Herritar guztiak euskal turismo-eskaintzara iritsi ahal izatea sustatzeko laguntzak 2010

Erakunde eskatzaileak eskabidea bete beharko du, honako hauek barne: egin beharreko proiektuaren memoria deskribatzailea (gauzatze-epeak, egin beharreko ekintzak, beharrezkoak diren planoak, eta abar zehaztuta), eta zinpeko aitorpena, eskabide horretan bildu diren eta erakunde eskatzailearen izaeraren arabera aplikagarri zaizkien alderdien egiazkotasuna frogatzeko. Honako hauek dira aplikatu beharreko alderdi horiek:

a)     Eskabidearen ekitaldiaren aurreko ekitaldiko abenduaren 31n zeuden langileen kopurua, hilabete horretako TC2 inprimakiaren arabera, sexuaren arabera bereizita.
b)     Eskabidea egin aurreko ekitaldiko abenduaren 31n izandako fakturazioaren kopurua.
c)     Eskabidearen ekitaldiaren aurreko ekitaldiko abenduaren 31n egindako urteko balantze orokorraren kopurua.
d)     ETE ez den enpresa batek edo zenbait ETEk aldi berean, zuzenean edo zeharka, erakunde eskatzailearen kapitalaren % 25etik gorako partaidetza ez dutela egiaztatzen duen dokumentua.
e)     Inbertsio-proiektu berbera gauzatzeko beste erakunde publiko edo pribatuk emandako laguntzak.
f)       Azken hiru ekitaldietan enpresak jasotako laguntzak, laguntza eskatu den urtea azken urtearen erreferentziatzat hartuta.
g)     Erantzukizun-aitorpena, erakunde eskatzailea zigor- eta administrazio-arloan diru-laguntza edo laguntza publikoak lortzeko aukera galtzearekin zigortuta ez dagoela adierazten duena, ezta hartarako ezgaitzen duen legezko debekuaren eraginpean ere, sexu-diskriminazioaren ondoriozko debekuak barne, 4/2005 Legearen (otsailaren 18koa, Emakumeen eta Gizonen arteko Berdintasunerakoa) Azken Xedapenen arteko seigarrenean xedatutakoari jarraiki.
h)     Enpresa honako kalitate-ziurtagiri hauetako batzuen jabe izatea: ISO 9001:2000, Espainiako Turismo Kalitaterako Institutuaren Turismoko Kalitate Marka, eta/edo EFQM errekonozimenduak.

Eskabideak oinarrizko honako dokumentu hauekin batera aurkeztu beharko dira:
a)     Hala badagokio, eskatzailearen ordezkaritza-ahalmenaren fotokopia, salbu eta ahalmen hori Industria, Berrikuntza, Merkataritza eta Turismo Sailaren eskura badago eta ahalordedun-aldaketarik izan ez bada.
b)     Eskatzailearen NANaren fotokopia.
c)     Erakunde eskatzailearen Identifikazio Fiskaleko Txartelaren kopia.
d)     Memoria. Hobekuntza-planean adierazitako establezimenduan egin beharreko egokitze-ekintzen artean, eskatutako laguntzaren xede direnak identifikatuko dituen memoria.
e)     Aurrekontua, proformako faktura edo behin betiko faktura, edo proiektuan bildutako gastu- eta/edo inbertsio-kontzeptuei buruzko eskaera-egiaztagiriak, eskatutako laguntzaren xede diren jardunei dagokienez bakarrik.
f)       Euskadiko Autonomia Erkidegoko Aurrekontu Orokorren kargurako diru-laguntzen enpresa onuradunek zerga-betebeharrak bete dituztela egiaztatzeari buruzko Ogasun eta Finantzako sailburuaren 1991ko urriaren 7ko Aginduan edo haren ordezko araudian ezarritako kasuetan, Euskal Autonomia Erkidegoaren Administrazioak, betiere eskatzailearen esanbidezko baimena badu, laguntzak eta diru-laguntzak eskatu dituzten enpresek zerga-betebeharrak bete izanaren ziurtagiria egiteko eskatuko die zuzenean zerga-alorreko organo eskudunei. Espedientean esanbidezko baimen hori jasota ez badago, laguntzen eskatzaileak dagokion ziurtagiria aurkeztu beharko du.
g)     Gizarte Segurantzarekiko betebeharrak beteta dituela adierazten duen ziurtagiriaren kopia.
h)     Hirugarrenaren alta-dokumentua, salbu eta aldez aurretik aurkeztu bada eta datuak aldatu badira.

Oinarrizko dokumentazioa ez ezik, erakunde eskatzaileak, bere izaera juridikoaren arabera, honako hauek ere aurkeztu beharko ditu:
a)     Irabazi-asmorik gabeko elkarte edo erakundeek euren estatutuen fotokopia aurkeztu beharko dute.
b)     Erakunde publikoek eskumeneko gobernu-organoaren ziurtagiria aurkeztu beharko dute, diru-laguntzaren xede den proiektua onartzen duen erabakiaren ziurtagiria, hain zuzen ere.
c)     Enpresa txiki eta ertainek, Foru Ogasunak emandako JEZeko altak eta bajak egiaztatzen dituen ziurtagiria.

Zinpeko aitorpenean bildutako datuak egiaztatu ahal izango dira espedientea izapidetzean, edozein unetan, eta, erakunde eskatzaileak gezurra esaten badu edozein daturi dagokionez, administrazio- eta zigor-arloetan indarrean dagoen zehapen-erregimena ezarriko zaio.

Nolanahi ere, Industria, Berrikuntza, Merkataritza eta Turismo Sailak, aurkeztutako eskabideak behar bezala ulertu, ebaluatu eta izapidetzeko beharrezkotzat hartzen dituen dokumentu eta/edo argibide guztiak eskatu ahal izango dizkio erakunde eskatzaileari. Arau honetan esanbidez aurreikusita ez dagoenari dagokionez, urtarrilaren 13ko 4/1999 Legeak aldatutako Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean xedatutakoa aplikatuko da.

Jadanik Industria, Berrikuntza, Merkataritza eta Turismo Sailaren eskura dauden indarreko dokumentuak ez dira nahitaez aurkeztu beharko. Kasu horretan, eskabidean adierazi beharko da zer egunetan eta zer organo edo bulegotan aurkeztu diren aipatutako dokumentuak, azaroaren 26ko 30/1992 Legearen 35. artikuluaren f) idatz-zatian ezarritako baldintzei jarraiki.

Erakunde eskatzaileek laguntza jasotzeko eskaera aurkeztu ahal izango dute horrekin batera aurkezten den dokumentazioarekin, haiek aukeratu duten hizkuntza ofizialean. Gainera, laguntza-eskabidetik eratorritako jardueretan eta prozedura osoan, erakunde eskatzaileak aukeraturiko hizkuntza baliatuko da, Euskararen erabilera normalizatzeko azaroaren 24ko 10/1982 oinarrizko Legean ezarritakoaren arabera.