RSS
49. zk., 2019ko martxoaren 11, astelehena
- Bestelako formatuak:
- PDF (235 KB - 2 orri.)
- EPUB (196 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
JUSTIZIA ADMINISTRAZIOA
DONOSTIA / SAN SEBASTIÁNGO LEHEN AUZIALDIKO 3 ZENBAKIKO ZUZENEKO LAGUNTZA EMATEKO UNITATE PROZESALA
1280
EDIKTUA, ezkontzaz kanpoko seme-alabentzako neurrietarako 93/2018 prozeduraren ondoriozkoa.
Donostiako Lehen Auzialdiko 3. Epaitegia (Familia) – Zuzeneko Laguntza emateko Unitate Prozesal Zibila.
Judizioa: 93/2018 ezkontzaz kanpoko seme-alabentzako neurriak.
Alderdi demandatzailea: Yadira Fernandez Cordero.
Alderdi demandatua: Alejandro Chaparro Bragado.
Gaia: guraso eta seme-alaben arteko neurriak.
Judizio horretan ebazpena eman da, eta honela dio hitzez hitz:
XEDAPENAK
Epaitegietako Irigoyen prokuradore jaunak Yadira Fernandez Cordero andrearen izenean eta hura ordezkatuz Alejandro Chaparro Bragado jaunaren aurka jarri duen demanda baiesten dut, eta, hortaz, harremana haustearen ondoriozko neurri hauek hartzea erabaki dut:
1.- Guraso-ahalaz baliatzea. Guraso biek dute XXXXX adingabeko semearen guraso-ahala, baina amak bakarrik edukiko du aita ez dagoen bitartean.
Ahala beretzat bakarrik izanik, amak hartuko ditu adingabearen gaineko erabaki garrantzitsuak, beste gurasoaren baimenik behar izan gabe. Guraso-ahalaren arloan hartu beharreko erabakien artean, honako hauek daude, besteak beste:
a) Adingabearen egoitza hark ohiko bizileku duen udalerritik kanpora aldatzea, eta adingabea atzerrira joatea oporraldietan.
b) Ikastetxea aukeratzea eta, behar bada, ikastetxea aldatzea.
c) Eskolaz kanpoko ekintzak edo ekintza osagarriak zehaztea.
d) Gizarte- eta erlijio-ospakizun garrantzitsuak; hala nola, bataioa, lehen jaunartzea eta beste erlijio batzuetako antzeko ekitaldiak.
e) Premiazkoak ez diren ekintza medikoak, ebakuntza egitea edo tratamendu mediko luzea dakartenak, edo tratamendu psikologikoak.
d) Adingabearen dokumentazioa izapidetzea/berritzea (pasaportea, NAN, bizileku-txartela, osasun-txartela...).
Halaber, adingabearekin dagoen gurasoak hari buruzko erabakiak hartzerik izango du, beste gurasoari aldez aurretik galdetu gabe, premiazko egoeraren batean edo eguneroko bizimoduko gorabehera arrunt eta ohikoei buruzko erabakiak hartu behar direnean.
2.– Zaintza eta jagoletzaren gaineko esleitzea. Amari esleitzen zaio adingabearen zaintza eta jagoletza.
3.– Egonaldi-, komunikazio- eta bisita-araubidea. Ez da bisita-araubiderik ezartzen aitaren eta semearen artean. Aitak adierazten badu berriz izan nahi duela harremana semearekin, bisitak guraso biek adostu beharko dituzte eta, ados ez badaude, legez ezarrita dagoen prozeduraren bidez aldatu beharko da neurri hau.
4.– Mantenu-pentsioa. Aitak pentsio bat ordaindu behar du XXXXX seme adingabearen mantenurako kontribuzio moduan, harik eta semea adinez nagusia izan arte, ekonomikoki independentea izan arte edo independentzia hori lortzeko moduan egon arte, fede onaren eskakizunekin bat eginez. Pentsio hori 200 eurokoa izango da hilero, eta aurretiaz ordainduko dio amari, urteko hamabi hilabeteetako bakoitzaren lehen bost egunen barruan. Pentsioa urtero eguneratuko da, horretarako errekerimendua egin beharrik izan gabe, Estatistikako Institutu Nazionalak edo horren ordezko erakundeak aurreko urtean zehar ezarritako Kontsumoko Prezioen Indizeak abendutik abendura bitartean izandako aldaketen arabera; 2020. urtean eta urtarrilaren 1etik aurrera izango ditu ondorioak eguneraketak.
5.– Aparteko gastuak. Bi gurasoek erdibana ordainduko dituzte semearen bizitzan gertatzen diren aparteko gastuak, betiere ados baldin badaude eta modu frogagarrian egiaztatzen badute, dokumentu bidez. Bi gurasoek hartu behar dute erabakia, eta, ados egon ezean, baimen judiziala egon beharko da, aurretiaz. Dena den, ez dira aparteko gastutzat hartuko honako hauek: eskola-uniformearen edo -liburuen gastuak (izan ere, urtero errepikatzen dira); bestelako gastuak, berriz, sartu egingo dira apartekoen kontzeptuan, eta katalogo posible osoa adierazi asmorik gabe, honako hauek izan daitezke: gastu medikoak, kirurgikoak, ospitalekoak, ortopedikoak, dentistarenak, psikologikoak, farmazeutikoak, ortodontziakoak, logopediakoak, eta, oro har, edozein gaixotasun fisiko edo mentalari lotutakoak, bai eta, prestakuntza-arloan, eta eskolan atzeratuta egonez gero, derrigorrezko ikasgaiei buruzko klase partikularretakoak ere.
Goragoko lerroaldean zehaztutako aparteko gastuak egiteko, guraso bien adostasunezko erabakia beharko da, betiere hura egin aurretik; eta adostasunik ez bada, arazoa epailearen esku utzi beharko da, zeinak erabakiko baitu gastua bi gurasoek egin beharko duten ala ez, ebazpen honetan ezarritako proportzioan. Ebazpena aldekoa izango da adingabearentzako behar-beharrezkoa eta egokia bada gastua, eta familiaren inguruabarrekin bat badator. Ez dira gastu-araubide horren barruan sartuko beharrezkoak diren premiazko gastuak; horrelakoetan, aldez aurretik ezin bada, aski izango da beste gurasoari ondoren jakinaraztea.
Aparteko gastuak ordaintzeko obligazioa amaitu egingo da semea –adin nagusikoa edo legez emantzipatua izanik– ekonomikoki independentea izatea lortzen duenean, Kode Zibilaren 150. eta 152. artikuluetako azkentze-kausak baztertu gabe.
6.– Ezingo da beste neurririk hartu.
Kostuak berariaz ezarriko dira bestela.
Epaiaren aurka aurkeztutako errekurtsoek ez dute etengo aurreko neurrien eraginkortasuna.
Alderdi demandatuaren gaur egungo helbidea edo bizilekua ezezaguna denez gero, Prozedura Zibilaren 1/2000 Legearen 156.4. eta 164. artikuluetan xedatutakoarekin bat etorriz, ediktu hau EHAAn argitaratzea ebatzi da, epaia jakinarazteko eginbidea gauza dadin.
Donostia, 2019ko otsailaren 25a.
JUSTIZIA ADMINISTRAZIOAREN LETRADUA.
