RSS
210. zk., 2020ko urriaren 26a, astelehena
- Bestelako formatuak:
- PDF (280 KB - 3 orri.)
- EPUB (226 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
XEDAPEN OROKORRAK
LAN ETA ENPLEGU SAILA
EKONOMIA ETA OGASUN SAILA
4472
237/2020 DEKRETUA, urriaren 20koa, zeinaren bidez 128.250,00 euroko kredituak sartzen baitira Euskal Autonomia Erkidegoko Administrazioaren 2020ko aurrekontuan, lan-arloko legeria betearaztearen alorrean Estatuak eskualdatutako eginkizun eta zerbitzuak direla eta: kaleratze kolektiboko espedienteek eragindako langileentzako ohiko erretiroaren aurreko laguntzak.
Maiatzaren 24ko 1/2011 Legegintzako Dekretuaren bitartez, batetik, Euskal Autonomia Erkidegoko Aurrekontu Erregimenari buruz indarrean dauden lege-xedapenen testu bategina onartzen da, eta, bestetik, Euskal Autonomia Erkidegoko sektore publikoko fundazio eta partzuergoei aplikatuko zaien aurrekontu-erregimena arautzen da. Bada, dekretu horren 75. artikuluan ezartzen denez, Euskal Autonomia Erkidegoak Estatutik zerbitzu eta eskumen berriak jasoz gero, zirkunstantzia horren ondoriozko obligazioei aurre egiteko, Aurrekontu Orokorretan beharrezko kredituak sartuko dira eta bai likidatzea aurreikusten diren eskubide ekonomikoak ere. Guztiarekin ere, Estatuko Aldizkari Ofizialean eta Euskal Herriko Agintaritzaren Aldizkarian Transferentzien Bitariko Batzordearen Akordioa azkenekoz argitaratu zenetik harako hogei egun baliodun igaro baino lehen, Jaurlaritzak onartu egin beharko du eskumen edota zerbitzu berriari dagokion aurrekontua, ekitaldia amaitu arteko aldiari dagokiona onartu ere.
2020ko uztailaren 15eko Estatuko Aldizkari Ofizialean, uztailaren 14ko 665/2020 Errege Dekretua argitaratu zen, lan-arloko legeria betearazteari lotuta Estatuko Administrazioak Euskal Autonomia Erkidegoari eskualdatzen dizkion eginkizun eta zerbitzuei buruzkoa (kaleratze kolektiboko espedienteek eragindako langileentzako ohiko erretiroaren aurreko laguntzak). 2020ko uztailaren 15eko Euskal Herriko Agintaritzaren Aldizkarian, uztailaren 14ko 90/2020 Dekretua argitaratu zen, aipatu arloari dagokionez Transferentzien Bitariko Batzordeak 2020ko ekainaren 25ean lortutako Akordioa onartzen duena.
Horrenbestez, Ekonomia eta Ogasuneko sailburuaren eta Lan eta Enpleguko sailburuaren proposamenez, eta Gobernu Kontseiluak 2020ko urriaren 20an egindako bilkuran proposamena aztertu eta onartu ondoren, hau
XEDATZEN DUT:
1. artikulua.– Zenbait kreditu sartzea Euskal Autonomia Erkidegoaren Administrazioaren 2020ko Aurrekontuan.
1.– 128.250,00 euroko gastu-egoera onartzen da, eta honako obligazio honi aurre egiteko beharrezko zenbatekoaz osatzen da: lan-arloko legeria betearaztearen alorrean Estatuaren eginkizun edo zerbitzu berriak jasotzearen ondoriozko obligazioak (kaleratze kolektiboko espedienteek eragindako langileentzako ohiko erretiroaren aurreko laguntzak).
2.– Jasotako eskumen berriari dagokion sarrera-egoera 128.250,00 eurokoa da.
3.– Aurreko paragrafoetan aipatutako sarrera- eta gastu-egoerak 2020ko uztailaren 16tik 2020ko abenduaren 31ra arteko aldiari dagozkio. Hona hemen nola banatzen diren:
Gastuak: 3112 programa: Lana.
