RSS
209. zk., 2013ko azaroaren 4a, astelehena
- Bestelako formatuak:
- PDF (359 KB - 34 orri.)
- EPUB (253 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
INGURUMEN ETA LURRALDE ANTOLAMENDU SAILA
4743
EBAZPENA, 2008ko abenduaren 18koa, Ingurumeneko sailburuordearena, Fundiciones S.A. enpresari baimen bateratua emateko dena, Elorrioko udalerrian (Bizkaia)metal ferrosoen galdaketaren jarduera burutu ahal dezan.
AURREKARIAK
2006ko abenduaren 28an, José María Urtega jaunak, Fytasa Fundiciones, S.A. enpresaren izenean eta ordez, Eusko Jaurlaritzako Ingurumen eta Lurralde Antolamendu Sailari ingurumeneko baimen bateratua ematea eskatu zion, kutsaduraren prebentzio eta kontrol integratuari buruzko uztailaren 1eko 16/2002 Legeak xedatutakoaren arabera, Elorrioko (Bizkaia) udalerrian metal ferrosoen galdaketa egiteko jarduerarako. Ondorengo dokumentu teknikoak erantsi zitzaizkion eskaerari:
– Oinarrizko proiektua (2006ko abendua).
– Eranskinak (2006ko abendua).
– Laburpen ez-teknikoa (2006ko abendua).
Erreferentzia-baimena eskatzeko orduan, Fytasa Fundiciones, S.A. enpresak, besteak beste, honako baimenak zituen: burdinaren galdaketa egiteko baimena, 1999ko ekainaren 18koa. Halaber, hondakin arriskutsuen ekoizle izateko dagokion baimena du, 2005eko urtarrilaren 24koa eta 2006ko otsailaren 28an aldatua, industria-hondakin geldoen ekoizleen erregistroan izena emanda dago, 200ko otsailaren 22an, ibaiara isurtzeko baimena, 2004ko maiatzaren 27koa, eta atmosfera kutsatu dezakeen instalazioen ziurtapena, 2000ko urtarrilaren 21ekoa, ditu, eta guztia hondakin, isurketa eta atmosferara egiten diren isurketen inguruan indarrean dagoen araudiak xedatutakoari jarraituz.
2007ko otsailaren 23an, Ingurumenaren Kalitatearen Zuzendaritzak prozeduran parte hartzen duten hainbat organori txostenak eskatu zizkion, ingurumen organoak proiektua jendaurrean jartzeko agindu zezan. Zehazki, Elorrioko Udalari eta Eusko Jaurlaritzako Osasun Sailari egin zitzaien kontsulta.
2007ko apirilaren 4an eta urriaren 18an, ingurumen organoak agiri osagarriak eskatu zizkion sustatzaileari, eta 2007ko uztailaren 31n eta azaroaren 9an aurkeztu zituen.
Ingurumeneko sailburuordeak 2008ko urtarrilaren 24an emandako ebazpenaren bidez, jendaurrean jarri zen 30 egun balioduneko epean, Fytasa Fundiciones, S.A. enpresak sustatutako proiektua, egoki iritzitako alegazioak aurkezteko. Euskal Herriko Agintaritzaren Aldizkarian nahiz Bizkaiko Aldizkari Ofizialean argitaratu zen, bietan 2008ko otsailaren 11n. Era berean, Euskal Autonomia Erkidegoko bi egunkaritan argitaratu zen, eta ondoko auzokide bakoitzari jakinarazpena bidali zitzaion.
Jendaurrean jartzeko izapidetze-epea bete ondoren, bi alegazio-idazki aurkeztu zirela egiaztatu zen.
Uztailaren 1eko 16/2002 Legearen 17. eta 18. artikuluetan xedatutakoa betez, 2008ko apirilaren 3an Ingurumenaren Kalitatearen Zuzendaritzak txostenak eskatu zizkien Elorrioko Udalari, Eusko Jaurlaritzako Osasun Sailari eta Iparraldeko Ur-konfederazioari, espedientean ageri den emaitza jasoz.
Amaitzeko, eta eskaeraren izapideekin jarraituz, 2008ko uztailaren 3an agiri osagarriak eskatu zitzaizkion sustatzaileari; 2008ko uztailaren 18an igorri ziren agiri horiek.
2008ko urriaren 13an, Kutsaduraren Prebentzio eta Kontrol Integratuari buruzko uztailaren 1eko 16/2002 Legearen 20. artikuluan xedatutakoa betez, espediente osoa Fytasa Fundiciones, S.A. enpresaren esku utzi zen, Ingurumen eta Lurralde Antolamendu Sailak egindako ebazpenaren proposamena gehituz.
ZUZENBIDEKO OINARRIAK
Uztailaren 1eko 16/2002 Legearen 1. artikuluan xedatutakoaren arabera, lege horren xedea da atmosferaren, uraren eta lurzoruaren kutsadura saihestea edo, hori ezinezkoa denean, kutsadura hori gutxitu eta kontrolatzea; eta hori lortzeko, ingurumen osoaren babes-maila altua helburutzat harturik, kutsadura prebenitu eta kontrolatzeko sistema integratu bat ezartzea.
Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatu eta burutzeko Erregelamendua onartzen duen apirilaren 20ko 509/2007 Errege Dekretuaren 3. artikuluan xedatutakoarekin bat eginez, baimen honetan sartzen dira ekoizpen-elementu eta -lerro guztiak; 16/2002 Legearen 1. eranskinean aipatzen ez diren arren, lege hori aplikatu beharreko esparruko jardueren instalazioetan gauzatzen dira eta jarduera horrekin zerikusia dute.
16/2002 Legearen 9. artikuluak ezartzen duena betez, ingurumeneko baimen bateratua behar dute 1. eranskinean aipatzen diren jardueraren bat garatzen duten instalazioak eraiki, muntatu, ustiatu, lekuz aldatu nahiz funtsezko beste aldaketaren bat egiteko. 11. artikuluaren arabera, baimen honen oinarrizko helburua baldintzak ezartzea da, araua, berau aplika daitekeen instalazio guztietan betetzen dela bermatzeko; horretarako, baimena emateko parte hartuko duten Herri Administrazio desberdinen artean koordinatuta izango den prozedura bat erabili nahi da, izapideak erraztu eta partikularrek ordaindu beharreko kargak gutxitzearren. Era berean, indarrean dagoen araudiaren araberako ingurumeneko administrazio-baimen guztiak egintza administratibo bakar batean bildu nahi dira. Fytasa Fundiciones, S.A. enpresaren kasuan, baimen hauek guztiak behar ditu: hondakin arriskutsuen eta ez-arriskutsuen ekoizle izateko baimena eta ibilgura eta Elorrioko saneamendu-sistema orokorrera isurtzeko baimena; eta ingurumen izaerako beste zehaztapenen artean, atmosferaren kutsadurari dagozkion baimenak eta lurzoruaren kutsadurari aurrea hartu eta zuzentzeari dagozkionak.
16/2002 Legearen 29. artikuluan xedatutakoaren arabera, ingurumeneko baimen bateratua emateko prozedurak jarduera sailkatuetarako udal-lizentziaren prozedura ordezkatzen du, jarduera gogaikarri, osasungaitz, kaltegarri eta arriskutsuei buruzko azaroaren 30eko 2414/1961 Dekretuan aurreikusten zena; ez du ordezkatzen, ordea, udal-agintaritzak emango duen behin betiko ebazpena. Ondorio horietarako, ingurumeneko baimen bateratua udal-agintarientzat loteslea izango da, baldin eta lizentzia ukatzeko bada edota neurri zuzentzaileak ezartzeko bada; baita aipatu arauaren 22. artikuluan jasotako ingurumen-alderdiei buruzko aipamena egiten bada ere. 29. artikulu horretan aipatzen denez, goiko guztiak ez ditu kaltetuko autonomia-erkidego bakoitzean jarduera sailkatuei aplikatzekoak diren gainerako arauak. Transkribatutako aginduak aplikatuz, Fytasa Fundiciones, S.A. enpresari dagokion ingurumeneko baimen bateratuaren prozedurak barne hartu ditu Euskal Autonomia Erkidegoko Ingurumena Babesteko otsailaren 27ko 3/1998 Lege Orokorrean aurreikusitako izapideak, eta Elorrioko Udalaren eta Eusko Jaurlaritzako Osasun Sailaren txostenak eskatu dira, espedientean agertzen den bezala.
Azkenik, instalazioak gehienez isur ditzakeen gai kutsagarrien balioak eta ingurumena, oro har, ahalik eta gehien babesteko ustiapenerako ezarriko zaizkion beste baldintza batzuk zehazte aldera, Ebazpen hau egiterakoan kontuan izan dira teknika onenen erabilera eta aplika dakiokeen alorreko legerian ezarritako neurriak eta baldintzak. Zehazki, Europako Batzordearen agiri hauen edukiak hartu dituzte kontuan: 2006ko uztaileko Reference Document on Best Available Techniques in the Smitheries and Foundries Industry BREF agiria, 2001eko abenduko Reference Document on the application of Best Available Techniques to Industrial Cooling Systems agiria eta 2005ko uztaileko Reference Document on Best Available Techniques for Emissions from Storage.
Espedienteko txostenak aztertu ondoren, ebazpen proposamena sinatu eta Fytasa Fundiciones, S.A. enpresak sustatutako proiektuak bete beharreko baldintzak ezarri ziren.
Goian adierazitako izapideak amaitu dira, eta Kutsaduraren Prebentzio eta Kontrol Integratuari buruzko uztailaren 1eko 16/2002 Legearen 20. artikuluan jasotzen den entzunaldi-izapidea bete da.
Organo hau da ingurumeneko baimen bateratu hau emateko eskuduna, aipatutako legearen 13. artikuluan eta Ingurumen eta Lurralde Antolamendu Sailaren egitura organikoa ezartzen duen urriaren 25eko 340/2005 Dekretuaren 9. artikuluan ezarritakoari jarraituz.
Ondorengo araudia ikusi da: Ingurumen eta Lurralde Antolamendu Sailak 2008ko martxoaren 5ean emandako ebazpen proposamena; otsailaren 27ko 5/1998 Lege Orokorra, Euskal Herriko Ingurumena Babesteari buruzkoa; 16/2002 Legea, uztailaren 1ekoa, Kutsaduraren Prebentzio eta Kontrol Integratuari buruzkoa; Ingurumenaren gaineko Eraginaren Ebaluazioari buruzko ekainaren 28ko 1302/1986 Legegintzako Errege Dekretua, maiatzaren 8ko 6/2001 Legeak aldatu zuena; irailaren 30eko 1131/1988 Errege Dekretua, Legea burutzeko araudia onartzen duena; urriaren 25eko 340/2005 Dekretua, Ingurumen eta Lurralde Antolamendu Sailaren egitura organikoa ezartzen duena; 30/1992 Legea, Herri Administrazioen Araubide Juridikoa eta Administrazio Prozedura Erkideari buruzkoa, eta aplikatzeko den gainerako araudia,
EBATZI DUT:
Lehenengoa.– Helbide soziala Elorrioko (Bizkaiko lurralde historikoa) udalerriko Julian Arińo kalean duen eta IFK: A48851356 zenbakia duen Fytasa Fundiciones, S.A.enpresari Ingurumeneko Baimen Bateratua ematea, metal ferrosoak galdatzeko jarduerarako Elorrioko udalerrian, eta Ebazpen honen bigarren atalean zehaztutako baldintzak jarraituz.
Jarduera uztailaren 1eko 16/2002 Legearen, Kutsaduraren Prebentzio eta Kontrol Integratuari buruzkoaren 1. eranskinean jasota dago. Hain zuzen ere, 2.4. kategorian, «Metal ferrosoen galdaketa, eguneko 20 tonatik gora ekoizteko gaitasuna duten instalazioak».
Enpresan burdinurtu nodularreko piezak fabrikatzen dira. Automobilgintzaren sektorean erabiltzeko piezak dira, pieza kritikoak eta segurtasun-piezak nagusiki. 2005. urtean 24.000 tonako ekoizpena egin zen.
Honako ekoizpen-prozesu hauek garatzen dira enpresan: galdatzea eta isurtzea, moldekatzea eta argintza, desmoldekatzea eta hondarra berreskuratzea eta akaberak; bai eta paketatzea eta hainbat zerbitzu orokor ere.
Galdatze-prozesua bi indukzio-labe elektrikotan eta gas natural bidezko oxi-errekuntzako labe batean egiten da. Burdina urtu ondoren, burdina grisa nodular bihurtzen da. Horretarako, magnesio ferrosilizioa gehitzen zaio eta, ondorioz, erreakzio bortitz bat gertatzen da. Burdinurtu nodularra lortu ondoren, galda molde fabrikatuetara erortzen da grabitate bitartez.
Burdina galdatzean eta nodulizatzean sortzen diren isurketak hartu eta arazi egiten dira bi zikloietan eta mahuka-iragazkietan.
Piezak moldekatzeko, goitik beherako moldekatze automatikoko bi lerro daude. Bakoitzak presioko isurtze-labe bat du.
