Euskal Herriko Agintaritzaren Aldizkaria

101. zk., 2011ko maiatzaren 30a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Xedapen Orokorrak

Euskal Herriko Unibertsitatea

2832

EBAZPENA, 2011ko apirilaren 19koa, Euskal Herriko Unibertsitateko Akademia Antolakuntzako errektoreordearena, honako hau argitaratzekoa: Graduko eta Lehenengo eta Bigarren Zikloko Ikasketen Gestiorako 2011-2012 ikasturteko Arautegia.

Unibertsitateak, bere ahalmenaz baliatuta, arau eta prozedurak ezarri behar ditu bere gestioaren arlo desberdinetako zereginak tramitatu ahal izateko.

Proposamen honen bidez oinarrizko arau batzuk zehaztu nahi dira Graduko eta 1. eta 2. zikloetako ikasketak kudeatzeko, erreferentzia izan daitezen Zerbitzu Zentralentzat eta ikastegi eta sailentzat, eta ikasleen eskubideak berma daitezen.

Honekin batera doan proposamena Akademia Antolakuntzako eta Doktoregoko Batzordeak onetsi zuen 2011ko apirilaren 7an, eta Gobernu Kontseiluak onartu zuen 2011ko apirilaren 14an.

Aipaturiko guztia kontuan hartuta, eta otsailaren 25eko 3/2004 Legeak, Euskal Unibertsitate Sistemarenak, 10.2 artikuluan dioena betetzeko (2004-03-12ko EHAA), honako hau

EBATZI DUT:

Artikulu bakarra.- Agindua ematea Euskal Herriko Agintaritzaren Aldizkarian argitaratzeko, alde batetik, Graduko eta Lehenengo eta Bigarren Zikloko Ikasketen Gestiorako Araudia, 2011-2012 ikasturtekoa, 2010eko ekainaren 10eko Euskal Herriko Agintaritzaren Aldizkarian argitaratutakoa ordezkatzen duena, I. eranskinean jasotakoa.

Leioa, 2011ko apirilaren 19a.

Errektorea.

EE (2011ko otsailaren 25eko Ebazpena, 2011-03-17ko EHAA).

Akademia Antolakuntzako errektoreordea,

CARMEN GONZÁLEZ MURUA.

I. ERANSKINA

GRADUKO ETA LEHENENGO ETA BIGARREN ZIKLOKO IKASKETEN GESTIORAKO 2011-2012 IKASTURTEko ARAUTEGIA

I. KAPITULUA

UNIBERTSITATERA SARTZEA

Plazen erreserba.

1. artikulua.- Honako kupo hauek ezartzen dira adierazitako taldeetarako gordeta:

a) Unibertsitateko titulazioa daukaten ikasleentzat: plazen % 2.

b) % 33ko ezintasun-maila edo handiagoa duten ikasleentzat: plazen % 5.

c) Goi mailako kirolarientzat: plazen % 3 (% 5 gehiago Jarduera Fisikoaren eta Kirolaren Zientzietako graduaren kasuan).

d) 25 urtetatik gorakoen sarbidea hartzen dutenentzat: plazen % 2.

e) 45 urtetatik gorakoen sarbidea hartzen dutenentzat: plazen % 1.

f) Lan-arloko esperientzia egiaztatuz sartzeko bidea hartzen dutenentzat: plazen % 1.

Sarbide-motak, dokumentazioa, epeak eta aukera-kopurua.

2. artikulua.- UPV/EHUn sartzeko eskaera egin nahi duten ikasleek aukera hauetakoren bat erabili beharko dute:

- Unibertsitatera sartzeko proba UPV/EHUn egin duten ikasleak.

- Unibertsitatera sartzeko proba UPV/EHUtik kanpo egin duten ikasleak.

- Lanbide-Hezkuntzako goi mailako teknikari-titulua, arte plastiko edo diseinuko goi mailako teknikari-titulua, edo goi mailako kirol teknikari-titulua edo baliokidea duten ikasleak.

- Unibertsitaterako sarbidea ematen duten atzerriko ikasketak dituzten ikasleak (Hezkuntzarako 2/2006 Lege Organikoa, maiatzaren 3koa).

- 25 urtetik gorakoentzako sarrera-proba gainditu duten ikasleak. Proba UPV/EHUn egin dutenek izango dute lehentasuna, eta horien ondoren joango dira proba beste unibertsitate publiko batean egin dutenak. Probak unibertsitate ez publikoetan gainditu dituzten ikasleen eskariak banan bana aztertuko dira.

- 45 urtetik gorakoentzako sarrera-proba gainditu duten ikasleak. Proba UPV/EHUn egin dutenek izango dute lehentasuna, eta horien ondoren joango dira proba beste unibertsitate publiko batean egin dutenak. Probak unibertsitate ez publikoetan gainditu dituzten ikasleen eskariak banan bana aztertuko dira.

- Lan-esperientzia egiaztatuz sartzeko bidea aukeratu duten ikasleak.

- Unibertsitateko titulazioa daukaten ikasleak.

3. artikulua.- Honako hauek dira sarrera-eskaria egiteko aurkeztu beharreko agiriak:

a) UPV/EHUren web atariaren bidez eginiko aurretiko izen-ematearen gordekina.

b) NANaren edo pasaportearen fotokopia.

c) Ondoko agirien fotokopia erkatua: unibertsitatera sartzeko probako txartela; Lanbide-Hezkuntzako ikasketen ziurtagiria, deialdia eta azken nota zehaztuta dituela; unibertsitatean egindako ikasketen ziurtagiria (titulazioa edo lehenengo zikloa UPV/EHUn 1990aren ostean egin duten ikasleen kasuan).

d) Ikasle ezinduentzat eta goi mailako kirolarientzat gordetako plazen bidez sartu nahi duten ikasleek egoera hori frogatzen duen dokumentua aurkeztu behar dute, kasuan kasuko administrazioak emana.

Eskariak aurkezteko epeak eta lekuak eta aukera-kopurua.

4. artikulua.- Sartzeko eskariak UPV/EHUren web orriaren bidez egingo dira eta honetarako epe bakarra egongo da 2011.eko ekainaren 27tik uztailaren 1 arte, biak barne, sarbide-mota guztietarako eta graduko ikasketak egiteko deialdi guztietarako, 1. eta 2. zikloko edo 2. zikloa besterik ez duten titulazioetarako sarbidea ere barne.

Hirugarren artikuluan jasotzen den dokumentazioa posta ziurtatuaren bidez igorri beharko da Sarbiderako bulegora, 1.397 posta-kutxa. 48080 Bilbao, aurretiko izen-emateari dagokion epearen barruan. Egindako eskariak behin-behinekoak izanen dira 3. artikuluak adierazitako dokumentazioa UPV/EHUn jaso arte.

Sarbiderako probaren ezohiko deialdikoak izateagatik edo lanbide-hezkuntzakoak izateagatik, bete beharreko baldintza akademikoak izena emateko epean betetzen ez dituzten ikasleek dokumentazioa jaso bezain pronto igorriko dute eta hurrengo onartuen zerrendan ageriko dira, dagozkien eskubideak dagozkielarik.

5. artikulua.- Unibertsitateak egoki leritzokeen dokumentazio osagarria eskatu ahal izango du, aurkeztutako eskariak behar bezala ebazteko.

6. artikulua.- Ikasleek, aurretiko izen-emate bakarrean, gehien delarik, zortzi aukera eskatu ahal izango dituzte, matrikulatu nahiko lituzketen ikasketak hautatzeko. Behin onarpen-prozedura hasita, ez da inola ere onartuko plaza lortzeko aurkeztutako eskarian eginiko aldaketarik edo gehipenik, une guztietan oro interesatuak eskarian ezarritako lehentasunezko ordena errespetatuz.

Unibertsitateko ikasketak hasita dauzkaten ikasleak.

7. artikulua.- Unibertsitateko ikasketak hasita dituzten ikasleek, zeinek bere kasuari dagokion prozedurari jarraiki egin beharko dute eskaria:

a) Ikasketa berberak (lehenengo edo bigarren zikloa) egiten jarraitu nahi duten ikasleak, beste unibertsitate batetik edo UPV/EHUko beste ikastegi batetik datozenean (leku-aldaketak).

Ikasketa berberak egiten jarraitu nahi duten ikasleek ikastegiko idazkaritzan aurkeztuko dute eskaria, 2011.eko uztailaren 1etik 8ra bitartean. UPV/EHUko ikasleak ez direnek eskariarekin batera ikasketen ziurtagiri pertsonala ere aurkeztu beharko dute. Ikastegiko dekanoak edo zuzendariak -errektoreak ahalmena eskuordetuta- ebatziko ditu eskariak, gestio horren ardura duen organoak egindako proposamena ikusita, irizpide hauen arabera:

1) Lehenengo maila oso-osorik gaindituta izatea edo 60 kreditu gaindituta izatea.

2) Iraute-Arauak betetzea.

3) Ikastegiko zuzendaritzak onartu ahal izango ditu titulazio horretako lehenengo mailan sartzeko ezarrita dagoen ikasle-kopuruarekin, irakats ahalmenarekin eta titulazioa kentzeko egutegiarekin bateragarriak diren leku-aldaketak. Horretarako, ikastegiko Akademia-Antolakuntzako Batzordeak zehaztutako irizpide objektiboak erabiliko dira. Irizpideok iragarki-oholean egongo dira izena emateko epea hasi baino lehen.

Ikasleek, onartuak izan ondoren, espedientea ikastegi berrira aldatzea eskatu beharko dute jatorrizko ikastegian, onarpen-gutuna aurkeztuta. Espedientearen leku-aldaketa interesatuak berak eskatu beharko du jatorrizko unibertsitatean, onatua izan eta hilabeteko epean; bestela, matrikula baliogabetu egingo da.

Lehenengo ataleko baldintza betetzen ez dutenak, 1892/2008 Errege Dekretuan plazak esleitzeko ezarritako sistema orokorrera bilduko dira eta, honetarako, eskaria aurkeztu beharko dute (aurretiko izen-ematea) 4. artikuluan esandako leku eta epeetan. Ikasle horiei, aurkeztutako agiriak oinarri hartuta, espediente akademiko berria egingo zaie 1. Mailako ikasle gisa; espedientearen leku-aldaketa nahitaez eskatu eta honi dagozkion tasak ordainduz.

b) Unibertsitateko ikasketak hasita dituzten ikasleek beste ikasketa batzuk hasi nahi dituztenean.

Ikasle-multzo honek aurretiko izen-emate berria egin beharko du prozedura orokorrerako ezarritako epe eta datetan eta sarrera berriko ikasleen izaera bera izango dute; hau da, sarbide-proban lortutako kalifikazioa edo baliokidea hartuko da aintzat, salbu eta, egindako ikasketen eta eskatutako ikasketen arteko antzekotasunarengatik, lehengo antolaketaren (diplomatura, lizentziatura, ingeniaritza eta beste) ikasketa-planetako lehenengo ikastarotik goragokoetara sar daitezkeen ikasleak, eskaria 2011.eko uztailaren 1etik 8 arteko epean zuzenean ikastegiko idazkaritzan, akademi ziurtagiri pertsonalarekin batera (UPV/EHUko ikasleei eskatu ez zaiena) aurkeztu beharko dutelarik, dekanotzek zein zuzendaritzek a) atalean ezarritako irizpideak baliatuz, ebatziko badituzte. Ikasle horiei, aurkeztutako agiriak oinarri hartuta, espediente akademiko berria egingo zaie 1. Mailako ikasle gisa; espedientearen leku-aldaketa nahitaez eskatu eta honi dagozkion tasak ordainduz.

c) Unibertsitateko ikasketak hasita dituzten ikasleek GRADUKO ikasketetara sartu nahi dutenean.

Ikasleok ondoko aukerak dituzte:

1) Ikasle-multzo honek aurretiko izen-emate berria egin beharko du prozedura orokorrerako ezarritako epe eta datetan eta sarrera berriko ikasleen izaera bera izango dute; hau da, sarbide-proban lortutako kalifikazioa edo baliokidea hartuko da aintzat.

2) 1892/2008 Errege-Dekretuko 56. artikuluaren arabera, unibertsitateko ikasketa partzialak eginda dauzkaten ikasleek beste unibertsitate batean eta/edo unibertsitateko beste ikasketa ofizial batzuetan sartu nahi badute eta, gutxienez, lehenengo ikastaroko 30 kreditu baliokide onartuta badituzte, espedientearen leku-aldaketa eskatu beharko dute zuzenean ikastegiko idazkaritzan, 2011.eko uztailaren 1etik 8ra bitartean. Eskari horiek ikastegiko dekanoak/zuzendariak ebatziko ditu, errektoreak horretarako eskumenak eskuordetuta, irizpide hauei jarraiki:

2.1.- Lehenengo maila osoa jatorrizko ikastegian gaindituta izatea, baldin eta ikasketa horietarako plaza-kopuru mugatua badago edo plaza guztiak ohiko prozeduraren bidez esleitu badira.

2.2.- Iraute-arauak betetzea.

2.3.- Ikastegiko zuzendaritzak beste irizpide batzuk onartu ahal izango ditu, bai eta ere titulazio horretako lehenengo mailan sartzeko ezarrita dagoen ikasle-kopuruarekin, irakats ahalmenarekin eta titulazioa kentzeko egutegiarekin bateragarriak diren leku-aldaketen kopurua. Horretarako, ikastegiko Akademia-Antolakuntzako Batzordeak zehaztutako irizpide objektiboak onartuko dira. Irizpideok iragarki-oholean egongo dira izena emateko epea hasi baino lehen.

3) Ikasleak plaza lortuz gero beste ikasketa batzuetan, espediente akademikoa lekuz aldatu beharko da. Tramite hori jatorrizko unibertsitateak egin beharko du, interesatuak beste unibertsitate batean onartu izan dela egiaztatu ondoren.

d) Unibertsitateko ikasketak atzerrian hasi dituzten ikasleak.

Ikasle-multzo honek, baldin eta, gutxien dela, lehenengo ikastaroko 30 kreditu baliokide aitortu bazaizkie, egin nahi duten matrikulari dagokion ikastegiko idazkaritzan aurkeztuko du eskaria, akademi ziurtagiri pertsonalarekin batera, 2011.eko uztailaren 1etik 8ra bitartean eta bertako dekanoak edo zuzendariak ebatziko ditu eskariak -errektoreak horretarako eskumenak eskuordetuta- ikastegiko Baliozkotze-Batzordeak 1892/2008 Errege Dekretuko 57. artikuluari jarraiki ezarritako irizpideak erabiliz.

Ikasleek espedientea lekuz aldatzeko eskaera egingo dute, baina izena emateko prozesuan ere parte hartzeko aukera izango dute 2. artikuluan zehaztutako modalitateren bati jarraiki.

e) Hasitako ikasketak egiten jarraitu nahi duten ikasleak.

Ikasketak beste unibertsitate batera edo UPV/EHUko beste ikastegi batera joateko utzi zituzten eta berriz ere hartu gura dituzten ikasleek ikastegiko idazkaritzan aurkeztu beharko dituzte eskariak zuzenean 2011.eko uztailaren 1etik 8ra bitartean, dekanotza edo zuzendaritzak ebatz ditzan.

Aurretiko izen-ematea berrestea, plazak esleitzea eta matrikula.

8. artikulua.- Unibertsitatera sartzeko proba euskal barrutian gaindituta izanda, 2011-2012 ikasturtean UPV/EHUn sartzeko eskaria egin duten ikasleek berretsi egin beharko dute eskaria, lehengoari eusteko edo aldaketak egiteko eta berretsi, honako toki eta egunetan berretsi beharko dute:

a) Unibertsitatera sartzeko proba ohiko deialdian (2011ko ekainean) gainditu duten ikasleek ekainaren 20tik 24ra, biak barne, lehendabiziko aukeran hautatutako ikastegiko idazkaritzan, sarbiderako bulegoan edo campuseko errektoreordetzetako bulegoetan, edo Interneten bidez, unibertsitatera sartzeko web orrian (www.sarrera.es).

b) Unibertsitatera sartzeko proba ezohiko deialdian (2011ko uztailean) gainditu duten ikasleek uztailaren 18tik 22ra, biak barne, lehendabiziko aukeran hautatutako ikastegiko idazkaritzan, sarbiderako bulegoan edo campuseko errektoreordetzetako bulegoetan, edo Interneten bidez, unibertsitatera sartzeko web orrian (www.sarrera.es).

9. artikulua.- Plazak mugatzeko baimena duten ikasketetan plazak esleituko dira 1892/2008 EDn zehaztutako lehentasunei jarraituz, ikasleak adieraziriko hobespenak errespetatuz eta honako irizpide hauek kontuan harturik:

a) Gordetako zenbait kupotako plazak sarrera orokorreko ikasleei esleituko zaizkie aldez aurretik, salbu eta, aurreko ikasturteetako datuen arabera, plaza horiek guztiak betetzen dituzten titulazioetan. Talde horien eskaririk balego, kasuan kasu dagokion portzentajeraino onartuko dira. Gehipen hori kasuan kasuko ikastegiekin adostuko da.

b) Unibertsitateen Kontseiluak baimendutako muga gehitu egingo da aurreko ikasturteko urriaren 31 baino lehen baliogabetutako matrikulen kopuru berean. Igoera hori dagokien ikastegiekin erabakiko da, eta plazak sarrera orokorreko ikasleek beteko dituzte, lehentasunen hurrenkera zehatz-mehatz gordez.

10. artikulua.- 1.- Graduko edo bigarren zikloko ikasketetara sartzeko eskaerak ikaslearen batez besteko notaren hiru hamartarrak kontutan hartuta ordenatuko dira, dagokion balorazio-irizpidea oinarri hartuta.

2.- Unibertsitateko espedienteko batez besteko nota, ikasleak unibertsitateko tituluren bat duelako ziurtagiria aurkeztuta, 1125/2003 EDn ezarritakoarekin bat etorrita kalkulatuko da. Aurkeztutako akademi ziurtagiria ikusita, batez besteko notarik ezin ondoriozta daitekeenean, honetara kalkulatuko da:

Sarbideko kalifikazioak homologatzearren, ondoko taulan adierazitako zenbakiak esleituko zaizkie kalifikazio kualitatiboei: baliozkotuta: 5,5 (kalifikaziorik gabeko irakasgaietan); nahikoa: 5,5; oso ongi: 7,5; bikain: 9; ohorezko matrikula: 10.

Kreditutan egituratuta ez dauden ikasketa-planetan honela kalkulatuko da batez besteko nota: irakasgaien kalifikazioa biderkatuko da taularen arabera dagokion puntuazioaz, eta gero emaitza guztiak batu egingo dira. Emaitza zati egingo da kasuan kasuko titulazioko irakasgaien kopuru osoarekin. Lauhileko edo seihileko irakasgaien kasuan, kalifikazioaren erdia hartuko da batuketarako eta irakasgaiaren erdia zatitzailean. Karrera-amaierako proiektua urte osoko irakasgaitzat hartuko da.

Espedientea kreditutan egituratuta badago, honela kalkulatuko da batez besteko nota: irakasgai bakoitzeko kredituen kopurua biderkatuko da irakasgai bakoitzari dagokion kalifikazioaz, aurreko taularen arabera, eta emaitza guztiak batu egingo dira; Gero, batura hori zatituko da gainditutako kredituen kopuru osoaz.

Batez besteko nota kalkulatzean ez dira kontuan hartuko kalifikaziorik ez daukaten kreditu onartuak.

11. artikulua.- Matrikula egiteko onarpena unibertsitatearen web orrian argitaratuko da honako data hauetan:

Lehenengo onarpena: uztailak 14.

Bigarren onarpena: uztailak 21.

Hirugarren onarpena: uztailak 23.

Laugarren onarpena: uztailak 27.

Bosgarren onarpena: uztailak 29 (uztaileko azken onarpen honetan sartu eginen dira batxilergo eta hezkuntza-zikloetako sarrera-probaren ezohiko deialdiko ikasleak).

Seigarren onarpena: irailak 10.

Zazpigarren onarpena: irailak 14.

Unibertsitateak, onarpen-prozesuaren garapena ikusirik, onarpen-zerrenda gehiago atera ahal izango ditu, behar besteko aurrekotasunaz iragarrita.

12. artikulua.- UPV/EHUn matrikula onartu delako jakinarazpen ofiziala UPV/EHUren web orrian argitaratzea izango da.

13. artikulua.- 1.- Ikasleak egingo dituen ikasketak irakasten dituen unibertsitateko ikastegian egingo da matrikula, 27. artikuluan adierazitako egunetan eta 30. artikuluan aipatutako dokumentuak aurkeztuz.

