Euskal Herriko Agintaritzaren Aldizkaria

79. zk., 2008ko apirilaren 25a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Garraio eta Herri Lan Saila

2538

EBAZPENA, 2008ko apirilaren 1ekoa, Garraio Azpiegituraren zuzendariarena, «Bilboko tranbia-sarea handitzeko trazadura-proiektua. Basurto-Errekalde tartea» behin betiko onartzeko dena.

Ikusi dut «Bilboko tranbia-sarea handitzeko trazadura-proiektua. Basurto-Errekalde tartea» onartzeko espedientea.

Euskal Autonomia Erkidegoko Trenbide Sarearen Lurraldearen Arloko Planak, otsailaren 27ko 41/2001 Dekretu bidez onartu eta otsailaren 22ko 34/2005 Dekretu bidez aldatutakoak, egungo korridorea zabaltzeko aukera aurreikusten du, Bilbao hegoaldeari zerbitzua emateko, eta zehatzago esanda, Errekalde, Irala eta San Adrian auzoei, eta garai bateko mehatzeen ingururako aurreikusitako auzo berriari.

«Bilboko tranbia-sarea handitzeko trazadura-proiektua. Basurtu-Errekalde tartea» proiektuaren helburua Basurtu eta Errekalde arteko geralekuen artean tranbiak zer bide egingo duen zehaztea da. Montevideo etorbidetik abiatuta, Autonomia kalearen azkeneko zatia igaro, eta Gordoniz eta Ciudadela kaleetan zehar egingo du aurrera tranbiak, autobusarekin batera konpartituko duen plataforma batean, eta hiru geraleku izango ditu: Autonomia kalean (autobusa gelditzen den leku berean), eta La Casillan eta Errekalden (erdiko nasarekin).

Trenbide Sektorearen legearen Erregelamenduaren 10.5 artikuluan ezarritakoari jarraituz, proiektua jendaurrera atera zen Garraio Azpiegituraren zuzendariaren 2006ko urtarrilaren 10eko Ebazpen bidez. Ebazpena 2006ko otsailaren 6ko Euskal Herriko Agintaritzaren Aldizkariaren 25. zenbakian argitaratu zen, eta hogeita hamar egun balioduneko epean Bilboko udaletxeko iragarki-oholetan izan zuten.

Jendaurrean izan den epe horretan, hainbat alegazio eta iradokizun jaso ditugu proiektuaren edukiaren inguruan, eta aztertu ondoren, horietako batzuk kontuan hartu ditugu, alegazioak aurkeztu dituztenei zuzenean bidalitako erantzunetan adierazi zaien moduan.

Proiektuek ingurumenean duten eragina ebaluatzeari buruzko urtarrilaren 11ko 1/2008 Legegintzako Errege Dekretuaren 16 eta 17. artikuluen arabera, eta proiektu hau lege horren II. eranskineko 7. taldeko f) paragrafoan sartzen denez, ez dago tarte jakin hori eraiki eta ustiatzeko ingurumenaren gaineko adierazpen bereziturik egin beharrik. Hala eta guztiz ere, eraikuntza-proiektuan jasotzen diren kontrol eta zainketa neurri guztiak aplikatuko dira.

Garraio Azpiegituraren Zuzendaritzako zerbitzu teknikoek proiektua aztertu, eta aldeko txostena eman dute, eta egiaztatu, teknikoki zuzena dela eta trenbideen alorreko legeria betetzen duela, bai eta Herri Administrazioen Kontratuei buruzko Legearen 124.1 artikuluan, abenduaren 30eko 2387/2004 Errege Dekretuaren bidez onartutako Trenbide Sektorearen Legearen Erregelamenduaren 11, 12 eta 13. artikuluetan xedatutakoa eta indarrean dauden gainontzeko legezko xedapenak ere.

Trenbide-garraioaren azpiegituretako proiektuak onartzea Garraio Azpiegituraren zuzendariaren ardura da, hala ezartzen baitute Garraio eta Herri Lan Sailaren egitura organikoa eta egitekoak finkatzen dituen urtarrilaren 15eko 20/2002 Dekretuaren 7.g) eta 10.1.e) artikuluek eta ekainaren 27ko 8/2005 Dekretuaren 16.1.a) artikuluak.

Trenbide Sektorearen Erregelamenduaren 13.1 artikuluak ezartzen duenez, trenbide-linea berriak jartzeko proiektuak onartuz gero edo lehendik dauden trenbideak handitzeko edo hobetzeko obrak egiteko lur-sail handiagoa behar izanez gero, eta juridikoki bidezkoak izanez gero, nahitaezko desjabetze kontuetarako, trenbideak zeharkatu behar duen lur-saila edo handitze-obrak hartu behar dituena herri-erabilerakotzat, interes sozialekotzat eta lehenbailehen okupatu beharrekotzat joko da, besterik gabe.

Horiek horrela, aipatutako xedapenak, horiekin bat datozenak eta aplikatu beharreko gainontzekoak ikusirik,

EBATZI DUT:

Lehenengoa.– «Bilboko tranbia-sarea handitzeko trazadura-proiektua. Basurto-Errekalde tartea» behin betiko onartzea.

Bigarrena.– Trazadura-proiektu honek berekin dakar obrak herri onurakotzat eta interes sozialekotzat jotzea, eta proiektuarekin batera doan eranskinean jasotako ondasun eta eskubideak lehenbailehen okupatu beharrekotzat aitortzea.

Ebazpen honen kontra, administrazio-bidea agortzen ez duenez, gora jotzeko errekurtsoa aurkeztu ahal izango zaio Euskal Autonomia Erkidegoko Administrazio Orokorreko Garraio eta Herri Lan sailburuordeari, ebazpena jakinarazi edo argitaratu egunaren biharamunean hasi eta hilabeteko epearen barruan; idazkia Garraio Azpiegituraren zuzendariari edo Garraio eta Herri Lan sailburuordeari bidali beharko zaio.

Vitoria-Gasteiz, 2008ko apirilaren 1a.

Garraio Azpiegituraren zuzendaria,

MIRARI ARRUABARRENA ELIZALDE.