Hondarrezko moldeak egiteko, hondar berria, hondar berreskuratua, Greenbond (bentonita eta harrikatzaren nahasketa), ura eta xurgatze-sistemetako hondar-xehekiak nahastu behar dira. Nahasketa hori errotara (nahasgailura) eraman behar da, bertatik moldekatzeko makinetara banatzeko.
Arrak egiteko bi teknika desberdin baliatzen dira: kaxa beroa batetik –hondar aurrestalia gehitzen da (erretxina eta katalizatzailearekin nahastutako hondarra) eta beroa ematen zaio arra egiteko–; eta kutxa hotza bestetik -hondar berria, erretxinak eta katalizatzailea (amina) ditu oinarrian–.
Hondarra eta erretxina dosifikatua errotan nahasten dira. Ondoren, orga batean jartzen da eta horizontalean egiten den mugimendu bati esker, argintza-makina desberdinak hornitzen dira, bertan instalatutako maskorra baliatuz. Lan hori egin eta gero, katalizatzailea injektatzen da –gas-egoeran dagoen amina–, eta katalizatzaileari esker lortzen da nahastea soldatzea eta gogortzea.
Argintza-gela bakoitzean xurgapena egiten da: amina-lurrunak antzeman eta kanpora isurtzen ditu tximiniatik.
Hondarrezko moldea, iragazpena egin eta hozten utzi ondoren, desmoldekatu egin behar da. Une horretan bereizten da pieza hondarrezko moldetik.
Desmoldekatzeko prozesuan egiten diren isurketak mahuka-iragazkien bitartez arazten dira, lehorrean.
Desmoldekatzea egin ondoren erabilitako hondarra, arren hondarrekin nahastuta, bereizgailu magnetikoetara eta bahera eramaten da, eta hondakin metalikoak bereizten dira bertan. Hondarra hozten uzten da ondoren, eta hautsa kentzen zaio ohantze fluidizatuko hozkailu batean. Horrela berreskuratzen den hondarra siloetan biltegiratu eta nahasteko errotara eramateko prest uzten da.
Akaberen sekzioan honako ekipo hauek daude: 2 prentsa, granailatzeko makina bat eta Haldex zelula bat (piezei ukituak emateko eta akaberak egiteko hainbat ekipo).
Piezak granailatzeko makinara sartzen dira, azalean geratu zaizkien hondar-aztarnak desagerrarazteko. Soberakinak ebakitzeko 2 prentsa erabiltzen dira, eta prentsak eta lixagailuak erabiltzen dira akaberak egiteko.
Granailatzeko makinak eta Haldex zelulak xurgapen-sistema bat dute (arazketa barne hartzen du).
Instalazioan honako energiak erabiltzen dira: energia elektrikoa indukzio-laberako eta instalazioen funtzionamendu orokorrerako, labe birakarian kontsumitutako gas naturala eta berokuntza eta ur berorako gas naturala; eta gasolioa orgatilen funtzionamendurako.
Gaur egun isurtze-foku mugatuak daude labeen xurgapenetan,harea-lanetan, danborretan, granailatzeko makinan, soberakinak ebakitzean eta argintzan. Halaber, beste bi foku daude, mugatu gabe: burdinezko piezak hozteko prozesuan bat eta piezak granailatzeko eta akabera egiteko prozesuan bestea. Argintzako xurgapen-fokuak izan ezik, gainerakoetan arazketa-sistemak daude.
Instalazioan sortzen diren hondakin-uren artean, euri-urak daude. Bi dekantazio-putzuetatik pasa ondoren, Zumelegi ibaira isurtzen dira bi isurketa-puntutatik.
Bestalde, ur sanitarioak, teilatuko zorrotenetako euri-urak eta konpresoreak purgatzetik sortutako industria-urak daude. Guztiak udal kolektorera isurtzen dira.
Proiektuak 2005eko maiatzeko prozesuari buruzko Reference Document on Best Available Techniques in the Smitheries and Foundries Industry BREF agirian jasotako teknika erabilgarri onenak (TEO) izan daitezkeen ondorengo neurriak hartzen ditu barne: txatarra estalkipean biltegiratzea, txatarra garbiak kargatzea, hiru indukzio-labeen eta labe birakariaren baterako xurgaketa eta arazketa, mahuka-uhalaren bidez antzematea eta araztea nodulizazio-prozesuan, mahuka-uhalen bidez xurgatzea eta araztea desmoldekatzean eta hondar-lanetan, hondarren leheneratze primarioa, granailatzea eta soberakinak xurgatzea eta araztea, zarata murrizteko neurriak, isurtze barreiatuak murrizteko neurriak, isurtzeak kontrolatzeko neurriak, ingurumena kudeatzeko sistema baten ezarpena.
Bigarrena.– Fytasa Fundiciones, S.A. enpresak Elorrioko udalerrian sustatutako burdinurtzeko jarduera ustiatzeko ondorengo baldintzak eta eskakizunak ezartzea.
A) Administrazioarekiko harremanez arduratuko den pertsonaren gainean Ingurumen Sailburuordetzari eman dizkion datuetan aldaketarik balego, Fytasa Fundiciones, S.A. enpresak aldaketa horien berri emango du.
B) Neurri babesle eta zuzentzaileak, sustatzaileak Ingurumen Sailburuordetza honetan aurkeztu dituen agirietan aurreikusita bezala burutuko dira, indarrean dagoen araudiaren arabera eta ondorengo ataletan ezarritakoari jarraituz:
B.1.– Instalazioaren jardunerako baldintza orokorrak.
B.1.1.– Airearen kalitatea babesteko baldintzak.
B.1.1.1.– Baldintza orokorrak.
Fytasa Fundiciones, S.A. instalazioa ustiatzean atmosferara egingo diren isurtzeek ez dituzte Ebazpen honetan ezarritako balioak gaindituko.
Prozesuan zehar atmosferara isurtzen den gai kutsatzaile oro bildu eta ihesbide egokienean zehar kanpora bideratuko da, behar denean, gai kutsatzaileen ezaugarrien arabera diseinatutako gasak arazteko sistema batetik igaro ondoren.
Arau orokor hori bete beharrik ez dute izango gai kutsatzaileak mugarik gabe isuri eta horiek biltzea teknikoki edo ekonomikoki bideragarria ez denean, edota ingurunean kalte urria eragiten dutela egiaztatzen denean.
Neurriak hartuko dira ustekabean gai kutsatzailerik ez botatzeko, eta botatzen direnak giza osasunerako nahiz gizartearen segurtasunerako arriskutsuak izan ez daitezen. Gas-efluenteak tratatzeko instalazioak behar bezala ustiatu eta mantenduko dira, efluenteen tenperatura- eta konposizio-aldakuntzei modu eraginkorrean aurre egiteko. Era berean, ahalik eta gehien murriztuko dira instalazio horiek gaizki dabiltzan edo geldirik dauden aldiak.
B.1.1.2.– Fokuak identifikatzea. Katalogazioa.
Metal ferrosoak galdatzeko instalazioak ondorengo fokuak ditu, atmosfera babestearen arloan indarrean dagoen araudiaren arabera katalogatuta:
(Ikus .PDF)
Halaber, isurketa barreiatuak egiten dira:
– Bi granailatzeko prozesuetan (moldekatzeko eta desmoldekatzeko prozesuko granailatzeko makinan eta piezen akabera egitean), partikulen isurketa etenkakoak egiten dira.
– Desmoldekatzeko prozesua orokorrean. Zentzu horretan, nabera sartzeko/irteteko ateak itxita egongo dira beti, poiluitzaileak kontrolik gabe kanporatzea ekiditeko eta nabe barruko zarata arintzeko.
– Burdinezko piezak hoztean partikulak isurtzen dira, baina etenkako isurketak izaten dira.
– Labeen zama-lanetan, nodulizazioan, ontziz aldatzean eta zepak kentzean. Zentzu horretan, aipatutako prozesuetan sortzen diren isurketak antzemateko eta husteko proposamen bat aurkeztu behar du titularrak.
B.1.1.3.– Isurketarako muga-balioak.
a) Atmosferara isurtzen diren gai poluitzaileek ondorengo balioak ez gainditzeko moduan ustiatuko da instalazioa:
(Ikus .PDF)
Balio horiek baldintza hauek dituzte: 273 şK-eko tenperatura, 101,3 kPa-ko presioa eta gas lehorra.
b) Neurtutako parametroek ez dituzte isurtzeko muga-balioak gaindituko, arauz egingo diren aldizkako ikuskaritzetan (ordubeteko hiru neurketa, gutxienez) zortzi ordutan zehar neurtuta. Neurketa-tolerantzia gisa, kasu guztien % 25ean gainditu ahal izango da muga-balioa, % 40 gainditzen ez duen zenbatekoa baldin bada. Tolerantzia hori gaindituz gero, neurketa-aldia astebetez luzatuko da, eta aldi honetako tolerantzia global gisa, kasuen % 6an gehienez onar daitezkeen mailak gainditzea onartuko da, % 25 gainditzen ez duen zenbatekoa denean. Tolerantzia horiek izanda ere, gai kutsatzaileak isurtzen dituen fokuaren eraginpeko zonaldean ezin izango dira inoiz higienikoki onar daitezkeen balioak gainditu.
Ezarritako IMBak lortzen ez badira, beharrezko neurri zuzentzaileak hartuko dira (arazteko sistemak instalatzea, eta abar.) atmosferara egiten diren isurtzen balio horiek betetzea ziurtatzeko.
B.1.1.4.– Gasak bildu eta husteko sistemak.
Fokuetako gas-hondarrak kanporatzeko tximiniek ez dute B.1.1.2 atalean jasota dagoen goreneko kota baino baxuagoa izango. Tximinietan behar beste neurri hartuko dira, Industria Ministerioak industriak atmosferan eragiten duen kutsadurari aurrea hartu eta hori zuzentzeari buruz 1976ko urriaren 18an emandako Agindua bete dezaten; besteak beste, laginak hartzeko puntuetara iristeko sarbide seguru eta errazak izango dituzte.
Zehazki, laginak hartzeko aurreikusitako zuloen kokapenari eta ezaugarriei dagokienez, gas-fluxuak laginketa-puntutik neurketa-puntura bitartean, bere norabidean zehar nahiz aurkakoan, edozein perturbazio izan dezakeen gunera bitarteko distantziek (L1 eta L2 parametroak) 1976ko urriaren 18ko Aginduaren III. eranskinean xedatutakoa beteko dute. L1 = 8D eta L2 = 2D distantziak betetzen ez diren fokuetarako inoiz ez dira L1 < 2D eta L2 < 0,5D balioak onartuko. Kasu horietan, neurketen txostenean laginketa-planoaren baliozkotasuna justifikatzea eskatuko da.
Isurtze barreiatuak murrizteko, isurtzeak biltzeko, husteko eta arazteko sistema guztien mantentze-lan zuzenak egingo dira, eta gainera, beste jarduera hauek: instalazioak egunero eta astero garbitzea, nabera sartzeko/irteteko ateak ixtea, eta fatxadan/gailurrean eta abar dauden zuloak ixtea, isurketak minimizatzeko. Aipatutako informazio guztia agiri honen D.3 ataleko prebentziozko mantentze-lanen eskuliburuan jaso eta erregistratuko da.
B.1.2.– Isurketarako baldintzak.
B.1.2.1.– Isurketen sailkapena, jatorria, ingurune hartzailea eta kokapena.
Isurketa sortzen duen jarduera mota nagusia: burdinurtzea.
Jarduera-taldea: 2.
Mota-taldea-EJSN: 1-02-27.51.
(Ikus .PDF)
B.1.2.2.– Gehienez isur daitezkeen emari eta bolumenak.
a) Instalazioko euri-urak bi isurketa-puntutatik:
(Ikus .PDF)
B.1.2.3.– Isurtzeko muga-balioak.
Ibilgurako isurien ohiko kutsadura-parametroak ondoren zerrendatutakoak izango dira bakarrik, bakoitzerako zehazten diren gehienezko balioekin:
(Ikus .PDF)
Ezingo dira diluzio-teknikak erabili isurtzeko muga-balioak lortzeko.
Gainera, ingurune hartzaileari dagozkion arauak eta kalitate-helburuak bete behar dira. Aitzitik, titularrak kasuan kasu tratamendu egokia egin beharko du, isurketaren ondorioz aipatutako kalitate-helburuak urratzen ez direla ziurtatzeko.
Baimen horrek ez du baldintza honetan berariaz adierazitakoak ez diren beste substantzien isurketa onartzen, batez ere maiatzaren 23ko 606/2003 Errege Dekretuaren Hirugarren xedapen gehigarrian aipatzen diren substantzia arriskutsuak. Errege Dekretu horren bidez, Urei buruzko abuztuaren 2ko 29/1985 Legearen atariko titulua eta I, IV, V, VI eta VIII. tituluak garatzen dituen jabari publiko eta hidraulikoari buruzko araudia onartzen duen apirilaren 11ko 849/1986 Errege Dekretua aldatzen da.
Ezkutuko purgaketa izango liratekeen terrazen, gordailuen eta abarren gainezkabideen isurketak ez dira baimenduko. Gertatuz gero, jakinarazi beharko dira eta dagokien isurketarako baimena eskatu beharko da.