2.- Matrikula esandako egunean eta orduan egiten ez duen ikasleak matrikula egiteko eskubideari uko egiten diola ulertuko da eta, hortaz, galdu egingo du ikasketak egiteko plaza. Ikasleak UPV/EHUn matrikula egiteko nahia adieraziko balu beranduago, eskaerak berriro ordenatu ondoren plaza hutsak dauzkan titulazioren batean sartzeko aukera izanez gero egingo luke matrikula.

Talde batetik baino gehiagotatik sartzeko eskariak.

14. artikulua.- 1.- Indarrean dagoen legerian zehaztutakoari jarraituz, sarrera-bide batetik baino gehiagotatik egiteko baldintzak betetzen dituzten ikasleak eskaria egitean baliatu beharko dira posibilitate horretaz.

2.- Unibertsitatean sartzeko eskaria bide batetik baino gehiagotatik egin arren, eskaria bakarra izango da.

Onarpenari buruzko errekurtsoak ebazteko irizpideak.

15. artikulua.- Amaitutako onartze-prozesuen aurka jartzen diren errekurtsoak Akademia-Antolakuntzarako Errektoreordetzak ebatziko ditu, honako irizpideon arabera:

a) Ikasleek errekurtsoan eskatutako ikasketetan plaza hutsak geratzen direnean, onartu egingo zaie eskaria, nahiz eta izena eman zutenean ikasketa horiek ez jarri eskarian.

b) Errekurtsoa jartzen duen ikasleak onartutako azkenak baino nota hobea izanda ere, eskaria ez zaio onartuko baldin eta titulazio horretako plaza guztiak beteta badaude.

c) Aparteko tratamendua emango zaie arrazoi bereziengatik egindako eskariei, agiri bidez egiaztatzen badira (gaixotasun luzeak, ezintasun fisikoak etab.). Eskariok ebazteko Akademia-Antolakuntzako eta Doktoregorako Batzordeari eskatuko zaio iritzia.

Arkitekturaren Oinarrietako Graduan, Itzulpengintza eta Interpretazioko Graduan eta Jarduera Fisikoaren eta Kirolaren Zientzietako Graduan sartzeko proba bereziak.

16. artikulua.- 1.- 1892/2008 errege-dekretuko bigarren xedapen gehigarrian zehaztutakoaren babesean, proba bereziak ezartzen dira Arkitekturaren oinarrietako gradua, Itzulpengintza eta Interpretazioko gradua, eta Jarduera Fisikoaren eta Kirolaren Zientzietako gradua egiten hasi baino lehenago.

2.- Proba horiek gainditzeak ez dakar graduan onartua izatea; izan ere, proba gaindituta izateaz gain, kontuan izango dira eskaria egiteko eta ikasleak hautatu eta onartzeko kapitulu honetan ezarritako gainerako irizpideak.

3.- Bestalde, proba gainditu arren ikasleak ez badu matrikularik egiten, hurrengo urtean matrikula egin nahi izanez gero berriro egin beharko du proba. Era berean, proba hori beste unibertsitate batean gaindituta izan arren, berriro egin beharko dute UPV/EHUn.

4.- Arkitekturako GETko zuzendariak eta Letren Fakultateko eta Jarduera Fisikoaren eta Kirolaren Zientzien Fakultateko dekanoek eskuordetuta dute aipatutako proba antolatu eta garatzeko eta epaimahai kalifikatzailea izendatzeko ardura, Akademia-Antolakuntzarako Errektoreordetzarekiko koordinazioan.

5.- Arkitekturaren oinarrietako graduko proban eta Jarduera Fisikoaren eta Kirolaren Zientzietako graduko proban izena emateko eskariak 2011.eko maiatzaren 2tik 6ra bitartean egin behar dira. Itzulpengintza eta Interpretazioko graduko probarako, berriz, 2011.eko maiatzaren 18tik 25era bitartean.

II. KAPITULUA

BIGARREN ZIKLORA SARTZEA

17. artikulua.- 1.- Bigarren ziklora sartzeko gestioa I. Kapituluan eta ondorengo artikuluetan zehaztutakoaren arabera egingo da.

2.- Sarbide-motak honakoak dira, ikasle motaren arabera:

- Unibertsitateko lehenengo zikloko ikasketak gaindituta baina unibertsitateko titulurik ez izanda eta behar diren baldintzak beteta, eskaria egiten dutenak 2. zikloa baino ez duten ikasketak hasteko edo beste titulazio bateko bigarren zikloan sartzeko.

- Unibertsitateko titulua edo parekoa duten ikasleak.

3.- Bigarren ziklo hauetan onartua izanagatik ere, ikasleak ez du zertan utzi hasita dauzkan ikasketen bigarren zikloa; bestela esanda, titulazio biak aldi berean egiteko aukera dute.

4.- Sartzeko eskariak espediente akademikoaren arabera ordenatuko dira, 10. artikuluan zehaztutakoari jarraituz.

5.- Prestakuntza-osagarri diren irakasgaiak ikasturte bakoitzeko irakats eskaintzan sartuko dira, eta plaza-kupo bat aukera askerako utziko dira eta beste kupo bat ikasle berrientzat.

6.- Irakasgai horiek jatorrizko ikasketetako 1. zikloan egin ahal izango dira, aukera askeko eskaintzaren bitartez; edo, bestela, 2. zikloa baino ez daukan titulazioko beste irakasgaiekin batera. Azken kasu honetan ikaslea nahitaez matrikulatu beharko da gainditu gabeko irakasgaietan, gainditu arte.

7.- 2. zikloa baino ez daukaten ikasketetako prestakuntza-osagarri guztiak edo batzuk gaindituta izan arren, ikasleak ez du izango inolako lehentasunik 2. zikloa baino ez daukaten ikasketetan onartua izateko.

8.- Unibertsitateko ikasketen 1. ziklo bat gaindituta duten eta titulazio bereko 2. zikloa egin nahi duten beste ikastegi edo beste unibertsitate bateko ikasleek espedientea lekuz aldatzeko eskaria aurkeztu beharko dute zuzenean xede-ikastegian, 2011.eko uztailaren 1etik 8ra bitartean.

Ikastegietako dekano eta zuzendariek ebatziko dituzte eskaerok, ikastegiko Akademia-Antolakuntzarako Batzordeak onartutako irizpide objektiboei jarraiki. Irizpide horiek iragarki oholean emango dira argitara, eskaerak aurkezteko epea zabaldu baino lehenago.

III. KAPITULUA

IKASKETAK ALDI BEREAN EGITEA

18. artikulua.- 1.- Ikasketa desberdinak aldi berean egiteko eskariak onartuko dira baldin eta ikasleek gaindituta badaukate hasita daukaten titulazioko lehenengo maila osoa (plan zaharretan) edo 60 kreditu (plan berrietan) eta baldin eta matrikula-epeak behin amaituta bigarren titulazioan plazarik geratzen bada. Plazak baino eskari gehiago badago, hasitako ikasketetako kalifikazioen arabera ordenatuko dira.

2.- Ikasketa desberdinak aldi berean egiteko eskariarekin batera, hasita dauden unibertsitateko ikasketen ziurtagiri akademiko pertsonala eta unibertsitatera sartzeko probetako txartela aurkeztu beharko dira, UPV/EHUko ikasleek ez dute dokumentazio hori aurkeztu behar izango eta 2011.eko irailaren 1etik 2ra bitartean aurkeztuko campuseko errektoreordetzetan edo sarbiderako bulegoan.

3.- Lehenengo ikastarotik gorako ikastaroetarako, ikasketak aldi berean egiteko eskaria, ikasketak berriro hartu nahi diren ikastegiko idazkaritzan aurkeztu beharko da, 2011.eko uztailaren 1etik 8ra eta ikastegiko dekano edo zuzendariak ebatziko ditu eskariok, errektoreak eskuordetzan emandako ahalmena erabiliz.

IV. KAPITULUA

MATRIKULA ETA PREZIO PUBLIKOAK

Matrikula berriko irakasgaiak.

19. artikulua.- Akademi ikasturte bakoitzean, 1. eta 2. zikloko titulazioetako ikasleek muga bat izango dute irakasgai berrietan matrikulatzeko, hain zuzen, titulazioaren kreditu-kopuru osoa zati titulazioaren urteak eginik, hortik ateratzen den emaitzaren ehuneko jakin bat, ikastegi bakoitzak ezarri beharrekoa. Ikastegiek ikasturte bakoitzeko maiatzaren 15a baino lehen jakinarazi beharko diote ehuneko hori Graduko Ikasketen Zerbitzuari. Hala egin ezean, aurreko ikasturteetan erabilitako ehunekoa erabiliko da. Graduko titulazioetako ikasleek aurreko ikastaro guztietan gainditzeke dituzten irakasgai guztietako matrikula egin beharko dute, matrikula daitekeen kreditu-kopururik handietan 60 izanik. Guztira, kreditu berriak eta errepikatutako kredituak batuta, ezingo du 90 kreditu baino gehiagotan matrikulatu.

Hautazko irakasgaiak.

20. artikulua.- 1.- Ikasleek ikasturte bakoitzean hautazko irakasgaiak aldatu ahal izango dituzte, nahiz eta aurreko ikasturteetan beroriek suspenditu edo haietara aurkeztu ez. Irakasgai berrietan zerotik hasiko dira kontatzen deialdiak, eta ikasleak egin dituen baina gainditu ez dituen irakasgaietan hurrengo ikasturteetan matrikulatzea baldintzapean geratuko da, gai horiek irakats eskaintzan sartu ala ez.

2.- Matrikulan eskaintzen diren hautazko irakasgaietarako muga bat dago bai irakasgai kopuruari bai talde bakoitzarentzako plaza kopuruari dagokionean, eta muga hori ikasturte bakoitzerako irakats eskaintzan zehaztuko da. Beraz, ez da nahastu behar ikasketa-planetan ageri diren hautazko irakasgaien kopurua, eta ikasturte bakoitzerako eskainitako hautazko irakasgaiena.

3.- Ikasle bakoitzak matrikula egiteko txanda heltzen zaionean aukeratuko ditu hautazkoak, 28. artikuluan matrikulen hurrenkerarako zehaztutako irizpideak erabilita.

4.- Ikastegiek plaza bermatu beharko diete ikasle guztiei hautazko irakasgaietan, beren ikasketa-planean beren ikastarorako ezarrita dauden kreditu guztietan matrikulatu ahal izan daitezen; era berean, matrikula egiteko txandan ikasleek aukeratu ahal izateko adinako kopuruan eskaini beharko dituzte.

Irakasgai osagarriak edo gehiegizko kredituak.

21. artikulua.- Titulazioko kreditu guztiak eginda izan arren, ikasleek aukera izango dute, automatrikularako epea amaitu eta gero, hautazko irakasgaietan eta aukera askekoetan matrikulatzeko, 19. artikuluan zehaztutako mugaren barruan, dekanotzak/zuzendaritzak aurretik baimena emanda, eta titulua jasotzeko eskaria egin aurretik.

Eskolarik gabeko irakasgaiak.

22. artikulua.- Desagertzeko bidean eta irakaskuntzarik ez duten ikasketa-planetako irakasgaiak honakoen arabera gestionatuko dira:

a) Desagertzeko bidean diren ikasketa-planetako ikasleak matrikulatu behar dira, nahitaez, gainditzeke dauzkaten eta desagertzeko azken urtean dauden ikastaroetako irakasgai guztietan.

b) Irakasgai horien deialdiak izango dira, oro har, bigarren lauhileko irakasgai bati dagozkionak. Honelakorik luketen ikastegietan, lehenengo lauhileko ohiko deialdia erabili gura duten ikasleek hala adierazi beharko dute ikastegietako idazkaritzetan, ikastegiek berek adierazitako epearen barruan. Deialdia aurreratu baina azterketa gainditu ez duten ikasleek ikastegiko idazkaritzan esan beharko dute, maiatzaren 15a baino lehen, beste bi deialdietatik zein erabili gura duten. Ikasleak ezer esaten ez badu, ikasturte horretako bigarren deialdi bezala bigarren lauhilekoko ezohiko deialdia erabiliko duela ulertuko da.

c) Irakasgai horien kalifikazio-orriak eta aktak beste irakasgai guztietan erabilitako prozedura berberaren bidez eskuratuko dira.

d) Irakasgai horien azterketa-egunak ikastegi bakoitzak jarriko ditu deialdi bakoitzerako, eskolak dauzkaten irakasgaietarako prozedura berbera erabiliz.

e) Balioespen-probak ikastegiko batzarrak izendatutako epaimahaiek epaituko dituzte, irakasgaia irakasten zuten sailen iritzia entzunda. Epaimahaiok sail horietako hiruna irakasle iraunkorrek osatuko dituzte, ahal bada irakasgaiari zegokion jakintza-arlokoak. Bosgarren edo seigarren deialdiko ikasleentzako epaimahaia izendatuta balego, irakaskuntzaren plangintza eta ikasleen ebaluaziorako arauei jarraiki, epaimahai horrexek berak kalifikatuko ditu desagertuta dauden irakasgai horien probak, ikaslea edozein deialditan egonda ere.

Behin betiko matrikula.

23. artikulua.- Ikasleek egindako matrikulak behin-behinekoz onartuko dira. Matrikula behin betikoa izango da egiaztatzen denean ikasleak betetzen dituela eskatu duen titulazioa egiteko behar diren baldintzak. Egiaztapena egingo da ikasleak matrikula egin eta 4 hilabeteko epean. Lau hilabeteko epe hori igarota ikastegiko dekanoak edo zuzendariak ez badu matrikula horren kontrako erabakirik hartzen, matrikula behin betiko onartutzat emango da. Dekano edo zuzendariaren ebazpenaren kontra gorako errekurtsoa aurkeztu ahal izango zaio errektoreari.

Irakasleen matrikula.

24. artikulua.- Unibertsitateko irakasleen araubideari buruzko apirilaren 30eko 898/1985 errege-dekretuko 12. artikuluak hauxe dio: «unibertsitateko irakasle guztiek debekatuta izango dute eurak irakasle dauden ikastegietan ikasle gisa matrikulatzea».

Hala ere, diplomatu-titulua bakarrik daukaten unibertsitate-eskoletako irakasle titularrak lizentziaturako ikastaroetan matrikulatu ahal izango dira, edo, lizentziatuak izanez gero, doktoregoko ikastaroetan. Errektoreak beren-beregi eman beharko du horretarako baimena.

Matrikula bakarra.

25. artikulua.- 2011-2012 ikasturterako matrikula bakarra izango da bi lauhilekoetarako. 37. artikuluan aipatzen den bigarren matrikulaldia baino ezin izango da ireki, eta hala dagokionean besterik ez.

Ikasleen banaketa nahitaezko irakasgaietako taldeetan.

26. artikulua.- 1.- Matrikulatutako ikasleak nahitaezko irakasgaietako taldeetan banatu ahal izango dira hurrenkera alfabetikoaren arabera, ausaz edo ikaslearen nahiari jarraituz, ikastegiko batzarrak erabakitako irizpidearekin bat etorrita.

2.- Ikaslearen nahiaren arabera egitea erabakiz gero, ikasleek matrikula egitean aukeratu beharko dute taldea, egokitu zaizkion matrikula egun eta orduan lituzkeen aukeren arabera.

Matrikula-epeak.

Lehenengo ikastaroko ikasleak.

27. artikulua.- 1. ikastaroko ikasleek, dagokienaren arabera, honako epe hauen arabera egingo dute matrikula:

1. onespenekoak, uztailaren 15etik 20ra.

2. onespenekoak, uztailaren 21etik 22ra.

3. onespenekoak, uztailaren 26an.

4. onespenekoak, uztailaren 28an.

5. onespenekoak, irailaren 1etik 2ra.

6. onespenekoak, irailaren 12tik 13ra.

7. onespenekoak, irailaren 15ean.

Lehenengo ikastarotik gorako ikasleak.

28. artikulua.- 1.- Matrikula 2011.eko irailaren 1 eta 16 bitartean egingo da, biak barne. Ikasleak edo haren ordezkari akreditatuak matrikula egingo ez balu adierazitako egun eta orduan, espedientearen arabera daukan lehentasuna galduko luke.

2.- Ikasleek, esan bezala, automatrikula egingo dute, horretarako jarriko den ikasgelan edo beste edozein lekutan, Interneten bidez. Ikasle bakoitzak aukeratu ahal izango du bere orduan eskaintzen diren hautazko eta aukera askeko irakasgaien artean, ikastegian onartutako irakats eskaintzaren arabera betiere.

3.- Matrikula egiteko egun eta orduaren jakinarazpen ofiziala Interneten bidez egingo da, 2011.eko abuztuaren 30ean, unibertsitatearen web orrian.

4.- Ikasle bakoitzak matrikula zein egun eta ordutan egin behar duen zehazteko, 2011.eko abuztuaren 29an unibertsitateak ikasle guztiak ordenatuko ditu espedientean data horretan azaltzen diren kalifikazioetan oinarrituta eta matrikula-ordena handienak izango du lehentasuna. Ondoko formula hau erabiliko da ikasleak ordenatzeko:

Matrikula-ordena MO = A-ren % 25 + M-ren % 25 + F-ren % 50, non.

A = gainditutako irakasgaien kalifikazioa baloratzen duen koefizientea den (ikasitako espedientearen batez bestekoa).

M = matrikularen urtean izandako errendimendu akademikoa neurtzen duen faktorea den (ordenatze-egunerako ikasturte horretan gainditutako kredituak/ikasturte horretan matrikulatutako kredituak).

F = titulazioa bukatzeko gradua definitzen duen (ordenatze-egunerako gainditu dituen kredituak/titulazioko kreditu guztiak).

Ikasketei berriro ekin eta 2010-2011 ikasturtean matrikularik egin ez duten ikasleak.

29. artikulua.- 2010-2011 ikasturtean matrikulatutako ikasleek eta lekualdaketa eginda onartuak izan direnek 2011.eko irailaren 12tik 23ra bitartean egingo dute matrikula ikastegiko idazkaritzan.

Matrikula egiteko aurkeztu behar diren agiriak.

30. artikulua.- 1.- Lehenengo mailan lehendabiziko aldiz matrikulatzen diren ikasleek, edozein izanda ere titulazioa, honako agiriak aurkeztu behar dituzte:

a) Datu estatistiko eta ekonomikoen inprimakia.

b) NANaren edo pasaportearen fotokopia.

c) Argazki bat, atzean izena eta deiturak idatzita.

d) Matrikularen ordainketa helbideratzeko inprimakia.

e) Matrikulako prezio publikoetatik salbuetsita egoteko edo prezio murriztua ordaintzeko eskubidea egiaztatzen duen agiria, ikasketa-zerbitzuengatik ordaindu beharreko prezioak finkatzeko Eusko Jaurlaritzak onartzen duen aginduaren arabera.

f) Beka eskatuz gero, eskaeraren inprimakia edo eskaeraren frogagiria.

g) Gizarte-Segurantzan alta emanda egotearen agiria, eskola-asegururako.

2.- Aurrekoaz gain, erabilitako sarbidearen arabera, ikasle bakoitzak honako dokumentuok aurkeztu beharko ditu:

- Unibertsitatera sartzeko probako ikasleak:

h) Unibertsitatera sartzeko probako kalifikazio-txartelaren fotokopia erkatua edo fotokopia eta jatorrizkoa.

i) Ohorezko matrikula globala lortu duten LOGSEko ikasleek horren ziurtagiria aurkeztu beharko dute.

j) Espedientea lekuz aldatzeko (matrikulatuta egon den unibertsitate edo ikastegitik aldatzeko) gastuak ordaindu izanaren agiria, UPV/EHUko ikasleak izan ezik.

- Lanbide-Hezkuntzako ikasleak, ikasle titulatuak, 2. ziklora sartzera doazenak:

k) Ikasketen ziurtagiri pertsonalaren, kalifikazio-liburuaren edo kasuan kasuko titulaziora sartzeko bidea ematen duen tituluaren fotokopia erkatua, edo fotokopia eta jatorrizkoa.

