Itsas Salbamendu Humanitarioa (SMH) gobernuz kanpoko erakundearen Aita Mari erreskate-ontzia martxoaren 22an iritsi zen Bilbora, Mediterraneo Erdialdeko uretan hamabigarren misioa amaitu ostean. Misio horretan 43 pertsona erreskatatu zituen, eta Italiako portu segurura eraman zituen.

Misio bakoitza amaitzean, Aita Marik Mediterraneoko Vinaros edo Burriana ditu egoitza-portu, baina oraingoan euskal uretan igaroko ditu misioen arteko bi hilabeteak. Lehenengoa Bilbon, Itsasmuseumaren aurrean, eta bigarrena Pasaia San Pedron, Gipuzkoako udalerriko itsas jaialdirako garaiz. Itzulera horren helburua da «egiteke dauden eguneratze batzuk eta doitzea». Gainera, Euskal Herrira egindako bisita honek proiektu solidario hau euskal herritarrengana hurbiltzeko ere balioko du. 2020tik Aita Mari ontzia ez zen euskal uretara itzuli.