RSS
194. zk., 2018ko urriaren 8a, astelehena
- Bestelako formatuak:
- PDF (212 KB - 3 orri.)
- EPUB (193 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
JUSTIZIA ADMINISTRAZIOA
EIBARKO LEHEN AUZIALDIKO ETA INSTRUKZIOKO 2 ZENBAKIKO ZUZENEKO LAGUNTZA EMATEKO UNITATE PROZESALA
4903
EDIKTUA, ezkontzaz kanpoko seme-alabentzako neurrietarako 71/2018 prozeduraren ondoriozkoa.
JAKINARAZPEN-ZEDULA
Eibarko (Gipuzkoa) Lehen Auzialdiko 2 zenbakiko Epaitegian, ezkontzaz kanpoko seme-alabentzako neurrietarako 71/2018 prozedura bideratu da, Aura Maria Ruiz Alonsok eskatuta Fidel Efrain Manzanarez Rodriguezen aurka, guraso eta seme-alaben arteko neurriei buruz. Prozedura horren gainean epaia eman da. Hona hemen idazpurua eta epaitza:
99/2018 EPAIA
Eibar, 2018ko irailaren 10a.
Nik, María de Pablo Guererok, Eibarko Lehen Auzialdiko 2 zenbakiko Epaitegiko epaileak, guraso eta seme-alaben arteko neurriei buruz epaitegi honetan bideratutako 71/2018 auto hauek ikusi ditut. Hona hemen alderdiak: batetik, demandatzaile gisa, Aura María Ruiz Alonso, María Jesus Teijido Pena letraduak lagunduta eta María Antonia De la Fuente Valdezate epaitegietako prokuradoreak ordezkatuta; eta bestetik, demandatu gisa, Fidel Efrain Manzanarez Rodríguez, auzi-iheslari deklaratua ediktu bidez. Horrela, bada, honako ebazpen hau ematen dut:
ERABAKIA
Partez baiestea Aura María Ruiz Alonsoren ordezkari prozesalak Fidel Efrain Manzanarez Rodríguezen aurka aurkeztutako eskaera, guraso eta seme-alaben arteko neurriei buruzkoa, eta neurri hauek ezartzea:
1.– Guraso-ahalaz baliatzea. Bi gurasoek jarraituko dute guraso-ahala batera edukitzen, baina amak bakarrik baliatuko du. Horrek esan nahi du XXXXX adingabeari buruzko erabaki garrantzitsuak amak hartuko dituela. Guraso-ahalaren esparruan hartu beharreko erabakien artean, honako hauek daude, besteak beste:
Adingabearen egoitza hark ohiko bizileku duen udalerritik kanpora aldatzea; adingabea atzerrira joatea, oporraldiko bidaietan ez bada.
Ikastetxea aukeratzea edo ikastetxez aldatzea.
Eskolaz kanpoko jarduerak edo jarduera osagarriak zehaztea.
Gizarte- eta erlijio-ospakizun garrantzitsuak; hala nola, bataioa, lehen jaunartzea eta beste erlijio batzuetako antzeko ekitaldiak.
Premiazkoak ez diren ekintza medikoak, ebakuntza egitea edo tratamendu mediko luzea dakartenak, edo tratamendu psikologikoak.
Alabarekin dagoen gurasoak hari buruzko erabakiak hartzea izango du beste gurasoari aldez aurretik galdetu gabe, baldin larrialdiko egoerarik gertatu bada, edo erabakiak adingabearen eguneroko bizimoduko gorabehera arrunt eta ohikoei buruzkoak eta garrantzirik gabekoak badira.
2.– Zaintza- eta jagoletza-araubidea. Amak, Aura Maríak, izango du XXXXX alaba adingabearen gaineko zaintza eta jagoletza.
3.– Bisita-araubidea. Ez da aitaren eta alaba adingabearen arteko bisita-araubide zehatzik ezartzen, aita non dagoen ez dakigulako; baina, aitak berriro hartzen badu parte adingabearen bizitzan, alderdiak, askatasunez, ados jarriko dira, eta, ados jarri ezean, aita legez dagokion eskubideaz balia daiteke, eta horrela gauzatu.