3.- Lehenengo ikastarotik gorako ikasleek eta errepikatzaileek honako agiriok aurkeztu behar dituzte:

a) Datu ekonomiko eta estatistikoen inprimakia (aurreko ikasturtean matrikulatuta egon ez diren ikasleek bakarrik).

b) NANaren edo pasaportearen fotokopia.

c) Matrikulako prezio publikoetatik salbuetsita egoteko edo prezio murriztua ordaintzeko eskubidea egiaztatzen duen agiria, ikasketa-zerbitzuengatik ordaindu beharreko prezioak finkatzeko Eusko Jaurlaritzak onartzen duen aginduaren arabera.

d) Lehen matrikulatuta egon diren unibertsitate edo ikastegitik espedientea lekuz aldatzeko gastuak ordaindu izanaren gordekina (unibertsitate honetako ikastegi batetik bestera edo beste unibertsitate batetik hona aldatutako ikasleentzat besterik ez).

e) Gizarte-Segurantzako afiliazio-agiria eskola asegururako (beste unibertsitate batetik hona aldatu direnek bakarrik).

f) Beka eskatuz gero, eskaeraren inprimakia edo eskaeraren frogagiria.

Erasmus programako edo antzeko nazioarteko programetako ikasle atzerritarrak.

31. artikulua.- Ikasle hauek ez dute UPV/EHUn matrikularik ordaindu beharko, zeinek bere unibertsitatean ordainduta izango baitu.

Honako agiriok aurkeztu beharko dituzte:

a) Erasmus ikasle atzerritarrek edo antzekoek UPV/EHUn izena emateko inprimakia (orri horretan koordinatzaileak zehaztu beharko ditu ikasleak egingo dituen irakasgaiak, espedientean alta emateko).

b) Nortasun-agiriaren edo pasaportearen fotokopia.

c) Argazkia.

d) Jatorrizko unibertsitatean egindako matrikularen gordekinaren fotokopia.

e) E-111 dokumentuaren fotokopia edo, ezinezkoa balitz, aseguru indibidualaren erreferentzia.

Sicue-Seneka edo antzeko programen bidez beste unibertsitate batzuetatik datozen ikasleak.

32. artikulua.- Ikasle hauek ez dute UPV/EHUn matrikularik ordaindu beharko, zeinek bere unibertsitatean ordainduta izango baitu.

Honako agiriok aurkeztu beharko dituzte:

a) Sicue-Seneka edo antzeko programetako ikasleek UPV/EHUn izena emateko inprimakia (orri horretan koordinatzaileak zehaztu beharko ditu ikasleak unibertsitate honetan dagoen bitartean egingo dituen irakasgaiak, bere espedientean alta emateko).

b) Nortasun-agiriaren fotokopia.

c) Argazkia.

d) Jatorrizko unibertsitatean egindako matrikularen gordekinaren fotokopia.

e) Eskola aseguruaren ordainagiriaren fotokopia edo, ezinezkoa balitz, aseguru indibidualaren erreferentzia.

Behin-behineko matrikula.

33. artikulua.- Beste unibertsitate batean onartua izateko zain dagoela agiri bidez frogatzen duen ikasleak behin-behineko matrikula egin ahal izango du UPV/EHUn, bertako prezio publikoak behin betiko matrikula egitean ordainduz.

Matrikula ordaintzea.

34. artikulua.- 1.- Ikasleek unibertsitateari ordaindu beharrekoa Eusko Jaurlaritzako Hezkuntza, Unibertsitate eta Ikerkuntza Sailak zehaztuko du akademi urte bakoitzerako.

2.- Prezio publiko murriztuak ordaintzeko edo preziook ordaintzetik salbuetsita egoteko eskubidea izateko, matrikula egiteko epearen barruan bete eta egiaztatu beharko dira horretarako baldintzak.

3.- Ikasle bakoitzak matrikulagatik ordaindu beharreko zenbatekoa matrikula egiteko momentuan kalkulatuko da automatikoki.

4.- Matrikula ordaintzeko erak:

- Ikasleak unibertsitateari kontu-zenbaki bat eman eta ordainketa horra helbideratzea. Matrikularen ordainketa helbideratzeko azken eguna ikasturte bakoitzeko otsailaren 28a izango da.

- Matrikula egiten duenean ikasleari ematen zaion ordainagiri pertsonalizatuaren bidez, eta Prezioen Aginduan zehaztutako epeetan, ikasleak epeka ordaintzea erabakitzen badu. Matrikula-orrian adierazten diren hiru aurrezki-kutxetako batean sartu beharko dute dirua.

Aurrezki-kutxak zigilua ipiniko du ordainagirian eta baliozkotu egingo du hala egindako ordainketa. Ikasleak ordainketa egin bezain laster, jatorrizko ordainagiria eraman beharko du ikastegiko idazkaritzara. Ikasleak ordainagiriaren kopia bat gordeko du, eta horixe izango da ordainketa egiaztatzeko bere esku izango duen agiria. Ikastegietako idazkaritzek ordainagiri pertsonalizatuaren jatorrizkoa baino ez dute onartuko ordainketa egiaztatzeko.

5.- Ikasleak epeka ordaintzea erabakitzen badu, Eusko Jaurlaritzak prezio publikoei buruzko aginduan zehaztutako epeak errespetatu beharko ditu.

6.- Matrikula egitean pertsona batek matrikula ordaintzen ez badu beka baten zain dagoelako, eta gero beken epaimahaiak beka behin-behinekoz ukatzen badio, matrikulako dirua ordaindu beharko du, nahiz eta beka ukatzearen kontrako alegazioak aurkeztu.

7.- Ikasketa-plana desagertu egin delako egokitu diren irakasgaiek ez dute kosturik izango, prezioen aginduak bestela zehazten ez badu bederen.

8.- Matrikula hedatzeagatiko ordainketetan eta beka ukatzen denean, ezin izango da zatika ordaindu.

9.- Ezohiko ebaluazio-probaren kalifikazioen zain dauden ikasleek hiru epetan ordaindu beharko dituzte beti matrikula «iragankorrak», salbu eta matrikulan ordaindu beharreko kopurua txikiagoa denean Prezioen Aginduan epeka ordaintzeko zehaztutako gutxienekoa baino. Lehenengo epea behin-behineko matrikularen arabera kalkulatuko da. Ikaslea kalifikatu eta behin betiko matrikula zein izango den jakin ondoren, automatikoki kalkulatuko dira bigarren eta hirugarren epeetan ordaindu beharreko diru kopuruak.

Matrikula baliogabetzea.

35. artikulua.- 1.- Euskal Autonomia-Erkidegoko Administrazioaren Tasa eta Prezio Publikoei buruzko Legearen Testu Bateratua onartu zuen irailaren 11ko 1/2007 Legegintzako Dekretuak 34.6 artikuluan dioenaren arabera, nahiz eta ikasleek legeak agindutako epe eta moduan eskatu matrikula baliogabetzea, ez zaio inolaz ere itzuliko ordaindutako dirua.

2.- Matrikularen prezioaren zatiren bat edo ezer ez ordaintzeak matrikula baliogabetzea ekarriko du, eta ikasleak ez du eskubiderik izango dirurik bueltan jasotzeko, hori guztia Iraute Arauetan ezarritakoari jarraiki.

3.- UPV/EHUk ikusiko balu ikasleak ez duela betetzen matrikula egiteko baldintzaren bat, ezetsi egingo du matrikula egiteko eskaria, eta ordaindutako dirua itzuliko dio ikasleari.

4.- Ikasturte bakoitzean ikasleek abenduaren 31 arteko epea izango dute matrikula baliogabetzeko. Data horretatik aurrera ez da baliogabetuko matrikularik, baldin eta unibertsitateak baimena beren-beregi ematen ez badu, ikasleak eskaera egin eta gero.

5.- Tasak ez ordaintzeagatik matrikula baliogabetzen zaien ikasleek ez dute bueltan jasoko ordaindutako dirua eta ordaintzeke dituztenak unibertsitatearen aldeko zortzat hartuko dira, interesatuari jakinaraziko zaion erabaki batean jasoko dena.

6.- UPV/EHUrekin zorrak dituztenek ezin izango dute aurrerantzean beste matrikularik egin. Halaber, ez zaie emango titulurik edo ziurtagiririk, ez eta espediente akademikoari buruzko informaziorik ere. Era berean, ezin izango dituzte UPV/EHUren zerbitzuak erabili.

7.- Unean uneko ikasturteko matrikula berreskuratu nahi duten ikasleek maiatzaren 15a baino lehen ordaindu beharko dute zor duten dirua.

8.- Egun horretatik aurrerako ordainketek ez dute inolaz ere eskubiderik emango indarrean dagoen ikasturteko matrikula berreskuratzeko eta 6. puntuan aipatutako eskubideak berreskuratzeko besterik ez dute balioko.

9.- Matrikula baliogabetu duten ikasle berriek berriro eman beharko dute izena unibertsitatean ikasketak egiten hasi nahi badute.

10.- Ikasle bekadun moduan matrikulatzeko, bekaren deialdian eskatzen diren baldintza akademikoak matrikula egiterakoan bete beharko ditu ikasleak, eta aurretik beka-eskaera egina eduki beharko du, matrikulatzerakoan beka-eskaeraren agiria matrikulatzeko behar diren beste dokumentuekin batera agertuz. Bestela, matrikulako prezioak ordaindu beharko ditu, nahiz eta horrek ez duen eragotziko beka eskatzea.

Hala ere, ikasle batek eskakizun akademikoak betetzeagatik bekadun moduan egin badu matrikula eta ondoren beka ukatu egin bazaio eta ukoa jakin ondoren matrikula baliogabetzea eskatzen badu, ikasle hori ez da zorduntzat hartuko.

Matrikula lehenengo epean egiten duten ikasleak berriak badira eta matrikula egiterakoan bekaren gordekinik ez badute, ikasle ez bekadun gisa matrikulatuko dira. Behin beka-eskaria eskuratuta, matrikula egin duten ikastegiko idazkaritzan aurkeztu behar dute, matrikula-mota eguneratu eta bekadun gisa agertzeko.

Ohorezko matrikulak.

36. artikulua.- Ohorezko matrikulak prozedura honen arabera gestionatuko dira:

a) Irakasgaietan ohorezko matrikulak eman ahal izango dira, matrikula bat hogei ikasletako multzo bakoitzeko edo hogei ikasletatik beherako ikasle multzo bakoitzeko, irakasgai bateko ikasle guztiak zenbatzeko, akta bakarra aintzat hartuz, leudekeen taldeak egonda ere.

b) Ohorezko matrikulak eskubidea ematen du matrikulan deskontua izateko, baina hori aplikatzen da ikasketa berberetan egiten den hurrengo matrikulan, edo lehenengo zikloa egin ondoren bigarren zikloko ikasketak hastean.

Murrizketa horiek UPV/EHUko ikasleei aplikatuko zaizkie, ez beste inori, ez eta beste unibertsitateetatik datozenei ere, izan publikoa zein pribatua.

c) Plan zaharretik plan berrirako egokitzapenen kasuan, deskontua egingo da zenbat kredituren parekoa den ohorezko matrikulaz gaindituriko plan zaharreko irakasgaia.

d) Batxilergoko irakasgaietan lorturiko ohorezko matrikulek ez dute murrizketarako eskubiderik ematen. Kalifikazio orokorra ohorezko matrikula denean baino ez dute izango ikasleek matrikula ez ordaintzeko eskubidea unibertsitatean lehenengo aldiz matrikulatzean.

Bigarren matrikulaldia.

37. artikulua.- Bigarren lauhilekorako bigarren matrikulaldia zabaltzen duten ikastegiek Ikastegiko Batzarrean onartu beharko dute horretarako erabakia eta idazkaritzetan egingo da, 2012.eko otsailaren 17 baino lehenago. Bigarren matrikulaldia irakasgai hauetarako baino ez da zabalduko:

a) Aldez aurreko baldintzak dauzkaten irakasgai edo ikastaroak.

b) Hautazko irakasgaiak eta aukera askekoak, plaza hutsik baldin badago.

c) Enborreko irakasgaiak eta nahitaezkoak, ikastegiko batzarrak hala onartu badu.

V. KAPITULUA

IRAKASKUNTZA-IKASKUNTZAREN PLANGINTZA ETA EBALUAZIOA

Irakaskuntza-ikaskuntzaren plangintza.

38. artikulua.- Berdintasuna, irakaskuntzaren baldintzetan eta irakaskuntzaren gestioan.

Ikastegiko zuzendaritza arduratuko da ikastegian ematen diren titulu eta espezialitateen ikasketak berdintasunez gestionatu eta pareko baldintzetan irakats daitezen.

39. artikulua.- Hezkuntza-programa eta irakaskuntza-gidak.

1.- Akademi ikasturterako matrikula-epea ireki aurretik, ikastegiak tituluaren hezkuntza-programari buruzko informazioa argitaratuko du web orrian eta ikasle guztien eskura jarriko, sailek ikastegiko titulazioetan irakasten diren irakasgai guztiei eta bakoitzari buruz onetsitako irakaskuntza-gisa, bai eta balioespenerako proben eta bestelako irakaskuntza-jardueren egutegia ere.

2.- Irakasgaien irakaskuntza-gidetan, gutxien dela, hezkuntza-helburuak, programa bera, programatutako jarduerak eta ebaluaziorako irizpideak agertuko dira, azken hauen kasuan, hala behar izanez gero, proba bakoitzaren haztapena ere. Hezkuntza-helburuek, programatutako jarduerek eta ebaluaziorako irizpideek elkarrekiko koherentzia agertu beharko dute. Irakasgaiaren oinarrizko programa talde ezberdinetako ardura duten irakasleek adostu beharko dute. Ados jartzen ez badira, Saileko Kontseiluak, irakasgaia ematen duten irakasle guztiak entzun ondoren, guztien irakatsi beharreko gaiei buruzko erabaki arrazoitua hartuko du, bai eta onartuko diren salbuespenei buruzkoa ere.

3.- Ikastegiak behar besteko aurrekotasunez jasoko dute sailetatik jaso beharreko informazioa.

4.- Ikastegiak ikasgelako jardueraren ordutegia argitaratu beharko du (eskola magistralak, mintegia, ikasgelako praktikak edo ikasgelan egin beharreko beste edozein jarduera) eskola-astetan antolaturik. Behar-beharrezkoa izango da, nolanahi ere, irakaskuntza magistralerako ordutegia ezartzea. Irakaskuntzaren beste mota batzuen programazio zehatza aurreikusi ezin balitz, gutxienez, hauen inguruko aurreikuspenak finkatu beharko dira.

5.- Eskoletako zuzendariek eta fakultateko dekanoek, bertako baliabideen heinean, talde-bidaiak eta ikasketa-bidaiak egitea erraztu eta bultzatuko dute. Bidaiok behar besteko aurrekotasunaz programatuko dira, behar bezala antolatzeko eta beharrezko baimen akademikoak eta balizko laguntzak eskuratzeko.

6.- Argitaratutako programazioaren barruan, programatutako jarduera bakoitzaren ardura izanen duen irakaslearen izena agertuko da.

7.- Matrikulaturiko ikasleek talde jakin batean sartzeko eskaria egin ahal izango dute, ikastegi bakoitzak horretarako zehaztutako epean. Eskarien kopurua taldeko plazen kopurua baino handiagoa izango balitz, ikasleak irizpide objektiboen arabera banatuko dira taldeetan. Irizpideok argitara emango dira taldez aldatzeko eskariak egiteko epea hasi baino lehen. Edozelan ere, 5. eta 6. deialdietako ikasleek izango dute lehentasuna.

8.- Sail edo ikastegiek ikasleak ezagutzeko bana ditzaketen identifikazio-fitxak betetzea borondatezkoa izango da ikasleentzat. Edozein kasutan, fitxa honek ikaslea identifikatzeko ezinbesteko datuak besterik ez ditu jasoko, hau da: argazkia, izen osoa, ikastaroa, irakasgaia eta telefonoa.

40. artikulua.- Irakaskuntzaren Antolaketarako plana.

1.- Ikastegiko dekanotza edo zuzendaritzak hurrengo ikasturterako irakaslana antolatzeko plana jakinaraziko die zerikusia duten sail guztiei. Sailek, berriz, ikastegi bakoitzean eskolak ematen dituzten irakasle guztien irakaslanen behin betiko esleipena jakinaraziko dio ikastegi bakoitzari, tutoretza-orduak barne. Informazio guzti hau publiko egingo da lauhileko bakoitzeko lehenengo 15 egun naturalen barruan ikastegiko iragarki-taulan eta bertan egongo da lauhileko osoan zehar.

2.- Ikastegi eta sailaren arteko harremanetarako, sailak ordezkari bat izendatuko du irakaskuntza eskaintzen duen ikastegi bakoitzean, ahal bada arduraldi osoa duena. Sailak pertsona horren izena jakinaraziko dio ikastegiko zuzendaritzari. Ikastegi bakarrean irakasten duten sailen kasuan, ordezkaria saileko zuzendaria bera izango da. Ikastegi batean baino gehiagotan irakasten duten sailen kasuan, berriz, ordezkari hori sailaren barne arauei jarraiki izendatuko da, baina, betiere, ikastegian eskolak eman eta ikastegiari atxikitakoa izango da.

3.- Ezarritako tutoretza-erregimena ikasturte osoan mantendu beharko da, azken deialdia egin eta burutu arte. Tutoretza-ordutegiak aldatu ahal izateko, ikastegiko zuzendaritzaren edo dekanotzaren baimena beharko da eta, gutxien dela, aldaketak indarrean jarri baino 3 eskola-egun lehenago argitaratu beharko dira.

4.- Irakats eskaintza egitean talde bakoitzeko irakasleen izenak eta NAN zenbakiak sartu beharko dira Akademia-Antolakuntzako datu basean, kalifikazio-orrietan eta aktetan datu horiek ager daitezen, nahiz eta horrek ez duen eragotziko 45.4 artikuluaren arabera beharrezkoak izan daitezkeen aldaketak.

41. artikulua.- Koordinazio-erregimena.

1.- Graduko tituluetan, titulazioaren koordinazioa eta jarraipena bermatu ahal izateko, ikastegiko batzarrak titulazioko koordinatzailea izendatuko du, bai eta ikastaro edo moduluko koordinatzaileak ere. Ikastaro edo moduluko koordinatzaileak ikastaro edo moduluko gaitasunen garapenaz arduratuko dira eta ikasketa-taldeen koordinazioa, ikaslearen lanaren banaketa orekatua eta hezkuntza-prozesuaren hobekuntza jarraiturako proposamena ere, ikastaro edo moduluan zehar jasotako datu eta segurantzetan oinarri hartuta.

2.- Ikastegiak ahaleginduko dira, ordutegiak zehazterakoan, gutxienez, astean bi ordutako tartea beste jarduera-mota batzuetan taldeka jardun ahal izateko.

Ikaskuntzaren ebaluazioa.

42. artikulua.- Ebaluazioaren printzipio nagusiak.

Ikasleek berdintasuna eta justizia bermatuko dituen ebaluazioa izateko eskubidea dute, jasotako irakaskuntza-mailaren arabera.

43. artikulua.- Ebaluatzeko metodoak.

1.- Ikasleen gaitasunak eta jakintzak ebaluatzeko, ebaluazio etengabearen prozesua, azken ebaluazioaren bidezkoa edo balioespen mistoaren bidezkoa (azken bion konbinazioa) baliatu ahal da.

Gardentasuna eta ekitatea bermatzearren, sistema bakoitzean edo ebaluazio-tresna bakoitzean erabilitako balioespenerako irizpideek agerikoak eta argitaratuak beharko dute izan.

Edozelan ere, ebaluazioa beti izan beharko da aurretik ezarritako eta ikasturtearen hasieran argitaratutako irizpideen araberakoa.

a) Etengabeko ebaluazioa.

Etengabeko ebaluazioa da, irakaskuntza-gidetan definitutako prozesu, tresna eta estrategia didaktikoen multzoa, irakaskuntza-ikaskuntzaren prozesuan zehar modu progresiboan aplikatu beharrekoak. Ebaluazio-sistema eta tresna hauek askotarikoak izan daitezke oso: jardueretan parte hartzea, praktikak, ahozko eta idatzitako lanak, kasuei buruzko txostenak, proiektuen garapena, problema ireki eta praktikoen ebazpena, irakaskuntza-karpeta bat eta bestelako ebaluazio-proba; eta, edonola ere, gaitasun espezifiko eta zeharkako guztien garapena bermatu behar da eta irakasgaiaren irakaskuntza-gidak agertu beharko ditu.

b) Ebaluazio mistoa.

Irakasgai bat ebaluazio mistoaren bidez kalifikatuko da, baldin eta gutxien dela programaren % 30 etengabeko ebaluazioaren sistemaren bidez balioesten bada. Etengabeko balioespen hau azken proba batek osatuko du, unibertsitatearen akademi egutegian ezarritako epearen barruan egin beharrekoa. Balioesteko mota bakoitza balioesten duen programaren portzentajearen araberakoa izango da.

c) Azken ebaluazioa.