B.1.2.4.– Araztu eta husteko instalazioak.
Arazketa-instalazioek edo hondakin-urak zuzentzeko neurriek honako jarduera hauek barne hartzen dituzte funtsean:
– koipe-bereizgailuak eta dekantazio-andelak dituzten bi sistema 0,63 m3/h-ko edukierakoa bakoitza.
Hartutako neurri zuzentzaileak nahikoak ez direla ikusiz gero, Fytasa Fundiciones, S.A. enpresak behar beste aldaketa egingo ditu arazteko instalazioetan, isurketak baimenean ezarritako baldintzak bete ditzan. Aldaketak Administrazioari jakinaraziko dizkio lehenik, eta behar izanez gero, baimena aldatzeko ere eskatuko du.
Aurkeztutako agirien arabera, isurketak kontrolatzeko kutxeta bat jarriko da baimendutako hondakin-ur mota bakoitzerako; kutxeta horiek isurketen lagin esanguratsuak lortzeko beharrezkoak diren ezaugarri guztiak izango dituzte. Kutxetak ikuskatu ahal izateko sarbide zuzena ahalbidetzen duten lekuan kokatuko dira, hala badagokio.
B.1.2.5.– Isurien kontrol-kanona.
Uraren Legearen Testu Bateginaren 113. artikulua eta Jabari Publikoko Urguneen Erregelamenduaren (606/2003 Errege Dekretua) 291. artikulua aplikatuz, honakoa da isurien kontrol-kanona:
(IKK) = V x Pu.
Pu = Po x Km.
Km = K2 x K3 x K4.
Honela ulertuta:
V = Isurketa baimenduaren bolumena (m3/urte).
Po = Oinarrizko prezioa m3-ko isurketaren izaeraren arabera.
K2 = Isurketaren ezaugarrien araberako koefizientea.
K3 = Isurketaren kutsadura-mailaren araberako koefizientea.
K4 = I ngurune hartzailearen ingurumen-kalitatearen araberako koefizientea.
Km = Isurketaren maiorazioko edo minorazioko koefizientea.
Pu = Isurketaren kontroleko prezio unitarioa.
Instalazioko euri-urak bi isurketa-puntutatik:
(Ikus .PDF)
Km = 1,0 x 0,5 x 1,25 = 0,62500.
Pu = 0,03005 x 0,62500 = 0,01878 euro/m3.
Isurien kontrol-kanona = 11.173 x 0,01878 = 209,83 euro/urte.
Zenbateko hori ez da aldatuko isurtzeko baimena edo isurien kontrol-kanonaren kalkulua osatzen duten faktoreetako bat aldatzen ez den artean.
Urte natural bakoitza amaitu ondoren, administrazio eskudunak baimenaren titularrari urte horri dagokion isurien kontrol-kanonaren likidazioa jakinaraziko dio.
Isurketen kontrol-kanona ez da lotuta egongo saneamendu- eta arazte-lanak finantzatzeko autonomia-erkidegoek edo udalek ezar ditzaketen kanonekin edo zergekin (ULTBren 113.7. artikulua).
B.1.3.– Instalazioan sortutako hondakinak egoki kudeatzen direla bermatzeko baldintzak.
Instalazioetan sortzen diren hondakin guztiak hondakinei buruzko apirilaren 21eko 10/1998 Legean eta aplikatzekoa den berariazko gainerako araudian xedatutakoari jarraituz kudeatuko dira; hondakinak karakterizatu egin beharko dira euren izaera zehaztu eta helburu egokiena erabakitzeko.
Espresuki debekatuta dago sortzen diren tipologia desberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira eta horiek bildu eta biltegiratzeko bide egokiak jarriko dira, nahasketa saihesteko.
Hondakinen kudeaketari buruzko printzipio hierarkikoei jarraituz, hondakin oro baliotu egin behar da eta horretarako balioztagune baimendu batera eraman behar dira. Hondakinak ezabatu ahal izango dira, baldin eta horiek baliotzea teknika, ekonomia edota ingurumen aldetik bideragarria ez dela behar bezala egiaztatzen bada. Birsortzea eta berrerabiltzea lehenetsiko dira baliotzeko beste modu material edo energetikoren aurretik.
Era berean, hondakinak tratatzeko Euskal Autonomia Erkidegoan instalazio baimenduak badaude, instalazio horietara bidaliko dira lehentasunez, autosufizientzia- eta gertutasun-printzipioei jarraituz.
Baimendutako zabortegian ezabatzea aurreikusita dagoen hondakinen karakterizazioa, 2002ko abenduaren 19ko Kontseiluaren 2003/33/EE Erabakiarekin bat etorriz gauzatuko da. Erabaki horren bidez, hondakinak zabortegian hartzeko irizpideak eta prozedurak ezartzen dira. Bestela, erabaki hori garatzeko Euskal Autonomia Erkidegoan onartutako jarraibideekin bat etorriz gauzatuko da.
Hondakinak biltzeko eremuek lurzoru estankoa izan beharko dute. Egoera fisiko likidoan edo oretsuan dauden edo oso bustita daudelako isurketak edo lixibiatuak sor ditzaketen hondakinen kasuan, horiek biltzeko kubeta edo sistema egokiak jarriko dira, ezbeharrez gerta daitezkeen isurketak kanpora irten ez daitezen. Hondakina hautsa bada, euri-urarekin kontakturik izan dezan edo haizeak arrasta dezan saihestuko da; behar izanez gero, estali egingo da.
Hondakinak desagertu, galdu edo ihes eginez gero, berehala jakinaraziko da gertatutakoa Ingurumen Sailburuordetzan eta Elorrioko Udalean.
B.1.3.1.– Hondakin arriskutsuak.
Sustatzaileak adierazitako hondakin arriskutsuak honako hauek dira:
● 1. Prozesua: «galdaketa».
Prozesu honetan sortzen diren hondakin arriskutsuak beste prozesu batzuetan sortutako izen bereko beste batzuekin batera kudeatzen dira, eta zerbitzu orokorren prozesuan daude kodetuta guztiak.
● 2. Prozesua: «moldekatzea».
Prozesu honetan sortzen diren hondakin arriskutsuak beste prozesu batzuetan sortutako izen bereko beste batzuekin batera kudeatzen dira, eta zerbitzu orokorren prozesuan daude kodetuta guztiak.
● 3. Prozesua: «argintza».
Prozesu honetan sortzen diren hondakin arriskutsuak beste prozesu batzuetan sortutako izen bereko beste batzuekin batera kudeatzen dira, eta zerbitzu orokorren prozesuan daude kodetuta guztiak.
● 4. Prozesua: «akabera».
Prozesu honetan sortzen diren hondakin arriskutsuak beste prozesu batzuetan sortutako izen bereko beste batzuekin batera kudeatzen dira, eta zerbitzu orokorren prozesuan daude kodetuta guztiak.
● 5. Prozesua: «gas efluenteak araztea».
– 1. hondakina: «galdaketa hautsak».
Identifikazioa: A48851356/4800000441/5/1.
Hondakinaren kodea: Q9//R4//S25//C7/11//H14//A231//B0011.
EHZ: 100909.
Urtean sortutako kantitatea: 120 tona.
Galdatze-gasak iragaztearen ondorioz sortzen da; euren konposizioan honako metalak dituzten hautsak dira: zinka eta kadmioa.
Hondakinarentzat identifikatutako edukiontzi hermetikoan gordetzen da hondakina, kudeatzaile baimenduari emateko.
– 2. hondakina: «mahuka iragazkiak».
Identifikazioa: A48851356/4800000441/5/2.
Hondakinaren kodea: Q9//R13//S35//C7/11//H14//A231//B0011.
EHZ: 150202.
Galdatze-gasak iragazteko sistemako mahukak aldatzean sortzen da; zinka eta kadmioa dituzten mahukak dira.
Hondakinarentzat identifikatutako poltsan gorde eta hondakinen biltegira eramaten da, kudeatzaile baimenduari emateko ondoren.
● 6. Prozesua: «zerbitzu orokorrak».
– 1. hondakina: «erabilitako olioa».
Identifikazioa: A48851356/4800000441/6/1.
Hondakinaren kodea: Q7//R13//L8//C51//H5/6//A231//B0019.
EHZ: 130110.
Urtean sortutako kantitatea: 5 Tona.
Makina edo instalazioetako olioa aldatzeko eragiketetan sortzen da, Mantentze orokorraren azpiprozesuan; olio hidrauliko erabiliak dira.
Hondakinarentzat berariaz identifikatutako edukiontzian biltzen da hondakinen biltegian, kudeatzaile baimenduari emateko ondoren.
– 2. hondakina: «olioa urarekin».
Identifikazioa: A48851356/4800000441/6/2.
Hondakinaren kodea: Q7//D13//L9//C51//H5//A231//B0019.
EHZ: 130802.
Urtean sortutako kantitatea: 1,5 Tona.
Galdatze-prozesuan eta isurtzea egitean mantentze-eragiketak egiteko labe elektrikoak urarekin hoztean sortzen da; putzuetan jasotako ur olioduna da.
Hondakinarentzat berariaz identifikatutako edukiontzian biltzen da hondakinen biltegian, kudeatzaile baimenduari emateko ondoren.
– 3. hondakina: «pila agortuak».
Identifikazioa: A48851356/4800000441/6/3.
Hondakinaren kodea: Q6//R13//S37//C11/16//H6/14//A231//B0019.
EHZ: 200133.
Urtean sortutako kantitatea: 0,03 tona.
Mugikor, ordenagailu, automata, eta abarretako pila agortuak birjartzeko eragiketetan sortzen da. Lan-metodologiari jarraituz, multzokatuta jasotzen dira; merkurioa, kadmioa eta beste hainbat oxido metaliko dituzten pilak dira.
Hondakinarentzat identifikatutako edukontzian jasotzen dira eta dagokien eremuan utzi, kudeatzaile baimenduari emateko ondoren.
– 4. hondakina: «fluoreszenteak».
Identifikazioa: A48851356/4800000441/6/4.
Hondakinaren kodea: Q6//R13//S40//C16//H14//A231//B0019.
EHZ: 200121.
Urtean sortutako kantitatea: 0,005 tona.
Lanparak birjartzeko eragiketetan sortzen da mantentze-lan orokorren azpiprozesuan; merkurioa duten lanpara erabiliak dira.
Hondakinarentzat berariaz identifikatutako edukiontzian biltzen da hondakin arriskutsuen biltegian, kudeatzaile baimenduari emateko ondoren.
– 5. hondakina: «ekipo elektrikoak eta/edo elektronikoak».
Identifikazioa: A48851356/4800000441/6/5.
Hondakinaren kodea: Q14//R4//S40//C6/11/18//H6/14//A231//B0019.
EHZ: 160213.
Urtean sortutako kantitatea: hondakin puntuala.
Ekipo elektrikoak eta elektronikoak birjartzeko eragiketetan sortzen da; baztertutako ekipo ofimatikoak dira.
Hondakinarentzat berariaz identifikatutako edukiontzian biltzen da hondakinen biltegian, kudeatzaile baimenduari emateko ondoren.
– 6. hondakina: «disolbatzaile organiko ez halogenatua».
Identifikazioa: A48851356/4800000441/6/6.
Hondakinaren kodea: Q7//R13//L5//C41//H3b/5//A231//B0019.
EHZ: 140603.
Urtean sortutako kantitatea: 0,2 tona.
Garbiketaren azpiprozesuko garbiketa-disolbatzailea birjartzean sortzen da; disolbatzaile organiko ez-halogenatua du.
Instalazioan bertan jasotzen da zuzenean, kudeatzaile baimenduari emateko.
– 7. hondakina: «material kutsatuak».
Identifikazioa: A48851356/4800000441/6/7.
Hondakinaren kodea: Q5//D13//S40//C41/51//H5//A231//B0019.
EHZ: 150202
Urtean sortutako kantitatea: 0,2 tona.
Xurgatzaileak eta ehunak jaso eta multzokatzeko azpiprozesuan kodetzen dira; olio, pintura eta disolbatzailez inpregnatutako zatar, iragazki eta material xurgatzaileak dira.
Hondakinarentzat identifikatutako bidoian jasotzen da sortzen den tokian bertan. Behin bete ondoren, hondakinen biltegira eramaten da, kudeatzaile baimenduari emateko.
– 8. hondakina: «aerosol hutsak».
Identifikazioa: A48851356/4800000441/6/8.
Hondakinaren kodea: Q14//R13//S36//C51//H3b//A231//B0019.
EHZ: 160504.
Urtean sortutako kantitatea: 0,05 tona.
Xurgatzaileak eta ehunak jaso eta multzokatzeko azpiprozesuan kodetzen dira; substantzia arriskutsuen hondarrak dituzten edo substantzia arriskutsuek kutsatuta dauden aerosolak dira.
Oro har, olio lubrifikatzaileak eduki dituzte.
Hondakinarentzat identifikatutako bidoian jasotzen da sortzen den postuan edo postuetan. Behin bete ondoren, hondakinen biltegira eramaten da, kudeatzaile baimenduari emateko.
– 9. hondakina: «olio iragazkiak».