(Ikus .PDF)
Diru-sarrerak: 9111 Programa: foru-aldundien ekarpenak.
(Ikus .PDF)
2. artikulua.– Kredituak sartzeak zer ondorio dakarren.
1.– Ekonomia eta Ogasun Sailak integratu egingo du aurreko artikuluan aipatu gastu- eta sarrera-egoera Euskal Autonomia Erkidegoaren 2020ko aurrekontuan, betiere dagozkion ondorio juridikoak izan ditzan, eta, bereziki, egoera horien kontabilitatea, exekuzioa eta ondorengo likidazioa egoki gauza daitezen.
2.– Martxoaren 23ko 2/2007 Legearen bitartez, Euskal Autonomia Erkidegoko Aurrekontuak finantzatzeko foru aldundiek egin beharreko ekarpenak zehazteko eta baliabideak egoki banatzeko metodologia onartu zen, 2007-2011 aldirako; bada, metodologia horretako 9. artikuluko 1. apartatuan xedatzen denarekin bat etorriaz, Kupoaren metodologiaren ondoriozko ekarpenei dedukzio osagarria egingo zaie, zehazki metodologia horretako 2. artikuluan zehaztua, 2020ko ekitaldirako eta 128.250,00 euroko zenbatekoarekin.
3.– Aurreko paragrafoan aipatutako metodologiaren 9. artikuluko 3. paragrafoan xedatutakoarekin bat etorriaz, eta transferentzia berriak finantzatzearren, foru-aldundiek Euskal Autonomia Erkidegoko Ogasun Nagusiari ekarpen zehatz eta osagarri bat egingo diote, 2020ko ekitaldian, 128.250,00 eurokoa.
4.– Aipagai dugun arloko eginkizunak eta zerbitzuak Euskal Autonomia Erkidegoari eskualdatzen zaizkion egunetik aurrera aplikatuko dira aurreko 2. eta 3. paragrafoetan zehaztu ondorioak.
3. artikulua.– Kupoan minorizazio bat aldatzearen ondorioak.
1.– Euskal Autonomia Erkidegoaren 2017-2021 bosturtekorako kupoa zehazteko metodologiaren –urriaren 25eko 11/2017 Legeaz onartutakoaren– 11. artikuluko 1. eta 2. paragrafoetan xedatutakoarekin bat etorriaz, 2020ko ekitaldirako Kupo likidoaren minorazioaren ondoriozko emaitza hauxe izango da: dekretu honetako aurreko artikuluko 2. paragrafoan zehaztu dedukzio osagarrian behin betiko zenbatzen dena.
2.– Dekretu honetan, goragoko artikuluko 3. paragafoan aipatu Ekarpen Zehatz eta Osagarrian ere zenbatuko da dena delako emaitza.
3.– Ekonomia eta Osasun Sailari baimena ematen zaio, beharrezkoa bada, aldaketak egiteko, artikulu honetan xedatutakoaren ondorioz behar diren aldaketak alegia.
4. artikulua.– Legebiltzarrari komunikatzea.
Ekonomia eta Ogasun Sailak, Eusko Jaurlaritzaren izenean, Eusko Legebiltzarreko Ekonomia, Ogasun eta Aurrekontu Batzordeari jakinaraziko dio dekretu honetan xedatutakoaren babespean egindako kreditu-kontsignazioaren berri.
AZKEN XEDAPENA.– Indarrean jartzea.
Dekretu hau Euskal Herriko Agintaritzaren Aldizkarian argitaratu eta hurrengo egunean jarriko da indarrean. Nolanahi ere, 2020ko uztailaren 16tik aurrera izango ditu ondorioak, dekretuko transferentziak egun horretan gauzatu baitziren.
Vitoria-Gasteizen, 2020ko urriaren 20an.
Lehendakaria,
IÑIGO URKULLU RENTERIA.
Bigarren lehendakariordea eta Lan eta Enpleguko sailburua,
IDOIA MENDIA CUEVA.
Ekonomia eta Ogasuneko sailburua,
PEDRO MARÍA AZPIAZU URIARTE.
