erregistro-gaietan laguntzeko bulegoak izango dira, eta eginkizun osoak izango dituzte administrazio-prozedurei eta Lanbide-Euskal Enplegu Zerbitzuaren eskumenekoak diren gainerako izapideei dagokienez.

5. Pertsonek beste edozein administrazio publikotako organoetara zuzentzen dituzten eskaerei, idazkiei eta komunikazioei dagokienez, Lanbideren toki-bulegoen eginkizuna dokumentazio hori jasotzea, digitalizatzea eta erregistratzea izango da; aurkezpen-data eta -ordua egiaztatzen duen ordainagiria entregatuko dute, eta, ondoren, organo eskudunei bidaliko diete, ekainaren 20ko 91/2023 Dekretuaren 101.4 artikuluaren c), d) eta f) letretan xedatutakoaren arabera (91/2023 Dekretua, Herritarrei arreta integral eta multikanala ematekoa eta zerbitzu publikoak bitarteko elektronikoz irispidean izatekoa).

6. Tokiko enplegu-bulegoak administrazio-organoak dira, eta administrazio-ahalak baliatzen dituzte, aurreko apartatuetan aipatzen diren izaera publikoko eginkizunetan.

Lanbide-Euskal Enplegu Zerbitzu Publikoak Euskararen erabilera normalizatzeko azaroaren 24ko 10/1982 oinarrizko Legean aitortutako hizkuntza-eskubideak bermatzen ditu, eta Euskal Enplegu Publikoaren abenduaren 1eko 11/2022 Legearen XIII. Tituluan, Euskal Sektore Publikoan euskararen erabilera normalizatzeko otsailaren 22ko 19/2024 Dekretuan eta indarrean den gainerako araudian hizkuntza-normalizazioari buruz jasotzen diren xedapenak aplikatu behar zaizkio.

Lanbide-Euskal Enplegu Zerbitzu Publikoko zuzendaritza-organoek eta kudeaketa-organoek, nork bere eremu funtzionalean, bermatuko dute errespetatzen direla martxoaren 16ko 1/2023 Legegintza Dekretuaren bidez onartutako Emakume eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bateginak zuzenbide pribatuko ente publikoei ezartzen dizkieten betebeharrak.

1. Lanbide-Euskal Enplegu Zerbitzu Publikoko langileen araubideak Enpleguaren abenduaren 21eko 15/2023 Legearen 99. artikuluan eta arau hauetan ezarritakoa beteko du:

   1. Administrazio-kontseiluak onartzen duen lanpostu-zerrendak aplikatu egingo ditu enplegu publikoaren gaineko eskumena duen sailak zerrenda horiek oro har egiteko ezartzen dituen irizpideak. Era berean, Eusko Jaurlaritzak onartzen duen EAEko Administrazioko sektore publikoko langileen dimentsionamendura egokituko da.

      Lanpostu-zerrenda onartzeko, enplegu publikoaren arloan eskumena duen sailaren nahitaezko txostena beharko da.

   2. Langile lan-kontratudunei dagokienez, zuzendaritza nagusiari dagokio lanpostuak eskuratzeko, lanpostuak behin-behinean eta behin betiko betetzeko eta lanpostuz mugitzeko prozesuak deitzea, kudeatzea eta ebaztea, Euskal Enplegu Publikoaren abenduaren 1eko 11/2022 Legearen arabera.

   3. Funtzionarioei dagokienez, Euskal Autonomia Erkidegoko Administrazio Orokorreko funtzio publikoa erregulatzen duen araudia aplikatuko da.

      Lehiaketa bidez lanpostuak hornitzeko prozedurak deitzea eta ebaztea funtzio publikoaren gaineko eskumena duen sailaren ardura izango da.

      Zuzendaritza nagusiaren deialdiaren eta ebazpenaren bidez beteko dira izendapen askeko funtzionarioen lanpostuak, Euskal Enplegu Publikoaren abenduaren 1eko 11/2022 Legearen 102. artikuluarekin bat etorriz.

      Zuzendaritzako langileen lanpostuak betetzeko, deialdia egingo du zuzendaritza nagusiak; horretarako, administrazio-kontseiluaren adostasuna ere beharko da, zuzendaritza nagusiak proposatuta; konpetentzia profesionala eta esperientzia hartuko dira kontuan, merezimendua, gaitasuna eta publikotasuna bermatuko dituen prozedura baten bidez.

   4. Lanbide-Euskal Enplegu Zerbitzu Publikoak egin eta kudeatuko ditu entearen aldi baterako enpleguaren lan-poltsak.

2. Aurreko apartatuan ezarritakoak ez ditu eragotziko enplegu publikoaren gaineko eskumena duen sailaren eginkizunak eta eskumenak.