Identifikazioa: A48851356/4800000441/6/9.
Hondakinaren kodea: Q6//R13//S35//C51//H14//A231//B0019.
EHZ: 160107.
Urtean sortutako kantitatea: 0,1 tona.
Enpresaren jabetzako ekipoetan olio-iragazkiak birjartzeko eragiketetan sortzen da.
Hondakinarentzat berariaz identifikatutako edukiontzian biltzen da hondakinen biltegian, kudeatzaile baimenduari bidaltzeko ondoren.
– 10. hondakina: «dekantazio lohiak».
Identifikazioa: A48851356/4800000441/6/10.
Hondakinaren kodea: Q5//D15//P8/9//C51//H5//A231//B0019.
EHZ: 120114.
Urtean sortutako kantitatea: 7,5 tona.
Fabrikako jariatze-uren dekantagailua garbitzeko eragiketetan sortzen da, zerbitzu orokorren prozesuan; olioak ditu.
Sortzen den lekuan bertan jasotzen da zuzenean, kudeatzaile baimenduari emateko.
– 11. hondakina: «sepiolita».
Identifikazioa: A48851356/4800000441/6/11.
Hondakinaren kodea: Q4//D15//S40//C51//H5//A231//B0019.
EHZ: 150202.
Urtean sortutako kantitatea: hondakin puntuala.
Xurgatzaileak eta ehunak jaso eta multzokatzeko azpiprozesuan kodetzen dira; jarioak gertatzean hidrokarburoz inpregnatutako sepiolita da.
Hondakinarentzat identifikatutako bidoian jasotzen da sortzen den postuan edo postuetan. Behin bete ondoren, hondakinen biltegira eramaten da, kudeatzaile baimenduari emateko.
a) Hondakin arriskutsuak biltzeko sistemak bereiziak izango dira, duten tipologia dela-eta, isuriren bat gertatuz gero, nahasi, arriskutsuago bihurtu edo kudeaketa zaildu dezaketen kasuetan.
b) «Dekantazio-lohiak» hondakina sortzen den instalazioko gordailutik jaso behar da zuzenean, aurretik ontziratu eta biltegiratu gabe, eta baimendutako kudeatzaileari eman behar zaizkio.
c) Hondakin arriskutsuak jasotzen dituzten ontziek, hondakin toxiko eta arriskutsuei buruzko maiatzaren 14ko 20/1986 Oinarrizko Legea betearazteko erregelamendua onartzen duen uztailaren 20ko 833/1988 Errege Dekretuak 13. artikuluan ezarritako segurtasun-arauak kontuan izan beharko dituzte, eta itxita egongo dira kudeatzaileak jaso arte, isuri edo lurrundu ez daitezen.
d)Aurreko atalean aipatzen diren ontziek etiketatuta egon beharko dute, eta etiketak argia, irakurtzeko modukoa eta ezabaezina izan beharko du; etiketa 1988ko uztailaren 20ko 833/1988 Errege Dekretuak 14. artikuluan horretarako adierazitako jarraibideen araberakoa izango da.
e) Hondakin arriskutsuak gordetzeko denbora ezingo da 6 hilabetetik gorakoa izan.
f) Hondakinak kudeatzaile baimenduaren instalazioetara eraman aurretik, nahitaezko baldintza izango da agiri baten bidez egiaztatzea kudeatzaile baimendu horrek hondakinak onartu dituela. Agiri horretan hondakinak onartzeko baldintzak ezarriko dira, eta egiaztatu egingo da tratatu beharreko hondakinaren ezaugarriak administrazio-baimenarekin bat datozela. Agiri hori Ingurumen Sailburuordetzara bidaliko da hondakina lehenengoz erretiratu aurretik eta, behar izanez gero, hondakin-kudeatzaile berri batengana eraman aurretik. Beharrezkoa izanez gero, karakterizazio xehatua egingo da, proposatutako tratamenduaren egokitasuna egiaztatzeko. Hala badagokio, arrazoitu egin beharko da proposatutako kudeaketa-modua Ebazpen honetako hondakinen kudeaketari buruzko printzipio hierarkikoei egokitzen zaiela.
g) Hondakin arriskutsuak eraman aurretik eta, hala badagokio, araudian ezarritako aurretiazko jakinarazpena egin ondoren, kontrolerako eta jarraipenerako agiria bete beharko da. Agiri horren zati bat garraiolariari emango zaio, zamarekin batera jatorritik helmugaraino eraman dezan. Fytasa Fundiciones, S.A. enpresak artxibategian gorde beharko ditu onarpen-agiriak eta kontrolerako zein jarraipenerako agiriak, edo horien agiri ofizial baliokideak, bost urtean gutxienez.
h) Egiaztatu egin beharko da hondakin arriskutsuak kudeatzaile baimenduaren instalazioetara eramateko erabiliko den garraiobideak horrelako gaiak garraiatzeko indarrean dagoen legerian ezarritako baldintzak betetzen dituela.
i) Fytasa Fundiciones, S.A. enpresak ekainaren 2ko 679/2006 Errege Dekretuari, Industrian erabilitako olioaren kudeaketa arautzen duenari, jarraituz kudeatu beharko du sortutako olio erabilia.
j) Ekainaren 2ko 679/2006 Errege Dekretuan aurreikusitako baimendutako kudeaketa bateraturako sistema bat ezartzen ez den bitartean, irailaren 29ko 259/1998 Dekretuan, Euskal Autonomia Erkidegoan erabilitako olioaren kudeaketa arautzen duenean, begiesten diren aurreikuspenak bete beharko ditu Fytasa Fundiciones, S.A. enpresak.
k) Ekipo elektriko eta elektronikoen hondakinak, horien artean hodi fluoreszenteak, tresna elektriko zein elektronikoei eta horien hondakinen kudeaketari buruzko otsailaren 25eko 208/2005 Errege Dekretuan ezarritakoaren arabera kudeatuko dira.
l) Fytasa Fundiciones, S.A. enpresak PKB daukaten gailuak dituenez, nahitaez bete behar ditu horiek behar bezala kudeatzeko abuztuaren 27ko 1378/1999 Errege Dekretua, poliklorobifeniloak, polikloroterfeniloak eta horiek dituzten gailuak ezabatu eta kudeatzeko neurriak ezartzen dituena, eta errege-dekretu hori aldatzen duen otsailaren 24ko 228/2006 Errege Dekretua.
m) Europako Parlamentuaren eta Kontseiluaren 2000ko ekainaren 29ko 2037/2000 EE Arautegian ozono-geruza agortzen duten substantzia batzuk zehazten eta arautzen dira. Fytasa Fundiciones, S.A. enpresak era horretako substantziarik badu, substantzia horiek bildu eta suntsitu egingo dira aldeek erabakitako bide teknikoak erabiliz edota ingurumen ikuspuntutik onar daitekeen suntsiketarako beste edozein bide erabiliz; hondakin horiek birziklatu edo birsortu egingo dira bestela, aparailuak aztertu eta mantentzeko lanen aurretik nahiz desmuntatu eta suntsitu baino lehen.
n) Fytasa Fundiciones, S.A. enpresak urtero adierazi beharko dio Ingurumen Sailburuordetzari ekitaldi bakoitzean sortu dituen hondakin arriskutsu guztien jatorria, kopurua, helmuga eta aldi baterako biltegiratuta dauden hondakinen zerrenda.
o) Erregistro bat edukiko du, hondakin arriskutsuei buruzko datu hauek agerrarazteko: kopurua, izaera, identifikazio-kodea, jatorria, tratatzeko metodo eta tokiak, sorrera- eta lagapen-datak, biltzeko maiztasuna eta garraiatzeko modua, uztailaren 20ko 833/1988 Errege Dekretuaren 17. artikuluan ezarritakoa betez, eta uztailaren 20ko 952/1997 Errege Dekretuaren bidezko aldaketan ezarritakoa betez. Sei hilean behin, Ingurumen Sailburuordetzari kontrolerako erregistro horren kopia bidaliko dio.
p) Hondakin arriskutsuen kudeaketako funtsezko oinarriak bete daitezen, hau da, hondakin horiek ahal den gutxiena sortzeko, Fytasa Fundiciones, S.A. enpresak neurri babesleak erabiliz hondakin arriskutsuen sorrera gutxitzeko plana egin eta aurkeztu beharko du Ingurumen Sailburuordetza honetan, gutxienez lau urtean behin.
q) Aurreko f) eta g) (kudeatzaileak EAEn daudenean), n) eta o) ataletan adierazitako agiriak Ingurumen Sailburuordetzara bidaliko dira, ahal dela transakzio elektroniko bidez, IKS-L03 Sistemaren erakundeentzako bertsioa erabilita.
r) Amiantoa duten hondakinak antzemanez gero, Fytasa Fundiciones, S.A. enpresak 108/1991 Errege Dekretuan, amiantoak ingurumenean sortzen duen kutsadura saihestu eta gutxitzekoan, ezarritako eskakizunak bete beharko ditu. Era berean, amiantoa duten hondakinak kudeatzeko egingo diren manipulazioak martxoaren 31ko 396/2006 Errege Dekretuan ezarritako aginduen arabera burutuko dira; dekretu horren bidez ezarri ziren amiantoarekin lan egitean segurtasun- eta osasun-arloan bete behar diren gutxieneko baldintzak.
B.1.3.2.– Hondakin ez-arriskutsuak.
Sustatzaileak adierazitako hondakin ez-arriskutsuak hauek dira:
(Ikus .PDF)
a) «Ar hautsiak», «partikula metalikoak dituzten hondarrak», «soberan dagoen hondarra» eta «xurgaketako xehekiak» hondakinen hurrengo hustuketa egin aurretik, guztien karakterizazioa egingo da, ezarrita dagoen hondakinak desagerrarazteko kudeaketaren aurrean, baliotzeko edo berreskuratzeko ezintasuna justifikatzeko. Hondakin horiek ispilu-sarrera dute gaur egun indarrean dagoen hondakinen Europako zerrendan. Bada, horiek hondakin ez-arriskutsutzat hartuko dira, baldin eta hondakin horiek lehenengo aldiz ebaluatu baino lehen karakterizatzen badira; karakterizazio horren emaitzak Ingurumen Sailburuordetzara bidali beharko dira, proposatutako kudeaketa egokia ote den egiaztatzeko. Baldin eta hondakin hori arriskutsua dela ezartzen bada, Ebazpen honetako B.1.3.1 atalean jasotako xedapenak aplikatuko dira.
b) Erabilitako ontziak eta ontzi-hondakinak gaika behar bezala bereizi eta eragile ekonomiko bati emango zaizkio (hornitzaileari), erabilitako ontzien kasuan berriro erabili ahal izateko; ontzi-hondakinak, berriz, berreskuratzaile, birziklatzaile edo balioztagune baimendu bati.
c) Hondakin horiek ezabatzeko direnean ezin dira urtebete baino gehiagoz biltegiratuta eduki. Hondakinen azken helburua baliotzea denean, 2 urtez gorde ahal izango dira.
d) Oro har, hondakinak hustu aurretik, kudeatzaile baimendu batek onartzen dituelako agiria izan beharko dute, onarpen horretarako baldintzak zehaztuta. Agiri horren kopia bidali beharko da Ingurumen Sailburuordetzara, proposatutako kudeaketa egokia dela eta Ebazpen honetan ezarritako oinarrizko printzipioak betetzen direla egiaztatzeko. Hala badagokio, arrazoitu egin beharko da proposatutako kudeaketa-modua Ebazpen honetako hondakinen kudeaketari buruzko printzipio hierarkikoei egokitzen zaiela. Fytasa Fundiciones, S.A. enpresak artxibategian gorde beharko ditu onarpen-agiriak eta kontrolerako zein jarraipenerako agiriak, edo horien agiri ofizial baliokideak, bost urtean gutxienez.
e) Halaber, hondakin geldo eta geldotuen kudeaketari buruzko azaroaren 2ko 423/1994 Dekretuarekin bat etorriz, hondakin ez-arriskutsuak zabortegi baimendu batera eraman aurretik, jarraipenerako eta kontrolerako dagokion agiria bete beharko da. Agiri horiek bost urtez gorde beharko dira.
f) Erregistro bat egingo da, hondakin arriskutsuei buruzko datu hauek agerrarazteko: kopurua, izaera, identifikazio-kodea, jatorria, tratatzeko metodo eta tokiak, sorrera- eta lagapen-datak, biltzeko maiztasuna eta garraiatzeko modua. Urtero, Ingurumen Sailburuordetzari bidaliko zaio kontrolerako erregistro horren kopia.
g) Aurreko d eta e (kudeatzaileak EAEn daudenean) eta f ataletan adierazitako agiriak Ingurumen Sailburuordetzara bidaliko dira, ahal dela transakzio elektroniko bidez, IKS-L03 Sistemaren erakundeentzako bertsioa erabilita.
B.1.4.– Lurzorua babesteko baldintzak.
