Langabezian dauden eta/edo diru-sarrerak bermatzeko errenta jasotzen duten pertsonen kontratazioa sustatzeko ezohiko laguntzak iragartzen dituen Agindua

1.- Agindu honetan araututako laguntzak jaso nahi dituzten erakunde onuradunek eskabidea aurkeztu beharko dute, eskabidearen eranskinean bildutako eredu ofizialari jarraiki, honako web helbide hauetan eskuragarri dagoena:

• www.euskadi.net
• www.egailan.es

2.- Eskabide horrekin batera, honako agiri hauek aurkeztu beharko dira:

• Memoria, enpleguen edukia, diruz lagundu beharreko kontratu kopurua, eta kontratu bakoitzaren iraupena eta hasierako eta amaierako eguna adieraziko dituena. Aginduaren betekizunak eta laguntzak esleitzeko irizpideak betetzen direla egiaztatzeko informazio nahikoa bildu beharko da memorian, kontratatu beharrekoek diru-sarrerak bermatzeko errenta jasotzen dutela edo kontribuzio-prestaziorik jasotzen ez duten langabeak direla egiaztatzen duten agiriak bereziki, eta, hala badagokio, haien iritziz, 4. artikuluan ezarritako betekizuna bete ezin dezaketela justifikatzen duten arrazoiak.
• Erakunde eskatzaileak zinpeko aitorpen bat egin behar du Euskal Autonomia Erkidegoko Administrazio Orokorrak eta haren erakunde autonomoek emandako izaera bereko laguntza eta diru-laguntza publikoak itzultzeko prozedurei nahiz prozedura zehatzaileei buruz, prozedura horiek oraindik izapidetzealdian badaude.
• Erakunde eskatzailearen arduradunaren zinpeko aitorpena, zigor- eta administrazio-arloko diru-laguntza edo laguntza publikoak lortzeko aukera galtzearekin zigortuta ez dagoela eta horretarako ezgaitzen duen legezko debekuen eraginpean ez dagoela adierazita, emakumeen eta gizonen berdintasunerako otsailaren 18ko 4/2005 Legearen arabera sexu-diskriminazioarengatik gertatutakoak barne.
• Erakunde eskatzaileak zinpeko deklarazio bat egin behar du, administrazio honi nahiz beste administrazio publiko zein erakunde publiko edo pribatu batzuei xede eta helburu berarako eskatutako beste edozein laguntza zein egoeratan dagoen (emanda, eskatuta nahiz izapideak egiten) jakinarazteko.
• Erakunde onuradunak ziurtagiri bat aurkeztu behar du, zerga-betebeharrak eguneratuak dituela frogatzeko, prozeduraren izapideak egitean hori berriz ere egiazta daitekeela aintzat hartuta. Administrazio Publikoen kasuan ez da beharrezkoa izango ziurtagiri hori aurkeztea.
• Zinpeko aitorpena, aldez aurretik programa honen kargura diru-laguntza eskabidearen xede izan diren kontratazioei buruz.
• Gizarte Segurantzako Diruzaintza Nagusiaren edo dagokion erakundearen ziurtagiri eguneratua, erakunde edo enpresa eskatzaileak erakunde horiekiko betebeharrak eguneratuak dituela egiaztatzen duena.
• Hirugarren interesdunaren datuei alta emateko fitxa, erakundearen ordezkariak sinatua eta dagokion banku-entitateak zigilatua.
• Langile Batzordearen edo Enpresa Batzordearen txostena. Ordezkaritza-organo horien ordezkaritza-erantzunik jaso ezean, Erakunde onuradunak horri buruz emandako ziurtagiria aurkeztuko da.
• Diru-laguntzak jasotzeko eskabideak oso-osorik betetzen ez badira edo derrigor aurkeztu beharreko agiriekin, aurreko paragrafoan jaso direnak, aurkezten ez badira, erakundeari hamar eguneko epea emango zaio akatsa zuzentzeko edo falta diren agiriak aurkezteko, eta agindutako hori egiten ez badu eskabideari uko egin diola ulertuko dela adieraziko zaio. Halakorik gertatzen bada, Administrazioak eskabideari buruzko esanbidezko ebazpena eman eta ebazpen hori jakinarazi beharko du.