Ikasleari, justifikatutako arrazoiengatik (lanari lotutako arrazoiak, pertsonak izatea bere kargura; % 33ko ezintasun-maila edo handiagoa duten ikasleak; goi-mailako kirolaria; bidaiak edo denbora asko eskatzen duten kultur eta arte-jarduerak; goi-mailako beste ikasketa batzuekiko bateragarritasuna; eta mota desberdinetako karguekiko bateragarritasuna: kargu politikoak, sindikalak, ikasleen ordezkaritza, elkarteetakoak, GKEkoak edo beste batzuk) ezin bazaio egin etengabeko ebaluazioa, bukaerako proba bakarra egingo zaio, irakasgaiko ezagutzak eta gaitasunak bereganatu dituela egiazta dezan. Proba horrek, egiten den moduan egiten dela, irakasgaiko notaren % 100 balio beharko du.

Irakasgaiaren ezaugarri eta edukiengatik azterketaz gain irakasgaiaren beste alderdi batzuk gainditu behar badira, praktikak esaterako, bukaerako probaz gain kontuan hartuko beharko da beste alderdiak gainditu diren ala ez.

2.- Ekitatea bermatzearren, irakasgaien irakaskuntza-gidek balioespenerako irizpide komunak ezarriko dituzte, ikasle-talde ezberdinetan baliatzekoak. Ildo honetan, irakasleek probaren ezaugarriak eta ebaluatzeko irizpideak adostu beharko dituzte. Adostasunik ez balego, Saileko Kontseiluak, ukituriko irakasle guztiei entzun ondoren, erabakiko du, modu arrazoituan, ebaluazio-mota, bai eta aplika litezkeen salbuespenak ere.

3.- UPV/EHUko estatutuetako 68. artikuluaren arabera, proba akademikoak, UPV/EHUn sartzekoak barne, egokitu egingo dira pertsona ezinduen beharretara, prozedura, era eta denborari dagokienean.

Honek ez du inolaz ere probaren edukia aldatzea ekarriko eta eguna ere berbera izan beharko da.

4.- Erizaintzako diplomaturan eta Irakasleen titulazioetan, bai eta nahitaez egin beharreko praktikak dauzkaten graduetan ere, ikasleak urtean deialdi bakarra izango du praktiketako irakasgaia gainditzeko, baldin eta eskola horiek ematen dituzten ikastegiek beren deialdi-sistema ezartzen ez badute; deialdiok, betiere, helburu akademikoak bete izana bermatu beharko dutelarik.

5.- Ebaluazio-proben programazioa ezin izango da aldatu, ez bada, proba behar bezala egitea ezinezko bihurtuko lukeen ustekabeko ezintasuna gertatzen. Salbuespenezko egoera hauen aurrean, titulazioetako arduradunek egin beharreko kontsultak egingo dituzte ukitutako irakasle eta ikasleekin programazio berria proposatu eta ezartzearren, autonomi arautegian eta unibertsitateen berezko arauetan ezarritakoarekin bat etorrita.

Ezin izango da irakasgaiaren ebaluazioa egin irakasleek behar beste landu ez dituzten gaien inguruan, nahiz eta gaiok irakasgaiaren programan agertu.

6.- Edozein ebaluazio-proba egiterakoan, ikasleari identifikazioa eskatu ahal izango zaio.

7.- Unibertsitateko kide anitzeko ordezkaritza organoetako bileretara joateagatik edo unibertsitateko araudian jasotako arrazoiengatik, programatutako ebaluazio probetara joan ezin diren ikasleek eskubidea izango dute proba beste egun eta ordu batean egiteko.

Unibertsitateak ardura hartuko du azterketa garaian eta azterketen aurreko egunetan bilerarik ez egiteko.

44. artikulua.- Ahozko probak eta probak egiteko erregimena.

1.- Programa litezkeen ahozko ebaluazio-probak publikoak izango dira eta ikasleek, zeinek berea, balioespen-proba grabatzeko eskatu ahal izango du.

2.- Ariketaren batean ikasleak iruzurrik egingo balu, horrek «gutxiegi» kalifikazioa ekarriko lioke ariketa horretan, izan litzakeen bestelako erantzukizunez gain.

45. artikulua.- 1.a.- Kalifikazioen argitarapena.

Irakasleek azken proben kalifikazioak argitaratuko dituzte ariketa egin eta 10 egun naturalen epean. Horretarako, unibertsitateak beren esku jartzen dituen baliabide informatikoak erabiliko dituzte. Dena dela, nahi izanez gero, iragarki-oholetan ere argitaratu ahal izango dituzte. Hala egitera, ikasleak NAN zenbakiaz identifikatuko dira, huts-hutsean. Era batera zein bestera, argi agertu beharko da argitaratze-data, kalifikazioak berrikustea eskatzeko epea ezartzeari begira. Edonola ere, uztaileko deialdiko kalifikazio-prozesu osoa hilabete horren barruan egin behar da.

1.b.- Aktak.

Irakasgaiaren aktetan ikasleak lorturiko kalifikazioak agertuko dira. Akta hauek, behar bezala beteta, ikastegiko zuzendaritzara bidaliko ditu irakasleak. Orduan idazkari akademikoak irakaslearen sinadura egiaztatuko du eta kalifikazioak berehala argitaratuko dira UPV/EHUko web orrian, ikasleek ikus ditzaten. Dena dela, nahi izanez gero, iragarki-oholetan ere argitaratuko dituzte. Hala eginez gero, ikasleak NAN zenbakiaz identifikatuko dira, huts-hutsean. Aktetan akatsik antzemango balitz, beroriek zuzentzeko diligentziak erantsiko litzaizkioke aktari behealdean.

Sinadura elektronikoa erabili nahi bada eta aktan irakasle arduradun bat baino gehiago badago, bide hori erabiltzeko beharrezkoa izango da akta sinatu behar duten irakasle guztiak ados jartzea.

1.c.- Irakasleek kalifikazioen igorpena ez betetzea.

Akademia Antolakuntzako Errektoreordetzak epeak bete ez dituzten irakasleen zerrenda bidaliko die dagokien sailei. Kalifikazioak dagokion datan argitaratzen ez badira, unibertsitateak zenbait neurri har litzake, UPV/EHUko Estatutuek ezarritakoari jarraiki. Hori alde batera utzita, ikastegietako zuzendaritzak/dekanotzak oharra bidali ahalko die eginbehar hori bete ez duten irakasleei. Akta sinatu behar duen irakasleak dena delako arrazoiengatik sinatu ezin balu, irakasgaiaren ardura daukan sailak ordezko irakasle bat izendatuko luke akta sinatzeko, aurreko puntua betetzeari begira.

2.- Ikasle guztiek kalifikazioen doaneko ziurtagiria jaso ahal izango dute, eskatuz gero. Dokumentu horretan jasoko dira ikaslea ikasturte horretan matrikulatuta egon den irakasgaien kalifikazioak, informaziorako baino ez da izango eta ikastegiko idazkaritzak emango du, administratzaileak edo idazkaritzaren buruak sinatuta.

3.- 47. artikuluan aurreikusitakoa eragotzi barik, 1. deialditik 4. deialdira bitartean, irakasgai bateko taldeek irakasle desberdinak dauzkatenean, irakasleok kalifikazio-sistema bateratua erabili ahal izango dute. Kasuotan irakasle bakoitzak bere taldeenak sinatuko ditu.

4.- Aurreko zenbakian aurreikusitakoa gorabehera, eta kasu berberetarako, ikastegietako arautegiek ebaluazio bateratua ezarri ahal izango dute 1., 2., 3. eta 4. deialdietarako. Ebaluazio bateratu hori kasuan kasuko irakasgaiko hiru irakaslek, edo guztiek, osatutako epaimahaiaren bidez egingo da. Epaimahaiok baldintza hauek bete beharko dituzte:

Epaimahaiak irakasgai bereko taldeei dagozkien irakasleek osatuko dituzte. Taldeetako irakasleak epaimahaia osatzeko behar diren kideak baino gutxiago direnean, epaimahaia osatuko da ikastegian jakintza-arlo horretan kategoria handiena eta antzinatasun handiena duen irakaslearekin.

Epaimahaian talde bakoitzeko irakaslea egon beharko da nahitaez.

Irakasgaia ematen duten irakasleak epaimahaia osatzeko behar diren kideak baino gehiago direnean, honakoek osatuko dute epaimahaia: taldeko irakasle arduradunak, eta ikastegian jakintza-arlo horretan kategoria altuena eta antzinatasun handiena duten irakasleek, epaimahaiko toki guztiak osatu arte.

Kategoria handiena eta arloan (edo bestela, administrazioan) antzinatasun handiena daukan irakaslea izango da epaimahaiaren buru. Epaimahaiaren osaera ikasturteko lehenengo hiruhilekoan argitaratuko da.

Kasu hauetan, bai kalifikazioak (sailetako iragarki-oholetan argitaratuko direnak) bai aktak, talde bakoitzeko irakasleak eta epaimahaiaren buruak sinatuko dituzte.

46. artikulua.- Bosgarren, seigarren eta salbuespenezko deialdietako epaimahaiak Ikastegiko Batzarrak izendatuko ditu ikasturte bakoitzeko lehenengo hiruhilekoan, sailak entzun eta gero. Hauek saileko hiru irakaslek osatuko dituzte, ahal dela irakasgaiari dagokion jakintza-arlokoak eta kontuan izanda irakasgaia zein hizkuntzatan ematen den; probaz gain, epaimahaikideek ikaslearen historiala eta gainerako gorabehera akademikoak hartuko dituzte kontutan. Epaimahaia osatuko duten pertsonen zerrenda ikasturte bakoitzeko lehenengo hiruhilekoan jarriko da jendaurrean.

Epaimahaien erabakien kontra erreklamazioak jarri ahal izango dira, 47.2 artikuluan zehaztutako prozedurari jarraiki. Ebaluazio-proba epaimahaiak berrikusiko du halakoetan.

Berrikusketarako prozedura.

47. artikulua.- 1.- Sailek ariketaren zuzenketa eta berrikusketei buruzko erreklamazioak ebazteko batzorde bat izendatu beharko dute, gutxienez, jakintza-arlo bakoitzeko hiru irakaslek eta ikasleen kontseiluko buruak edo berau ordezka dezakeen pertsonak osatuta, bai eta hauen ordezkoak ere. Sailak neurriak hartuko ditu batzordeko irakasleak probak lehenengo aldiz zuzendu duten berberak izan ez daitezen. Epaimahai horren buruak irakasle iraunkor bat izan beharko du. Kalifikazioa aldatu behar izanez gero, aldaketa batzordeko irakasleek egingo dute, dela bozketa bidez dela batez besteko nota kalkulatuta.

2.- Honako prozedura hau beteko da:

a) Kalifikazioak argitaratzea.

Kalifikazioa argitaratzean, probak berrikusteko tokia, eguna eta ordua zehaztu beharko da; berrikuspenerako epea, bestalde, kalifikazioak argitaratu eta gutxienez hiru egun naturaletakoa eta gehienez sei egunetakoa izango da. Kalifikazioa berrikusten denean ikasleak bertan egoteko eskubidea izango du, berrikusketa pertsonal eta banakakoa izanda. Ikaslea ezin bada joan berrikuspenera arrazoi akademikoengatik edo behar bezala justifikatutako arrazoi pertsonal larriengatik, beste egun batean egiteko eskubidea izango du. Egun hori irakaslearekin adostu beharko du, gorago aipatu den epearen barruan. Kalifikazioak berrikusteko epea amaituta, irakasleak akta ofizialak sinatuko ditu hiru egun naturalen epean eta ikastegiak berehala argitaratuko ditu.

b) Sailari erreklamazioa aurkezteko era.

Ikaslea ados ez badago berrikuspenarekin, kexa idatzia aurkeztu ahal izango dio saileko zuzendariari sei egun naturalen epean, aktak argitaratu zireneko egunetik hasita.

Xede honetarako izendatutako batzordeak, aurreko balioespen-prozesuan parte hartu duten irakasleek ezin osatuko dutenak erreklamazioa aztertuko du eta, taldeko irakaslearen iritzia entzun ondoren eta egoki deritzen ekintzak burutu ostean, ikasleari entzun eta gero, erabaki arrazoitua hartuko du erreklamazioaz. Erabakia gehienez ere zortzi egun naturalen epean hartu beharko du batzordeak, erreklamazioa jarri zen egunetik zenbatzen hasita. Ikasleari eta taldeko irakasleari eta ikastegiko Idazkaritzari jakinaraziko zaie erabakia, jakinaren gainean egon daitezen eta behar diren ondorioak sor ditzan eta, hala behar izanez gero, akta aldatuko da, ikastegiko idazkariaren diligentziaren bidez.

c) Ikastegiari erreklamazioa aurkezteko era.

Ikaslea sailari aurkeztutako erreklamazioaren ebazpenarekin ados ez balego, idatziz, erreklamazioa aurkeztu ahal izango dio ikastegiko dekano edo zuzendariari, lau egun naturalen epean.

Ikastegi bakoitzean batzorde bat eratuko da, gutxienez batzordearen buruak, idazkariak eta beste irakasle batek osatuko dutena. Epaimahai honen bileretara ikastegiko ikasleen kontseiluko burua edo berau ordezka dezakeen pertsona joango da.

Batzorde horrek, gehien dela, hamar egun naturalen epean eta behar diren txostenak eskatu ondoren, kasua aztertuko eta erabaki arrazoitua hartuko du eta ikasleari eta saileko zuzendariari jakinaraziko zaie, eta zuzendariak, berriz, taldeko irakasleari eta ikastegiko idazkariari helaraziko die, jakinaren gainean egon daitezen eta behar diren ondorioak sor ditzan. Hala behar izanez gero, akta aldatuko da, ikastegiko idazkariaren diligentziaren bidez. Batzordeko kideak ezin izango dira izan ikasleak erreklamatutako kalifikazioan esku hartutakoak.

d) Irakasgaitzat hartzen diren karrera-amaierako proiektuen kasuan berrikuspena 47.2 artikuluan zehaztutako prozedurari jarraiki egingo da.

Edozelan ere, karrera-amaierako proiektuak aztertzen dituzten epaimahaiak sail bateko baino gehiagoko kideek osatzen dituztenez, berrikuspena epaimahaiak egingo du, eta erreklamazioa, lehendabizi, ikastegi-batzarraren batzorde eskudunari aurkeztuko zaio.

e) Gorako errekurtsoa.

Ikastegiko batzarraren erabakiaren aurka interesatuak, hilabeteko epean, gorako errekurtsoa jarri ahal izango dio errektoreari. Honek, sailean hartarako osaturiko batzordearen eta Ikastegiko batzarraren txostenak ikusirik eta beharko liratekeen aholkuak jasorik, erabakia emango du, honela administrazio-bideari amaiera emanik.

f) Proba berria egitea.

Ikasleak proba berri bat egiteko eskubidea izango du honakoetan:

f.1.- Azken kalifikazioa jartzeko proba edo probaren zati bat programan ageri ez ziren gaien ingurukoa izan bada edo, programan agertu arren, irakasleak landu ez zituen gaien ingurukoa.

f.2.- Ezinbestez, baldintza fisiko edo bestelakoengatik ezinezkoa izan denean ikasleentzat proba normaltasunez egitea. Horrelakoetan, irakasleak, atxikita dagoen sailaren oniritziarekin eta ikastegiarekin koordinatuta, egoera aztertuko du eta, behar izanez gero, probak egiteko beste egun bat izendatuko du, har ditzakeen bestelako neurri bereziak baztertu gabe.

f.3.- Irakasleak venia docendirik ez badu.

f.4.- Probak egin aurretik ikasleek ezagutzen ez zuten ebaluazio-sistema erabili badu irakasleak.

f.5.- Ikastegiko erreklamazio-batzordeak hala erabakitzen duenean, ariketaren emaitzak anormalak iruditzen zaizkiolako, gainditu ez duten ikasleen kopurua askoz ere handiagoa egon delako arrazoiz espero zitekeena baino irizpide akademikoak kontuan hartuta, hots, titulazioaren testuingurua eta kasuan kasuko irakasgaiak aintzat izanik.

48. artikulua.- 1.- Ikastegiko zuzendaritza edo dekanotzak balioespen-ariketa bakoitza egiteko ordua eta ikasgelaren berri eman beharko du, gutxienik, ariketak hasi baino hilabetea lehenago.

Ariketen datak arrazoi justifikatuengatik aldatzeko proposamenak sailak egingo ditu, eta dekanoak/zuzendariak onartu beharko ditu, ikastegiko Ikasleen Kontseiluaren iritzia entzun ondoren. Aldaketak berehala argitaratuko dira ikastegiko iragarki-oholean, betiere aldatutako ebaluazio-proba egin baino 15 egun natural lehenago, gutxien dela.

2.- Ikasleek, eskatuz gero, ebaluazio-probara joan izanaren ziurtagiria jasoko dute.

3.- Enborreko edo nahitaezko irakasgai biren ebaluazio-ariketaren datak batera gertatuz gero, irakasgairen bat errepikatzen ari diren ikasleei kalterik ez egiteko, bien artean maila goragokoa den irakasgaiko irakasleek jarriko dute data.

4.- Enborreko edo nahitaezko irakasgai baten eta hautazko irakasgai baten ebaluazio-ariketaran datak batera gertatuz gero, hautazko irakasgaiaren eguna aldatu beharko da.

5.- Ebaluazio-ariketa bat baino gehiago egun berean suertatuz gero, ikasleak ebaluazio-proba eguna baino gutxienez 15 egun natural lehenago eskatu beharko dio irakasleari data aldatzeko.

6.- Bi balioespen-ariketa batera jarri dira baldin eta ariketa biak egun berean eta txanda berean (hau da, goizez edo arratsaldez) jarri badira. Txanda aldaketa 14:00etan gertatzen da.

49. artikulua.- 1.- Praktiken memoriak eta lanak aurkezteko data ikasleekin hitzartuko dute irakasleek eta lanok agintzeko momentuan adieraziko. Edozelan ere, lanok ebaluatzeko ezarritako datak behar besteko aurretiaz jarri beharko dira, ikasleak berme guztiekin erabili ahal izan dezan ebaluazio-proba egiteko eskubidea.

2.- Praktiken memoriak eta lanak ikasleei itzuliko zaizkie, hala eskatuko balute, kalifikazioa jarri eta bi hilabete pasatu ondoren. Lan hauek zatiz edo osorik argitaratu edo erreproduzitzeko, edota beste edozein helburutarako erabiltzeko, egile(ar)en baimen agerikoa beharko da.

3.- Ikastegi bakoitzak karrera-amaierako proiektu edo lanak egiteko indarrean duen arautegia ikastegiko iragarki-oholean egongo da ikusgai.

50. artikulua.- Ebaluazio-proba egin ondoren, saileko irakasleek ebaluazio-probako galderen erantzun zuzenak jakinaraziko dituzte, ikasleek ahalik eta etekin handiena atera dezaten egindako probetatik.

51. artikulua.- 1.- Ikasketen egitura, garapen edo ebaluazioan gerta litezkeen anomalia edo ez-betetzeen inguruan jarritako salaketak zuzendari edo dekanoen aurrean aurkeztuko dira eta haiek organo eskudunei bideratuko dizkiete, hartu beharreko neurriak har ditzaten.

2.- Akademia Antolakuntzarako Errektoreordetzak modu sistematikoan aztertuko ditu UPV/EHUko titulazioetako irakasgaietan ikasleek lortutako emaitza akademikoak. Horrela, kalifikazio hauek ikusita, behar diren neurriak hartuko dira ikasleen emaitzak emaitza orokorretatik desbideratzen direnean. UPV/EHUko Ikasleen Kontseiluari emango zaio hartzen diren neurrien berri.

3.- Zuzendari edo dekanoaren eta ikastegiko batzarraren erabakien aurka gora jotzeko errekurtsoa aurkeztu ahal izango zaio errektoreari eta bere erabakiek agortu egingo dute administrazio-bidea.

52. artikulua.- Balioespen-probak, gutxien gutxienez, hurrengo ikasturtea amaitu arte gorde beharko dira, salbu eta ebazteke dagoen errekurtsoa badago eta, honelakoetan, errekurtsoa ebatzi arte gordeko dira. Ikastegiak ezarriko ditu proba horiek gordetzeari buruzko arauak.

53. artikulua.- Abuztua baliorik gabea izango da epeak zenbatzeko.

Ebaluazio bereziak.