Urtarrilaren 14ko 9/2005 Errege Dekretuan eta otsailaren 4ko 1/2005 Legean ezarritako agindua betez lurzoruaren egoerari buruz aurkeztu duten aurretiazko txostenean jasota dauden gomendioen arabera, Fytasa Fundiciones, S.A. enpresak honako zereginak izango ditu:
– Hondakin-hondarrak eta urtze-jalkin xeheak gordetzeko sistema hobetzea; siloetan jarriko dira, zementu-fabrikara eta berreskuratzeko instalaziora kudeatu ahal izateko.
– Hautsezko materialak arrastatzea murriztuko da, honelako neurri orokor hauek ezarriz:
a)Hautsezko gaiak siloetan, pabiloi barruan, edo horrelakorik ezean, haizetik hobekien babestutako guneetan biltegiratu.
b) Haize gogorra dabilenean hautsezko solidoak manipulatzea saihestu.
c) Materialak deskargatzeko altuera mugatu.
– Isurketek, jarioek edo ihesek kaltetu ditzaketen lursaileko gainazal guztiak zolatuak eta irazgaiztuak egongo dira.
– Isurketak, jarioak edo ihesak eragozteko moduan gordeko dira lehengaiak, erregaiak eta produktuak.
Era horretan, ontzi mugikorretan zein finkotan gordetako produktu kimiko likido guztiek (batez ere substantzia eta prestakin arriskutsuak) eta gordetako erregai likidoek jarioak biltzeko sistema izango dute.
Produktu kimikoak gordetzeari buruz indarrean dagoen araudiak eragindako biltegiratzeek araudi horretan ezarritako babes-neurriak beteko dituzte. Petrolio-instalazioei buruz indarrean dagoen araudiak eragindako biltegiratzeek araudi horretan ezarritako babes-neurriak beteko dituzte. Egiaztapen horiek egiteko, Ingurumen Sailburuordetza honi aurkeztuko zaizkio eskumena duten erakundeek emandako egiaztagiriak.
– Hondakinak biltegiratzeko aurreko ataletan jada adierazi diren jarraibideak hartuko dira kontuan.
– Hondakin metalikoak barruan edo, hala ezin bada, estalkipean biltegiratuko dira, lixibiatuak lurzorura eta uretara ahalik eta gutxien heltzeko.
– Aurretiazko Egoera Txostena (AET) osatuko da. Lurzorua kutsa dezaketen iturri guztiak barne hartuko dira, eta horien artean daude dekantazio-putzuak.
– Lurrean gertatzen den lixibiatuen iragazketa minimizatzeko, eta bi dekantazio-putzuei dagokienez, azterketa bat aurkeztuko da. Azterketa horretan adieraziko dira, besteak beste, diseinua eta eraikuntza (zola barne hartuta), segurtasun-neurriak, gainezkatzeen aurrean esku hartzeko protokoloak, eta abar. Era berean, enpresak putzuak garbitzeko jarraitzen duen prozedura adieraziko da, dekantatutako hondakinen bilketa barne hartuta. Hondakin horiek kudeatzaile baimendu batek kudeatu behar ditu. Erregistro bat osatuko da eta bertan adieraziko dira aldiro egiten diren ikuskapenak eta antzemandako intzidentziak, halakorik egonez gero.
B.1.5.– Zaratari buruzko baldintzak.
Jarraian adierazitako zarata-mailak ez gainditzeko neurriak hartu eta instalatuko dira:
a) Jarduera maila hauei egokitu behar zaie: etxebizitzen barrualdean entzungo den zarata ezin izango da inoiz ere 40 dB (A) baino handiagoa izan Leq 60 segundo etengabeko balioan neurtuta, 08:00ak eta 22:00ak bitartean, leiho eta ateak itxita, ezta 45 dB (A) ere gehienezko balioetan.
b) Jarduera maila hauei egokitu behar zaie: etxebizitzen barrualdean entzungo den zarata ezin izango da inoiz ere 30 dB (A) baino handiagoa izan Leq 60 segundo etengabeko balioan neurtuta, 22:00ak eta 08:00ak bitartean, leiho eta ateak itxita, ezta 35 dB (A) ere gehienezko balioetan.
c) Era berean, zarata ezin da 60 dB (A) baino handiagoa izan, Leq 60 segundo etengabeko balioan neurtuta, industria-eremuaren kanpoko itxituran.
d) Zamalanetan eta materiala kamioietan garraiatzean egiten den zaratak ez du handituko sentsibilitate akustiko handieneko guneetako zarata-maila.
e) Instalazioetara sartzeko/irteteko ateak itxita egongo dira beti, nabe barrutik datorren zarata arintzeko.
C) Ingurumena Zaintzeko Programa.
Ingurumena Zaintzeko Programa sustatzaileak aurkeztutako agirietan aurreikusitakoaren eta ondoko atal hauetan ezarritakoaren arabera gauzatu beharko da:
C.1.– Atmosferara botatzen diren poluitzaileak kontrolatzea
a) Fytasa Fundiciones, S.A. enpresak isurien kontrola egin beharko du, informazio honi jarraituz:
(Ikus .PDF)
b) Aurreko atalean aipatutako aldizkako neurketa guztiak baimendutako kontrol erakunde batek (BKE) egin beharko ditu (ordubeteko hiru neurketa, gutxienez, zortzi orduan zehar neurtuta; eta dioxinak eta furanoak ere neurtzen direnean, 6-8 orduko neurketa bat), eta aldizkako kontrol horiei buruzko txostenak Ingurumen Sailburuordetza honek prestatutako «Baimendutako kontrol erakundeen gutxieneko txostenaren» arabera egin beharko dira. Nolanahi ere, isurtzeen kontrolek eta neurketa-baldintzek Ingurumen Sailburuordetzaren jarraibide teknikoetan eskatutako baldintza guztiak bete beharko dituzte.
Arestian eskatutako parametro guztien neurketen BKE txostenak bidaliko dira. Neurketa berriak egin beharko dira, baldin eta parametroen neurketarik ez badago edo egindako neurketak Ebazpen honetan kontrol-maiztasuna ezarri aurretik egindakoak badira. Atmosferara egiten diren isurtzeen ondorengo kontrolak, egindako azken neurketarekiko adierazitako maiztasunarekin egingo dira.
c) Bestalde, labeen zama-lanetan, nodulizazioan, ontziz aldatzean eta zepak kentzean egiten diren isurketak antzeman eta husteko proposamen bat aurkeztu behar da.
d) Erregistro bat egin beharko da euskarri informatikoan edo, horrelakorik ezean, paperean. Dokumentazio gaurkotua erabilita gauzatuko da erregistroa, eta industriak atmosferan sortzen duen kutsadura saihestu eta zuzentzeari buruzko 1976ko urriaren 18ko Aginduak 33. artikuluan ezarritako edukia jaso beharko du. Erregistro horretan adieraziko dira egindako neurketen emaitzak, mantentze-lanak, garbiketa, aldizkako ikuskatzeak, matxuraren ondorioz gertatutako etenaldiak, egiaztapenak, edozein motako gorabeherak, eta abar. Dokumentazio hori eguneratuta egongo da, eta ingurumen-ikuskatzaileek eskuragarri izango dute.
C.2.– Isuritako uraren kalitatea kontrolatzea.
a) Analisi hauek egingo dira:
(Ikus .PDF)
b) Kanpoan egiten den kontrol bakoitza, laginak hartzea zein ondorengo analisia, «Erakunde Laguntzaile» batek (Jabari Publiko Hidraulikoaren Erregelamenduaren 255. artikulua) egin eta egiaztatuko du, eta goian aipatutako parametro bakoitzaren gainean egingo dira. Sustatzaileak isurketa-puntu bakoitzeko lagin hartu berri baten analisia aurkeztu beharko du gutxienez; lagina 24 orduko ur-emariarekiko proportzionala izango da, edo bestela, lagin puntual esanguratsua.
Isurketen kontrolen emaitzak Ingurumen Sailburuordetzara bidaliko dira laginak hartzen direnetik hilabeteko epean.
c) Laginketak kutsatzaile gehien sortzen den aldietan egingo dira beti.
d)Isurketak baimenean jarritako baldintza guztiak betetzen dituela ulertuko da, B.1.2.2 atalean ageri diren parametro guztiek ezarritako mugak betetzen baditu.
e) Isurketan lehen aipatutako maiatzaren 23ko 606/2003 Errege Dekretuaren hirugarren xedapen gehigarriak aipatzen dituen gai arriskutsuak dauden dioen adierazpen bat igorriko du titularrak urtero. Adierazpen horretan produkzio-prozesuan manipulatu diren substantzia guztiak adierazi behar dira, nahiz eta isurketan ez detektatu.
C.3.– Jardueraren adierazleak kontrolatzea.
Sustatzaileak jardueraren gaineko ondorengo parametro adierazleen jarraipena egingo du urtero, ingurumenean duten eragina aztertzeko:
(Ikus .PDF)
C.4.– Zarataren kontrola.
Jarduera garatzen den lursaileko kanpoko baldintza akustikoak hiru urtean behin kontrolatuko dira, batez ere zarata etxe barruetara sartzeko arriskurik handiena dagoen aldeetan. Kontroleko lehen urtean izandako emaitzen arabera erabakiko da aurrerantzean neurketak urtero egin ala ez.
Sustatzaileak neurketen proposamen zehatz bat landu beharko du eta neurketa-metodo zehatzak adierazi bertan. Proposamena Ebazpen honen C.6 atalak aipatzen duen ingurumena zaintzeko programaren agiri bateginari gehituko zaio.
C.5.– Emaitzak kontrolatu eta bidaltzea.
Ingurumena zaintzeko programa osatzen duten analisi eta txostenen emaitzak behar bezala erregistratuko dira, eta Ingurumen Sailburuordetzara bidaliko dira. Ingurumena zaintzeko programaren emaitzak urtean behin bidaliko dira, beti martxoaren 30a baino lehen, ingurumenean aditua den erakunde aske batek egindako txostenarekin batera. Txosten horretan adieraziko dira neurri zuzentzaileen funtzionamendua, eta prozesuak eta ingurunearen kalitatea kontrolatzeko sistemak. Emaitzen analisia ere adieraziko da, eta bereziki aipatuko dira aldi horretan gertatu diren gorabehera garrantzitsuenak, horien ustezko arrazoiak eta konponbideak, eta baita laginketen xehetasunak ere, aurretik zehaztu ez baldin badira.
Isuritako uraren kalitatearen kontrolari buruzko emaitzak, gainera, hiru hilean behin bidaliko dira Uraren Euskal Agentziara (Bizkaiko Ordezkaritza).
C.6.– Ingurumena Zaintzeko Programaren agiri bategina.
Sustatzaileak ingurumena zaintzeko programaren agiri bategina landu beharko du, aurkeztu dituen agirietan eta Ebazpen honetan proposatutako betekizunak bilduz. Programa horrek hauek zehaztu beharko ditu: kontrolatu beharreko parametroak, parametro bakoitzerako erreferentzia-mailak, analisi edo neurketen maiztasuna, laginketak edo analisiak egiteko teknikak, eta laginak hartzeko guneen kokapen xehatua. Halaber, dagokion aurrekontua ere barne hartu beharko du.
Era berean, ingurumena zaintzeko programak jardueraren adierazleak zehaztu eta adierazle horiek aztertzeko sistematika barruan izan beharko du, horien arabera enpresan bertan ingurumen-hobekuntza ziurtatzearren ezarritako neurri eta mekanismoen eraginkortasuna egiaztatu ahal izateko (ingurumen-adierazleak).
D) Ezohiko egoeretan kutsadurari aurrea hartzeko neurriak eta jardunerako baldintzak.
D.1.– Fabrika gelditzeko eta abiarazteko eragiketak eta mantentze-lanetarako programatutako eragiketak.
Programatutako urteko mantentze-lanei dagokienez, botako diren kutsagarriak eta sortuko diren hondakinen balioespena egin beharko du enpresak, eta dagokionean, horiek kudeatzeko eta tratatzeko proposamena ere.
D.2.– Jarduera uztea.
Jarduera, honako hauen aplikazio esparrukoa da: lurzorua ez kutsatzeko eta kutsatutakoa garbitzeko otsailaren 4ko 1/2005 Legea (27.510 burdinurtzearen epigrafea), eta kutsadura sor dezaketen jardueren zerrenda eta lurzoru kutsatuen adierazpenerako irizpide zein estandarrak ezartzen dituen urtarrilaren 14ko 9/2005 Errege Dekretua. Hori dela-eta, Fytasa Fundiciones, S.A. enpresak hasiera eman beharko dio lurzoruaren kalitatearen adierazpenerako prozedurari, gehienez ere bi hilabeteko epean, jarduera behin betiko uzten duenetik kontatzen hasita, otsailaren 4ko 1/2005 Legeak 17.4 artikuluan xedatutakoaren arabera.
D.3.– Ezohiko jardunean aplikatzeko neurriak eta jarduerak.
