Euskal Herriko Agintaritzaren Aldizkaria

93. zk., 2018ko maiatzaren 16a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

OGASUN ETA EKONOMIA SAILA

2600

EBAZPENA, 2018ko maiatzaren 7koa, Ogasun eta Ekonomia Saileko zerbitzu zuzendariarena, zeinaren bidez Gobernantza Publiko eta Autogobernu Saileko Administrazioko eta Zerbitzu Orokorretako sailburuordeari delegatzen baitzaio Euskadiko Zerga Koordinaziorako Organoaren eta Euskadiko Ekonomia Arduralaritzako Epaitegiaren administrazio-zentroak goi- eta behe-tentsioko energia elektrikoz eta gas naturalez hornitzeko kontratazioaren eskumena. Bi organo horiek sail honi atxikita daude, eta Vitoria-Gasteizko Gaztelako Atea kaleko 15. zenbakian daude.

Administrazioko eta Zerbitzu Orokorretako Sailburuordetzari dagokio kudeaketa bateratuaren arloan eta kudeaketa bateratuko deklaratutako higiezinen arloan kontratazioa egitea, hala ezarrita baitago Euskal Autonomia Erkidegoko Sektore Publikoaren kontratazio-araubidea onartzen duen uztailaren 27ko 116/2016 Dekretuaren 15. eta 17. artikuluetan eta Gobernantza Publiko eta Autogobernu Sailaren egitura organikoa eta funtzionala onartzen duen apirilaren 11ko 71/2017 Dekretuko 19.d) artikuluan.

Bestalde, 116/2016 Dekretuak 20. artikuluan ezartzen duenez, kontratazio zentralizatukotzat deklaratu ahal izango dira Euskal Autonomia Erkidegoko sektore publikoaren erakundeek orokorrean eta ezaugarri nagusi bertsuekin kontratatzen dituzten hornidura, obra eta zerbitzuak.

Badira urte batzuk modu zentralizatuan kontratatzen dela goi- eta behe-tentsioko energia elektrikoaren hornidura eta gas naturalaren hornidura Administrazioko eta Zerbitzu Orokorretako Sailburuordetzaren eskumeneko kudeaketa bateratuko eraikinetan eta Euskal Autonomia Erkidegoko Administrazio Orokorreko gainerako sailei eta haren erakunde autonomo eta sozietate publikoei atxikitako eraikinetan. Hartara, zerbitzuak hobeto kudeatzeaz gainera, gastu publikoa arrazionalizatu egiten da.

Energia elektrikoaren eta gasaren kontratazio zentralizatua deklaratzeko dekretua onartu bitartean, kontratazio zentralizatua egiteko, Sektore Publikoaren Araubide Juridikoaren urriaren 1eko 40/2015 Legearen 9.1 artikuluan eskumenak delegatzeko ezarritakoa da formula egokia. Hona hemen zer xedatzen duen: «Administrazio publikoetako organoek beste organo batzuei delegatu diezazkiekete beren eskumenak, baldin eta organo horiek administrazio berekoak badira, nahiz eta hierarkikoki bata bestearen mendekoa ez izan».

Hori dela eta, Ogasun eta Ekonomia Sailaren egitura organikoa eta funtzionala ezartzeko ekainaren 13ko 168/2017 Dekretuak sail honetako zerbitzu zuzendariari ematen dizkion eskumenak baliatuz, honako hau

EBAZTEN DUT:

Lehenengoa.– Administrazioko eta Zerbitzu Orokorretako sailburuordeari delegatzea 2019rako, kontratazio zentralizatukotzat deklaratuko dituen dekretua onartu ondoren dagokion erosketa zentralizatuko kontratua egin arte, Euskadiko Zerga Koordinaziorako Organoaren eta Euskadiko Ekonomia Arduralaritzako Epaitegiaren administrazio-zentroak goi- eta behe-tentsioko energia elektrikoz eta gas naturalez hornitzeko kontratazioaren eskumena (bi organo horiek sail honi atxikita daude, eta Vitoria-Gasteizko Gaztelako Atea kaleko 15. zenbakian daude).

Bigarrena.– Sektore Publikoko Kontratuei buruzko azaroaren 8ko 9/2017 Legean aurreikusitako arlo hauetara zabalduko da eskumen-delegazioa, betiere kontratuari aplikatzekoak badira:

1.– Kontratua prestatzea (II. liburua, I. titulua, I. kapitulua, 1. atala).

2.– Kontratua esleitzea (II. liburua, I. titulua, I. kapitulua, 2. atala).

3.– Administrazioren prerrogatibak: aldatzea, azkentzea, lagapena eta azpikontratazioa (II. liburua, I. titulua, I. kapitulua, 3. atala).

4.– Kontratua formalizatzea (II. liburua, I. titulua, I. kapitulua).

5.– II. liburuko II. tituluko IV. kapituluko hornidura-kontraturako aurreikusitako arloak.

Hirugarrena.– Ez da delegatuko aurreko puntuan jaso ez diren arloen gaineko eskumena, kontratazio-organoari baitagozkio arlo horiek, eta, bereziki, egindako zerbitzuen betetzeari onespena emateko eta haien ordainketa agintzeko eskumena.

Laugarrena.– Euskal Herriko Agintaritzaren Aldizkarian argitaratuko da eskumenak delegatzeko ebazpen hau, eta argitara eman eta biharamunean jarriko da indarrean.

Vitoria-Gasteiz, 2018ko maiatzaren 7a,

Zerbitzu zuzendaria,

MARÍA LUZ RUIZ MELENDO.

Azterketa dokumentala