Euskal Herriko Agintaritzaren Aldizkaria

81. zk., 2015eko maiatzaren 5a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

INGURUMEN ETA LURRALDE POLITIKA SAILA

1941

34/2015 DEKRETUA, martxoaren 17koa, ingurune hidrikoari lotuta dauden kontserbazio bereziko eremuetarako (KBE) eta hegaztien babes bereziko eremuetarako (BBE) arau orokorrak onartzen dituena.

215/2012 Dekretuaren bidez, KBE izendatu ziren eskualde biogeografiko atlantikoko 14 ibai eta estuario, eta onartu egin ziren ibaietan eta estuarioetan KBE guztiei aplikatu beharreko jarraibide, arau eta jardute erkideak, aipatutako dekretu horren I. eranskin gisa argitaratuta. Horren ostean, 356/2013 Dekretuaren bidez, izendatu egin zen Txingudi-Bidasoako KBEa, eta onetsi egin ziren KBE horretarako eta Txingudiko BBErako kontserbazio-neurriak; horretaz gain, dekretu horrek argitara eman zituen, II. eranskin gisa, 215/2012 Dekretuaren bidez onetsitako jarraibide, arau eta jardute erkideak.

Eskualde biogeografiko mediterraneoko ingurune hidrikoari loturiko KBEak eta BBEak izendatzeko lanak egin bitartean, egiaztatu egin da eskualde biogeografiko atlantikoko ibai eta estuarioen KBEetarako onartutako kontserbazio-arauak (jarraibideak eta arauak), gehien bat, egokiak eta aplikagarriak zirela eskualde mediterraneoan; hala ere, ingurune hidrikoari loturiko KBE eta BBE guztiei aplikatzeak aldaketa batzuk egitea eskatzen zuen.

Hori dela eta, egokitzat jo da dekretu honetan onestea ingurune hidrikoari lotuta dauden KBE eta BBEetan oro har aplika daitezkeen jarraibideak eta arauak onartzea, bai eskualde biogeografiko atlantikorako bai eskualde biogeografiko mediterraneorako, hauetan izan ezik: Urdaibaiko Biosfera Erreserba eta Gaztelugatxe Doniene. Haietarako araubidea xedatuta dago ekainaren 4ko 358/2013 Dekretuan, zeinaren bidez kontserbazio bereziko eremu izendatzen baitira lau leku, Batasunaren garrantzizko 4 leku, hain zuzen, Urdaibai eta Gaztelugatxe Donieneko eremuan; eta zeinaren bidez onartzen baitira KBE horietarako eta Urdaibaiko itsasadarreko hegaztien babes bereziko eremurako kontserbazio-neurriak.

Horren ondorioz, hor xedatutako arau orokorrak aplika dakizkieke Natura Sarean ingurune hidrikoei lotutako gune guztiei; beraz, dekretu hori indarrean jartzen den unean onartutako guneek ez ezik, etorkizunean onartzen diren tokiek ere izango dute araubide hori, gaur egun izapidetze-bidean daudenek ere bai.

Arau orokorrak onartzeaz eta aplikazio-eremua eta edukia zehazteaz gain, xedapen honek aldi baterako araubide baten mende uzten ditu 215/2012 eta 356/2013 dekretuetan adierazitako jardute erkideak, foru-organoek haien ordezkoak onartu arte.

Horrenbestez, batetik, apirilaren 15eko 1/2014 Legegintzako Dekretuaren bidez onartutako Euskal Herriko Natura Babesteko Legearen testu bateginaren 22. artikuluan eta, bestetik, Natura Ondareari eta Biodibertsitateari buruzko abenduaren 13ko 42/2007 Legearen 44. eta 45.1 artikuluetan xedatutakoarekin bat, jendaurrean jarri ondoren, Ingurumen eta Lurralde Politikako sailburuak proposatuta, eta Gobernu Kontseiluak –2015eko martxoaren 17an egindako bilkuran– eztabaidatu eta onartu ondoren, honako hau

XEDATZEN DUT:

1. artikulua.– Xedea.

Onartu egiten dira, dekretu honen eranskin gisa, ingurune hidrikoari lotuta dauden kontserbazio bereziko eremuetarako (KBE) eta hegaztien babes bereziko eremuetarako (BBE) arau orokorrak.

2. artikulua.– Aplikazio-eremua.

1.– Dekretu hau aplikatu behar da ibaiei, estuarioei eta hezeguneei lotutako KBEetan eta BBEetan.

ES2130003 Barbadungo Itsasadarra.

ES2130004 Astondoko haremunak.

ES2130010 Lea ibaia.

ES2130011 Artibai ibaia.

ES2120004 Urolako itsasadarra.

ES2120009 Iñurritza.

ES2120010 Oriako itsasadarra.

ES2120005 Oria Garaia.

ES2120012 Araxes ibaia.

ES2120013 Leitzaran ibaia.

ES2120015 Urumea ibaia.

ES2110017 Barrundia ibaia.

ES2110023 Arakil ibaia.

ES2110020 Ega–Berron ibaia.

ES2120018 Txingudi-Bidasoa.

ES0000243 Txingudi BBE.

ES2110006 Baia ibaia.

ES2110010 Zadorra ibaia.

ES2110012 Ihuda ibaia (Ayuda).

ES2110005 Omecillo-Tumecillo ibaia.

ES2110008 Ebro ibaia.

2.– Dekretu hau aplikatu behar da ibaiei, estuarioei eta hezeguneei lotutako KBEetan eta BBEetan, gaur egun izapidetze-bidean hauek daude:

ES2110007 Arreo-Caicedo de Yusoko lakua.