54. artikulua.- 1.- UPV/EHUko ikastegi guztiek izango dituzte epaimahai bereziak, ikastegiko dekanoa edo zuzendaria edo berau ordezka dezakeen dekanotza edo zuzendaritza-taldeko edozein kide epaimahaiburu izanik.

2.- Epaimahaiaren buruaz gain, epaimahaiko idazkaria egongo da, hitz egin ahal izango duena baina ez botoa eman. Ikastegiko idazkariak hartuko du bere gain eginkizun hori. Epaimahaian, epaimahaiburu eta idazkariarekin batera, ikastegiko sei irakaslek jardungo dute. Irakasle horiek jakintza-arlo desberdinetakoak izango dira, eta ikastegi-batzarrak izendatuko ditu ikasturte bakoitzeko lehenengo hiruhilekoan. Epaimahai honen bileretara ikastegiko ikasleen kontseiluko burua edo berau ordezka dezakeen pertsona joango da. Jakintza-arlo bateko ordezkaria joan ezin bada epaimahai bereziaren bilerara, beste arlo bateko irakasle batek ordezkatu ahalko du, baina ikastegiko dekano edo zuzendariak horren berri jaso beharko du epaimahaiaren aktari erantsiko zaion agiri baten bitartez.

3.- Titulazio bat baino gehiago irakasten duten ikastegiek epaimahai bana eratu ahal izango dute ikasketa bakoitzerako, baldin eta ikastegiko batzarrak hori erabakitzen badu.

4.- UPV/EHUko Gobernu Kontseiluak ere izango du epaimahai berezia. Epaimahaiburua Ikasleen errektoreordea izango da, errektoreak eginkizunak eskuordetuta, eta beste bost irakaslek osatuko dute, Gobernu Kontseiluak berak ikasturte bakoitzeko lehenengo hiruhilekoan proposatu eta berretsiko dituenak, bat arlo zientifiko bakoitzeko.

Epaimahai bereziak ikasturtez ikasturte irizpide berberei eusten diela bermatzeko, 2009-2010 ikasturtetik aurrera, kideetako bik epaimahaian jarraituko dute hurrengo ikasturtean. Gainerakoek ikasturtea amaitzean utziko dute kargua.

Akademia-Antolakuntzarako Errektoreordetzako legelaria edo haren ordezkoa epaimahaiko idazkaria izango da, ahotsaz bai baino boturik gabe. Gobernu-Kontseiluko epaimahai bereziko kideren batek bere ikastegiko epaimahai berezian jardun badu, ordezko bat izendatuko da. Epaimahai honen bileretara unibertsitateko ikasleen kontseiluko burua edo berau ordezka dezakeen pertsona joango da, ahotsaz bai baino boturik gabe.

5.- Epaimahai horrek ebatziko ditu ikastegietako epaimahai berezien erabakien kontra jarritako erreklamazioak.

55. artikulua.- 1.- Ikasleek ebaluazio berezia eskatu ahal izango dute ikasturte bakoitzeko urrian eta martxoan. Eskaria egiteko azken eguna hilaren 15a izango da kasu bietan. Ikastegietako epaimahai bereziek martxoaren edo urriaren 31 baino lehen hartu beharko dute erabakia, hurrenez hurren.

2.- Erreklamazioak urte bakoitzeko apirilaren edo azaroaren 10a baino lehen (deialdiaren arabera) aurkeztu beharko zaizkio Gobernu Kontseiluko epaimahai bereziari, eta hil beraren 30a baino lehen ebatziko dira. Erreklamazioa behin ebatzita, eta ikaslea ados ez badago, gorako errekurtsoa aurkeztu ahal izango dio errektoreari. Hilabeteko epea izango du horretarako, Gobernu-Kontseiluko epaimahai bereziak bere erabakia jakinarazten duenetik hasita.

56. artikulua.- 1.- Irakasgaiak ebaluazio bereziaren bidez gainditzeko, ikasleek 2011-2012 ikasturtean matrikulatuta egon behar dute nahitaez.

2.- Ikasleek, baldin eta irakasgaiaren deialdi guztiak agortu ez badituzte, egokitzat hartzen dituzten alegazioetan oinarrituta, ebaluazio berezia eskatu ahal izango dute honako kasuotan:

Titulazioko kreditu guztien % 6ri dagozkion irakasgaien ebaluazio berezia eskatu ahal izango du ikasleak, gehienera, baldin eta egin beharreko kredituen % 85 gainditu badu.

Ebaluazio berezia eskatzen duten ikasleek hiru deialdi behintzat erabilita izan beharko dituzte irakasgai horietan, eta horietako baten batean gutxienez 3 puntu lortuta izan.

Inola ere ezingo da eskatu ebaluazio berezia karrera-amaierako proiektu edo lanerako eta practicumerako.

57. artikulua.- 1.- Epaimahai bereziak balioz eratzeko beharrezkoa izango da kideen erdiak bertan egotea, epaimahaiburuak eta idazkariak edo, hala dagokienean, ordezkoek beti egon beharko dutelarik.

2.- Erabakia ez bada hartu aho batez eta berdinketa gertatu bada, epaimahaiburuaren kalitateko botoak izango du lehentasuna.

3.- Idazkariak bileraren akta egingo du, kasu bakoitzean hartutako erabaki arrazoitua jasota. Erabakia eskariaren aldekoa edo kontrakoa besterik ezin izango da izan.

4.- Akta hau prozeduran interesatuak diren guztiei helaraziko zaie.

58. artikulua.- 1.- Eskaera aztertu baino lehenago, epaimahai bereziko buruak iritzia emateko eskatuko dio ikastegiko irakasgaiaren ardura duen sailari. Iritzi hori idatziz bidali beharko du sailak, arrazoiak emanda, hamar egun naturalen epean. Epaimahaiko kideren batek irakasten duen irakasgaia agertzen bada eskaeran, ikastegiko dekano edo zuzendariak ordezkoa izendatuko du.

2.- Erabakia hartzerakoan epaimahaiak ikaslearen espediente osoa hartu beharko du kontuan.

59. artikulua.- 1.- Epaimahai bereziak irakasgaia gainditutzat ematea erabaki badu, epaimahaiko idazkariak jakinaren gainean jarriko du ikaslea matrikulatuta dagoen ikastegiko idazkaria. Idazkariak «Ebaluazio bereziaz gaindituta: 5,0» nota sartuko du ikaslearen espedientean.

2.- Epaimahai bereziak irakasgaia gainditutzat ematen badu, ikasleak deialdi bat gastatuko du. Epaimahai bereziak ez badu ematen irakasgaia gainditutzat, ikasleak ez du deialdi hori agortuko.

3.- Ebaluazio bereziaz gainditutako irakasgaiaren balioa 5,0 izango da, espedientea barematzerakoan.

4.- Ikaslearen espediente akademikoan ebaluazio bereziaz gainditutako irakasgaia jasoko da, epaimahaiak erabakia eman zuen datarekin.

VI. KAPITULUA

AUKERA ASKEA

(1393/2007 Errege Dekretua baino lehenagoko ikasketa-planetan).

Definizioa.

60. artikulua.- Aukera askea da titulu bat eskuratu ahal izateko ikasleak nahitaez amortizatu (curriculumean sartu) behar duen eta kasuan kasuko ikasketa-planean horrela definituta agertzen den kredituen kopurua. Kreditu hauen lortzea (amortizatzea) bi modutara egin daiteke: bata, izaera berean eskainitako irakasgaiak gaindituz eta, bestea, prestakuntzaren jarduera osagarriak eginez.

Irakats eskaintzaren eta aukera askekoen gestioa koordinatzeko, UPV/EHUren irakats eskaintza egiteko jarraibideek ikasturte bakoitzean beren-beregi jaso beharko dute arautegi honetatik aukera askeari dagokiona eta aplikagarri dagokiona.

Ezin izango dira inolaz ere aukera askean hartu norberaren titulazioan egindako gaien eduki bera edo antzekoa daukaten gai edo ekintza akademikoak, ez eta aurretiko baldintzen edo bateraezintasunen menpe daudenak ere.

Ezinezkoa izango da ikasketa-planak orotara eskatzen dituen aukera askeko kredituak baino gehiago egitea, salbu eta honelako irakasgai berri batean matrikulatzean kopuru hori gainditzen denean.

Kredituak irakasgaien bidez amortizatzea.

61. artikulua.- 1.- Titulazioaren beraren hautazko irakasgaiak.

Ikasleak bere titulazioko hautazko irakasgai guztiak burutu ahal izango ditu kreditu horiek aukera askeko gisa konta daitezen, irakasgaiok ikasturte horretarako onartu den irakats eskaintzan azalduz gero. Hautazko kredituen soberakina aukera askeko kreditu gisa sartuko da automatikoki ikaslearen espedientean. Ikasleak aukera askeko moduan egin duen irakasgaia bere titulazioko hautazko irakasgaia bada, aukera askeko irakasgaia espedientean hautazko irakasgai gisa agertzeko eskaria egin dezake ikasleak. Aipatutako kreditu horien aitorpena ziklo bakoitzaren amaieran baino ezin da egin.

2.- Beste titulazio bateko enborreko, nahitaezko edo hautazko irakasgaiak.

Titulazio hori egiten ari ez diren ikasleei aukera askeko gisa eskainiko zaizkie irakasgai horiek.

Lehenengo zikloa bukatu ondoren bigarren ziklo batera sartzean (dela zuzenean dela prestakuntza-osagarriak gaindituta) ezin izango dira bigarren ziklo horretako irakasgaiak aukera askeko gisa egin.

Aukera askeko eskaintzan ezin izango dira eskaini plaza mugatuak dauzkaten titulazioen lehenengo ikastaroko irakasgaiak, salbu eta ikastegiak eskatutako oso irakasgai berezituak direnean eta unibertsitateko irakats eskaintzan hala baimenduta daudenean.

Jakintza-arlo artekoak izateagatik beste karrera batzuetako ikasleentzat gomendagarriagoak izan daitezkeen irakasgaiak eskainiko dituzte sailek lehendabizi, eta zehaztuko dute zenbat plaza eskaintzen dituzten horretarako eta zein titulaziotako ikasleentzat.

Bigarren ziklo bateko aukera askeko kredituak ezin izango dira amortizatu ikasleari bigarren ziklo horretara sartzeko bidea eman dion lehenengo zikloan egindako kredituekin.

Edozein titulaziotako lehenengo ikastaroan sartuko diren ikasleek, aldez aurretik unibertsitate honetako edo beste bateko titulazio batean matrikulaturik, 2. zikloa besterik ez duten titulazioen kasuan izan ezik, aukera askeko kredituak amortizatu ahal izango dituzte gainditutako irakasgaiengatik, baldin eta beste irakasgai batzuk baliozkotzeko erabili ez badira, betiere ondoko muga hauek gainditu barik: 18 kreditu, ziklo bakarreko titulaziora sartzen diren ikasleentzat eta 24 kreditu bi ziklotako titulaziora sartutako ikasleentzat.

3.- Aukera askeko irakasgai «bereziak»

Aukera askeko irakasgai «bereziak» deritze inongo ikasketa-plani atxikita ez dauden gaiei eta sailek eskaintzen dituzte aukera askeko kredituak amortizatzeko ondoko prozedura honen bidez:

a) Sailek aukera askeko irakasgai «bereziak» ikastegien bidez eskainiko dituzte. Ikastegiek kontuan hartu beharko dute horretarako leku egokiak (ikasgelak, mintegiak edo laborategiak) eduki beharko dituztela, ezer berriren beharrik gabe. Irakasgai horiek ikasturte bakoitzerako onartuko dira, irakats eskaintza onartzeko prozedura orokorraren arabera.

b) Eskaintza horiek honako datuak jaso beharko dituzte: irakasgaiaren izena, irakaskuntzaren irakasle arduraduna, saila, irakasgaiaren justifikazioa eta edukien laburpena, kreditu kopurua, ikasleen gehieneko kopurua, zer nolako jakintza eskatzen zaizkien ikasleei aldez aurretik eta, hala dagokionean, zein titulaziori zuzenduta dagoen.

c) Irakasle arduradunaren erantzukizuna izango da gaia bere osoan irakastea eta ikasleen ebaluazioa egitea. Horretarako, gaian interesa daukaten irakasleen laguntza izango du.

d) Irakasle guztiek hartu ahal izango dituzte bere gain horrelako irakaskizunak, baldin eta horrek irakasle gehiago kontratatu beharra ez badakar.

4.- Matrikula.

a) Aukera askekotzat egingo diren irakasgaien matrikula gainerako irakasgaien matrikularekin batera egingo da. Aukera askeko irakasgaietan matrikulatzeak ez dakar berez irakasgai horien ordutegia bateragarria izatea ikaslea matrikulatu den gainerako irakasgaien ordutegiekin.

b) Prezio publikoen aginduan ezarriko da aukera askeko irakasgaien kredituen prezioa.

5.- Ebaluazio-probaren datak.

Aukera askeko irakasgaien ebaluazio-probak ikaslea egiten dagoen titulazioko hautazko edo nahitaezko irakasgaien azterketekin batera suertatzen badira, ikasleak eskubidea izango du aukera askeko irakasgaiaren proba beste egun batean izateko, aukera askeko irakasgaiaren ardura daraman irakasleak proposatuta.

6.- Aktak.

Aukera askeko irakasgaietan matrikulatzen diren ikasleak eskolak hartu dituzten taldearen kalifikazio-orrietan azalduko dira. Titulazio horretako gainerako ikasleei legez kalifikatuko zaie irakasgaia. Talde horretako ikasle guztiekin akta bat egingo da, eta gero beste akta bat erantsiko da beste titulazio bateko ikasle-multzo bakoitzerako. Azken horiek behin sinatuz gero, dagozkien ikastegietako idazkaritzetara bidaliko dira.

Aukera askeko irakasgai berezien kasuan prozedura bera jarraituko da. Izan ere, nahiz eta irakasgai horiek inongo ikasketa-planetan ez egon, ikastegi jakin bati atxikita azalduko dira.

Kredituak prestakuntza osagarriaren bidez amortizatzea.

62. artikulua.- 1.- Sail eta ikastegiekiko lankidetza.

Ikasleak aukera askeko kredituen amortizazioa eska lezake bibliografi berrikusketak egitera bideraturiko lanengatik; laboratorio, biblioteka edo bestelako tokiren bateko ikerkuntza-tekniken oinarrizko ikaskuntza prozesuei buruzko lanengatik edo/eta gure unibertsitateko irakasle baten gidaritzapean, betiere ikasleak egiten diharduen titulazioan irakaskuntzarik atxikita duen jakintza-arlo batekoa bada, burututako oinarrizko lanak egiteagatik.

Hala eta guztiz ere, titulazioko irakasgaiak gainditzeko ikasleak egin beharreko lanetik apartekoak izango dira goian aipaturiko lanak. Lan horiek egiteagatik ikasleak ez du dirurik jasoko eta aukera askeko kredituak amortizatzeko baino ez dute balioko, 30 orduri kreditu 1 emanez.

Ziklo bateko titulazioetan ezingo dira 20 kreditu baino gehiago amortizatu eta bi ziklotako titulazioetan 30 kreditu amortizatuko dira gehienez.

Jarduera horien arduradunek ziurtagiri bat emango diote ikasleari. Ziurtagiria ikastegiko dekano edo zuzendariak edo saileko zuzendariak bermatuko du, eta bertan jasoko dira ikaslearen lanari buruzko memoria eta horregatik aitortuko zaizkion kredituen kopurua.

Ikasleak, 63. artikuluan aipaturiko epeetan, ziurtagiri hori aurkeztuko du matrikulatuta dagoen ikastegiko idazkaritzan, kreditu horiek espedientean sar diezazkioten, prezio publikoak (tasak) ordaindu ondoren.

2.- Praktikak enpresa, entitate eta erakundeetan

Aukera askeko kredituak enpresa, entitate eta erakundeetan egindako praktiken bidez amortizatu nahi direnean, praktika horiek ez badira nahitaezkoak ikaslea egiten ari den ikasketa-planean, ondoko era honetara jokatuko da:

a) Praktikak komenio baten babesean egiten badira, praktiken arduraduna gure unibertsitateko irakasle bat izango da eta berak erabakiko du zenbat kreditu aitortuko zaizkion ikasleari praktika horiengatik. Irakasle horrek egingo die jarraipena ikasleei eta ziurtagiri bat emango die, non azalduko duen ikasleak praktiketan zer egin duen eta horren truke zenbat kreditu aitortzen zaizkion.

Ikaslea, ziurtagiri hori hartuta, bere ikastegiko idazkaritzara joango da 63. artikuluan aipaturiko epeen barruan, kreditu horiek espedientean sar diezazkioten. Horretarako, prezio publikoak (tasak) ordaindu beharko ditu.

b) Praktikak ez badira komenio baten babesean egiten, ikastegietako baliozkotze-batzordeek onartu beharko dituzte kredituak amortizatzeko eskariak. Batzorde horiek erabaki beharko dute ikasleari amortizatuko zaion kreditu-kopurua; gero, ikastegiko idazkari akademikoaren erabakiaren bidez ikaslearen espedientean sartuko dira kreditu horiek, ikasleak prezio publikoak ordaindu ondoren.

Kasu bietan, kreditu bat emango da 30 ordurengatik, baldin eta ikasketa-planean bestelakorik adierazten ez bada; gehien dela, ziklo bakarreko titulazioetan 20 kreditu, eta ziklo bitako titulazioetan 30 kreditu.

3.- Nazioarteko komenioen babesean egindako ikasketak.

Aukera askeko kredituak nazioarteko komenioen babesean egindako ekintzen bidez amortizatzeko, jarraitu egin beharko zaie Nazioarteko Hedakuntzarako Errektoreordetzak ikasturte bakoitzerako markatuko dituen irizpideei. Errektoreordetza horrek eskaini eta plazaratuko ditu aukera askeko kredituak amortizatzeko baliagarri izango diren ekintzak eta jarduerak, berorietan parte hartzen duten ikasleen jarraipena egingo du eta ziurtagiria emango die ikasleei, burutu den ekintza zein izan den adieraziz, bai eta zenbat kreditu amortizatzeko balio duen ere.

Era berean, ikastegi bakoitzeko Erasmus koordinatzaileak aukera askeko kreditu moduan onartu ahal izango ditu Sokrates-Erasmus ikasleen mugikortasunerako Europako Programaren barruan egindako jarduerak, aurretiko konpromisoan agertzen ez direnak, baldin eta hizkuntza-ikastaroak ez badira.

Ikaslea, ziurtagiri hori hartuta, bere ikastegiko idazkaritzara joango da 63. artikuluan aipaturiko epeen barruan, kreditu horiek espedientean sar diezazkioten. Horretarako, prezio publikoak (tasak) ordaindu beharko ditu.

Jarduera horiengatik gehienez ere 20 kreditu onartuko dira ziklo bakarreko titulazioetan eta 30 kreditu bi ziklotako titulazioetan.

4.- Ikasleen ordezkaritzarako organoak eta ikasleen elkarteak.

Ordezkatze-organo batean edo batean baino gehiagotan egoteagatik ikasleen ordezkariek ezingo dituzte aukera askeko 20 kreditu baino gehiago amortizatu ziklo bakarreko titulazioetan eta 30 kreditu baino gehiago bo ziklotako titulazioetan. Hauexek dira aplikatu beharreko irizpideak:

a) Unibertsitateko Ikasleen Kontseiluko buruak 20 kreditu jasoko ditu urteko.

b) Ikasleen Kontseiluko beste kideek 15 kreditu urteko.

c) Ordezkarien Batzarreko kideek 3 kreditu urteko.

d) Ikastegiko Ikasleen Kontseiluko buruak 10 kreditu urteko.

e) Ikastegiko Ikasleen Kontseiluko gainerako kideek 6 kreditu urteko.

f) Ikastegiko Ordezkarien Batzarreko kide ere diren ikastaldeetako ordezkariek 3 kreditu urteko.

g) Saileko kontseilu bateko kide diren ikasleek 2 kreditu jasoko dituzte urteko.

h) Ikastegiko batzarrean dauden ikasleek 4 kreditu jasoko dituzte urteko.

i) Campuseko batzarreko ikasleei 2 kreditu emango zaizkie urteko.

j) Klaustrokideak diren ikasleek 2 kreditu jasoko dituzte urteko.

k) Gobernu-Kontseiluko ikasleei 6 kreditu aitortuko zaizkie urteko.

l) Ikasleen elkarteetako buruek kreditu 2 jasoko dituzte gehienez ere, baldin eta gutxienez urte batean izan badira elkarteko kide eta kargua beste urte batean bete badute.

m) UPV/EHUren jarduera instituzionaletan parte hartzeagatik, errektoreak horretarako izendatuak izan badira.

