Euskal Herriko Agintaritzaren Aldizkaria

72. zk., 2006ko apirilaren 12a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Nekazaritza, Arrantza eta Elikadura Saila

1975

EBAZPENA, 2006ko martxoaren 20koa, Nekazaritza eta Abeltzaintza zuzendariarena, "azaleraren araberako laguntzak" eta "azienda-primak" izeneko Europako laguntzak Euskal Autonomia Erkidegoan garatzeko eta ezartzeko den apirilaren 8ko 86/2003 Dekretuaren, 2004., 2005. eta 2006. urteetan Erkidegoak esnegintzara bideratuko dituen zuzeneko diru-laguntzen erregimenari dagokion martxoaren 30eko 63/2004 Dekretuaren eta Euskal Autonomia Erkidegoko mahastiak berregituratu eta birmoldatzeko planentzako laguntzei buruzko uztailaren 27ko 162/2004 Dekretuaren babesean 2005ean emandako diru-laguntzen onuradunen zerrenda jendaurrean jartzekoa.

Oso-osorik NBBEF-Bermea funtsen bidez ematen diren diru-laguntzak hiru arautan jasota daude gure erkidegoan.

Lehenik eta behin, 86/2003 Dekretua daukagu, apirilaren 8koa, "azaleraren araberako laguntzak" eta "azienda-primak" izeneko Europako laguntzak Euskal Autonomia Erkidegoan garatzeko eta ezartzeko dena. Uztailaren 20ko 157/2004 Dekretuak aldatu zuen.

Bestetik, 63/2004 Dekretua dago, martxoaren 30ekoa, 2004., 2005. eta 2006. urteetan Erkidegoak esnegintzara bideratuko dituen zuzeneko diru-laguntzen erregimenari dagokiona.

Eta, azkenik, 162/2004 Dekretua dugu, uztailaren 27koa, Euskal Autonomia Erkidegoko mahastiak berregituratu eta birmoldatzeko planentzako laguntzei buruzkoa. Otsailaren 6ko 23/2001 Dekretua ordezkatu zuen horrek.

Nekazaritza eta Abeltzaintza zuzendariak, Europako Erkidegoko nekazaritza-politikak Euskal Autonomia Erkidegoan dituen gastuak ordaintzeko erakundearen arduraduna den aldetik, aipatutako dekretuek eta gainerako arau ezargarriek eman dioten eskumenez baliaturik, aurkeztutako diru-laguntzen eskabideak ebatzi ditu eta diru-laguntzon zenbatekoa zehaztu eta eman du.

Ebazpenak eman eta esleipendunei jakinarazi ondoren, eta Euskadiko Ogasun Nagusiaren Antolarauei buruzko Legearen testu bategina onartu duen azaroaren 11ko 1/1997 Legegintza Dekretuaren 49.2. artikuluan zehaztutakoarekin bat, kontuan hartuta diru-laguntza horiek jaso dituzten onuradunak asko direla, bidezkoa da ebazpen honen bidez esleipendunen zerrenda jendaurrean ipintzea, diru-laguntza-moten arabera banatuta.

Horiek horrela, honako hau

EBATZI DUT:

Lehenengoa.– "Azaleraren araberako laguntzak" eta "azienda-primak" izeneko Europako laguntzak Euskal Autonomia Erkidegoan garatzeko eta ezartzeko den apirilaren 8ko 86/2003 Dekretuaren, 2004., 2005. eta 2006. urteetan Erkidegoak esnegintzara bideratuko dituen zuzeneko diru-laguntzen erregimenari dagokion martxoaren 30eko 63/2004 Dekretuaren eta Euskal Autonomia Erkidegoko mahastiak berregituratu eta birmoldatzeko planentzako laguntzei buruzko uztailaren 27ko 162/2004 Dekretuaren babesean 2005ean emandako diru-laguntzen onuradunen zerrenda agindu hau Euskal Herriko Agintaritzaren Aldizkarian argitaratu eta hurrengo egunetik aurrera jendaurrean jartzeko agintzea, denek zerrenda horren berri izan dezaten.

Bigarrena.– Onuradunen zerrendaren jendaurreko erakusketa honako leku hauetan egingo da:

– Eusko Jaurlaritzako Nekazaritza, Arrantza eta Elikadura Saileko Zerbitzu Orokorren Zuzendaritza (Donostia-San Sebastián kalea 1; Vitoria-Gasteiz).

– Eusko Jaurlaritzako Nekazaritza, Arrantza eta Elikadura Saileko Arrantza Egituren Zuzendaritza (Kale Nagusia 81, 6.a, 6. Dep.; Bilbao).

– Eusko Jaurlaritzako Nekazaritza, Arrantza eta Elikadura Saileko Arrantzaren Antolamendurako Zerbitzua (Easo kalea 10; Donostia-San Sebastián).

Hirugarrena.– Ebazpen honen aurka, interesdunek gorako errekurtsoa jarri ahal izango diote Nekazaritzaren eta Arrantzaren Garapeneko sailburuordeari, hilabeteko epean, Euskal Herriko Agintaritzaren Aldizkarian argitaratu eta biharamunetik aurrera.

Vitoria-Gasteiz, 2006ko martxoaren 20a.

Nekazaritza eta Abeltzaintza zuzendaria,

JOSÉ ANTONIO OCIO ORIVE.