Aurkeztutako dokumentazioan egindako proposamenean ez-ohiko egoeretan aplikatu beharreko prebentziozko neurriak eta jardunerako baldintzak zehazten dira. Horiez gain, ondorengo ataletan aipatzen diren baldintzak bete behar dira:
a) Prebentziozko mantentze-lanen eskuliburua eduki beharko da instalazioen egoera bermatzeko, batez ere ustekabeko isuri edo ihesak daudenean kutsadura ekiditeko eskuragarri dauden baliabideei dagokienez. Ihesak daudenean lurzorua babesteko hartu beharreko neurriak zehaztuko dira, eta zehatz adieraziko da hauei dagokien guztia: eraikuntzako materialak (iragazgaiztea), biltegiratzeko neurri bereziak (gai arriskutsuak), egon daitezkeen ihesak antzemateko neurriak edo gainbetetzerako alarma-sistemak, lantegiko kolektore-sarea zaindu eta garbitzekoak (sistematikoki garbitzeko beharra, maiztasuna, garbiketa mota), eta lurzoruaren gaineko isuriak biltzeko sistemak.
b) Aurreko paragrafoan adierazitako eskuliburuak ikuskaritza eta kontrolerako programa jaso beharko du, hauek bilduko dituena: estankotasun-probak, mailen eta adierazleen egoera, balbulak, presioa arintzeko sistema, hormen egoera eta lodieren neurketa, andelen barnealdearen begi-bidezko ikuskaritzak (hormena eta estaldurena) eta kubetetako detekzio-sistemen aldizkako kontrol sistematikoa, zorua kutsa dezakeen edozein egoerari aurrea hartzeko.
c) Goian aipatutako prebentziozko mantentze-lanen eskuliburuan, atmosferaren kutsadurari aurrea hartzeko eta zuzentzeko (arazketa, minimizazioa, eta abar) sistemen egoera ona bermatuko duten neurriak gehitu behar dira.
d) Era berean, erregistro bat eduki behar da, eta bertan, aldizka egindako mantentze-lanen berri eman behar da, baita antzemandako gorabeherena ere.
e) Gasolioa, erretxinak, katalizatzaileak, olioak, disolbatzaileak eta abar, eta orokorrean, instalazioan sortutako hondakinak, besteak beste, maneiatzeak lurzorua eta ura kutsa ditzake. Beraz, isurketak, jarioak edo ihesak gertatzeko arriskua izan dezaketen azalera guztiak iragazkaiztuko dira.
f) Prozesurako behar diren lehengaiak, erregaiak eta produktuak ingurunean ez sakabanatzeko moduan biltegiratuko dira.
g) Hauts-produktuak gordetzeko, iragazkiak dituzten silo itxiak egongo dira.
h) Segurtasun-tarteei eta babes-neurriei dagokienez, egiaztatu egin beharko da biltegiratzeko instalazio horiek bete egiten dituztela produktu kimikoak biltegiratzeari buruz indarrean dagoen araudian ezarritako betebeharrak. Egiaztapen hori egiteko, Ingurumen Sailburuordetza honi aurkeztuko zaizkio eskumena duten erakundeek emandako egiaztagiriak.
i) Larrialdi-egoera sortzen denean, berehala eta eraginkortasunez jarduteko behar beste material eduki behar da: berriro ontziratzeko erreserbako edukiontziak, beharrezkoa izanez gero; gerta daitezkeen isuriei eusteko produktu xurgatzaile selektiboak, segurtasuneko edukiontziak, hesiak eta kaltetutako ingurunea isolatzeko seinaleztapen-elementuak eta babes pertsonalerako ekipamendu bereziak.
j) Ingurumen Sailburuordetzara bidaliko da kubetak husteko eragiketak kontrolatzeko protokolo edo agiri bidezko prozedura; eraginkortasunean eragin dezaketen produktuen jarioak ez dira tratamenduko instalaziora eramango.
k) Hidrokarburoen bereizgailuak aldian-aldian ikuskatuko dira eta mantentze egokia egingo da, hondakinak pilatu ez daitezen; dekantagailuetan eta bereizgailuetan metatutako lohiak eta flotatzaileak aldian-aldian kendu behar dira. Hondakin horiek baimendutako kudeatzaile bati emango zaizkio.
l) Bereizgailuan metatutako lohiak, olioak eta koipeak aldian-aldian kendu behar ditu baimendutako kudeatzaile batek. Isuriaren kantitateari eragiteko moduko mailetan metatzea saihestuko da.
m) Andel edo putzuen hondoan pilatzen diren solidoak ez dira ibilgura hustuko aldizkako garbitze-lanetan zehar; behar bezala kudeatuko dira edo zabortegi baimendura eramango dira.
n) Arazte-prozesuan pilatutako hondakin solidoak eta lohiak aldizka aterako dira instalazioa behar bezala ibil dadin. Behar izanez gero, gordailu iragazgaitzetan eta hondoan hustubiderik ez dutenetan gordeko dira.
o) Inoiz ez dira pilatuko euri-uren jariatzearen ondorioz ibilgu publikoko ura kutsatzeko arriskua egon daitekeen guneetan.
p) Larrialdi-egoeretan, babes zibileko legeriari helduko zaio, eta bertan ezarritako betekizun guzti-guztiak bete beharko dira.
q) Titularrak behar diren bitartekoak izango ditu arazketa-instalazioak zuzen ustiatzeko eta ustekabeko isuriak prebenitzeko hartu diren segurtasun-neurriak abian izateko.
Ebazpen honetan deskribatutako jarduerez gain, gasoleoa biltegiratzeko eta manipulatzeko instalazioak behar den bezala isolatuko dira, ustekabeko hausturak edo jarioak, eta abar, gertatzen direnean horiei eusteko.
r) Ingurunearen edo jardueraren kontrolaren gainean kalteak eragin ditzakeen gorabehera edo ez-ohiko gertaeraren baten aurrean (beste hainbaten artean, ihesak, jarioak,lurzorua edo urak kutsa ditzaketen hondakinak, erregaiak edo substantzien isurketa garrantzitsuak; suteak), gorabehera edo ez-ohiko gertaera horren berri eman beharko dio Ingurumen Sailburuordetzari.
s) Gertakari edo arazo larriren bat edo ustekabeko isuriren bat egonez gero, SOS DEIAK eta Udalari jakinarazi beharko zaie berehala. Ondoren, eta gehienez ere 48 orduko epean, ezbeharrari buruzko txosten xehatua bidali beharko da Ingurumen Sailburuordetzara. Txosten horretan, gutxienez, honako datu hauek agertuko dira:
– Gertakari-mota.
– Gertakaria non, zergatik eta zein ordutan gertatu den.
– Iraupena.
– Ustekabeko isuria izanez gero, emaria eta isuritako gaiak.
– Mailak gainditu badira, isurtzeei buruzko datuak.
– Eragindako kalteen balioespena.
– Hartutako neurri zuzentzaileak.
– Berriro gerta ez dadin aurreikusitako neurriak.
– Prebentzio-neurriak eraginkortasunez aplikatzeko ezarritako epeak.
t) Instalazioek suteen aurkako babesari buruz indarrean dagoen araudian ezarritako betekizunak betetzen dituztela egiaztatu beharko da. Egiaztapen hori egiteko, Ingurumen Sailburuordetza honi aurkeztuko zaizkio eskumena duten erakundeek emandako egiaztagiriak.
E) Baldin eta arautegi berria indarrean sartzeak, edo barneratzen diren sistemen egitura eta funtzionamenduari buruzko ezagutza berri esanguratsuetara egokitu beharrak hori egitea gomendatzen badute, neurri babesle zein zuzentzaileak eta ingurumena zaintzeko programa aldarazi ahal izango dira, bai neurtu behar diren parametroen kasuan, bai neurketaren aldizkakotasuna eta aipatutako parametroek hartu behar duten tarteari dagozkion mugen kasuan. Era berean, neurri babesle zein zuzentzaileak eta ingurumena zaintzeko programa, jardueraren sustatzaileak hala eskatuta, edo ofizioz, aldaraz daitezke, ingurumena zaintzeko programan lortutako emaitzetan oinarrituta.
F) Urtean behin Fytasa Fundiciones, S.A. enpresak Ingurumen Sailburuordetzari jakinaraziko dizkio atmosferara botatako kutsagarriei, uretara egindako isurketei eta sortu dituen hondakinei buruzko datuak, E-PRTR-Euskadi botatako eta eskualdatutako kutsagarrien Europako Inbentarioa landu eta eguneratzeko, E-E-PRTR Araudiko eta ingurumeneko baimen bateratuetako isurketen gaineko informazioa ematea arautzen duen apirilaren 20ko 508/2007 Errege Dekretuari jarraituz.
Informazio hori ekitaldi horren hurrengo martxoaren 31 baino lehen bidali beharko da. Informazioa Ingurumenari buruzko Adierazpenaren (IA) bidez gauzatuko da, hori baita kanpoko erakundeek eta Ingurumen eta Lurralde Antolamendu Sailak ingurumen-informazioa batak besteari elektronikoki emateko ardatza. Informazio-trukaketa horren funtsa Ingurumenari buruzko Adierazpenari (IA) dagozkion ingurumeneko datu teknikoak eta prozedurakoak sartzean datza, IKS-L03 Sistemako erakundeentzako bertsioaren bidez (www.eper-euskadi-net web orrian eskuragarri): Ingurumen eta Lurralde Antolamendu Saileko Ingurumen-informazioa Kudeatzeko Sistema. Datu horiek guztiek Ingurumenean Eragina duten Jardueren Euskal Autonomia Erkidegoko Erregistroa osatuko dute, Europako Ingurumen Agentziaren Erregistrora (Europako E-PRTR Erregistroa) egiten diren informazio-bidalketen oinarri dena.
Halaber, Ebazpen honetan aurreikusitako gainerako informazio-trukeak aipatutako Ingurumenari buruzko Adierazpenaren bidez gauzatuko dira, ahal izanez gero.
Informazio hori agerikoa izango da, uztailaren 18ko 27/2006 Legearen xedapenekin bat etorriz. Lege horren bidez informazioa eskuragarri izateko, herritarren partaidetzarako eta ingurumen-gaietan justizia eskura izateko eskubideak arautzen dira (2003/4/EE eta 2003/2005/EE Zuzentarauak jasotzen ditu). Horrez gain, uneoro bermatu beharko da datu pertsonalak babesteko abenduaren 13ko 15/1999 Lege Organikoan ezarritakoa betetzen dela.
G) Ingurumeneko baimen bateratu honen eraginpeko instalazioan egindako aldaketek bat etorri beharko dute kutsaduraren prebentzio eta kontrol integratuari buruzko uztailaren 1eko 16/2002 Legeak 10.3 artikuluan ezarritako komunikazio-erregimenarekin. Hori horrela, ingurumeneko beste baimen bateratu bat beharko da aldaketak funtsezkoak direnean.
Hirugarrena.– Ebazpen hau eraginkorra izan dadin, aurretik Ingurumen Sailburuordetzari agiri bidez egiaztatu beharko zaio Ebazpen honetako bigarren ataleko puntu hauetan ezarritako baldintzak betetzen direla: B.1.1.4 (gasak antzemateko eta husteko sistemak), B.1.3.1.f eta B.1.3.2. d) (sortutako hondakinak onartzeko agiria); B.1.3.1.o eta B.1.3.2.f) (hondakin arriskutsuen eta ez-arriskutsuen erregistro-eredua); B.1.3.2.a) (EHZ zerrendan ispilu-sarrera duten hondakinen karakterizazioa); B.1.4 (lurzorua babesteko baldintzak); C.1 (atmosferako isurketen neurketa-txostena BKEk egina), (Labeen zama-lanetan, nodulizazioan eta ontziz aldatzean izaten diren isurketak hartu eta husteko proposamena, atmosferara egiten diren isurketen erregistro-eredua); C.2 (Isurketen analitika); C.4 (zarata kontrolatzeko proposamena); C.6 (Ingurumena Zaintzeko Programaren Agiri Bategina); D.1 (Mantentze-lanen isurketa eta hondakinen zenbatespena); D.3.a), b) c) (prebentziozko mantentze-lanen eskuliburua, ikuskapen- eta kontrol-programa); D.3.h) (APQ sistemen ziurtapenak); D.3.i) (larrialdietarako materialen zerrenda), D.3.u) (suteen kontrako araudia betetzen dela ziurtatzen duen agiria).
Goiko baldintza horiek guztiak betetzeko 6 hilabeteko epea ezarri da, ingurumeneko baimen bateratua eraginkorra dela adierazteko Ingurumen Sailburuordetzak emandako Ebazpen hau jakinarazten den egunetik kontatzen hasita.
Halaber, baimen hau indarrean jarri aurretik, ingurumen organo honi atxikitako zerbitzu teknikoen ikuskaritza-bisitan egiaztatu beharko da instalazioak aurkeztutako proiektuaren arabera eta Ebazpen honetan ezarritakoarekin bat etorrita eraiki eta hornitu direla. Horretarako, aipatutako ikuskaritza-bisitaren aurretik, sustatzaileak Ingurumen Sailburuordetza honetan aurkeztu beharko du baldintza horiek betetzen direla egiaztatzen duen agiria, teknikari aditu batek eginda.
Adierazitako baldintzak betetzen direla ziurtatzean, ebazpena emango da eta, horren bitartez, ingurumeneko baimen bateratua eraginkortzat aitortuko da.