Ikastegiko dekano edo zuzendariak ziurtagiri bana egingo die aurreko pasarteko d), e), f) eta h) ataletan aipaturiko ikastegiko ordezkaritza-organoetan parte hartu duten ikasleei, hala eskatzen badute. Ziurtagirian adieraziko da zenbat kreditu amortizatu behar zaizkion.

Ikasleen errektoreordeak, Ikasleen Kontseilu Nagusiaren bitartez, ziurtagiri bana egingo die lehenengo pasarteko a), b), c), i), j), k), l) eta m) ataletan aipaturiko ordezkaritza-organo orokorretan parte hartu duten ikasleei, hala eskatzen badute. Ziurtagirian adieraziko da zenbat kreditu amortizatu behar zaizkien.

Saileko zuzendariak ziurtagiri bana egingo die saileko kontseiluan parte hartu duten ikasleei, hala eskatzen badute. Ziurtagirian adieraziko da zenbat kreditu amortizatu behar zaizkien.

Ikaslea, ziurtagiri hori hartuta, bere ikastegiko idazkaritzara joango da 63. artikuluan aipaturiko epeen barruan, kreditu horiek espedientean sar diezazkioten. Horretarako, prezio publikoak (tasak) ordaindu beharko ditu.

5.- Kultur ekintzak.

Aukera askeko kredituak amortizatzeko bidea ematen duten kultur ekintzak gure unibertsitateko kultur gestiorako bulegoek eta ikastegiek antolatutakoak izango dira. Azken kasuan beharrezkoa izango da kasuan kasuko Ikastegiko Batzarraren edo horren ordezko izango den batzordearen onespena, eta eskaintzak UPV/EHUko ikasle guztientzat balioko du.

Ekintza horietan kreditu bat emango da 15 ordurengatik, oro har; edozelan ere, gehienez 8 kreditu emango dira ekintza eta ikasturteko. Ekintzaren arduradunak bermatuko du onartzen diren aukera askeko kredituen kopurua. Arduradun hori UPV/EHUko irakaslea izan beharko da. Irakasle horrek egingo die jarraipena ikasleei eta berak emango dio dagokionari ziurtagiri bat, non azalduko duen ikasleak zer egin duen eta horren truke zenbat kreditu aitortzen zaizkion.

Ziurtagiri horrekin, ikaslea, 63. artikuluan aipaturiko epeetan, matrikulatuta dagoen ikastegiko idazkaritzan aurkeztuko da, kreditu horiek espedientean sar diezazkioten. Horretarako, prezio publikoak (tasak) ordaindu beharko ditu.

Jarduera horiengatik gehienez 20 kreditu onartuko dira ziklo bakarreko titulazioetan, eta 30 kreditu, gehienez, bi ziklotako titulazioetan.

6.- Kirol ekintzak.

Kirol ekintzen bidez aukera askeko kredituak amortiza daitezke, Kirol Zerbitzuaren eskaintzan hala zehaztuta ageri den kasuetan. Eskaintza hori 2011.eko urriaren batean emango da argitara, eta 2012.eko otsailean argitaratuko denarekin osatuko.

Kirol praktikari buruzkoikastaroak.

a) Kirol Zerbitzuak antolatutako edo zerbitzu honen aldeko txostena jaso duten ikastaroetan parte hartzen duten ikasleek lau kreditu amortizatu ahal izango dituzte, gehienez, ikasturtean. Kreditu 1 emango zaie 15 orduko praktikagatik.

Kirol ikastarotzat hartuko dira kirol bateko teknikei buruzko jakintza teoriko eta praktikoak irakasteko programatzen direnak.

Gutxienez astean bi egunetan egin beharko da jarduera, eta egunean ordubete iraun; edozelan ere, astean bi ordu hartuko dira kontuan gehienez.

Eskaerak. Kredituak eskuratu ahal izateko, ezinbestekoa da izena ematerakoan kredituak eskatzeko orria betetzea, bestela ikasleak ezin izango baitu bukaeran jaso 1) atalean aipatutako ziurtagiria. Inprimakiok UPV/EHUko Kirol Zerbitzuan jaso eta aurkeztu beharko dira.

Jarduerak naturan.

b) Ingurugiroa zaindu eta bere jakintzarekin zerikusia duten jardueretan eta hari lotutako kiroletan parte hartzeagatik ikasleak lau kreditu lortu ahal izango ditu, gehienera, ikasturte bakoitzean. Kreditu bat lortu ahal izateko gutxienez hiru saio oso egin beharko dira eta bi kirol modalitatetan, gutxienez. Saio osoak dira goizez eta arratsaldez egiten direnak. Goizez soilik edo arratsaldez soilik egiten direnak, ordea, saio-erdiak izango dira. Saio-erdiak pilatu ahal izango dira eta, beraz, bi saio-erdik saio oso bat egingo dute.

Eskaerak. Kredituak eskuratu ahal izateko, ezinbestekoa da izena ematerakoan kredituak eskatzeko orria betetzea, bestela ikasleak ezin izango baitu bukaeran jaso 1) atalean aipatutako ziurtagiria. Inprimakiok UPV/EHUko Kirol Zerbitzuan jaso eta aurkeztu beharko dira.

Lehiaketak.

c) Campusetako txapelketetan parte hartzen duten ikasleek kreditu bat lortuko dute lau egun edo gehiagotako txapelketetan parte hartzen badute. Kirol modalitate bakoitzeko talde txapelduneko kidea izateagatik edo banakako txapelketetan txapelduna izateagatik, ikasleak kreditu bat gehiago lortuko du, txapelketan gutxienez lau taldek edo lau lehiakidek hartu badute parte. Izena emandakoak hogei baino gehiago badira, txapeldunak bi kreditu gehiago lortuko ditu, eta bigarrenak bat gehiago. Izena emandakoak hogeita hamar baino gehiago izanez gero, txapeldunak hiru kreditu gehiago lortuko ditu, bigarrenak bi gehiago eta hirugarrenak bat gehiago.

d) Kirol modalitate bateko talde txapeldunekoa izateagatik, edo banakako lehiaketetan txapelduna izateagatik UPV/EHUko txapelketetan kreditu bat eskuratuko da. Kreditu hori campusetako txapelketetan lorturikoei gehitu ahal izango zaie.

e) Unibertsitate arteko estatuko txapelketetako finaletan parte hartzeagatik hiru kreditu lortuko dira. Gainera, urrezko domina lortuz gero, ikasleak bost kreditu eskuratuko ditu, zilarrezko dominagatik lau kreditu, eta brontzezko dominagatik, berriz, hiru. Kreditu horiek ezin zaizkie gaineratu UPV/EHUko barne-txapelketetan lorturikoei.

f) Nazioarteko unibertsitate-txapelketetan parte hartzeko Kirol Kontseilu Gorenak aukeratzen dituen ikasleek zortzi kreditu eskuratuko dituzte.

g) UPV/EHUk antolatu edo gestionatutako taldeetako ikasleek eta unibertsitatearekin lankidetza-komeniorik izenpetuta duten klubetakoek hurren aipatzen diren kredituak lortu ahal izango dituzte ikasturte bakoitzean liga federatuetan parte hartzeagatik:

Kategoria Kredituak

Probintziakoa 2

Euskal liga / estatuko 2. maila 4

Estatuko ligak (tarteko kategoriak) 6

Estatuko 1. eta 2. kategoria gorenak (ez profesionalak) 8

h) UPV/EHUk antolatu eta gestionatzen ez dituen taldeak badira, ikasleak behartuta egongo dira UPV/EHUrekin parte hartzera campuseko edota UPV/EHUko txapelketetan, bai eta estatuko edo nazioarteko txapelketetan ere.

i) Kirol Kontseilu Gorenak, Eusko Jaurlaritzak edo autonomietako gobernuek goi-mailako kirolaritzat hartzen dituzten ikasleek zortzi kreditu amortizatu ahal izango dituzte, gehienera, ikasturte bakoitzean, bildutako merezimenduen arabera. Federazio ofizialek egiaztatutako kirol merezimenduak aurkezten dituzten ikasleek ere kreditu-kopuru bera lortu ahal izango dute, bai eta eliteko kirola bultzatzen duten Bizkai, Araba eta Gipuzkoako Fundazioek proposatutakoek ere. Atal honetan sartuko dira Kirol Kontseilu Gorenak unibertsitate kirolerako urtero argitaratzen duen deialdian agertzen ez diren kirol modalitateak egiten dituzten kirolariak, ez beste inor.

Prestakuntza-ikastaroak.

j) Kirol bateko teknika ezberdinekin erlazionaturiko ikastaroetan, kirol zerbitzuak antolatu edo Euskal Gobernuak eta/edo Kirol Kontseilu Gorenak erregistratutako kirol federazioekin komeniatutako, abalatutako edo informatutako ikastaro, mintegi edo hitzaldietan parte hartutako ikasleek, gehien dela, 4 kreditu lortu ahal izango dituzte urteko, prestakuntzako 15 orduko kreditu bateko baliokidetza baliatuta.

Laguntzaileak.

k) Kirol Zerbitzuaren jardueretan laguntzen duten ikasleek zortzi kreditu amortizatu ahal izango dituzte, gehienera. Kreditu bat amortizatuko zaie hogeita hamar orduko lankidetzagatik.

Ziurtagiriak.

l) 6. puntu honen arabera 2011-2012 ikasturtean egiten diren kirol ekintzen ziurtagiriak 2012.eko irailaren 30a baino lehenago eskatu beharko dira Kirol Zerbitzuan. Aipaturiko jardueretan parte hartzen duten ikasleen jarraipena egingo du Kirol Zerbitzuak, eta ziurtagiria emango die, burututako jarduera eta horregatik lortutako kredituak adierazita. Ikaslea, ziurtagiri hori hartuta, bere ikastegiko idazkaritzara joango da 63. artikuluan aipaturiko epeen barruan, kreditu horiek espedientean sar diezazkioten. Horretarako, prezio publikoak (tasak) ordaindu beharko ditu.

m) Jarduera hauen bidez 8 kreditu amortizatuko dira gehienera ikasturte bakoitzean; ziklo bakarreko ikasketetan, guztira, hogei kreditu amortizatuko dira gehienez ere, eta bi ziklokoetan, berriz, hogeita hamar.

7.- Komenioaren barruko unibertsitateek eskaintzen dituzten aukera askeko ekintzak.

9U komenioko unibertsitateetan egindako aukera askeko ekintza guztiak baliodunak izango dira UPV/EHUn, eta kreditu-kopuru bera amortizatuko dute.

Hauek dira komenioko unibertsitateak:

- Kantabriako Unibertsitatea.

- Gaztela-Mantxako Unibertsitatea.

- Extremadurako Unibertsitatea.

- Errioxako Unibertsitatea.

- Illes Balearsko Unibertsitatea.

- Oviedoko Unibertsitatea.

- Universidad del País Vasco / Euskal Herriko Unibertsitatea.

- Nafarroako Unibertsitate Publikoa.

- Zaragozako Unibertsitatea.

8.- Hizkuntzak.

8.1.- Ikasleek aukera askeko kredituak amortizatu ahal izango dituzte euskara eta atzerriko hizkuntzak jakiteagatik. Hizkuntza bereko ziurtagiri bat baino gehiago izateagatik ezin izango dira kredituak pilatu.

8.2.- Hizkuntzen Balioespenerako Europar Erreferentziazko Eremu Bateratuaren arabera sailkatutako ziurtagirietarako, kredituak honela baliokidetuko dira:

A1 oinarrizko mailaren ziurtagiria 2 kreditu

A2 oinarrizko mailaren ziurtagiria 4 kreditu

B1 tarteko mailaren ziurtagiria 10 kreditu

B2 tarteko mailaren ziurtagiria 14 kreditu

C1 maila aurreratuaren ziurtagiria 18 kreditu

8.3.- Hizkuntzen Balioespenerako Europar Erreferentziazko Eremu Bateratuaren sailkapena baino lehenago lortutako hizkuntza-eskola ofizialetako tituluak honela baliokidetuko dira:

Lehenengo ikastaroa: 2 kreditu

Bigarren ikastaroa: 4 kreditu

Hirugarren ikastaroa: 10 kreditu

Laugarren ikastaroa: 14 kreditu

Bosgarren ikastaroa: 18 kreditu

8.4.- Era berean, hurren aipatzen diren ziurtagiriekin aukera askeko kredituak amortizatu ahal izango dira, honako baliokidetza honen arabera:

8.4.1.- Ingeles hizkuntza.

a) University of Cambridge:

Key English Test (KET): 4 kreditu

Preliminary English Test (PET): 10 kreditu

First Certificate in English (FCE): 14 kreditu

Certificate in Advanced English (CAE): 18 kreditu

b) Trinity College:

2. gradua: 2 kreditu

4. gradua: 4 kreditu

6. gradua: 10 kreditu

9. gradua: 14 kreditu

11. gradua: 18 kreditu

c) IELTS (International English Language Testing System):

3 puntu: 4 kreditu

3,5 - 4,5 puntu: 10 kreditu

5 - 6 puntu: 14 kreditu

6,5 - 7 puntu: 18 kreditu

d) LTE (London Tests of English)

Level A1: 2 kreditu

Level 1: 4 kreditu

Level 2: 10 kreditu

Level 3: 14 kreditu

Level 4: 18 kreditu

8.4.2.- Frantses hizkuntza.

a) Alliance Française

DELF A1: 2 kreditu

DELF A2: 4 kreditu

DELF B1: 10 kreditu

DELF B2: 14 kreditu

DALF C1: 18 kreditu

b) Alliance Française-k emandako ziurtagiriok, horiek ere Hizkuntzen Balioespenerako Europar Erreferentziazko Eremu Bateratuaren sailkapena baino lehenagokoak, onartuak izango dira aukera askeko kredituak amortizatzeko, honako baliokidetza honen arabera:

DELF. 1. Gradua: 10 kreditu

DELF. 2. Gradua: 14 kreditu

DALF: 18 kreditu

8.4.3.- Aleman hizkuntza.

a) Oinarrizkoa:

Zertifikat: 10 kreditu

b) Erdiko maila:

Zentrale Mittelstufenprüfung: 14 kreditu

Deutsches Sprachdiplom. Stufe I: 14 kreditu

c) Goi maila:

Kleines Deutsches Sprachdiplom: 18 kreditu

Zentrale Oberstufenprüfung: 18 kreditu

Grosses Deutsches Sprachdiplom: 18 kreditu

Deutsches Sprachdiplom Stufe II: 18 kreditu

Deutsche Sprachprüfung: 18 kreditu

8.4.4.- Euskara.

a) Hizkuntza-eskakizuna

Administrazio publikoetako 1. hizkuntza-eskakizuna: 10 kreditu.

Administrazio publikoetako 2. hizkuntza-eskakizuna edo irakaskuntzako 1. hizkuntza-eskakizuna: 14 kreditu

EGA, irakaskuntzako 2. hizkuntza-eskakizuna / administrazioko 3. hizkuntza-eskakizuna, baliokidea edo goragokoa: 18 kreditu

b) Alfabetatzea:

1. maila gaindituta 10 kreditu

2. maila gaindituta 16 kreditu

c) Euskalduntzea:

5. maila gaindituta 4 kreditu

9. maila gaindituta 12 kreditu

12. maila gaindituta 16 kreditu

8.5.- Hizkuntzak irakasten dituen beste edozein ikastegi ofizial, beti ere mailatan antolatuta dagoenean. Aurreko baliokidetzak aplikatuko dira zuzenean edo, bestela, ikasleak aurkeztutako dokumentazioaren arabera gehien hurbiltzen dena.

8.6.- Bestelako hizkuntzen kasuan, adibidez zeinu-hizkuntzarenean, ikastegiko baliozkotze-batzordeak egingo du balorazioa, edo, bestela Akademia-Antolakuntzarako Azpibatzordeak.

8.7.- Hala ere, hizkuntzak jakiteagatik ezin izango da aukera askeko krediturik amortizatu, ondoko kasu hauetan:

Hispaniar Filologiako ikasleek ezingo dute krediturik amortizatu hautatutako bigarren hizkuntza jakiteagatik.

Frantses Filologiako ikasleek ezingo dute krediturik amortizatu hautatutako bigarren hizkuntza jakiteagatik.

Ingeles Filologiako ikasleek ezingo dute krediturik amortizatu hautatutako bigarren hizkuntza jakiteagatik.

Euskal Filologiako ikasleek ezingo dute krediturik amortizatu hautatutako bigarren hizkuntza jakiteagatik.

Aleman Filologiako ikasleek ezingo dute krediturik amortizatu hautatutako bigarren hizkuntza jakiteagatik.

Itzulpengintza eta Interpretazioko ikasleek ezingo dute krediturik amortizatu aukeratu duten A, B edo C hizkuntza jakiteagatik.

Atzerriko hizkuntza: frantsesa espezialitateko Irakasleen titulazioko ikasleek ezingo dute krediturik amortizatu frantsesa jakiteagatik.

Atzerriko hizkuntza: ingelesa espezialitateko Irakasleen titulazioko ikasleek ezingo dute krediturik amortizatu ingelesa jakiteagatik.

Ekintza hauen bidez 20 kreditu amortizatu ahal izango dira gehienera ziklo bakarreko titulazioetan eta 30 kreditu gehienera bi ziklotako titulazioetan. Horretarako, jatorrizko dokumentuak eta kopiak aurkeztu beharko dira (erkatzeko) ikastegiko idazkaritzan, 63. artikuluan aipaturiko epearen barruan, eta kasuan kasuko prezio publikoak (tasak) ordaindu.

9.- Ikaskuntza artistikoak (musika eta dantza).

Musika eta dantza-ikasketen bidez ere amortizatu ahal izango dira aukera askeko kredituak, irizpide eta balio hauek aplikatuko direlarik:

3 kreditu ikasketa hauengatik:

- Oinarrizko graduaren ziurtagiria (1/1990 LOGSEko planaren edo 2/2006 LOEko planaren arabera).

9 kreditu ikasketa hauengatik:

- Tarteko graduaren ziurtagiria (1/1990 LOGSEko plana) edo lanbide-irakaskuntzen ziurtagiria (2/2006 LOEko plana).

15 kreditu ikasketa hauengatik:

- Goi mailaren ziurtagiria (1/1990 LOGSEko plana) edo musikaren graduko goi mailako ikasketen ziurtagiria (2/2006 LOEko plana).

Adierazitakoez gain, honako titulu ofizialen bidez ere amortizatu ahal izango dira aukera askeko kredituak, pilatu ezin izango badira ere:

6 kreditu irakasle-titulua izateagatik honako espezialitateetan: solfeoa edo musika-tresna, talde korala, harmonia, talde instrumentala, bat-bateko saio instrumentala eta transposizioa, ganbera-musika, estetika, konposizioa eta instrumentazioa, orkestra eta koro-zuzendaritza etab.

9 kreditu goi-mailako irakasle-titulua izateagatik honako espezialitateetan: solfeoa edo musika-tresna, talde korala, harmonia, talde instrumentala, bat-bateko saio instrumentala eta transposizioa, ganbera-musika, estetika, konposizioa eta instrumentazioa, orkestra eta koro-zuzendaritza etab.

Ikastetxe hauetan egindako musika-ikasketak onartuko dira: kontserbatorio ofizialetan, udal kontserbatorioetan, eta musika-ikastetxe eta eskola baimenduetan, hau da, indarrean dagoen legeriaren araberako musika-ikasketak irakasten dituztenetan.

Euskal Dantzarien Biltzarraren eta elkarte diren dantza-taldeen irakaskuntza eta ekintzei dagokienez, hiru kreditu amortizatzeko balioko dute, baina urte osoko jarduna frogatu beharko du ikasleak. Horretarako, elkarteak egindako ziurtagiria aurkeztu beharko du.

Ekintza hauen bidez 18 kreditu amortizatu ahal izango dira gehienera ziklo bakarreko titulazioetan, eta 24 kreditu gehienera bi ziklotako titulazioetan. Ikaslearen mailaren arabera emango dira kredituok, eta ezingo dira pilatu mailaka. Jatorrizko dokumentuak eta kopiak aurkeztu beharko dira ikastegiko idazkaritzan 63. artikuluan aipaturiko epeen barruan, eta kasuan kasuko prezio publikoak (tasak) ordaindu.

10.- Erakunde humanitarioak eta jarduera sozialak.

