Euskal Herriko Agintaritzaren Aldizkaria

140. zk., 2016ko uztailaren 22a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INGURUMEN ETA LURRALDE POLITIKA SAILA

3292

AGINDUA, 2016ko uztailaren 13koa, Ingurumen eta Lurralde Politikako sailburuarena, zeinaren bidez hasiera ematen baitzaio Armañon Parke Naturaleko Natura-baliabideak Antolatzeko Plana landu eta prestatzeko prozedurari eta Parke Naturalaren mugak aldatzeko prozedurari.

Armañon balio natural handiko eta tradizio luzeko espazio bat da, zeinetan, egun, naturagune babestuko bi tipologia biltzen baitira: Parke Naturala da, eta Kontserbazio Bereziko Eremu ere bai. Apirilaren 15eko 1/2014 Legegintzako Dekretuaren bidez onartu zen Euskal Autonomia Erkidegoko Natura Kontserbatzeko Legearen Testu Bateginean (aurrerantzean, NKLTB) arautzen dira bi figura horiek.

Izan ere, Armañon Parke Natural izendatu zen irailaren 19ko 176/2006 Dekretuaren bidez eta irailaren 19ko 175/2006 Dekretuaren bidez onartu zen Natura Baliabideak Antolatzeko Plana (NBAP).

Bestalde, berriki, Kontserbazio Bereziko Eremu (KBE) izendatu da Armañon, otsailaren 16ko 25/2016 Dekretuaren bidez.

Egoera hori dela eta, aintzat hartu behar da NKLTBren 18. artikuluko aurreikuspena, zeinaren arabera, espazioak babesteko figura bat baino gehiago gainezarriko balira toki berean, horien arauak eta plangintza-mekanismoak agiri bakarrean koordinatu beharko baitira, espazioaren planifikazioa barne hartuz, kategoria bakoitzaren arabera aplikatu daitezkeen araubideek osotasun koherente bat osatzeko helburuarekin.

Hori dela eta, 25/2016 Dekretuaren azken xedapenetatik hirugarrenaren arabera, berau onartzean, «Parke Naturalaren NBAP naturagune babestuen bi tipologia horiek arautuko dituen dokumentu bakar bihurtzeko prozedura abiaraziko da».

Gainera, azken xedapenetatik hirugarren horrek agintzen duenaren arabera, prozedura horretan bertan, Parke Naturalaren mugek eta KBEren mugek bat etorri behar dute.

Beraz, hasiera ematen zaio Armañongo NBAP landu eta prestatzeko prozedurari. Horretarako, NKLTBren 7. artikuluan aurreikusitako prozedurari jarraituko zaio, eta, kasu horretan, ez da egoki irizten NKLTBren 9. artikuluan aurreikusitako prebentzio-araubidea aktibatzea. Izan ere, indarreko legezko araubide kontserbazionistaren NBAPren eta KBEko araubideen pean baitago jada eremua. Esparru juridiko honetan, ingurua behar bezala babestua dago, eta berez saihesten da NBAP berriaren helburuak lortzea eragotz dezaketen aldaketak burutzea errealitate fisikoan eta biologikoan.

Ingurumen eta Lurralde Politika Sailaren egitura organikoa eta funtzionala ezartzeko apirilaren 9ko 196/2013 Dekretuak ematen didan eskumenaz baliatuz, eta NKLTBren 4., 7. eta 18. artikuluen arabera, hau

XEDATZEN DUT:

1. artikulua.– NBAP hastea.

Erabakitzen da hasiera ematea Armañongo Parke Naturaleko Natura Baliabideak Antolatzeko Plana landu eta prestatzeko prozedurari, eremu horrentzat naturagune babestuko bi tipologiak –Parke Naturala eta KBE– arautzen dituen dokumentu bakarra izan dadin. Hala ohartarazten du apirilaren 15eko 1/2014 Legegintzako Dekretuaren bidez onartutako Euskal Autonomia Erkidegoko Natura Kontserbatzeko Legearen Testu Bateginaren 18. artikuluak.

2. artikulua.– KBEren Parke Naturalaren mugaketa berria.

Halaber, erabakitzen da hasiera ematea Parke Naturalaren mugak eta KBEren mugak bat etortzeko prozedurari.

AZKEN XEDAPENA

Agindu honek Euskal Herriko Agintaritzaren Aldizkarian argitaratu eta biharamunetik aurrera izango ditu ondorioak.

Vitoria-Gasteiz, 2016ko uztailaren 13a.

Ingurumen eta Lurralde Politikako sailburua,

ANA ISABEL OREGI BASTARRIKA.

Azterketa dokumentala