Euskal Herriko Agintaritzaren Aldizkaria

37. zk., 2011ko otsailaren 23a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Ingurumen, Lurralde Plangintza, Nekazaritza eta Arrantza Saila

950

19/2011 DEKRETUA, otsailaren 15ekoa, Gipuzkoako Foru Aldundiak -ondoko ondasunak eta eskubideak- nahitaez desjabetzeko lehenbailehen okupatu beharrekoak direla deklaratzeko dena: «Lasarte-Oria, Urnieta eta Andoain arteko bizikleta eta oinezkoen bide zatiaren lehen tartea (3. Ibilbidea: Donostia-San Sebastián-Beasain) egiteko proiektua»k eragiten dienak.

Gipuzkoako Foru Aldundiko Garapen Iraunkorreko diputatuak, 2009ko irailaren 22an emandako Foru-Aginduaren bidez, «Lasarte-Oria, Urnieta eta Andoain arteko bizikleta eta oinezkoen bide zatiaren lehen tartea (3. Ibilbidea: Donostia-San Sebastián-Beasain) egiteko proiektua» onartzeko legezko izapideei ekiteko erabakia hartu zen; proiektuak eragiten dien ondasun eta eskubideen zerrenda banakatua jendaurrean jartzeko erabakia ere hartu zen, nahitaez desjabetzeko. Ondoren, 2010eko azaroaren 9an egindako bilkuran, Diputatuen Kontseiluak erabaki zuen Eusko Jaurlaritzari eskatzea honakoa: nahitaezko desjabetzearen eraginpean dauden ondasun eta eskubideak lehenbailehen hartu beharrekoak direla adieraztea, Nahitaezko Desjabetzeari buruzko Legearen 52. artikuluan ezarritakoaren arabera.

Lehenbailehen hartu beharreko ondasunak eta eskubideak banakatuta eta xehatuta agertzen dira dosierrean jasotako zerrendan, zeintzuk diren jakiteko behar diren datuekin. Zerrenda hori jendaurrean jarri zen bere garaian, alegazioak aurkeztu ziren, administrazio-espedientean adierazten denez.

Zerbitzu teknikoek ikusi dutenez, ez dago espedientea izapidetzeko inolako hirigintza-oztoporik.

Ondasun eta eskubide horiek hartzea luza ezinezkotzat jotzen da honako arrazoi hauengatik:

Lehenbailehen betetzen joan daitezela, Gipuzkoako Bizikleta Bideen Sarearen Lurraldeko Alorreko Planean aurreikusitako helburuak.

Euskal Autonomia Erkidegoko Lurralde Antolamenduari buruzko maiatzaren 31ko 4/1990 Legearen 26.1.f) artikuluan xedatzen denaren arabera, Eusko Jaurlaritzari dagokio nahitaez desjabetu beharreko ondasun eta eskubideak lehenbailehen hartu beharrekoak direla adieraztea, nahitaezko desjabetzeak honako hauek hartzen dituenean: burutze-unitate osoak, lurraldearen hirigintza-antolamenduari dagozkion sistema orokorrak edo antolaketa horren elementuren bat eta hiri-lurzoruan egin beharreko banakako egintzak. Goian aipatutako lege horrek 26.2 artikuluan ezarritakoaren arabera, orduko Hirigintza, Etxebizitza eta Ingurugiro sailburuari zegokion horretarako proposamena Jaurlaritzaren Kontseiluari aurkeztea.

Hori dela bide, Ingurumen, Lurralde Plangintza, Nekazaritza eta Arrantzako sailburuak proposatuta, eta Gobernu Kontseiluak 2011ko otsailaren 15ean egindako bilkuran aztertu ondoren, hauxe

XEDATU DUT:

Artikulu bakarra.- Nahitaezko Desjabetzari buruzko Legearen 52. artikuluan eta Euskal Herriko Lurralde Antolakuntzari buruzko Legearen 26.ean xedatutakoari jarraituz, nahitaez desjabetzeko, Foru Aldundiak ondoko ondasun eta eskubideak lehenbailehen hartu beharrezkoak direla deklaratzea: «Lasarte-Oria, Urnieta eta Andoain arteko bizikleta eta oinezkoen bide zatiaren lehen tartea (3. Ibilbidea: Donostia-San Sebastián-Beasain) egiteko proiektua» burutzeko beharrezkoak diren ondasun eta eskubideak, alegia. Berariaz hasarazitako espedientean jasotako zerrendan daude zehaztu eta banakatuta ondasun eta eskubide horiek.

AZKEN XEDAPENA

Administrazio-bidea amaitzen duen dekretu honen aurka, lehenik, nahi izanez gero, berraztertzeko errekurtsoa jar dakioke Jaurlaritzaren Kontseiluari, hilabeteko epean, edo, bestela, zuzenean, administrazioarekiko auzi-errekurtsoa Euskal Autonomia Erkidegoko Auzitegi Nagusiko Administrazioarekiko Auzietarako Salari, bi hilabeteko epean. Epeak dekretu honen argitaratu eta hurrengo egunetik hara zenbatuko dira.

Vitoria-Gasteizen, 2011ko otsailaren 15ean.

Lehendakaria,

FRANCISCO JAVIER LÓPEZ ÁLVAREZ.

Ingurumen, Lurralde Plangintza, Nekazaritza

eta Arrantzako sailburua,

MARÍA DEL PILAR UNZALU PÉREZ DE EULATE.