Autonomia-erkidegoetako erregistro ofizialetan izena emanda dauden gobernuz kanpoko erakundeekin (GKE), Gurutze Gorriarekin eta Errepideetako Laguntzarako Elkartearekin aritu diren ikasleek aukera askeko kredituak amortizatzea eskatu ahal izango dute.

Gizarte-zerbitzuetako erakundeetan laguntzen duten ikasleek ere aukera askeko kredituak amortizatu ahal izango dituzte, betiere erakundeok autonomia-erkidegoetako erregistro ofizialetan alta emanda badaude.

Ekintza horiek burutuz gero, gehienez 8 kreditu emango dira ikasturte bakoitzeko. Edozelan ere, ziklo bakarreko titulazioetan gehienez 20 kreditu amortizatu ahal izango dira bide honetatik, eta bi ziklotako titulazioetan, berriz, 30 kreditu gehienez. Kreditu bat aitortuko da halako zereginetan emandako 30 ordurengatik. Ikasleak kasuan kasuko erakundearen ziurtagiria aurkeztu beharko du, adieraziko duena zein motatako lana egin duen, zenbat ordu eman dituen zeregin horretan eta erakundeak zein zenbaki duen erregistro ofizialean. Ikastegiko idazkari akademikoaren erabakiaren bidez, kreditu horiek ikaslearen espedientean sartuko dira, baina aurretik ikasleak prezio publikoak ordaindu beharko ditu.

Bestalde, UPV/EHUko «Desgaitasunak dituzten Ikasleei Lagun Egiteko Programan» parte hartzen duten ikasleei ere aukera askeko kredituak emango zaizkie. Kasuak oso desberdinak izaten direnez, kreditu-kopuruak ere aldatu egingo dira ekintza batetik bestera. Edozelan ere, ikasturteko gehienez ere 8 kreditu emango dira, eta ziklo bakarreko titulazioetan gehienez 20 kreditu eta bi ziklotako titulazioetan gehienez 30 kreditu.

Ikasleen errektoreordeak, Desgaitasunak dituzten Pertsonentzako Zerbitzuaren bidez, programa horretan parte hartzen duten ikasleen jarraipena egingo du, eta ikasle bakoitzari, aurretik eskatuz gero, ziurtagiri bat egingo dio, amortizatu beharreko kreditu-kopurua jasoko duena.

11.- Udako ikastaroak.

Bai UPV/EHUko udako ikastaroengatik eta bai beste unibertsitate batzuetakoengatik ere, aukera askeko kredituak aitortuko dira. Kreditu bat emango da 15 ordurengatik, 7. Atalean aipatutako jardueretako bat denean izan ezik.

Ikastaroak ematen dituzten erakundeek jarraipena egingo diete ikasleei, eta irakasle arduradunak ziurtagiri bat emango dio dagokionari, non adieraziko duen zein jarduera burutu duen ikasleak eta zenbat ordu egin dituen. Ziurtagiri horrekin, ikaslea, 63. artikuluan aipaturiko epeetan, matrikulatuta dagoen ikastegiko idazkaritzan aurkeztuko da, prezio publikoak (tasak) ordaindu ondoren aipaturiko kredituak bere espedientean sar ditzaten.

12.- Ikastaroak, mintegiak, hitzaldiak, jardunaldiak eta biltzarrak.

Ikastaroak, mintegiak, hitzaldiak, jardunaldiak eta biltzarrak egiteagatik aukera askeko kredituak amortizatzeko, honako irizpide hauek erabiliko dira:

a) Ikastaro, mintegi, hitzaldi, jardunaldi eta biltzarrak ekintza osagarritzat joko dira eta aukera askeko kredituak lortzeko bide, baldin eta erakunde hauetakoren batek edo gehiagok antolatuak badira:

- Errektoreordetzak.

- Unibertsitateko ikastegiak.

- Unibertsitateko sailak.

- Unibertsitateko institutuak.

- Ikastetxe nagusiak.

b) Era berean, ikastaro, mintegi, hitzaldi, jardunaldi eta biltzarrak ekintza osagarritzat joko dira, eta aukera askeko kredituak lortzeko bide, baldin eta erakunde hauetakoren baten edo gehiagoren bermea badute:

- Unibertsitateko ikastegiak.

- Errektoreordeak.

- Sailak.

c) Berez emango dira aukera askeko kredituak, baldin eta jardueren antolatzaileak hurrengo zerrendakoak badira. Dena dela, kredituak aitortu ahal izateko, lehenago eskaria aurkeztu beharko zaio Akademia-Antolakuntzarako errektoreordeari:

- Eusko Ikaskuntza.

- Udako Euskal Unibertsitatea.

- Euskal Herriko Adiskideen Elkartea.

- Euskaltzaindia.

Gorago aipatutako jarduerengatik unibertsitateko edozein ikasleri aitortuko zaizkio aukera askeko kredituak, alde batera utzita zein titulaziotakoa den.

Erakunde antolatzaileek ikasleen jarraipena egingo dute eta irakasle arduradunak ziurtagiri bat emango die ikasleei, ikasleak zein jarduera egin duen, zenbat ordu iraun duen jarduerak, nork baimendu duen eta noiz egin den argiro zehaztuta.

Ziurtagiri horrekin, ikaslea, 63. artikuluan aipaturiko epeetan, matrikulatuta dagoen ikastegiko idazkaritzara joango da, prezio publikoak (tasak) ordaindu ondoren aipaturiko kredituak bere espedientean sar ditzaten. Kasuan kasuko saileko idazkariak sinatuko ditu ziurtagiri horiek, edo hark bere ordez izendatzen duen pertsonak.

Jarduera horiek egiten dituzten ikasleei kreditu bat emango zaie 15 ordurengatik; gehienez ere 20 kreditu emango dira ziklo bakarreko titulazioetan, eta gehienez ere 30 kreditu ziklo bitako titulazioetan.

Kredituak aintzatespena.

63. artikulua.- 1.- Prestakuntza osagarriaren bidez lortutako kredituak onartzeko, nahitaezkoa izango da ekintza horiek titulazioak dirauen eskolaldiaren barruan egin izana. 2. zikloa besterik ez daukaten titulazioetan eskolaldiaren barruan sartzen da titulazio horretara sartzeko bidea eman duen titulazioko lehenengo zikloa ere.

2.- Hizkuntza, musika eta dantzako titulazio ofizialetan ez da aplikatuko 1. atalean adierazitako baldintza.

3.- Prestakuntza osagarriaren truke aukera askeko kredituak eskatzeko epea, oro har, urriaren lehen hamabostaldian izango da. Salbuespen moduan, ziklo edo titulazio bat bukatzen duten ikasleen kasuan edo oso justifikazio handia daukaten beste kasu batzuetan, ikastegi bakoitzak zehaztuko du epea.

4.- Adierazitako epeetan eskatu beharko du ikasleak kredituak bere espedientean sartzea. Horretarako, eskaera orria eta ziurtagiria aurkeztu beharko ditu bere ikastegiko Idazkaritzan.

5.- Ikastegiko idazkari akademikoak, ikasleak aurkeztutako dokumentazioa ikusita, kredituak onartzeko erabakia emango du, kreditu horiek ikaslearen espedientean sar daitezen. Horretarako, prezio publikoak ordaindu beharko ditu aurretik ikasleak.

6.- Erabaki horiei buruzko errekurtsoak UPV/EHUko errektoreari aurkeztu zaizkio, berak ebatz ditzan.

VII. KAPITULUA

EGOKITZAPENAK ETA BALIOZKOTZEAK

Egokitzapenak (plan zaharretik plan berrira aldatzea).

64. artikulua.- 1.- Espedienteak ikasketa plan batetik bestera egokitzeko, taula batzuen bidez egingo da. Taulotan jasota egongo dira aurreko ikasketa-planean gainditutakoengatik ikasketa-plan berrian ikasleak egokiturik (gainditurik) izango dituen irakasgaiak. Taula hori automatikoki aplikatuko da ikaslea plan berrira sartzean.

2.- Egokitzapenak irakasgaika, irakasgai-multzoka edo zikloka egin behar dira. Ezin izango da inola ere irakasgaien zatirik egokitu.

3.- Desagertuko den plan batetik ezarriko den plan berrira egokitzeak ez du ikaslearentzat kosturik sortuko.

4.- Plan berrira sartzean ikaslea deialdi guztiekin hasiko da egokitu gabeko irakasgaietan, kontuan hartu barik zenbat deialdi erabili zituen aurreko planean irakasgai horien baliokideetan. Iraute-Arauei jarraiki ikasleak unibertsitatean jarraitu ezin badu, ezin izango da ikasketa-plan berrira sartu.

5.- Aurreko planetik plan berrirako egokitzapena ikasketa berberen artean egingo da beti. Hala ere, gerta liteke plan zahar batetik titulazio bat baino gehiago sortzea. Matrikula egitean ikasleak erabaki beharko du titulazio berri horietatik zeinetara nahi duen egin egokitzapena.

6.- Egokitzapenak honako jardunbide honen arabera burutuko dira:

A) Aurreko ikasturtean matrikulatutako ikasleentzat:

1) Titulazioa irakasten duen ikastegiak egutegia jarriko du.

2) Ikasle hauek 28.4 artikuluan ezarritakoaren arabera ordenatuko dira. Matrikula zein egun eta ordutan egin behar duten jakiteko, unibertsitateko web orrian begiratu beharko dute.

3) Egokitzapena prozesu lantsua denez gero, ikaslearen espediente osoa egiaztatu behar baita, egokitzapenerako eskaria atzera ezinezkoa izanen da.

4) Askotan, automatrikula egiteko egunean ikasleak kalifikatu barik izango ditu artean irakasgai batzuk. Beraz, une horretan egiten den egokitzapena behin-behinekoa izango da, eta modu automatikoan eguneratuko da ikasleak irakasgai guztiak kalifikatuta dituenean.

5) Aurreko planean kredituak baliozkotuta dauzkaten ikasleek berriro onartzea eskatu beharko dute egokitzapena egiten dutenean. Onarpen hori ikasketa-plan berrian ezartzen denaren arabera eta ikastegiko baliozkotze-batzordeak ebatzitakoaren arabera egingo da.

B) Aurreko ikasturtean matrikulatuta egon ez diren ikasleentzat:

Ikasleok matrikularako hitzordurik izango ez dutenez, ikastegiko idazkaritzara joan beharko dira 29. Artikuluan adierazitako datetan eta ikasketa-plan berrira egokitzeko eskaria egin.

Egokitzapena eska dezaketen edo eskatu behar duten ikasleak.

65. artikulua.- 2010-06-24ko gobernu kontseiluak onetsitako graduko ikasketetan kredituak transferitu eta onartzeko arautegiaren 1393/2007 EDren aurreko ikasketa-planen egokitzapena izeneko 2. Xedapen gehigarrian dioenaren arabera, graduko ikasketen aurreko planak indarrean dauden bitartean, aurretik araututako ikasketak egiten ari diren ikasleek, ikasketa horiek desagertu aurretik eta matrikula egiterakoan, ikasten ari diren titulazioa ordezkatuko duen graduko titulaziora aldatzea eska dezakete, egokitzapen automatikorako prozedurari helduz. Prozedura horretan jaso beharko dira egungo UPV/EHUko titulazioak ordezkatuko dituzten graduko ikasketa-plan berrien proposamenak, 1393/2007 EDko I. eranskineko 10. atalean ezarritakoarekin bat.

Oro har, 1393/2007 EDren aurreko ikasketa-planak ikastaroz ikastaro desagertuko dira. Behin maila guztiak desagertuta, hurrengo bi ikasturteetan ebaluazio-probarako lau deialdi egingo dira. Ikasleek goian aipatutako deialdiak ariketa gainditu gabe agortu badituzte (Iraute-Arauei jarraiki deialdirik izateko aukerarik badute), ikasketekin jarraitu nahi dutenek ikasketa-plan berrian sartu beharko dute, dagokien egokitzapenaren edo kasuan kasuko onarpenaren ondotik.

1393/2007 Errege-Dekretuaren aurreko ikasketa-planetako baliozkotzeak.

66. artikulua.- 1.- Baliozkotze-eskariak ikastegietako idazkaritzetan egingo dira, horretarako zehaztutako epeetan eta onartuko den prozedurari jarraiki. Ikastegi bakoitzeko baliozkotze-batzordeak edo haren baliokideak ebatziko ditu abenduaren 1a baino lehen, arrazoiak azalduta.

2.- Erabaki horiei buruzko errekurtsoak UPV/EHUko errektoreari aurkeztu zaizkio, berak ebatz ditzan.

3.- Titulazio bat bertan behera utzi eta gero beste bide batetik titulazio berberera sartzen diren ikasleek baliozkotuta izango dituzte lehenengo aldiz sartzean gainditu zituzten gaiak.

4.- Ikasleek beste unibertsitate batean egindako aukera askeko kredituak baliozkotu edo egokituko zaizkie, jatorrizko titulazioa desberdina edo berbera den.

1393/2007 Errege Dekretuaren aurreko ikasketa-planetako kredituak baliokidetzaz onartzea.

67. artikulua.- 1.- Ikasketa-planean zehaztuta badago, kreditutzat hartu ahal izango dira titulazioko ikasketak egin bitartean enpresetan egindako praktikak, irakasle batek zuzendutako lan profesionalak, nazioarteko komenioaren babesean egindako ikasketak, hizkuntzak eta beste jarduera batzuk. Kredituok balio akademikoa izan dezaten, ikastegi bakoitzeko baliozkotze-batzordeak baimena eman beharko du, eta irakasle arduradun bat izendatu; horrez gain, ikasleak kreditu horietarako matrikula egin beharko du, eta dagokiona ordaindu.

2.- Enpresetan egindako praktikekin kredituak amortizatu ahal izateko, baliozkotze-batzordeak ez ezik, irakasle arduradunak ere onartu beharko ditu aldez aurretik.

3.- Ikasleak ikastegiko dekano/zuzendariari zuzenduko dio kredituak onartzeko eskaria.

4.- Eskariei buruzko erabakia ikastegiko baliozkotze-batzordeak emango du, gehienez ere hilabeteko epean; erabakia eman aurretik irakasle arduradunaren iritzia entzungo du. Erabakian honakoak zehaztu beharko ditu:

a) Aitortutako kreditu-kopurua.

b) Kreditu-mota: enborrekoa, nahitaezkoa, hautazkoa edo aukera askekoa.

c) Zein ziklo eta ikasturteri esleitzen zaizkion.

d) Enborreko edo nahitaezko kredituak onartuz gero, ikasketa-planeko zein irakasgai amortizatuko diren erabaki beharko da.

5.- Kreditu hauek ez dira kreditu teoriko eta praktikoetan banatuko: denak batera emango dira.

6.- Ikasleari erabakiaren berri emango zaio, eta hark matrikula egin eta onartu zaizkion kredituak edo irakasgaiak ordaindu beharko ditu.

7.- Ikasleak aukera askeko kredituengatik ordaindu beharreko zenbateko bera ordaindu beharko du titulazioko kredituengatik, prezio publikoei buruzko aginduan bestelakorik zehaztu ezean.

8.- Aitortutako kredituek ez dute kalifikaziorik izango, ez eta izenik ere.

Graduko ikasketa-planetako kredituak transferitu eta onartzeko arautegia.

68. artikulua.- Graduko ikasketa-planetako kredituak transferitu eta onartzeko kontuan hartuko da Graduko ikasketetan kredituak transferitu eta onartzeko arautegian xedatutakoa (Gobernu Kontseiluak onartua 2010-06-24an), edo, halakorik gertatuz gero, arautegi hori ordezkatuko duenean xedatutakoa.

VIII. KAPITULUA

PRACTICUMA, PRAKTIKA GIDATUAK ETA KARRERA-AMAIERAKO PROIEKTUAK

Definizioa.

69. artikulua.- 1.- Practicuma, praktika gidatu edo integratuak, egonaldiak edo karrera-amaierako proiektuak dira ikasleek lan-mundua ezagutzeko unibertsitateko ikastegietan edo unibertsitatearekin komenioa duten guneetan egiten dituzten praktiken multzoa. Praktika horiek enborrekoak edo nahitaezkoak dira, hau da, ikasleak ezinbestez egin behar dituenak titulazioa lortzeko. Hori dela eta, unibertsitateak bermatu egin behar du ikasle guztiek horrelakoak egiteko aukera izatea.

2.- Tutorea unibertsitateko irakaslea izango da, eta honakoak izango dira haren betebeharrak: ikasleari jarraipena egin eta laguntza ematea; unibertsitateko prestakuntza eta praktiketako prestakuntza koordinatzea; ikaslearen ikasketen ardura izatea eta ikaslearen ebaluazioa egitea praktiketako lekuan horretarako zehazten diren bitartekoen bidez.

3.- Begiralea (kanpoko tutorea) ikastegiekin batera adostutako irizpideei jarraituz praktikak antolatzen dituen guneko kidea izango da.

Antolaketa.

70. artikulua.- 1.- Ikastegietako dekano eta zuzendarien zeregina da 69. artikuluan zehaztutako jarduerak antolatzea, koordinatzea eta gestionatzea, ukitutako sailekin lankidetzan eta, betiere, ukitutako sailak entzunda.

2.- Dekano eta zuzendariek proposatuta, ikastegietako batzarrek jarduera hauek erregulatzeko oinarrizko arautegia onartuko dute, bai eta tartean diren sailekin lankidetzan aritzeko modua ere.

3.- Kasuan kasuko ikastegiek 69. artikuluan zehaztuko jarduerez arduratuko den dekanorde edo zuzendariordea izango dute, eta dekano/zuzendariaren eginkizunak eskuordetuta, bera izango da jarduerok antolatzeko arduraduna. Beharrezko duenetan, pertsona horrek laguntza eskatu ahal izango dio ikastegiko praktika-batzordeari, edo, horrelakorik ez badago, baliozkotze eta akademia-antolakuntzarako batzordeari. Dekanordea edo zuzendariordea izendatzeko, arlo horretan indarrean dagoen arautegia bete beharko da, eta izendapena egin bitartean, eginkizunok dekano/zuzendariak aukeratutako beste dekanorde/zuzendariorde batek beteko ditu.

4.- Aipatutako dekanorde/zuzendariordearen ardura izango da 69. artikuluan aipatutako jarduerak koordinatzea, eta ikasleen praktikak ziurtatzeko behar diren komenio edo itunak sustatuko ditu, campuseko kanpo harremanetako zuzendariarekiko lankidetzan. Era berean, ikastegien eta lankidetzan dauden erakundeen arteko harremanak koordinatuko ditu.

Komenio edo itunak.

71. artikulua.- 1.- 69. artikuluan zehaztutako jarduerak unibertsitatetik kanpo egiten baldin badira, ikastegiek komenioa sinatu beharko dute, eta bertan jaso betebeharrak eta eskubideak, bai erakundearenak, bai ikastegiarenak berarenak. Komenio horretan, besteak beste, oinarrizko komenioan (ikus arauetgi honetako 75. artikulua) zehaztutako baldintzak jaso beharko dira.

2.- Ikastegiak, campuseko kanpo harremanetako zuzendariarekiko lankidetzan, komenioa sinatzeko tramiteak egingo ditu, eta komenioaren edukia adostuko du erakundearekin batera. Praktikak estatu espainiarretik kanpoko enpresa edo erakundeetan egingo badira, horren berri eman beharko zaio Nazioarteko Hedakuntzarako Errektoreordetzari. Komenioa sinatu ondoren, kopia bana bidaliko du Akademia-Antolakuntzarako Errektoreordetzara eta Idazkaritza Nagusira.

3.- Komenioa, unibertsitatearen aldetik, honakoek sinatuko dute: komenioan ikastegi-bakarrak hartzen badu parte, ikastegiko dekanoak/zuzendariak; campus bateko ikastegi batek baino gehiagok hartzen badu parte, berriz, ikastegi guztietako dekano/zuzendariek eta Campuseko errektoreordeak. Bestalde, komenioan campus batek baino gehiagok hartzen badu parte, Akademia-Antolakuntzarako errektoreordeari dagokio hura sinatzea, tartean diren ikastegiek hala eskatuta. Beraz, errektoreorde horrek sinatuko du -errektoreak eskumenak eskuordetuta-, bai eta ikastegietako dekano/zuzendariek ere.

4.- Praktikak egin bitartean, 28 urtetatik beherako ikasleek eskola-aseguruaren babesa izango dute. Adin horretatik aurrera istripuen poliza kolektiboa sinatu beharko dute. Egoki iritziz gero, 28 urte izan baino lehen ere sinatu ahal izango du poliza hori eskola-aseguruaren osagarri gisa.