ES2110011 Zadorraren sistemako urtegiak.

ES2110014 Salburua.

ES2110021 Guardiako aintzirak.

3.– Ez da aplikatuko ez Urdaibaiko KBEetan eta BBEetan ez Gaztelugatxe Gaztelugatxe Donieneko KBEan (ekainaren 358/2013 Dekretuak onartuta).

3. artikulua.– Arau orokorren edukia.

Ingurune hidrikoari lotuta dauden kontserbazio bereziko eremuetarako (KBE) eta hegaztien babes bereziko eremuetarako (BBE) arau orokorrak, eranskinean jasotakoak, bi motatakoak dira:

a) Jarraibideak (J): hainbat erabilerari eta jarduerari, girori edo elementu giltzarriri buruzko xedapenak dira eta herri-administrazioen jarduerak orientatzea dute helburu.

b) Arauak (A): kontserbazio-elementuetan eta -helburuetan eragina izan dezaketen erabileren eta jardueren garapenean nahitaez bete beharreko arauak xedatzeko helburua duten xedapenak dira.

XEDAPEN IRAGANKORRA

Foru-organoek Natura Babesteko Legearen testu bateginaren 22.5 artikuluan aipatutako kudeaketa-jarraibideak onartu arte, indarrean izango dira 215/2012 Dekretuan eta 356/2013 Dekretuan xedatutako jarduteak eta, zehatzago esanda, hauek:

a) 215/2012 Dekretuaren I. eranskinean azaldutako ibaien eta estuarioen KBE guztietan aplikatzeko jardute erkideei buruzko idatzi-zatia eta II. eranskinetik XV. eranskinera azaldutako helburuen eta jardueren tauletan adierazitako jarduteei buruzko idatzi-zatiak (215/2012 Dekretua, urriaren 16koa, eskualde biogeografiko atlantikoko hamalau ibai eta estuarioren kontserbazio bereziko eremuak izendatzeko eta kontserbazio-neurriak onartzeko dena).

b) 356/2013 Dekretuaren II. eranskinean azaldutako ibaien eta estuarioen KBE guztietan aplikatzeko jardute erkideei buruzko idatzi-zatia eta III. eranskinean azaldutako helburuen eta arauen tauletan adierazitako jarduteei buruzko idatzi-zatiak (356/2013 Dekretua, ekainaren 4koa, Txingudi-Bidasoa –ES2120018– kontserbazio bereziko eremu izendatzen duena, eta eremu horren eta Txingudi hegaztien babes bereziko eremuaren –ES0000243– kontserbazio-neurriak onartzen dituena).

XEDAPEN INDARGABETZAILEA

Dekretu hau indarrean jartzeaz batera, indargabetuta geratuko dira honako xedapen hauek:

1.– Eskualde biogeografiko atlantikoko hamalau ibai eta estuarioren kontserbazio bereziko eremuak izendatzeko eta kontserbazio-neurriak onartzeko den urriaren 16ko 215/2012 Dekretutik baliogabetzen dira hauek:

a) 3. artikuluko 1.a) idatzi-zatia, jardute erkideei buruzkoa izan ezik; izan ere, bera xedapen iragankorrean xedatutako terminoen arabera geratuko da indarrean.

b) 6. tituluari eta eranskinari eginiko aipamenak, 3. artikuluko 2.1 idatzi-zatian azaldutako moduan.

c) I. eranskina, ibaien eta estuarioen KBE guztietan aplikatzeko jardute erkideak izan ezik; izan ere, beraiek xedapen iragankorrean xedatutako terminoen arabera geratuko dira indarrean.

2.– Txingudi-Bidasoa –ES2120018– kontserbazio bereziko eremu izendatzen duen, eta eremu horren eta Txingudi hegaztien babes bereziko eremuaren –ES0000243– kontserbazio-neurriak onartzen dituen ekainaren 4ko 356/2013 Dekretutik baliogabetzen dira xedapen hauek:

a) 3. artikuluko 1.a) idatzi-zatia, jardute erkideei buruzkoa izan ezik; izan ere, bera xedapen iragankorrean xedatutako terminoen arabera geratuko da indarrean.

b) 6. tituluari eta eranskinari eginiko aipamenak, 3. artikuluko 2.1 idatzi-zatian azaldutako moduan.

c) II. eranskina, ibaien eta estuarioen KBE guztietan aplikatzeko jardute erkideak izan ezik; izan ere, beraiek xedapen iragankorrean xedatutako terminoen arabera geratuko dira indarrean.

AZKEN XEDAPENETATIK LEHENENGOA

Ingurumenaren alorreko sailburu eskudunari baimena ematen zaio Eusko Jaurlaritzaren izenean egin ditzan legeak xedatutako izapide eta komunikazio guztiak, bai Estatuaren Administrazio Orokorraren aurrean, bai Europar Batasunarenean, eta, hala badagokio, neurriak ezartzeak eragingo duen kostu ekonomikoaren zenbatespena ere, 92/43/EEE Zuzentarauaren 8. artikuluak xedatutakoa betetze aldera.

AZKEN XEDAPENETATIK BIGARRENA

Dekretu hau Euskal Herriko Agintaritzaren Aldizkarian argitaratu eta biharamunean jarriko da indarrean.

Vitoria-Gasteizen, 2015eko martxoaren 17an.

Lehendakaria,

IÑIGO URKULLU RENTERIA.

Ingurumen eta Lurralde Politikako sailburua,

ANA ISABEL OREGI BASTARRIKA.

(Ikus .PDF)

Azterketa dokumentala