Laugarrena.– Ingurumeneko baimen bateratu hau 8 urteko epean egongo da indarrean, aurreko atalean ezarritakoaren arabera ondorioak dauzkan egunetik kontatzen hasita. Epe hori igarota, baimena berritu egin beharko da eta, hala badagokio, jarraian datozen aldietarako eguneratu.
Ingurumeneko baimen bateratua amaitu baino hamar hilabete lehenago, titularrak baimena berritzeko eskaera egin beharko du, uztailaren 1eko 16/2002 Legearen 25. artikuluan xedatutakoa betez.
Bostgarrena.– Edonola ere, ingurumeneko baimen bateratua ofizioz aldatu ahal izango da uztailaren 1eko 16/2002 Legearen 26. artikuluan ezarritako kasuak aintzat hartuta.
Seigarrena.– Ingurumeneko baimen bateratu honetan jasotako ibilgurako isurketen baldintzei dagokienez, Jabari Publikoko Urguneen Erregelamenduaren 261. artikuluan eta ondorengoetan ezarritakoak, eta baldintza horiek hainbat aldiz ez betetzea berrikusi, bertan behera utzi eta indargabetzeko kausa izango dira.
Fytasa Fundiciones, S.A. enpresak Ebazpen honen xede den burdinurtze-jardueran titulartasun aldaketarik eginez gero, aldaketa hori jakinarazi beharko du, Ingurumen Sailburuordetzak onar dezan.
Zazpigarrena.– Baimen honek balioa galduko du kausa hauek gertatzen direnean:
– Epearen barruan ez egiaztatzea Ebazpen honetako hirugarren atalean ingurumeneko baimen bateratuak ondorioak izan ditzan ezarritako baldintzak betetzen direla, interesdunak behar bezala justifikatuz epea luzatzeko eskatzen ez badu.
– Fytasa Fundiciones, S.A.enpresaren nortasun juridikoa bukatzea, indarrean dagoen araudian ezarritako kasuetan.
– Baimena indarrean jartzen dela adierazten duen ebazpenean xedatutakoak.
Zortzigarrena.– Ebazpen honen edukia jakinaraztea Fytasa Fundiciones, S.A.enpresari, Elorrioko Udalari, ingurumeneko baimen bateratua emateko prozeduran parte hartu duten erakundeei, eta gainerako interesdunei.
Bederatzigarrena.– Ebazpen hau Euskal Herriko Agintaritzaren Aldizkarian argitaratzeko agintzea.
Hamargarrena.– Ebazpen honek ez du agortzen administrazio-bidea; horrenbestez, interesdunek gora jotzeko errekurtsoa aurkez diezaiokete Ingurumen eta Lurralde Antolamendu sailburuari, hilabeteko epean, Ebazpen hau jakinarazi eta hurrengo egunean kontatzen hasita, hori guztia Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 114. artikuluarekin eta ondorengoekin bat etorriz (urtarrilaren 13ko 4/1999 Legeak aldatu zuen lege hori).
Vitoria-Gasteiz, 2008ko abenduaren 18a.
Ingurumeneko sailburuordea,
IBON GALARRAGA GALLASTEGUI.
I. ERANSKINA: ALEGAZIOEN TXOSTENA
Fytasa Fundiciones, S.A. enpresak Elorrioko (Bizkaia) udalerrian sustatutako burdinurtze jarduerari ingurumeneko baimen bateratua emateko prozeduraren barruan ingurumen organoak sustatutako jendaurrean jartzeko izapidean, bi alegazio-idazki aurkeztu dira.
Ondorengo ataletan egindako analisian agerian jarriko denez, Ingurumen Sailburuordetza honek erreferentziako instalazioaren ingurumeneko baimen bateratua ematerakoan, aurkeztutako alegazioetan proposatutako ingurumen-alderdi guztiak hartu dira kontuan. Horrela, proiektuan jasotako eta ingurumeneko baimen bateratuko prozedura honen bidez osatutako neurri zuzentzaileak, instalazioak sor litzakeen ingurumenaren gaineko balizko eraginak minimizatzera bideratuta daude.
Lehenik eta behin, kontuan hartu behar da Kutsaduraren Prebentzio eta Kontrol Integratuari buruzko uztailaren 1eko 16/2002 Legearen 11. artikuluaren arabera, ingurumeneko baimen bateratuaren helburua honakoa dela:
a) Arauaren ezarpen-esparruko instalazioek araua betetzen dutela ziurtatzeko baldintzak ezartzea. Baimena emateko prozesuan esku hartzen duten herri-administrazioekin ondo koordinatzeko prozedura bat jarraituko da, partikularrei izapidetze-lanak eta administrazio-kargak arintzeko.
b) Kutsadura prebenitzeko eta kontrolatzeko sistema bat edukitzea. Administrazioaren esku hartze bakar batekin hondakinen ekoizpen eta kudeaketaren esparruko ingurumen-baimen guztiak barne hartzea lortu behar da, bai eta udal hondakinen eta hondakin arriskutsuen errausketari dagozkionak ere eta, hala badagokio, hondakinak isurtzekoak, ur kontinentaletara egiten diren isurketenak, saneamendu-sistema integralera egiten direnenak barne hartuta, eta itsasotik lehorrera isurketak egitekoa; gainera, atmosferaren kutsaduraren esparruko ingurumen-zehazpenak jarraituko dira, konposatu organiko hegazkorrei dagozkienak barne hartuta.
Era berean, lege bereko 22. artikuluaren arabera, jarraian aipatu diren alderdiak barne hartuko ditu ingurumeneko baimen bateratuak:
a) teknika erabilgarri onenetan oinarritutako isurtzeko muga-balioak, araudi sektoriala eta tokiko ingurumeneko baldintzak aplikatuz
b) lurzoruaren eta lurpeko uren babesa bermatzen duten aginduak
c) instalazioan sortutako hondakinak kudeatzeko erabiliko diren prozedurak eta metodoak
d) mota guztietako isurketak eta hondakinak tratatzeko eta kontrolatzeko sistemak eta prozedurak, neurketa-metodologia, maiztasuna eta neurketak ebaluatzeko prozedurak zehaztuz.
e) ingurumenari eragin diezaioketen eta ohikoak ez diren egoeretan (martxan jartzea, ihesak, funtzionamendu-akatsak, aldian aldiko geldialdiak edo behin betiko itxiera) ustiaketaren baldintzen inguruko neurriak
f) aplikatzekoa den araudi sektorialak ezarritako beste neurri batzuk.
Kutsaduraren Prebentzio eta Kontrol Integratuaren esparruan indarrean dagoen araudia eta ezar daitekeen sektoreko ingurumen-araudia betez, instalazio osoaren balorazio orokorra egin du ingurumen organoak, eta jarduera ondo garatzeko ezarri beharreko neurriak zehaztu dira.
Horrela, ingurumeneko baimen bateratu honetan Fytasa Fundiciones, S.A.enpresari ezarri behar zaizkion baldintza eta eskakizunak, organo honek enpresari ezarri beharrekoak direla iritzitakoak, jasoko dira, kutsaduraren prebentzio eta kontrol integratuari buruzko uztailaren 1eko 16/2002 Legeak adierazitako helburuak betetzeko, atmosferaren, uraren eta lurzoruaren kutsadura saihesteari, edo hori ezinezkoa bada, kutsadura hori gutxitu eta kontrolatzeari dagokionez.
Hala ere, agertutako alderdiek egindako galderak zehaztasunez erantzuteko, ingurumen organo honek ondorengo txostena landu du. Txosten horretan aurkeztutako alegazioak sailkatu dira, hainbat ataletan:
1.– Atmosferaren kutsadura eta usainak.
Alegazioak:
Fytasa Fundiciones, S.A.enpresaren instalazioen iparraldera, 100 metro ingurura, kokatutako estazio mugikorrek 2007ko otsailetik martxora antzemandako atmosferako isurketek gainditu egiten dute 1073/2002 Errege Dekretuak ezartzen duen gehienezko muga, 50 PM10 (g/m3; horrela, kale, espaloi, balkoi eta etxeen barruan deposizioak egiten dira.
6. fokuak, «Xurgatzea argintza» ez du betetzen 1976ko urriaren 18ko Agindua, laginak hartzeko guneen kokapenari dagokionez: L1 eta L2 parametroak ez datoz bat aipatutako Aginduko III. Eranskinean xedatutakoarekin (L1 = 8D eta L2 = 2D).
4. fokua, «Xurgatzea granailatzeko makina», C.3.3.2 motakotzat sailkatu da, baina B.2.12.7 sailkapena dagokio, beraz, enpresak zorrozkiago kontrolatuko du beraren funtzionamendua eta egiten diren isurketak.
Mota horretako instalazioei dagokienez, enpresak aurkeztutako memorian bi granailatzeko makina aipatzen dira: bat moldetzakeko eta desmoldekatzeko eremuan dago eta akaberen eremuan bestea. Fokuen zerrendan horietako bat bakarrik aipatzen denez (akaberena), bestea foku batetik kanpo dagoela ulertzen da; hori dela eta, fokua behar den bezala mugatzeko eta B.2.12.7. multzoan sailkatzeko eskatu da.
Amaitzeko, bizilagunei gogaikarriak egiten zaizkien usainak isurtzen dira: galdategiko tximinietako keetan dute jatorria.
Ogoetak:
Ingurumeneko baimen bateratu honetan barne hartuta daude, besteak beste, Fytasa Fundiciones, S.A. enpresak airearen kalitatea babesteko esparruan bete behar dituen baldintzak eta betekizunak.
Horrela, «B.1.1. Airearen kalitatea babesteko baldintzak» atalean, instalazioa ustiatzean Ebazpen honetan adierazitako isurketarako muga-balioak errespetatuko direla adierazten da.
Ondoren, instalazioko fokuak identifikatzen dira eta bakoitzak errespetatu beharreko muga balioak zehaztu, indarrean dagoen eta ezar daitekeen araudiaren arabera. Foku horietan Ebazpen honetan aurreikusitako kontrolak egiten dira, bakoitzari dagokion katalogazioaren arabera.
Atmosferara egiten diren isurketen fokuak kontrolatzeko, honakoa aurkeztu beharrekoa:
– Ebazpenean eskatzen diren parametro guztien neurketen BKEren txostenak.
– Neurketa guztiak baimendutako kontrol erakunde batek (BKE) egin beharko ditu (ordubeteko hiru neurketa, gutxienez, zortzi orduan zehar neurtuta).
– 2008ko apirilaren 30a baino beranduago aurkeztutako neurketen BKE txostenek IT-DPECA-ES-IPPC-03, IT-DPECA-ES-IPPC-04 eta IT-DPECA-ES-IPPC-05 instrukzio teknikoetan adierazitakoa beteko dute –Eusko Jaurlaritzako Ingurumen Sailaren web-ean eskura daitezke- eta txostenak kontuan hartuko du «IPPC instalazioetan BKEren gutxieneko edukiari buruzko instrukzioa», eta web-orrian eskura daiteke hau ere: http://www.ingurumena.ejgv.euskadi.net/r49-3614/es/contenidos/aire_ippc/indice-html
– 2008ko apirilaren 30a baino lehen egindako neurketen BKE txostenek «BKEren gutxieneko txostenean» adierazitakoa beteko dute.
Esanak esan, isurketak hartu eta arazteko erabiltzen diren sistemak ezarritako muga-balioak betetzeko nahikoa direla ziurtatuko du enpresak; muga-balioak urratzen badira, neurri egokiak ezarriko ditu.
Tximinietan behar beste neurri hartuko dira, Industria Ministerioak industriak atmosferan eragiten duen kutsadurari aurrea hartu eta hori zuzentzeari buruz 1976ko urriaren 18an emandako Agindua bete dezaten. Zehazki, laginak hartzeko aurreikusitako zuloen kokapenari eta ezaugarriei dagokienez, gas-fluxuak laginketa-puntutik neurketa-puntura bitartean, bere norabidean zehar nahiz aurkakoan, edozein perturbazio izan dezakeen gunera bitarteko distantziek (L1 eta L2 parametroak) L1 = 8D eta L2 = 2D distantziak beteko dituzte eta ez dira inoiz L1 < 2D eta L2 < 0,5D balioak onartuko. 6. Fokuan, «Xurgatzea argintza», L1 = 8D eta L2 = 2D distantziak betetzen ez badira ere, L1 > 2D eta L2 > 0,5D gutxieneko distantziak betetzen dira eta, horrez gain, 2007ko urriaren 10eko BKE txostenaren arabera, eta sustatzaileak aurkeztutako erreferentziazko MA07/0037 txostenaren arabera, laginketa-planak UNE ISO 9096 araua betetzen duela justifikatu da. Horrenbestez, laginketa-planoa zuzena dela ulertzen da.
Dokumentazioaren arabera, sustatzaileak granailatzeko bi makina ditu instalazioetan; eta enpresak aurkeztutako memoriaren arabera granailatzeko bi makina dituzte: granailatzeko makina bat moldekatu eta desmoldekatzeko prozesuarekin dago lotuta eta bestea piezen akabera egiten den eremuan dago. Fokuen zerrendan bat bakarrik aipatzen da (moldekatu eta desmoldekatzeko prozesuarekin lotutako granailatzeko makinako xurgatzea), mugatuta dagoen granailatzeko makinen foku bakarra delako. Granailatze-prozesuak ez du airea kanporatzeko sistemarik, aire arazia jardueraren barruan isurtzen delako. Ebazpenaren B.1.1.4 atalean, bestalde, kanpoaldera egin daitezkeen isurtze barreiatuak kontrolatzeko kontuan hartu behar diren alderdiak adierazten dira.