5.- Lehenengo eta bigarren zikloko ikasleek nahitaezko praktikak unibertsitatetik kanpoko erakunde edo enpresekin egiteko sinatu beharreko oinarrizko lankidetza-hitzarmenaren eredua 75. artikuluan dago.

Irakaskuntzaren esleipena.

72. artikulua.- Dagokien sailetako zuzendariek, ikastegi bakoitzean onartutako prozedurari jarraituz, proposamena egingo diete dekanorde edo zuzendariordeei praktiketako orduak sailetako irakasleen artean banatzeko, matrikulatutako ikasleen kopurua kontuan hartuta.

Karrera-amaierako proiektuetarako eta gradu-amaierako lanetarako matrikula eta ebaluazio-probarako deialdiak.

73. artikulua.- Ikastegi bakoitzak zehaztuko du zein epetan egin beharko den karrera-amaierako proiekturako (gradu-amaierako lanerako) matrikula, bai eta proiektua aurkeztu eta defendatzeko datak ere. Era berean, ikastegi bakoitzak zehaztuko du, barneko arautegiaren bidez, nortzuk osatuko duten karrera-amaierako (gradu-amaierako) epaimahaia, Gradu-amaierako lana egin eta defendatzeko arautegian ezarritakoa ezertan ukitu barik.

Karrera-amaierako proiektua duten titulazioetako «azken» kalifikazioa.

74. artikulua.- 1.- Ikasketa-planaren arabera titulazioa lortzeko nahitaezkoa bada karrera-amaierako proiektua egitea, planean zehaztuta egon beharko dira «karrera-amaierako kalifikazioa» lortzeko irizpideak. Izan ere, titulu ofizialaren atzeko aldean nota hori jarri beharko da.

2.- Titulazio bat ikastegi batean baino gehiagotan irakasten bada, irizpide berak erabili beharko dituzte guztiek karrera-amaierako kalifikazioa kalkulatzeko.

Practicumerako komenioaren eredua.

75. artikulua.- Hona hemen ikasleek nahitaezko praktikak egiteko Universidad del País Vasco/Euskal Herriko Unibertsitateak kanpoko erakunde edo enpresekin sinatu beharreko komenioaren eredua:

UNIVERSIDAD DEL PAÍS VASCO/EUSKAL HERRIKO UNIBERTSITATEAREN ETA.................. ARTEKO KOMENIOA,...................... TITULAZIOKO IKASLEEK IRAKASKUNTZA PRAKTIKOA EGIN DEZATEN

..................(e)n, 200....eko............ aren.....a

BILDUTA

Alde batetik,..................... (errektorearen, Akademia-Antolakuntzarako errektoreordearen, Campuseko errektoreordearen edo dekanoaren izen-deiturak, praktiken arautegiko 3. paragrafoaren arabera komenioa sinatzea dagokiona, alegia),.................................. izanik.

Eta bestetik,............................................... (komenio-kidea den erakundeko ordezkariaren izen-deiturak),........................................... Erakundeko/enpresako ............................................. izanik, helbidea............................(herria);............................. ........(kalea) eta NAN/IFZ/IFK:............................. duena.

Hezkuntza-lankidetzarako komenioa sinatzeko legezko gaitasun nahikoa elkarri aitorturik,

ADIERAZTEN DUTE

Lehenengoa.- Ezen UPV/EHUko estatutuetan ezarritakoaren arabera, unibertsitateak irakats baldintza egokiak eta eskaintza osagarriak jarri eta sustatuko dituela honako hauek, betiere, ikasleen garapen pertsonala, prestakuntza osoa, ikerkuntza-eginkizunetan eta garapen-zereginetan aritzeko aukera eta, honetarako, hezkuntza-lankidetzarako eta erakunde eta enpresa publiko edo pribatuetan praktikak egiteko komenioak sinatuko dira, betiere, komenioon sinatzea eta bertan behera uztea UPV/EHUko gobernu kontseiluak onetsitako jarraibideekin bat etorrita eginez.

Bigarrena.- Ezen Universidad del País Vasco / Euskal Herriko Unibertsitatearen helburuetariko bat dela, gizartearen eskariei erantzunez, etorkizuneko profesionalak hezi eta prestatzea, eta horrek titulazio eta espezialitate desberdinetako ikasleek lan-munduko egoerarekin bat datorren prestakuntza praktikoa izatea eskatzen duela. Beraz, oso interesgarria da praktikok gizarteko erakunde eta ekoizte-sisteman bertan egitea.

Hirugarrena.- Ezen komenio honen helburua UPV/EHU eta erakundearen/enpresaren arteko lankidetzarik estuena sustatzea dela, horretarako erakunde bion giza baliabideen eta bitartekoen erabilerarik egokiena bultzatuta.

Laugarrena.- Ezen lankidetza honen bidez aipaturiko titulazioko ikasleen hezkuntza praktikoa hobetu nahi dugula, praktika horiek lantokietako benetako egoerara egokituta eta ikasleak zuzenean harremanetan jarriz laneko gorabeherekin eta gaur egungo arazoekin, horrela etorkizuneko titulatuen gaitasun profesionala hobetuko delakoan.

Adierazitako guztia aintzat hartuta, alde biek hezkuntzarako lankidetza-hitzarmen hau sinatzen dute ondoko baldintzen arabera:

KLAUSULAK

Lehenengoa.- Titulazioaren ardura daukan dekanorde edo zuzendariordeak tutore bat izendatuko dio ikasle bakoitzari, haren prestakuntzari jarraipena eta ebaluazioa egingo diona, erakunde edo enpresak izendatutako begiralearekin batera.

Bigarrena.- Universidad del País Vasco / Euskal Herriko Unibertsitateak, kasuan kasuko ikastegiaren bidez, titulaziorako praktika eta jardueren programa egingo du eta haren berri emango dio erakundeko/enpresako arduradunari ikasturtea hasi baino lehen. Programa horren barruan, gutxienez, honakoak zehaztuko ditu:

a) Praktiketara doazen ikasleen izenak eta tutorearen izena.

b) Ebaluazio eta kontrolerako sistemak.

c) Programaren helburuak eta aurreikusitako jarduerak.

d) Praktiken egutegi eta ordutegiaren proposamena.

Hirugarrena.- Titulazioaren ardura daukan ikastegiak bi ordezkari izendatuko ditu komenio honen hamahirugarren klausulan aipatutako jarraipen-batzorderako.

Laugarrena.- Universidad del País Vasco / Euskal Herriko Unibertsitateak venia docendi emango die automatikoki erakunde lankideko begiraleei, eta ordainsaririk gabeko ohorezko irakasle izaera aitortuko die, campuseko errektoreordeak horretarako egingo duen izendapenaren bidez, unibertsitateko ikastegiaren eta campuseko kanpo harremanetako arduradunaren proposamenari jarraiki. Era berean, begiraleok unibertsitateko instalazioak erabili ahal izango dituzte beren etengabeko prestakuntzarako (bibliotekak, kirol instalazioak, mintegiak&).

Bosgarrena.- 1.- Universidad del País Vasco / Euskal Herriko Unibertsitateak erantzukizun zibileko poliza dauka kontratatua ikasleek praktiketan sor litzaketen kalteetarako.

2.- Unibertsitateak ez ditu bere gain hartuko kalteak, ez eta ikasleak berak ere, baldin eta kalteok enpresako/erakundeko begiraleak praktiketako programan zehaztuta ez dagoen aginduren bat ematearen ondorio badira.

3.- Eskola-aseguruaren aseguru osagarria izan nahi duten ikasleek unibertsitateak hitzartuta duen «cum laude» istripuetarako talde-poliza sina dezakete.

Seigarrena.- Erakundeak/enpresak praktiketarako behar diren bere instalazio eta baliabideak erabiltzeko aukera bermatuko du, eta zehaztuko du zenbat ikasle har dezakeen, dauzkan baliabideak eta lortu nahi diren helburuak kontuan hartuta.

Zazpigarrena.- Erakundeak/enpresak begirale bat izendatuko du ikasle bakoitzarentzat, eta eginkizun hauek izango ditu, gutxienez:

a) Ikasleari harrera egitea.

b) Ikaslearen zereginak antolatzea, erakunde edo enpresan dagoen bitartean.

c) Erakunde edo enpresaren antolaketa eta funtzionamenduari buruzko informazioa ematea ikasleari (helburuak, funtzioak, ondorio deontologikoak eta abar).

d) Irakaskuntza praktikoa ematea.

e) Ikaslearen jarduerak gainbegiratzea.

f) Unibertsitateko irakasle tutorearekin batera programan zehaztutako jarduerak koordinatzea.

g) Jarraipen-batzordeari praktikak egin bitartean gerta litezkeen gorabeheren berri ematea.

Zortzigarrena.- Erakundeak/enpresak bi ordezkari izendatuko ditu komenio honen hamahirugarren baldintzan zehaztutako jarraipen-batzorderako.

Bederatzigarrena.- Erakundeak/enpresak ez du dirurik jasoko ikastegiaren partetik bere instalazioetan egindako praktiken truke.

Hamargarrena.- Ikasleek erakunde/enpresako begiralearen eta unibertsitateko irakasle tutorearen kontrol eta begiraletzapean egingo dituzte praktikak, eta erakunde/enpresaren funtzionamendu-arauak beteko dituzte uneoro. Horrez gainera, ikasleak isilpean gordeko du praktikaldian barrena enpresa/erakundearen jardueraz bereganatua izan lezakeen informazio guztia.

Hamaikagarrena.- Praktiken ordutegia zehaztuko da praktiken ezaugarriak eta enpresak/erakundeak daukan disponibilitatearen arabera, eta, betiere, ahalegina egingo da erakunde/enpresa lankidearen ohiko jarduerari ahalik eta traba gutxien egiteko.

Hamabigarrena.- Praktikak egiten ari diren ikasleek ez dute inolako lan-harremanik edo bestelako loturarik izango erakundearekin/enpresarekin eta ez dute ordainsaririk jasoko egindako lanaren truke.

Hamahirugarrena.- 1.- Jarraipen-batzordea eratuko da, lau kidez osatua: bi kide unibertsitateko ikastegikoak izango dira eta beste bi ................................. enpresakoak/erakundekoak eta honako eginkizun hauek izango ditu:

a) Titulazioaren ardura duen ikastegiak komenio honetako bigarren klausula jarraituz prestatutako praktika eta jarduera-programa aztertzea eta, hala dagokionean, onartzea.

b) Unibertsitateko ikastegiak proposaturiko ikasle-zerrendak onartzea.

c) Ikasle bakoitzak praktikak zein zerbitzutan egingo dituen zehaztea.

d) Praktiketan edo komenio hau betetzean sor litezkeen gorabeherak ebaztea.

2.- Jarraipen-batzordearen burutza txandaka izango dute komenioa sinatzen duten alderdiek, bakoitzak ikasturte baten. Lehenengo txanda Universidad del País Vasco / Euskal Herriko Unibertsitateak egingo du.

3.- Jarraipen-batzordeak ohiko bilera bi egingo ditu ikasturte bakoitzean; ezohikoak, berriz, presidenteak edo alderdi bietako batek eskatzen duen bakoitzean.

Hamalaugarrena.- 1.- Komenio honek mugagabeko indarraldia izango du sinatzen den unetik aurrera. Hala ere, alderdiek bertan behera utzi ahal izango dute, baina komenioak hurrengo ikasturtean ondoriorik ez izatea nahi badute, aurreko ikasturteko martxoa baino lehen adierazi beharko dute.

2.- Komenioa bertan behera uzteko nahia idatziz egin behar da eta horrek ez du eraginik izango lehenagotik egiten ari diren praktiketan.

Eta adierazitako guztiarekin ados daudela adierazteko, bi alderdiek lankidetza-komenio honen bi ale sinatu dituzte, idazpuruan aipatutako egunean eta tokian.

IX. KAPITULUA

TESINAK, GRADU-AZTERKETAK ETA LIZENTZIATURAKO SARI BEREZIAK

76. artikulua.- Lizentziatura-graduarekin lortzea unibertsitateko titulu ofizialean ageri den merezimendu akademikoa da. Gradua bi modutara eskura daiteke: edo graduko ebaluazio-ariketa eginez eta bertako ariketa idatziak, ahozkoak edo praktikoak gaindituz, edo tesina bat eginez, doktore baten zuzendaritzapean. Tesina ekitaldi publikoan defendatu behar du ikasleak, fakultateko batzarrak dekanoaren proposamenez izendatu eta hiru irakasle doktorek osatutako epaimahaiaren aurrean.

77. artikulua.- Lehenengo eta bigarren zikloko edo graduko ikasketa ofizialetako sari berezien ematea.

1. atala.- UPV/EHUko Gobernu Kontseiluak (Akademia-Antolakuntza eta Doktoregorako Batzordeak, eskuordetzaz), gehienez sari berezi bi eman ahal izango ditu ikasturte bakoitzean eta unibertsitateko ikastegietan ematen den titulazio bakoitzeko, espediente akademikorik onena daukaten ikasleentzat.

2. atala.- Karrera-amaierako sari berezia jasotzeko kandidatu izan daitezke sariak ematen diren ikasturtearen aurrekoan titulu ofizialeko ikasketak amaitu dituzten lehenengo eta bigarren zikloko edo graduko ikasleak.

3. atala.- Sari berezirako proposamena ofizioz egingo du ikastegi bakoitzeko dekanoak/zuzendariak, ikasturte bakoitzerako legez ezarritako azken deialdia amaitu eta gero.

4. atala.- Aurreko artikuluaren ondorioetarako, ikastegi bakoitzeko batzarrak zehaztuko du sari berezia proposatzeko egoki deritzon prozedura. Prozedura espezifikorik ezean, ikastegi bakoitzak batzorde bat izendatuko du. Gutxienez unibertsitateko hiru irakaslek osatuko dute, ikastegi horretan ematen diren titulazioei lotutako sailetakoak. Batzordeak espediente akademikoa egiaztatu eta baloratuko du, hurrengo artikuluan zehazten den legez.

5. atala.- Irizpide hauek erabiliko dira espediente onena zein den erabakitzeko:

1.- Titulazioko irakasgaietako kalifikazioak baino ez dira kontuan hartuko. Beraz, ez dira aintzat hartuko ikasleak egindako bestelako ikasketa edo lanak, eta bigarren zikloa besterik ez duten titulazioen kasuan, ez da hartuko kontuan jatorrizko lehenengo zikloko espediente akademikoa. Ikastegiko batzarrak egoki deritzen irizpideak ezarri ahal izango ditu puntu hau garatzeko.

2.- Ikasketa-planetan karrera-amaierako proiektua daukaten titulazioetan, ikastegiko batzarrak erabakiko du zelan baloratzen duen. Era berean, ikastegiak erabaki ahal izango du noiz jotzen duen bukatutzat aurreko ikasturtea, baina arautegi honetako 2. atalean esaten denari dagokionez, ez bestela.

3.- Espediente akademikoa baloratzeko, ekainaren 10eko 1267/1994 Errege Dekretuko (ekainaren 11ko BOE) I. eranskineko irizpide eta baliokidetzak aplikatuko dira, irailaren 5eko 1125/2003 Errege Dekretua (irailaren 18ko BOE), edo une horretan indarrean dagoen arautegia.

4.- Sari berezirako proposamena hutsik geratuko da titulazio batean baldin eta ikastegiko batzarrak ezarritako irizpideei jarraiki, horretarako merezimendurik daukan ikaslerik ez badago. Edozein kasutan, eman gabe geratzen diren sariak ezin izango dira eman ikastegiko beste titulazio batzuetan.

6. atala.- Saridun bakoitzari egiaztagiria emango zaio, eta sariaren aipamena espediente akademikoan geratuko da jasota. Era berean, titulu ofizialean ere horren aipamena jasoko da, eta ikasle sarituak ez du prezio publikorik ordaindu beharko titulua jasotzeko.

7. atala.- Interesatuak titulua baldin bazeukan eskatuta sari berezia jaso baino lehen, berak eskaria eginez gero sariaren aipua jasoko da tituluan eta titulu ofiziala eskuratzeko ordaindutako dirua itzuliko zaio.

X. KAPITULUA

SALBUESPENEZKO DEIALDIA

Salbuespenezko deialdia (graziakoa).

78. artikulua.- Salbuespenezko deialdietarako eskariak honako irizpide hauen arabera ebatziko dira:

a) Ziklo bakarreko titulazioetan gehien dela salbuespenezko deialdi bat emango da, eta bi ziklotako titulazioetan, berriz, deialdi bi, ziklo bakoitzeko bat eta inoiz ere biak ziklo berean.

b) Ikasleak gehienez hiru irakasgai izan ditzake gainditzeke salbuespenezko deialdiaz gainditu nahi duen irakasgaiaren zikloan. Kreditutan egituraturiko ikasketa-planetan, berriz, ziklo bakoitzean gehienez 36 kreditu izan ditzake gainditzeke.

c) Akademia-Antolakuntzarako errektoreordeak -UPV/EHUko errektoreak eskumenak eskuordetuta- salbuespenezko deialdi bat eman ahal izango dio ikasleari, haren espedientea eta goiko ataletan sartzen ez diren bestelako xehetasunak kontuan hartuta, betiere behar bezala justifikatuta egonez gero.

d) Ziklo bakoitzean gainditu gabeko irakasgaiak zenbatzerakoan, lau hilabeteko irakasgaiak irakasgai erditzat hartuko dira.

e) Ikasleak aukera dezake salbuespenezko deialdia zein deialditan erabiliko duen, eta ikastegiko Idazkaritzari jakinarazi beharko dio matrikula egiterakoan.

XI. KAPITULUA

EGUTEGI AKADEMIKOA

79. artikulua.- Honako hau izango da 2011-2012 ikasturterako UPV/EHUko oinarrizko eskola-egutegia:

GRADU ETA LEHENENGO ETA BIGARREN ZIKLOA.

- Ikasturtearen hasiera: 2011.eko irailaren 12an.

- Lehenengo lauhilekoa: 2011.eko irailaren 12tik 2011.eko abenduaren 23ra (biak barne).

- Neguko oporrak: 2011.eko abenduaren 24tik 2012.eko urtarrilaren 8ra (biak barne).

- Lehenengo lauhilekoko ohiko deialdia: 2012.eko urtarrilaren 11tik 27ra (biak barne).

- Bigarren lauhilekoa: 2012.eko urtarrilaren 30etik maiatzaren 18ra (biak barne).

- Udaberriko oporrak: 2012.eko apirilaren 5etik apirilaren 15era (biak barne).

- Bigarren lauhilekoko ohiko deialdia: 2012.eko maiatzaren 21etik ekainaren 7ra (biak barne).

- Ezohiko deialdia: 2012.eko ekainaren 21etik uztailaren 11ra (biak barne).

BESTELAKO JAIEGUNAK.

Horrez gain, ikastegi bakoitzeko zaindariaren eguna, udalerriko jaieguna, Eusko Jaurlaritzak Autonomia-Erkidegorako zehaztutakoak eta UPV/EHUren lan-egutegian zehaztutakoak ere jaiegun izango dira.

Ikastegiek oinarrizko egutegi honen arabera onartuko dute beren egutegi akademikoa, salbu eta ikastegiko batzarrak hortik aldentzen den zerbait onartzen duenean dekanoak/zuzendariak hala proposatuta, edo campuseko batzarrak hala onartzen duenean, errektoreordeak proposatuta. Hala ere, halako aldaketarik eginez gero, behar bezala justifikaturik, Akademia-Antolakuntzarako errektoreordetzari jakinarazi beharko zaio, ontzat eman beharko baitu Akademia-Antolakuntza eta Doktoregoko Batzordeak.

XII. KAPITULUA

INDARRALDIA ETA ESKUORDETZEA

80. artikulua.- 1.- Akademia-Antolakuntza eta Doktoregoko Batzordeari ahalmena ematen zaio arautegi hau garatzeko arau osagarriak eman ditzan eta ikasturtero datak, egutegiak eta eranskinak egunera ditzan, Akademia-Antolakuntzarako errektoreordearen proposamenaz.

2.- Arautegi hau 2011-2012 ikasturtean jarriko da indarrean, ikasturte hori barne.

3.- Arautegi hau nahitaez bete beharko dute UPV/EHUri atxikitako ikastegi guztiek.

4.- Akademia-Antolakuntzarako errektoreordearen gain uzten da arautegi hau ezartzean sor daitezkeen gorabeherak interpretatu eta ebazteko ahalmena.

XEDAPEN INDARGABETZAILEA

Indargabetuta geratzen dira arautegi honekin bat ez datozen gainerako xedapen guztiak.

Azterketa dokumentala