2025eko otsailaren 5ean, Migrazio eta Asilo Euskal Foroko Osoko Bilkura ospatu da Eusko Jaurlaritzaren egoitzan, Gasteizen. Urtero bezala, deitutako erakundeek parte hartu dute bilkura honetan, urtean zehar egindako lana aztertzeko eta harrera eta integrazioaren arloan izandako aurrerapenak partekatzeko. Aurtengo ekitaldia bereziki esanguratsua izan da, izan ere, Foroko hainbat batzordek osatutako erakundeek parte hartu ahal izan dute, baita partaidetza-gune honen garrantzia azpimarratzen duen eta testuinguruan kokatzen duen buletin bat bezalako elementu berriak ere barne hartu dira.

Aurtengo Osoko Bilkurak batzordeen koordinatzaileen berritzea eta erakunde berrien sartzea ere nabarmendu du, Foroak aniztasuna eta dinamismoa indartuz.

Saioa Nerea Melgosa Eusko Jaurlaritzako Ongizate, Gazteria eta Erronka Demografikorako sailburuak zuzendu du. Halaber, Ignacio Fariñaren lehen ekitaldi ofiziala izan da, Immigratutako Pertsonak Hartzeko eta Integratzeko zuzendari berria izendatu ostean, aurreko egunean kargua hartu ondoren. Bilkuran, Hiritartasun, Immigrazio eta Asiloaren VI. Plan Interkulturala 2022-2025 planaren betearazpenaren egoeraren balantzea egin da. Dokumentuak jasotzen dituen 113 ekintzetatik (103 hasierakoak eta 10 ondoren gehitutakoak), %67,26 (76 ekintza) dagoeneko amaituta daude, eta %20,35 (23 ekintza) garapen-prozesuan daude. Guztira, hamar ekintzetatik bederatzi amaituta edo martxan daude, planaren amaierarako urtebete falta dela.

Gainera, Ikuspegi, Euskal Immigrazio Behatokia, Foroko ordezkarien aurrean aurkeztu du Euskadiko Elkartze eta Migrazioa proiektuaren laburpena, non Foroko batzorde batzuek parte hartu duten. Laster argitaratuko den ikerketa honek, euskal gizartearen elkarte-sarean pertsona migratzaileen inplikazioaren analisi sakona eskaintzen du.

Topaketa honekin, Euskal Migrazio eta Asilo Foroak bere eginkizuna berretsi du, Euskadin harrera eta integrazio politikak jarraitzeko, hausnartzeko eta koordinatzeko gune gisa, aldaketa eta erronka berrien testuinguruan bere lana sendotuz.

2024an Batzordeek egindako lan guztia Foroko urteko Memorian jasota dago.

Foroko zenbait kideren testigantzak

• Garazi Zarauz, Elkarrekin Kooperatiba Txikiaren ordezkaria eta Euskararen eta Aniztasun Linguistikoaren Batzordeko koordinatzailea.

• Rocio Calderón, Adiskidetuak elkartearen ordezkaria eta Berme Juridikoen Batzordeko koordinatzailea.

• Shandra Lourido, SOS Arrazakeriaren ordezkaria eta Hezkuntza Batzordeko koordinatzailea.

• Oksana Demianovich, Ukraina-Euskadi elkartearen ordezkaria eta Parte-hartze Batzordeko koordinatzailea.

• Xabier Aguirre, Munduko Medikuak elkartearen ordezkaria eta Osasun Batzordeko koordinatzailea.