4. fokuari dagokionez («Xurgatzea granailatzeko makina»), 34/2007 Legeak, azaroaren 15ekoa eta airearen kalitateari eta atmosferaren babesari buruzkoa denak, ezartzen duen katalogazioaren arabera, «C.3.12 Industria manufakturatuak eta hainbat jarduera» multzokoa da fokua.
Isurtze barreiatuei helduta, Ebazpen honetan horiek minimizatu nahian hartu diren edo hartu behar diren neurriak barne hartzen dira. Hain zuzen ere, Ebazpenaren B.1.1.4 atalean honakoa esaten da:
«Isurtze barreiatuak murrizteko helburuarekin, isurtze bakoitzaren biltzeko, husteko eta arazteko sistema guztiak egoera onean mantenduko dira; gainera, isurtze horiek murriztea ziurtatuko duten kanpoko ateen itxitura eta instalazioak egunero eta astero garbituko dira».
Neurri horiek usainen sorrera minimizatzeko eraginkorrak izango dira halaber. Xede horrekin, instalazioan burdinezko piezak granailatzeko prozesuen eta hozteko prozesuen atzemate-sistemak eta arazketa-sistemak hartuko dira kontuan eta labeetako zama-lanetan eta ontziz aldatzean hautsik ez zabaltzeko neurriak hartuko dira.
2.– Zarata.
Alegazioak:
Oso gogaikarria zaie inguruko bizilagunei enpresak egiten duen zarata. Gainera, Eusko Jaurlaritzak ezarritako mugak gainditzen dira.
Bestalde, Fytasa Fundiciones, S.A. enpresak aurkeztutako txostenean ikus daiteke, aztertutako hainbat puntutan muga-balioak gainditzen direla.
Horrez gain, ez da ondorio hain gogaikarrik ergiten dituzten urratze horiek zuzentzeko neurririk aurreikusten.
Gogoetak:
Zaratari dagokionez, «B.1.5. Zaratari buruzko baldintzak» atalean eskatzen zaio enpresari ezarritako neurriak errespetatzeko neurriak aplikatzeko.
«C.4. Zarataren kontrola» atalean, gainera, zarataren gainean ezar daitekeen kontrola azaltzen da eta sustatzaileari eskatzen zaio neurketak egiteko proposamen zehatz bat aurkezteko (Ingurumena Zaintzeko Programan barne hartuko da).
3.– Hondakin-urak ubidera isurtzea.
Alegazioak:
Ibaizabal ibaia (Zumelegi), Fytasa fundiciones S.A.enpresaren lurren hegoaldean dago eta batzuetan ez dagokien kolorea izaten dute urek. Ondorioz, ibaira substantzia kutsatzaileen legez kanpoko isurketak egiten direla pentsa daiteke.
Enpresak aurkeztutako memorian isurketa-puntu bakar bat aipatzen zen. Ez ziren aipatzen ibaira isurketak egiteko erabiltzen diren bi puntuak. Gainera, aurkeztu den dokumentazioan ez da barne hartzen kolektorera isurtzeko baimenik eta ez dira zehazten isurketaren ezaugarriak eta baldintzak.
Euri-urei dagokienez, enpresak irteerako emaria neurtzeko gailurik ez duela aipatzen du eta urtean 11.174 m3 isurtzen dituela aitortu du. Zentzu horretan, ez ditu zehazten kopuru hori lortzeko egindako kalkuluak. Hala ere, kopuru hori Euskalmet-en parametroen arabera (2005eko txosten metereologikoa. Iurretako estazioa) lortutakoa baino baxuagoa da.
Gogoetak:
Zentzu horretan, «B.1.2.1. Isurtzeen sailkapena, jatorria, helmuga eta kokapena» atalean, Ingurumen Sailburuordetzak sustatzaileak bidalitako dokumentazioa aztertu ondoren, gaur egungo isurketa-puntuak eta ingurune hartzailea zehaztu dira, besteak beste. Esanak esan, Fytasa Fundiciones, S.A. enpresak, ingurumeneko baimen bateratua lortzeko, efluente likidoak ibaira isuriko ditu, teilatuetako zorrotenetatik eta udalaren saneamendu-sistema integraletik datozen uren (ur beltzak) dekantazioa egin eta gero.
Zentzu horretan, ezin da ahaztu ingurumeneko baimen bateratuak administrazio-egintza bakar batean barne hartzen dituela ingurumen-baimen guztiak, sanemandu-sistema integralera egiten diren isurketak barne hartuta.
Teilatuen zorrotenetatik datozen euri-uren isurketari dagokionez, enpresak Iparraldeko Ur-konfederazioaren eta Uraren Euskal Agentziaren aldeko txostena du. Bestalde, Ebazpen honetan adierazi dira jada aipatutako fluxuari dagozkion gehienezko emariak eta isurketa bolumenak.
4.– Ur-bilketa:
Alegazioak:
Aurkeztutako dokumentazioan ez da justifikatzen Zumelegi ibaitik hartutako 10.209,02 m3-ei emandako erabilera, ez baitute hozte-dorrerik eta ez baitute azalpenik eman.
Gogoetak:
Sustatzaileak ingurumeneko baimen bateratua lortzeko aukeztu duen dokumentazioaren arabera, enpresak hozte-sistema bat du eta ibaiko ura behar du berau mantentzeko. Amaitzeko, hozte-prozesuan bertan lurruntzen da korronte hori.
5.– Lehengaien kontsumoa eta biltegiratzea.
Alegazioak:
Aurkeztutako dokumentazioan ez da Segurtasun Kontseilari izendatutako pertsona aipatzen.
Gogoetak:
Arestian esandakoa gogora ekarriz, ingurumeneko baimen bateratuaren helburua da sektoreko araudian aurreikusitako ingurumen-baimen guztiak administrazio-egintza bakar batean barne hartzea. Baimen horien artean ez dira barne hartzen merkantzia arriskutsuak garraiatzeko arauditik ondorioztatutako betebeharrak. Horrenbestez, Kutsaduraren Prebentzio eta Kontrol Integratuari buruzko araudiaren ezarpen-esparrutik kanpo geratzen dira betebehar horiek.
6.– Lurzoruak.
Alegazioak:
Enpresak lurzoruaren kalitatearekin lotuta aurkeztutako dokumentazioan ez dira arrisku-iturri gisa aipatzen lurraren iragazpenaren ondorioz sortzen diren dekantazio-putzuak.
Gogoetak:
Zentzu horretan, «B.1.4. Lurzorua babesteko baldintzak» atalean enpresari eskatzen zaio Aurretiazko Egoera Txostenean (AET) lurzorua kutsa dezaketen iturri guztiak adierazteko, eta horien artean daude dekantazio-putzuak.
Lurrean gertatzen den lixibiatuen iragazketa minimizatzeko, eta bi dekantazio-putzuei dagokienez, azterketa bat aurkeztuko da. Azterketa horretan adieraziko dira, besteak beste, diseinua eta eraikuntza (zola barne hartuta), segurtasun-neurriak, gainezkatzeen aurrean esku hartzeko protokoloak, eta abar. Era berean, enpresak putzuak garbitzeko jarraitzen duen prozedura adieraziko da, dekantatutako hondakinen bilketa barne hartuta. Hondakin horiek kudeatzaile baimendu batek kudeatu behar ditu. Erregistro bat osatuko da eta bertan adieraziko dira aldiro egiten diren ikuskapenak eta antzemandako intzidentziak, halakorik egonez gero.
7.– Ingurumena Zaintzeko Programa.
Alegazioak:
Ingurumena zaintzeko programari dagokionez, honako alderdi hauek azpimarratu behar dira:
– Atmosferara egiten diren isurketen kontrola bakarrik hartzen da kontuan.
– Ez da kontrolatzen ez zarata ez isurketak.
– Ez da aipatzen arazketa-sistemen mantentze-kontrolik.
Gogoetak:
Ebazpen honen «C.6. Ingurumena zaintzeko programaren agiri bategina» atalean sustatzaileari eskatzen zaio ingurumena zaintzeko programaren agiri bategin bat lantzeko, aurkeztu dituen agirietan eta Ebazpen honetan proposatutako betekizunak bilduz. Programa horrek hauek zehaztu beharko ditu: kontrolatu beharreko parametroak, parametro bakoitzerako erreferentzia-mailak, analisi edo neurketen maiztasuna, laginketak edo analisiak egiteko teknikak, eta laginak hartzeko guneen kokapen xehatua. Halaber, dagokion aurrekontua ere barne hartu beharko du.
Horrez gain, eta «C.5. Emaitzak kontrolatu eta bidaltzea» atalean adierazten den moduan, programa osatzen duten azterketa eta txostenen emaitzak Ingurumen Sailburuordetzara bidaliko dira urtean behin. Horrekin batera, ingurumen-gaietako espezializatuta dagoen erakunde independente baten txostena aurkeztuko da.
Kutsaduraren prebentzio eta kontrol integratuari buruzko uztailaren 1eko 16/2002 Legearen 22. artikuluan xedatutakoari jarraituz, ingurumeneko baimen bateratuan honako alderdi hauek barne hartuko dira, besteak beste: ezohiko egoeretan, ingurumena eragin dezaketen egoeretan, ustiapena egiteko baldintzei dagozkien neurriak, adibidez instalazioa martxan jartzean, ihesak gertatzean, funtzionamendu-akatsak badaude, aldi baterako gelditzean edo behin betirako ixtean.
Arestian aipatutakoa betez, ingurumeneko baimen bateratuaren D atalean barne hartu dira ezohiko egoeretan funtzionatzeko prebentziozko neurriak eta baldintzak. Besteak beste, sustatzaileak prebentziozko mantentze-lanen eskuliburu bat eduki behar duela aipatzen da, instalazioen egoera ona ziurtatzera bidean.
Ildo berean, «B.1.1.4 Gasak antzemateko eta husteko sistemak» atalaren arabera, sustatzaileak isurketa guztiak antzema, hustu eta arazteko sistemen mantentze-lanak egokiak direla ziurtatuko du.
Amaitzeko, arazketa-sistemen mantentzeari dagokionez, Ebazpen «C3 Ezohiko jardunean aplikatzeko neurriak eta jarduerak» atalaren arabera, arazketa-prozesuan sortutako hondakin solido eta lohien soberakinak instalazioaren funtzionamendu egokia ziurtatzeko beharrezkoa den maiztasunarekin erauziko dira. Behar izanez gero, gordailu iragazgaitzetan eta hondoan hustubiderik ez dutenetan gordeko dira.
Gainera, Uren Legearen 97. artikuluak dioenez, oro har jabari publikoko urak kutsatzeko edo ur horien inguruak degradatzeko gaitasuna izan dezaketen hondakin solidoak, zaborrak edo substantziak biltzea debekatuta dago, horien izaera eta uzten diren lekua edozein dela ere.
Horregatik, titularrak beharrezko arreta-neurriak hartuko ditu produktuak, erregaiak, erreaktiboak, etab. gordetzeko andeletan ustekabean sortutako isuriak, eta horiek ontziz aldatzerakoan sortuak ibilgu publikoetara irits ez daitezen.
Kasu bakoitzean lortutako azken hondakinak instalazio-esparrutik kanpo erretiratu eta garraiatuko dira, eta dagozkien araudiak bete beharko dituzte, horien helmugaren edo ondoren produktu edo azpiproduktu gisa erabiltzearen arabera.
8.– Elorrioko HAPOarekin duen hirigintza-bateragarritasunari buruzko Udalaren Hirigintza Txostena.
Alegazioak:
Fytasa Fundiciones, S.A. enpresak ez du aurkeztu Elorrioko udalaren hirigintza-txostena, proiektua udalerriko hiriginitza-plangintzarekin bat datorrela ziurtatzen duena eta nahitaezkoa eta loteslea dena, ez eta dagokion eskaera ere.
Gainera, aurkeztutako dokumentazioaren arabera, konplexu industrialak betetzen duen azalera 19.638 m2 dela adierazi du, hortaz, ez dator bat Elorrioko HAPOaren arabera eramu horri dagokion 15.722 m2-ko azalerarekin.
Gogoetak:
16/2002 Legearen 15. artikuluan adierazitakoa betez, udaletxeak hirigintza-txostena luzatu behar du eta bertan adierazi instalazioaren kokapena udalerriko hirigintza-plangintzarekin bat datorrela. Horrelakorik egin ezean, txostena beharrean txosten-eskaera aurkez daiteke.
Fytasa Fundiciones S.A. enpresak Elorrioko udalerrian metal ferrosoen galdaketa egiteko jarduerari dagokion ingurumeneko baimen bateratua lortzeko ingurumen organoari eskatuta izapidetu den txostenean barne hartuta dago sustatzaileak Elorrioko udalaren aurrean egindako hirigintza txostenaren eskaera.