4.– Mantenu-pentsioa. Jagoletza ez duen gurasoa den aldetik Fidel Efrainek ordaindu beharreko pentsioa ehun (100) eurokoa izango da hilean, XXXXX alabak independentzia ekonomikorik ez duelako eta aitak mantenua ordaintzen lagundu behar duelako. Urteko hamabi hilabeteetarik bakoitzeko lehen bost egunetan ordainduko zaio kopuru hori amari, hark izendatutako kontuan. Pentsioa urtero eguneratuko da, horretarako errekerimendua egin beharrik izan gabe, Estatistikako Institutu Nazionalak edo horren ordezko erakundeak ezarritako kontsumoko prezioen indizeak izandako aldaketen arabera; 2019. urtetik aurrera eta urtarrilaren 1etik aurrera izango ditu ondorioak eguneraketak.
Mantenu-pentsioa ordainduko da harik eta XXXXX adin nagusikoa eta ekonomikoki burujabea den arte edo halako izateko kondizioan izaten den arte, fede onezko jokabidearekin bat etorriz.
Jagoletza ez duen gurasoak zuzenean ordaindu behar dituen era horretako gastuak ez dira kenduko ebazpen honen arabera ordaindu behar duen pentsiotik.
Gurasoek erdibana ordainduko dituzte burujabetasun ekonomikorik gabeko alabaren bizitzan sortzen diren ezohiko gastuak, ados baldin badaude eta gastuak agiri bidez egiaztatuta geratzen badira. Bi gurasoen adostasunez erabakiko da halako gastuak egitea, edo, ados ez badaude, epaile batek baimena emanda, betiere gastuak egin baino lehen. Kontzeptu horretatik kanpo, zenbait gastu utziko dira, esaterako, eskola-uniformearen edo -liburuen gastuak (izan ere, urtero errepikatzen dira). Beste zenbait gastu, berriz, sartu egingo dira apartekoen kontzeptuan, eta katalogo posible osoa adierazteko asmorik gabe, honako hauek sar daitezke: gastu medikoak, kirurgikoak, ospitalekoak, ortopedikoak, dentistarenak, psikologikoak, farmazeutikoak, ortodontziakoak, logopediakoak, eta, oro har, gaixotasun fisiko edo mentalei lotutakoak, bai eta, prestakuntza-arloan, eskolan atzeratuta egonez gero, derrigorrezko ikasgaiei buruzko klase partikularretakoak ere.
Aurreko paragrafoan azaldutako ezohiko gastuak aitak eta amak adostu beharko dituzte, gastua egin aurretik betiere; horrela, bada, gastu hori egin edo ez egin desadostasunik egonez gero, organo judizialaren pean jarriko da gaia; izan ere, organo horrek erabakiko du gastu hori ea bi gurasoek ordaindu behar duten ebazpen honetan ezarritako proportzioan.
Alderdi bati ere ez zaio ezartzen prozesuko kosturik.
Aurkaratzeko modua: apelazio-errekurtsoa, Gipuzkoako Probintzia Auzitegian (PZLb, 455. artikulua). Errekurtsoa egiteko, idazkia aurkeztu behar da epaitegi honetan, hogei egun balioduneko epean, jakinarazpena egin eta biharamunetik aurrera. Idazki horretan, bestalde, hauek adieraziko dira: aurkaratzea zein alegaziotan oinarritzen den eta apelatutako ebazpena eta aurkaratutako erabakiak zein diren (PZLb, 458.2 artikulua).
Errekurtsoa jarri ahal izateko, 50 euroko gordailua eratu beharko da, eta, baldintza hori bete ezean, ez da hura izapidetzea onartuko. Gordailua egiteko, epaitegi honek Banco Santanderren duen Gordailu eta Kontsignazio Kontuan (1837 0000 33 0071 18) kontsignatu beharko da zenbateko hori. Ordainagiriaren kontzeptua idazteko hutsunean, «Errekurtsoa» dela adierazi beharko da (kodea: 02-Apelazioa). Kontsignazioa egiaztatu beharko da errekurtsoa aurkeztean (BJLOren 15. xedapen gehigarria).
Errekurtsoa jartzeko, gordailua eratzetik salbuetsita daude aipatutako xedapenaren 5. paragrafoan aipatzen direnak, eta doako laguntza juridikorako eskubidea aitortua dutenak.
Eta epai honen bidez erabaki, agindu eta sinatzen dut.
Eta Fidel Efrain Manzanarez Rodriguez demandatuari behar bezala jakinarazpena egiteko balio dezan, ematen eta sinatzen dut honako hau, Eibarren (Gipuzkoa), bi mila eta hemezortziko irailaren hamarrean.
JUSTIZIA ADMINISTRAZIOAREN LETRADUA.