   Estatutu hauetan aurreikusi gabeko gaietan, Eusko Jaurlaritzak edo enplegu publikoaren eskumena duen sailak baliatuko ditu langileen arloko eskumenak, Euskal Enplegu Publikoaren abenduaren 1eko 11/2022 Legearen 17. eta 18. artikuluetan xedatutakoaren arabera.

Lanbide-Euskal Enplegu Zerbitzu Publikoaren baliabide ekonomikoak Enpleguaren abenduaren 21eko 15/2023 Legearen 98. artikuluan ezarritakoak dira.

1. Lanbide-Euskal Enplegu Zerbitzu Publikoaren ondare-, kontratazio-, dirulaguntza- eta kontrol-araubidea Enpleguaren abenduaren 21eko 15/2023 Legearen 97. artikuluan ezarritakoa da.

2. Lanbide-Euskal Enplegu Zerbitzuak, kontratazio-espedienteak izapidetzen dituenean, botere esleitzaileentzat ezarritako arauetara doituko du bere jarduera (botere esleitzaileak administrazio publikotzat jotzen dira sektore publikoko kontratuei buruzko araudiaren ondorioetarako), bai eta Euskal Autonomia Erkidegoko legerian dauden kontratazioari buruzko arauetara ere (hau da, Euskal Autonomia Erkidegoko Sektore Publikoko kontratazioaren araubideari buruzko uztailaren 27ko 116/2016 Dekretuan edo hura ordezten duen arauan eta gainerako garapen-arauetan kontratazioari buruz jasotako arauetara).

3. Era berean, Dirulaguntzen Araubidea erregulatzen duen abenduaren 21eko 20/2023 Legean edo hura ordezten duen arauan eta arlo horretako oinarrizko arauetan ezarritakora egokituko da, eta bermatuko du dirulaguntzak emateko prozedurak ebazteko organo eskudunak ez duela haien kudeaketa esleituta izango.

   Laguntzen deialdietako gastu-gehikuntzak organo eskudunak baimenduko ditu, guztizkoa kontuan hartuta. Era berean, zenbateko hori hartuko da kontuan oinarri arautzaileak eta dirulaguntzen deialdiak eta horien ebazpenak onartzeko organo eskuduna zein den zehazteko, salbu eta gehikuntza hori aipatutako egintzak eman ondoren gertatzen bada.

   Dirulaguntzen programak onartzeak, horiek emateari buruzko ebazpenek eta, hala badagokio, horiek itzultzeari buruzkoek administrazio-ahalak baliatzea dakarte.

4. Bere informazio ekonomiko-finantzarioa izango du, zeina Kontabilitate Plan Orokorraren irizpideekin, zuzenbide pribatuko ente publikoei buruz dagoen araudiarekin eta, hala badagokio, Kontrol Ekonomikoko Bulegoak ematen dituen jarraibideekin bat etorriz lantzen baita, Euskal Autonomia Erkidegoko Ekonomia Kontrolari eta Kontabilitateari buruzko Legearen testu bategina onartzen duen urriaren 19ko 2/2017 Legegintzako Dekretuan edo hura ordezten duen arauan aurreikusitako ondorioetarako.

5. Finantzaketa-proposamenek kredituen, abalen eta bestelako kauzioen eragiketetarako mugak ezarriko dituzte, azaroaren 8ko Euskal Autonomi Elkarteko Finantzen 8/1986 Legearen edo hura ordezten duen arauaren eta dagozkien aurrekontu-legeen esparruan.

   Maileguak, kredituak, abalak edo bestelako bermeak edo bere helburuen zerbitzura dagoen edozein finantza-tresna kontratatzeko, Euskal Autonomia Erkidegoko zorpetzeko eta bermea emateko araubideak erregulatzen dituen araudiari eta finantzaketa-proposamenean aurrez ezarritako mugei jarraituko zaie.

Lanbide-Euskal Enplegu Zerbitzu Publikoa epaiketa batean defendatu eta ordezkatzea Eusko Jaurlaritzaren Zerbitzu Juridiko Nagusiaren ardura da, gaia arautzen duen araudian ezarritakoaren arabera.

1. Lanbide-Euskal Enplegu Zerbitzu Publikoak merkataritza-sozietateak sortzea proposatu ahalko du, bai eta entitate publikoek lehendik eratu dituzten beste sozietate batzuetan parte hartzea ere, eta Euskal Enplegu Sareko entitateekin partzuergoak edo bestelako elkarteak sortzea, Euskal Autonomia Erkidegoan enplegu-zerbitzuen kudeaketa eraginkorra egiteko.

2. Aurreko apartatuan aipatzen den proposamena Euskal Enplegu Sarearen mapa betetzearekin eta sare horren zerbitzu-zorroa hobea izatearekin justifikatuko da.

   Nolanahi ere, Euskal Sektore Publikoaren maiatzaren 12ko 3/2022 Legean xedatutakoa beteko da.